الغربة مُرة ....

الغربه مُرة يامصر ، الغربة مُرة ومرار ، شوك وصبار ، ليه بتعملي كده فينا ؟؟ ده احنا بنحبك وانت شكلك كده بطلت بتحبينا ، ليه بطلت تحبينا ، ده احنا اجمل ولادك ، صغيرين وكبار رجاله وبنات ، كان نفسنا نكتب اسامينا علي دراعك ، ونعلق صورنا يوم نصرك علي الرايات ، ونخلي بكره بتاعك اجمل الايام ونعوضك اللي فات ، ونقرب الفرحه ونقصر المسافات ، ونهديك دمنا ورده وحب ومحبه وتقبلي منا وتفرحي بينا ولما الدنيا تصعب علينا تساعدينا وتقوينا وتشد حيلنا وتساندينا .... لكن انت خلاص بطلت تحبينا ، وسبتينا نشرب المر كاسات غربه ونحلي بالسم ، جواكي براكي مكتوب علينا الهم ، ودمعنا حاضر واحلامنا مكسوره ، وجرحنا مفتوح والدم سيال ، والوجع صاحي والغلب علي كتافنا حمول تهدل جبال ... ليه بتعملي كده فينا ؟؟؟

ده احنا اللي كنا بنحلم بيك اجمل حاجه ، وكتبنا فيك الشعر والموال وغنينا ورقصنا ، وقلنا انت اجمل مهرة وكل واحد فينا عاشق وخيال ، وحلمنا ليكي ولينا ببكره جميل ، لكن طيبتك اتحولت صبار ، مر علقم والشوك بالدم ، وابتسامتك عليله تركب قلوبنا الهم ، وبقيت قاسيه ومعذبانا وشاده كرباجك علينا ومتجاهلانا ، ومكنتش اعرف قسوتك قبل مااجرب غربتك تكوينا ، جوه وبره الغربه مكتوب سوداها ومرارها علينا ، والغربه حمل وهم وغم وتعب ودموع وكرابيج بتجلد فينا ، والاهه محبوسه في صدرنا والدمع خانقنا وسابينا ، واحنا متبعترين في الارض يتامي ولابتسالي علينا ولما نترمي في حضنك نلاقي برد ومذله ، وميتك مررت في النيل وفي القلة ، وشوارعك الطيبه مشيت وسابتنا وحاراتك الدافيه قفلت بيبانها في وشنا ودبحتنا ، وناسك اللي كنا عارفينهم وبنحبهم لبسوا وشوش غريبه ولخبطونا والتوهه هيه التوهه جوه او بره ، وايه اخرت غربتنا عن حضنك الا القهر والذله ، ليه بتعملي كده فينا !!!

يامصر ياقاسيه بقيتي قاسيه ليه ، كنت الحنان كله انت حصل لك ايه ، جبتي القساوة منين ياام الحنان ، حَكْمت علي رقابنا الغبي والندل والحرامي والجبان ، واللي من غير قلب ، وسبتينا نتبعتر ونتوجع ونشكي وانت عامله مش سمعانا ، وهمومنا مش فارق معاكي ولا علينا زعلانه ، بقيت قاسيه كده امتي ياام الطيبين ، ده احنا اجمل ولادك اللي بيحبوكي وبهواكي متعذبين ، ادينا فرصه نحبك وافتحي حضنك وضمينا ، كفايه قسوه وغربه القهره كسرتنا واستوينا !!

يتمتينا ياغاليه وسط اهالينا ، يتمتينا ومن حنانك وحبك حرمتينا ، لما جرينا لومتينا ولما رجعنا و قعدنا في حجرك طفشتينا ، واجمل ولادك بهدلتيهم وسفرتيهم وبغيابهم بهدلتينا ، وبالفراق والبعد والحسره والقهره كويتي قلوبنا وكويتنا ، ولما اشتكينا همنا ليك مارضيتش تسمعينا ـ ولما ادناك ضهرنا من ورا قلوبنا ماسالتيش فينا ، ولما الغلب فاض بينا والحسرة قسيتي اكتر علينا ، بعترتينا في بلاد غريبه وفرقتينا ، وبين ناس مانعرفهاش رمتينا ، ولما بطلنا نزورك لومتينا ، ولما جينا مشتاقين قفلت بابك في وشنا ورفضت تقابلينا ، هو قدرنا نتعذب في حبك ولا قدرنا تعذبينا ؟؟؟ ليه بتعملي يامصر كده فينا ؟؟؟

الغربه مره يامصر ، ليه بتعملي كده فينا ؟؟؟ ده احنا بنحبك وانت بطلت بتحبينا !!! قلنا مش مسافرين وقاعدين معاك عملتي مش سامعنا ومش مهتمه بينا ، جينا نشكي همنا زودتي همنا وتجاهلتينا ، وقسيت علي ولادك الطيبين ووجعتينا ، وقفلت بيبان الرحمه في وشنا واستقويت علينا ، وقسيت قلبك الطيب وعملتي انك مش مهتمه بينا ، ولما عيطنا ودموعنا سالت من القهره ضهرك ادتينا ، ولما جينا نفرحك مارضتيش تفرحينا ، ولما قلنا تعبنا من قسوتك زعلتي منك وخاصمتينا ، وكأن وجع قلبنا نصيبنا منك ونصيبتنا التقيله ... ليه بتعملي يامصر كده فينا ؟؟

الغربه مرة يامصر وبقت سم ماشي في عروقنا ، متغربين براك جواك مكويين بشوقنا ، قاعدين بعيد او جنبك ومعاكي متعذبين بطوقنا ، حبك خانق في رقابينا وفي قلوبنا ، ولا بيروينا ولا بيبل ريقنا ، ولاانتي فارق معاك حبنا ولا العمر اللي ضاع ولا الاحلام ولا قهرة قلبنا ولاكسره نفسنا ولا اليوم اللي طلع ماصَبحش علينا ولا الليل اللي مسي ومشي وسابنا ونسينا ، السم ماشي في العروق هم ، وعروقنا هربت منها ومن كتر خوفنا الدم ، وريقنا نشف واحنا بنادي ، ده احنا حبايبك ومتعذبين يابلادي ، وانت بحبك علينا بخلانه وكارهنا وتقلانه ، يامصر اسمعي صوتنا وضمينا ، وطبطبي علينا واحتوينا ، ولما نزعل من قسوتك خففي ظلمك لينا وصالحينا ، ريقنا نشف ولا بترديش علينا !!! امتي حتسمعينا وتنصفينا !!!! الغربه تعبتنا يامصر وهدت حيلنا ، وطرقك مقفوله وشنا وطال ليلنا ، كتبنا كل اللي ينفع نكتبه وقلنا ، وقدمنا روحنا هديه وانت رفضتيها ، وسبتينا محبوسين في شوارعك الظالمه ، وشمسنا مابتطلعش في ليلك الضلمه ، والامل في لسه في الروح وبنحبك صحيح متعذبين في حبك لكن بنحبك ... نموت يامصر ولا لازمينك !! ان كنا لازمينك صالحينا طيب وبطلي افترا وقسوه فينا !!!!

وداع قبل الوداع .....

ليس حزنا ياسيدي ... ليس حزنا ، ليس غضبا ياسيدي ... ليس غضبا ، يعتريني شجن موجع يثير العواصف في النفس والروح ، كلما نظرت في عينيك احسست رحيلا يقترب ووجعا يطغي، وقبلما تكتبت بنصلك الكلمه الاخيرة ، لملمت مشاعري واستعديت للرحيل ، سالت دمائي فوق الاسطر ترسم قلبا ونجمة ودمعتين ، شجنا ياسيدي كل ماتبقي لي من صفحات الايام ومحطات حياتي ، شجن يوقظ الذكريات ويداعب القلب ويستجلب الدمع ، شجنه احبه ويبكيني ، فلاتشغل راسك ياسيدي بهواجسي سيقتلها الوقت ويقتلني ووقتها لن ازعجك ، وقتها عليك تتخلص انت من ذكرياته وشجنك ومني ، وقتها ياسيدي لاتبحث عني فقد كنت هنا دائما ياسيدي وانت لم تنتبه منشغلا بالبندقيه التي تشرعها تبحث عن عصفور ملون تصطاده ، كنت هنا ياسيدي ولم تفهم معني وجودي فهل ستنتبه كالعاده بعدما يفوت الاوان ، وداع ياسيدي قبل الوداع ، فلست انت من سترحل بل انا وشجني وذكرياتي ، وساتركك علي شجره العصافير تغرد كالعصافير التي لا تشبهم ، لا تشغل قلبك ياسيدي بشجوني سيقتلها الوقت ويقتلني ووقتها لن اتذكرك ، فهل للموتي ذاكرة موجعة ؟؟ ..

وبعدما تمر الايام وستمر مهما كانت صعبه او قاسيه ، وحين تصمت عصافير شجرتك وتضيع اللغه والمفردات ويشق التفاهم والوصل ، لاتبحث عني ، ابحث عن كرواني في السماء ستجده يخاطب ربه ، اشكو لك لك لك ياصاحب الملك ، ابحث عنه وحاول تبدل شكواه فرحا ، ليس من اجلي ياسيدي بل من اجلك انت ، فمااصعب ان تفقد من لاتدرك قيمته وومااصعب ان تدرك قيمته بعد رحيله ومااصعب وخز الضمير حين يعذب صاحبه لانه عذب نفسه بغباء وحرم نفسه سعادتها بسذاجه ، مااصعب ان تضيع رصيد الايام الحقيقيه في لعبه مزيفة ساذجة ، فالالعاب تنتهي سريعا وطفولتك سينفذ حمقها ، وقتها ستتذكرني ودفئي وحناني وشجني ، وقتها لن تجد الا الشجن يوخزك فتفهم معني مااحس انا به الان ، ليس حزنا ياسيدي .... ليس حزنا ، ليس غضبا ياسيدي .... ليس غضبا ، انه الشجن الموخز ياسيدي ومازلت ساذجا لتفهم معناه ، اعذرك واشفق عليك ، وداع ياسيدي وداع قبل الوداع !!!ا

ادي الربيع عاد من تاني

وادي الربيع عاد من تاني

اوعي تمشي وتسيبينا !!!!

( 1 )

اوعي.... اوعي تمشي وتسيبنا ، نصحي من النوم الطويل نلاقيكي رحلت غضبت منا ، من قلبك محيت اسامينا ودعيتي علينا ولعنتينا وخاصمتينا وانت بتحبينا ، قلت تمشي تأديبنا وعملت مش سامعه صوتنا ورحت ماشيه واحنا بنقولك بلاش اوعي تسيبنا ، انت قررت تسيبينا خدتي معاك احلي حاجه في تاريخنا وعمرنا ، خليتي بينا وسط صحرا واتخليتي عننا ، كنا اطفال محتارين لسه بنفك الحروف ونقوي القلب علي الخوف وشنا في الحيطه واحنا مخروسين متكدرين متذنبين ، وانت ماشيه بنناديكي ، نرجوكي نصرخ عليكي ، وانت ولا بتعبرينا ولا بتردي ندانا ، وترحلي غضبانه منا ، لاننا اهملنا حبك ومعرفناش فعلا نحبك ، ولاقدرنا التاريخ ولا يوم وقفنا جنبك وفرحنا قلبك ، ولا صنا معزتك و كبرنا عزك ، واتهزمنا الف مرة ، وحاربنا واتحاربنا ، وكل نكسه نقول بكره حننتصر و كل مره تصدقيناولما تيجي مره تانيه ونتهزم تعيطي جامد علينا ونعيط احنا معاكي ، اصل نفسنا مره نسعدك وننول رضاكي ، فاصبري شويه علينا و اوعي تمشي وتسيبينا ..

( 2 )

اوعي تمشي وتسيبينا ، انت زهقت من هزايمنا الكتيرة وزهقت من كتر العياط ، من ضحكنا و لعبنا ومن اللي سافر واللي هاجر ، واللي راجع واللي في الهيصه زاط ، وزهقت من كتر المحايلة ، وزهقت من كتر الكلام ، وزهقت من كتر السلام اللي يقل المعرفه ، وزهقت من كتر الزهق والانتظار ، وزهقت من كتر التمني واشتهيت الانتصار ، وحلمت ياما ببكره جاي احلي لينا ، وانتظرت وصبرت ولما فاض بيكي زهقت من الامنيات اللي فضلت امنيات ، ولاواحده فيها اتحققت وكأننا قاسين عليك ، وكأننا قاصدين نضايقك واحنا زي ماانت عارفانا حبايبك بس مش عارفين نفرحك ، ولانحافظ عليك وعمالين نجرحك ،وانت زهقت منا ، قوليها صريحه ، اذا كنا احنا زهقنا خلاص من نفسنا ، ومن حزننا ومن همنا ، ومن غُلبنا ومن صمتنا، ومن كتر كلامنا وقلة فعلنا ، ومن الهزايم اللي عماله تحرق قلبنا ، نفسنا مره واحده ننتصر ، مش كل مره نتقهر ونتكسر ، نفسنا نعلق الرايات ونفرح ، ونرقص في الشارع معاكي ، يوم سعدك وهناكي ، بس لحظه النصر ماجاتش وانت تعبتي من الهزايم ومن اعذارنا ومن عياطنا ومن رزانه عقلنا وكتر تهريجنا وعبطنا وصممت تمشي وتسيبنا ، قلت جايز يمكن يعني بهجرك عنا تعلمينا ، ان اللي يحب بلده يحطها في نني عينه و جوة قلبه ويخاف عليها ، ولما تناديه قبل ماتكمل نداها يكون خلاص رد عليها وقدم حياته فدا احلامها وفداها ، اللي يحب بلده يعرف ازاي ينتصر علشان يفرحهاويتعلم من هزايمه القاسيه عمره تاني مايجرحها ، يتعلم من هزايمه ازاي تاني مايتهزمش واحنا حبايبك لكن ليه مابنتعلمش بنتكلم كتير ، وعمرنا مانسمع ولا نفكر بجد ولانرسم احلامنا لبكرة وكيف حيكون شكل الغد ، وانتي خلاص زهقت من كلنا زهقتي من قله حيلتنا وغلبنا وقلت ماشيه ... واحنا بنقولك اوعي تمشي وتسيبينا ، اصبري شويه علينا ...

( 3 )

قلت ماشية وانت قاصده تعلمينا ازاي نحبك ، بالعطاء مش بالكلام ، ولا برسم الكدب في الاحلام ، ولا ببيع الاوهام ، تعلمينا ازاي نحبك ، لما الوجع يوجعنا اكتر ، والضلمه تبقي ليل نهار ، والقمر يخاصمنا زيك والبرد يحتل الديار ، والوجع يخرس غنانا والحلم يرحل عن خيالنا ، ويبدل الفرحه سكوت والحياه اللي كنت اجمل حاجه فيها تتبدل خوف وموت ، والموت يبقي زي العيشة مر والحياه طبعا امر ، واحنا نفضل موجعين ، من حضنك الغالي ياغالية ومن جنة ترابك مطرودين ، ونناديك نقول يارب تسمعنا وانت سمعانا وعنيدة ولابتردي علينا وكأنك ياحبيبتي بعيدة سايبنا نتعلم من وجعنا ومن هزيمتنا سايبنا نكبر وقاعده تدعي ربنا نكسب ونفلح ، ولما طال الانتظار والزمن اصبح مرار زهقت منا وقلت تمشي وتسيبينا ، اوعي .. اوعي تمشي وتسيبينا محتاسين ، مش فاهمين الدرس لسه ولا فاهمين اخر حصة ، ولا عارفين اخرتنا فين ولاعارفين جايين منين ، طولي بالك علينا واشرحلنا مره تانيه ، قولي اخر كلمتين قبل ماتمشي ياغاليه اما نعرف ننتصر ، فترجعي ياغاليه لينا واما نفضل ميتين ، فتعيطي جامد علينا ، لكن انت خلاص زهقت من الكلام وكفرت بكل امانينا والاحلام ، قلت تمشي ويأما نعرف نفرحك فنرجعك واما تمشي للابد وتسيبنا ياحبيبتي حزنانين .... طيب وحياه خالتي ام حمادة ومرات جدي جورج بسادة وابن عمة طنط بطة وحياة فاطمة ومريم وميلاد وحياه كل البنات القمرات والولاد وحياه كل من مرعلي بابك وحبك ادينا فرصه واصبري شويه علينا واوعي تمشي وتسيبنا ....

( 4)

اوعي .... اوعي تمشي وتسيبنا وتاخدي معاك احلي الذكريات ، لما تاخدي معاك كل حاجه جميله حصلت في حياتنا وتسيبنا من غير ماضي ولا حاضر جميل ، نستحمل العيشه ازاي ياغاليه ؟؟ ونعيشها ليه ؟؟ده احنا حنبقي يتامي واهالينا عايشة ، محرومين من الدفا ومن الحنان ، والابوة والامومه والامان ، مقطوعين من شجره ماتت ، نشبه فرع ميت جدره مات قصاد عينه ، ليه ياغاليه حتسيبينا وماشيه ليه واحنا بنحبك ياغاليه ومهزومين ، ماسكين ديل جلابيتك مقهورين ، ماهو لما تمشي وتسيبنا تدبحينا ، حتسيبنا ازاي وتمشي ، توجعينا ازاي وتقسي ، ده انت لسه مامشتيش وخلاص الخوف قتلنا ، لو مشيتي ورحلتي تفتكري ازاي يبقي حالنا ؟؟ اصبري شويه علينا واوعي تمشي وتسيبنا ...

( 5 )

قولي حتاخدي ايه معاكي وانت ماشيه ، حتاخدي ماضينا اللي فات ولا كتب التاريخ والذكريات والسواقي والقناطر وكل الاهرامات ، ولا النيل الفسيح جايب الخير وات ، وبرديات الفراعنه خايفه عليها منا والتماثيل العظيمه ، والمسلات حتخلعيها ياغاليه وكل حاجه ليها قيمه ، راح تخبيها منا خايفه من ايام جايه رضية ، خايفه منا علي التاريخ وعلي الحضاره ، خايفه علي اسمك وروحك من التتار ، ناوية تاخدي معاك في رحلتك كام دير وكام كنيسه تحافظي عليهم جوه قلبك من سنواتنا الكبيسة ، ناويه تاخدي معبد ابو سمبل وطريق الكباش تحكي عن كل تاريخنا لحبايبك اللي جه زرانا وقت عزك واللي ماجاش وكحل عنين الفراعنه حتشيله للعرايس لما يوم الفرح يجي ، وابو الهول حتودعيه ويفضل اسير معانا ولا حتاخديه ياغاليه وتسيبنا خايفين حزانا ، والازهر تشيله من مكانه بعواميده الاثرية ومدارس العلم والفتوي والوسطيه وطه حسين وشهاده العالميه ، دول برضه حتاخديهم ياغاليه وتسيبنا طيب ومقام الست زينب والحسين سيدنا حتسيبهم ينفعونا في ليله صعبه يدعوا لينا ولا في الغربه حتاخديهم معاكي وتستخسريهم فينا ، ونفيسه العلم حتسيبها لمين وراكي ولا هي كمان حتاخديها معاكي ؟

والفيشاوي تقفليه وانت زعلانه علينا ، زمن الغنا والقعده والصحبه الجميله راحت عليه ، والشعر والازجال والدواوين تخرسيها ، والنايات تكسريها ، والغناوي تحرميها من المعاني وتحرمينا ، والموسيقي الحلوه تاخديها معاك وتسيبنا ، ناوية تاخدي معاك دواوين جاهين وحجاب ونجم والنديم ، واغاني شاديه وعبد الحليم ، والحجار و منير ورشدي ، وعبد الوهاب وانت عمري ، وبليغ وكل الفنانين ، ناويه تحرمينا من فرقه رضا ، لارقص خلاص حنرقص وحنقضيها بكا ، والست ام كلثوم تاخديها معاكي وتسيبنا في شرق ضلمه كوكبه سافر وراكي ، والجامعه برضه تقفليها والتلاميذ تروحيهم والكتب تحرقيهم والمدرجات تقفليهم ، محفوظ وادريس العباقرة من ابداعهم تحرمينا ، ومسرحيات عبد الصبور ونجيب سرور ، وكلام الشرقاوي وحكايات القهاوي ، والمهندس وعادل امام والريحاني ضحكهم حتحرميه وترجعيلنا الغم تاني ، وتلمي الكور الشراب من العيال وتقطعيها ، والشوارع اللي كنا نحبها ونحب فيها تغييرها ، والنكت وخفه دمنا حتسكتيها ، باختصار كل ذكري في كل قلب حتمسحيها ، وتسيبنا صفحه بيضا يكتب الزمن الاسود بحروفه عليها اسمه هو ويمحي اسمك واسامينا .. طيب اصبري شويه علينا وطولي بالك معانا واوعي تمشي وتسيبينا !!!

( 6 )

حتاخدي ايه ياغاليه معاكي ، القمح الاصفر في الغيطان ، الشمس وصوت الادان ، الامومة والحنان ، صوت هديل الكروان ، الحنة من كعب الصبايا ، وحتاخدي كمان الرحاية ، والكحل من رمش البنات والضفاير الطويلة علي الضهر تضحك ، شمع زفه العروسة ولا طرحتها الحرير ولا مفرش سفرتها ولحاف السرير ، منخل السبوع والهون والمغات ، ذكرياتنا واللي جاي واللي فات ، عوايدنا وعادتنا وتقاليدنا الجميله ، ناي ومزمار وطبله وصاجات ، والاغاني والموسيقي والنايات والمواويل الجميلة والسعاده في ليالي القمر الطويلة ، حتاخدي منا فوانيسنا القزاز والشمعه وتحرمينا من ليله الخميس وبخور صلاة الجمعه ، حتسرقي منا سهرتنا في ليالي رمضان وتحرمينا من فرحه الصيام ، ولما نخرج من الكنيسه حتحرمي علينا الكلام ، حتاخدي تكعيبه العنب البناتي ، وريحه الشوي عند الحاتي ، وعودين ياسمين وفل ، وبسمه ناوية تخطفيها من فوق وشوش الكل ، وتسيبنا موجوعين ، البنات بترقص قدام المرايه وتغني ، والحمام الطاير وقت الغروب متحني ، والحواري والكباري والتكيات القديمه والمباني الاثريه في شوارعنا العظيمه ، ناويه تاخدي الترماي القديم ومقله اللب وعربيه الحرنكش ، واغاني بياعه الدرة لما تلهلب فحمها ، ناويه تاخدي معاك كورنيش النيل ، ووقت المغربيه وقمر الليل والفرحه والحلم والمواويل ، وتسيبنا مقهورين ، قولي حتاخدي تاني ياغاليه معاكي ، بيوت الفلاحين في الصعيد ولا عرق الشقيانين ، ولا قعده مصطبتنا في يوم دفا ، ولا لمه عيلتنا وضحكها وقت الصفا ، ولاريح البحر ناويه تخطفيها وتسيبينا مخنوقين ، ولا زفه العروسه لما كنا فرحانين ، ولا نخل طريق بلدنا ناويه كمان تقطعيه ، وشجر البرتقان قبل ماتمشي تقلعيه ، والارض اللي كانت سمرا طيبه تبوريها ، والترع اللي تجري الميه فيها تنشفيها ، وتسيبينا شراقي وعطشانين ، ولانصعبش عليك مااحنا ياغاليه متعاقبين اصل زمن الحب راح ، والمحبه والاماني والوجع فتح الجراح ، وفكرنا بهزيمتنا تاني وانت خلاص زهقتي منا ومن الاماني ، طيب اصبري شويه علينا واوعي تمشي وتسيبنا !!!!

( 7 )

حتاخدي معاكي ياغاليه وانت ماشيه ، حتاخد زلعة المش وتمشي وتسيبنا حياتنا ماسخة ، حتاخدي خبيز جدتي وعيشها المرحرح ، والقراقيش اللي نقشتها بايديها ، وصاجات الكعك رصتها بفرحه ، حتاخدي معاك البتاو والعيش الشمسي وبطرمانات المخلل وصينيه القلل المعطره بالمورد ، وبطرمان اللارنج اللي خالتي زرعته شجرة اصالة وماتت وسابت لنا طعم الفرح ، ومربي الورد اللي ستي عطرتها بطيبتها ، حتاخدي معاكي الوان شم النسيم وتسيبنا في عيشه سوده مخنوقين لا نسيم قادرين نشمه ومن الوان الفرحه محرومين ، حتاخدي معاكي قدره الفول المدمس وتسيبنا نعيش من غير مزاج اصل الا الفول ياغاليه ده مزاجناوحبيبنا وتفانين نفس اجمل طباخينا ، حتمنعينا من الحمام وصواني الكنافه والباميه ورز البرام ، وتسيبلنا اكل سم نموت وناكله اكل طعمه مانعرفوش !!! الفرن القديم بتاعتنا حتردميه وكل اكل كنت جايباه لينا مخصوص حتمنعينا منه وترميه ، وتسيبنا نحكي عن ايام زمان ايام جدودنا لما كنا ولما كان ، وكانت الايام جميله بس ماحافظناش عليها ، قولي بس ناويه تاخدي ايه كمان معاك وانت ماشيه ، الطعميه والعجميه وغزل البنات وصواني البسبوسه وسكر النبات ، والفول النابت والعيش والسكر السنترافيش ، والعروسه الحلاوه والحصان دول كمان حتخديهم معاكي وتسيبي مولدنا من غير حلاوه وتسيبي لينا المر وصفه للقلوب الموجوعين طيب بس طمنيني لما حتمشي هنهون عليكي وحتسيبنا لمين ؟؟

( 8 )

ناويه تاخدي ايه معاكي تاني وانت ماشيه ، القناطر والرحلات المدرسيه ، والشجر اللي شاهد علي الغرام بين شباب زينه مجدع واجمل الصبايا ، لما كانوا بيحلموا ببكرة بتاعهم فقبل مابكره يجي امبارح خدعهم وباعهم ، ناويه تاخدي كل المراكب في الغروب وتسرقي النيل والبحر وتسرقينا ، وتردمي كل السواقي وتكسري كل الصاجات وتلغي اغانيك وكل النغمات ، الجربي حتشيله كمان من راس البر ومعاه هوا البحر وقعده البلاجات وحتسيبي لينا المشانق منصوبه علي الرمله تفكرنا بكل اللي فات ، وحتمسحي اسم الاحبة من فوق صخره ميامي ولما نيجي نشتكيليك تسيبنا وتخشي تنامي ، حتي مطروح حتقفلي سكتها وتمنعينا وتقولي هناك حمام كليوباترا وشاطيء الغرام وانتم مالكوش في المشاعر والهيام ، فسيبوا التاريخ في حاله لما تبقي تخفوا من فقدان الذاكره ابقوا تعالوا ، وتقسي علينا وتحرمينا وتمشي في الاخر وتسيبينا طيب قولي اي كلمه وطمنينا .. حتسيبنا ياغاليه وتمشي وتخلي كل ايامنا حداد ، وتقسي قلبك علينا وتعيطي علينا من ورانا ، وتستقوي قدامنا ولاكأنك من جماد ، وانت اصلا مرهفه وام الحنان حتي لما بنوحشك بتطلعي من مخبأك الهرم وتوعديه ، انك لمكانه الاصلي حترجعيه ، وحترجعي تضحكي تاني في وشوشنابعد مانكون انتصرنا بعد سبعميت مليون هزيمه ، وانت صابره وعماله تقوي فينا ، واحنا لسه بنتعلم ازاي ياغاليهنعرف نحارب ولسه ماطمرش فينا العلام ، لسه بيخدعنا الكلام !!!

( 9 )

بالحق قولي لي ياغاليه حتاخدي معاكي ايه تاني في رحلتك الللي مش ناويه منها ترجعي ، تاخدي اجمل مشاعرنا وتسيبنا في البلاده غرقانين ، وتقولي ايش فهمكم انتم في المشاعر ، وكنتوا فين لما دبحوها وباعوها وسكتم ، كنتوا فين لما ضربوا الاحبه في الشوارع وطلبوا من الحب بطاقته وهو صعلوك وصايع ، كنتوا فين لما مسحوا الاغنيات من الشرايط وركبوا الهم عليكم ، كنتوا فين لما كانوا حيهدوا الهرم والكنيسه حيشيلوا منها رنين الجرس والادان سكتوه وقالوا ده زمن الخرس والحريم شالوا منها الرحم وعقموها وكل الارض بوروها والرجاله الزين المجدع خوفوها وبلقمه العيش هددوها وبرزق العيال والسجن وجهنم الحمرا وقوايم الذنوب والفضايح صغروها ، كنتوا فين لما كل ده حصل واكتر ، كنتوا ساكتين وشاربين الهزيمه نقطه نقطه ومتخلين عن شرفكم والعزيمه ، ومستنين لما السفاحين يقتلوني الف مره ومجهزين هدومكم السودا ودموع الحزاني المكلومين خلاص بقي ارحموني ، ده اللي قلتيه لينا وانت خلاص مسافره قلت ماشيه قلت راحله قلت ياتفوقوا وتصحوا ياتروحوا في الف داهيه ، قلت ياتتعلموا الدرس الاخير ياتتهزموا تاني ، وساعتها امسحوا اسمي من علي كل اوراقكم وغيروا البطاقات ، وشوفوا خريطه تقبل بالهزيمه وتوأد البنات ، وانسوني وسيبوني ابني مجدي وارفع راياتي بعيد ، في مكان تاني اهله لسه مابقوش عبيد ، في بلاد بتفهم في الحب والفرحه والعيد ، وتحترم التاريخ والجغرافيا وتدافع عن وجودها بقلب جامد ودماغ عنيد !!! كل ده قلتيه واكتر واحنا قاعدين بنسمع، والدموع بحر جاري والحيره سم ، ونفسنا نفرحك والعيشه هم واكيد بكره حننتصر بس انت اصبري شويه علينا واوعي تمشي وتسيبنا !!!

( 10 )

قلتي ايه ياغاليه خلاص ، رضيتي علينا ولا لسه ، قاعده ليه ياغاليه تحت شباكنا ومابترديش علينا ، ولو اتكلمتني مرة من كتر ما صعبنا عليكي ، بتفكرينا بخبيتنا وتستخبي بذكرياتك وتحمي لينا ذكرياتنا ، وتقولي شدوا حيلكم واجمدوا واستحملوا وانا بكره حارجع لما ترجعوا الغنا في القهاوي وترجعوا ست الحسن في كل الحكاويوماتخافوش من ضحك البنات وتتعلموا من اللي فات ، ان اللي يسكت ويفرط في بلده تمشي وتسيبه ، وتمسح اسمها من فوق جبينه وتسيب له شلالات دموع هديه بيها تفكره وتكدره ، قلت ماشيه قلت راحله قلتي خلاص بطلوا تنادوا علي وانت قاعده بكل حبك تحت شباكنا مستنيه نناديك ، ونعرف نصالحك ونراضيك ، ونعرف نبطل نتهزم ونعرف كمان ننتصر ، ونعرف نعيش ايامك الحلوة ياحلوة وراسنا مرفوعه لفوق ، طيب وحياه عمتي سعادات وابله تريزا جارتنا الجدعه وحياه الواد الشطور نوار وحياه البت صفية العسله وحياه كل اللي بتحبيهم واللي ناويه خلاص تسيبهم وحياه غلاوتنا عندك وحبك لينا ، اصبري شوية علينا واوعي تمشي وتسيبنا الوجع جامد ياغاليه واحنا مش حمل الاسيه ، وناوين بجد ناوين نبطل نتهزم اصل الهزيمه ماتليقليناش ولاشكلنا والهزيمه مش قدرنا والنصر جاي مهما انكسرنا ، اوعي تمشي وتسيبنا اصل البلد اللي عايزين يجيبوها لينا رسمه في خريطة بلد لقيطة ، مالهاش تاريخ ولا ليها حضن يلمنا ، لاعمرنا حنحبها ، ولا عمرنا حنغني يوم باسمها ، ولاهي تشبهنا ولا احنا نشبه لها ، لا عسلها نيل ولا صبحها زيك جميل ولاابتسامتها تطيب القلب العليل ، ولا فيها كروان بيحب الغنا ولاحتقسامنا الهنا ، ولا بناتها منورين ولا رجالتها حنينين ولا حنسكر من نسيم بحرها ولا ريحه الاصاله في دربها ولا طيبه وحنينه زيك كده ومهما قالت عمرها ماتحبنا ومهما عادت عمرنا ما تحبها ، فاوعي تمشي وتسيبنا لو لسه بتحبينا ، حنذاكر الدرس بسرعه وحنفوق ونتلم ونصحي ، ونعزك قد ماتستحقي ونتعلم ازاي نبطل نتهزم وازاي نبطل نتغلب وازاي نبطل نتخدع وازاي نفكر وازاي نقرا ونكتب وازاي نقدر وازاي نحترمك زي ماانت تستحقي وازاي نقدم عمرنا فداك وانت غاليه بس اصبري علينا واستني شويه واوعي تمشي وتسيبينا !!!!

اقوي الوشائج !!!ا

كأنك لست انت ..

صوتك نبراتك مثلما كنت اسمعها

لكنك لست انت ..

يغيب عن صوتك صوتك !!

اسمعك كأني لم اعرفك ابدا

وانا التي كنت اعرفك وبحق

لست انت الذي كنت والذي اعرفه

شيء ما فقدته وسط صخب الايام ..

شيء كان جميل وضاع

روحك لم تعد هي التي كانت

فقدت روحك ياصديقك وسط الصخب

لم تعد انت

ضاع منك اميز مايميزك

ربما الصدق ، كنت صادق ولم تعد

زيف يغلف كلماتك ونبرة صوتك وعباراتك

زيف احتلك فاضاعك

كنت الاجمل بانسانيتك الحمقاء

باندفاعك بتهورك بحماسك بجنونك بطفولتك

لكنك لم تعد انت

ملامحك تشبهك لكن روحك فرت منك وتركتك تشبه نفسك

كنت الاجمل بانسانيتك الفطريه الجميله الحمقاء

اما الان بالعقل والرزانه التي تتلبسهما

لم تعد انت

لم تعد انت ولم اعد اعرفك

فالاغتراب بيننا صار اقوي الوشائج

ياخسارة .... كان لي صديق جميل وفقدته !!!!

نقول كمان ؟؟؟؟؟؟؟؟؟؟؟

ليه فريق كرة القدم حداشرلاعب !!! ليه مش 15 او 24 لاعب ... ليه كل اللاعبين دول بيلعبوا بكوره واحدة بس !!! يجري ايه يعني لو ادينا كل لاعب كوره !! وبدل مالفريقين بيجروا ورا كوره واحده ويقطعوا نفسهم ، يبقي معاهم في الملعب 22 كوره او حتي 44 ، هتقولي دي مش حتبقي كوره قدم ، حاقولك وماله ، احنا حنسميها كورة قدم ، حد ليه عندنا حاجه ، احنا براحتنا !!!! حتقولي فيه قواعد منظمه للعبه ، اقولك وايه يعني ماطظ في القواعد ، مانخترع قواعد تانيه ، احنا برضه حرين !!! وبالمره نغير وقت الماتش ، كتير قوي 90 دقيقه ، الناس بتقعد علي نار طول ال 90 دقيقه وده ظلم للجمهور اللي من حقه ينبسط ويعرف نتيجه الماتش بسرعه ، ايه رايك نخلي الماتش 5 دقايق ، 5ر2 للتايم الاول و5ر2 للتايم التاني وعلي ما الحكم يصفر لبدايه الماتش يصفر تاني لنهايته ، حتقولي الوقت مش حيكفي الماش ، حاقولك مش مهم ، المهم نبسط الجمهور اللي عايز الماتش يبتدي ويخلص بسرعه !!! حتقولي حيطردونا من الفيفا ، وماله ، طظ في الفيفا !!! المهم الجمهور ينبسط !!! باختصار احنا حنسمي اي حاجه كوره قدم ، قواعد من اختراعنا وتوقيت بمزاجنا واحنا حرين واللي مش عاجبه براحته بقي يشرب من الحته اللي عايز يشرب منها !!!!

ليه التحقيق مع الفاسدين بياخد وقت ، ليه مابيحاكموهمش بسرعه ، ليه المحامي بيأجل ، ليه المتهم بيقدم مستندات ، ليه مابيحكموش عليهم وبسرعه ، لسه حنستني النقض ، امتي حنعدمهم ونشرب من دمهم !!! حتقولي القانون والدستور ومواثيق حقوق الانسان ، ماطظ في ده كله واحنا نحاكمهم بالطريقه اللي تريحنا وتبسطنا ، ماهم فاسدين فاسدين ، احنا حكمنا عليهم بكده وانتهينا خلاص ، حرمناهم من قرينه البراءه وان المتهم بريء حتي تثبت ادانته ، وعايزين نحرمهم من قاضيهم الطبيعي ونحاكمهم بمحكمه الثورة او محكمه التفتيش ، المهم يتحكم عليهم بسرعه واحنا ننبسط بسرعه !!! انت مش موافقني ، يبقي انت من الثورة المضاده والفلول ، وتبقي قليل الوطنيه والثوريه و................... يجري ايه يعني لما نغير قواعد الكورة ، ماتقليش مش حتبقي كوره ، والله حتفضل كوره برضه ، بس علي الطريقه المصرية !!! ويجري ايه لما نقدم الفاسدين لمحكمه الثورة او حتي نعدمهم من غير محاكمه ، ولا حيجري حاجه خالص ، حيبقي اسمه المحاكمه الثورية علي الطريقه المصرية !!!! ونقول من الاول ولا كفايه كده ؟؟؟؟؟؟؟؟؟؟؟؟ نقول كمان ، ليه مابيخلوش فريق الكوره 22 لاعب في الملعب بدل 11 ، حتقولي ماتبقاش كوره ، مش مهم احنا حنسميها كوره ، المهم اننا ننبسط !!! ليه مابتعملوش محكمه ثوره تعيينوا فيها ناس ثوريين يحاكموا علي الفاسدين ويحكموا عليهم وبسرعه ، حتقولي ماتبقاش محكمه ، حاقولك مش مهم ، احنا حنسميها محكمه ، المهم اننا ننبسط !!! نقول كمان ؟؟؟؟؟؟؟؟؟؟؟ الحقيقه ياريت يلغوا القانون ويريحوني انا شخصيا ونعيش في غابه واللي ممعاهوش سكينه يلحق يشتري !!!!!!!!! نقول كمان ؟؟؟؟

ملحوظة يوم 12 ابريل 2011 ...

كتبت النص ده من يومين ، وبعدين قررت ماانشروش من منطق مافيش فايده ، وكل واحد بيفكر براحته وبطريقته ، لكن لما شفت حلقه يسري فوده وضباط المجلس الاعلي امبارح ، وسمعت يسري وهو عمال يدفعهم دفعا لاجراءات استثنائيه وهما عمالين يتمسكوا بالقانون وضماناته وحقوقه وانه بريء حتي تثبت ادانته ، حسيت ان الحوار بين يسري وبينهم هو بالضباط نفس الحوار بتاع فريق الكورة وعدد اللعيبه وعليه ......... قررت انشر النص بدل دفنه !!!

وبس ...........

المقصلة !!!ا

انا مش ثورة مضادة .... ولا من الفلول ... لكن نظريه الاخراس العمدي بتاعت ان اللي حيختلف معانا يبقي عدو الشعب نظريه فاشيه وعيب ومالهاش علاقه بالديمقراطيه خالص ... وعيب نعمل ثوره علشان الديمقراطيه وبعدين اول حاجه نمارسها بمنتهي الحماس هي الديكتاتوريه الثورية !!! عيب جدا ......... خلصنا كده ، خلصنا !!! علشان كده حاقول وجه نظري اللي هي ضد اللي بيحصل وانا مصريه جدا وباحب مصر جدا ومش من الفلول ولا من الثورة المضاده ولا ااقرب لهم خالص !!!!

نرجع بقي للموضوع الاصلي اللي عايزه اتكلم فيه .... حكايه المحاكمه الشعبيه ، التمثيليه المنصوبه في التحرير وصوره حسني مبارك في قفص لعبه .... الحكايه دي هزار !!! ااقول تاني ... مافيش في القانون حاجه اسمها محاكمه شعبيه ، واللي بيعمله المستشار الخضيري دعايه وبروباجندا وهزار ... والمحامين اللي بيهزروا قدام الشعب في التحرير باعتبارهم محامين الريس بيهزروا هزار عيب لان مافيش حد وكلهم يترافعوا ولا دي محكمه بجد ... وحكايه اجلنا المحاكمه لاعلان الريس ، كلام عيب ، ومالوش علاقه بالقانون ... اللي بيحصل هزار والهزار لا هو عيب ولا حرام ، يعني من حق الناس تهزر براحتها !! هي تهزر واحنا نضحك وعادي يعني !!!

لكن ان الناس تقول علي الهزار جد وتتعامل مع اللعبه علي انها لعبه جد وتفهم الناس انهم بيتكلموا جدا ، فده عيب قوي بقي ، حتي بالمقاييس الثورية ، عيب ضحك علي الناس واستغلال لجهلهم ... والمشكله ان اللي بيهزر في الموضوع ده هو المستشار الخضيري ، المستشار السابق علي المعاش ، ووجوده في اللعبه بيديها شكل الجد ، لان الناس الجاهله بالقانون بتقول ماهو بدام سعاده المستشار قال يبقي اكيد الكلام صحيح وده موقف غلط ، يعني قولوا للناس احنا بنهزر ونلعب ماشي ، لكن تقولوا للناس الحكم اللي حيطلع له قوه تنفيذيه ولازم يتنفذ واذا مااتنفذش حنفذه بنفسنا ، فده كلام غلط ومالوش علاقه بالقانون وله اوصاف تانيه مش مهم ااقولها دلوقتي ، عايزين تلغوا القانون واللي مايعجبكوش تموته في التحرير وهيصه وتشغلوا مقصله الثوره الفرنسيه حاجه وانكم تقولوا القانون بيقول حاجه تانيه ... عيب نضحك علي الناس ، عيب جداااااااااا طبعا جايز سعاده المستشار كان بيهزر لكن الاعلام هو اللي حط الهزار في صوره جد ، يبقي عيب برضه علي الاعلام انه يحول الهزار لجد ويستخف بعقول الناس !!!!

اللي بيحصل في التحرير ، بالنسبه للمحاكمه الشعبيه ، ليس الا اما هزار او سلوك سياسي بالتحريض وحشد الغضب ضد الرئيس السابق وفي الحالتين مالوش علاقه بالقانون ولا الحكم اللي حيطلع حيتنفذ ولا اي كلام من ده .... واذا كنتم بتهزروا انا كمان بحب الهزار واذا كنت بتحشدوا غضب الناس ضد الرئيس وماله برضه انا مش ضد ان الناس تحشد غضب الشعب ضد الرئيس السابق ، لكن محدش يقولي ان اللي بيحصل ده محاكمه وحكم وقوه تنفيذيه واعلان بجد بجد .. محدش يحط مصطلحات قانونيه في الهزار او في التحريض السياسي ، لان ساعتها القانون بينقح علي وباتضايق واضطر ارد عليكم واوضح وجه نظر القانون ...

المحاكمه القانونيه - للرئيس السابق او اي متهم - هي القضيه اللي حيحيلها النائب العام باعتباره ممثل الشعب وصاحب الدعوي العموميه ، حيحيلها للمحكمه بعد تحقيق قانوني مع المتهم في التهم المنسوبه اليه ومواجهته بالادله اللي في حيازة النيابه ويكون الفعل الجنائي المنسوب للمتهم يعاقب عليه قانون العقوبات .... النيابه تحقق مع المتهم في الاتهامات المنسوبه اليه وتواجهه بالادله والمتهم ينفي وينكر وفي الاخر لو اقتنعت النيابه بدفاعه تحفظ القضيه واذا مااقتنعتش تحيلها للمحكمه وفي المحكمه القانون نظم اجراءات المحاكمه وتشكيل المحكمه ودور النيابه ودور الدفاع ونظم طريقه اصدار الحكم وطريقه الطعن عليه ........ وكل ده بياخد وقت !!!!

عرفتوا بقي ليه باقول علي اللي بيحصل ان هزار !!! او حشد للغضب بشكل سياسي !!!

هزار او حشد سياسي للغضب حتي لو اللي قاموا بيه مستشار سابق علي المعاش ومحامين وقضاه سابقين او في الخدمه ، برضه بيهزروا وبيلعبوا او بيحشدوا غضب سياسي ضد الرئيس السابق ، لكن مالوش دعوه خالص بالقانون !!! اما اذا قلتم ان دي محاكمه قانونيه ، فده عيب وعيب جدا !!!صحيح اللي بتقولوه بيبسط الناس ويسعدها وبيفش غلهم في الرئيس السابق ، وصحيح انبساط الناس مهم جدا ، مهم انهم يبقوا مبسوطين لان النكد زاد عن الحد ، لكن برضه ماتقولوش انها محاكمه قانونيه بجد ، ليه ، لان معناه انكم بتحتقروا الجمهور اللي بتكلموه وبتتعاملوا معاه باعتباره جاهل وغبي ومايعرفش اي حاجه في سر الكهنوت المسمي بالقانون !!! واذا كنت عارفين انه عيب وبتعملوه فدي مصيبه واذا كنتم مش عارفين فالمصيبه اعظم!!!!

لكي الله يامصر !!!!!!!!!!!!!!!!!!!!!!!!!!ا

ثقب الابرة

كأن الحياه ضيقه كمثل ثقب الابرة ....

كان الشمس هذا اليوم لاتخرج وتطلق فقط لهيبها الساخن في وجوههنا ، لاتمنحنا دفئا بل سعيرا ولا تمنحنا حيويه بل موت !!

كأن الحياة ضيقة كمثل ثقب الابرة .... قبيحه كمثل سيدة جميله كانت ولم تعد بعدما افسدت ملامحها بعمليات التجميل ففقدت جمالها الاصلي ولم تمنحها العمليات الا قبحا اضافيا فوق قبحها الذي صار !!!!

الحياه ضيقه كمثل ثقب الابرة ... كل شيء حولي صامت ساكن ، كان اللوحه التي رسمها رسام فاشل عديم الموهبه صار خلفيه كل الاحداث وكل ما نعيشه ، انها لوحه بارده اخضر اشجارها باهت ووردوها ذابله وعصافيرها صامته خرساء ، ففي اللوحه البارده التي لانري غيرها وتحتل ابصارنا وتخزق عيوننا تصمت العصافير ويهاجر الكروان وتعطي الاشجار ظهورها للريح فلا تتمايل ولا تزفر اكسوجينا يجدد حيويتنا !!!

كأن الحياه ضيقه كمثل ثقب الابرة .. وكاني الفيل معقود الذيل الذي يعاني ليعبر من الثقب الضيق لكنه رغم كل شيء لايعبر ، يعاني ويعاني حتي تستوقفه العقده تزيد من اسره فلا يفلت من اسر الثقب الضيق !!!! احلم بالعصافير تغني مثلما كانت واحلم بالكروان يشكو همي لله بدل همه ، احلم بالشمس حانيه وليست لهيب مستعر فوق راسي ، احلم بالبحر هادي ونسيمه المنعش ورزازه البارد ينقش علي وجهي ابتسامه الطفوله التي كانت ترتسم وقتما اشاهد البحر وانا كمثل ذره رمال بيضاء ملقاه علي شاطئه الفيروزي .... احلم بعاشقين يقفا علي الكوبري يبتسما لاحلام المستقبل ويتمنيا قبله لايملكا اختلاسها لكنها تسيطره بدفئها علي كل مشاعرهما وروحيهما ، احلم بتلميذه بضفيره طويله ترسم في كراستها بابا وماما وبيت وقطه بيضاء وابتسامه ، احلم بناياتي يجلس تحت شجره ظليله يزفر انفاسه نغمات شجيه ، احلم بامي تدس سندوتش مغمس بالمحبه وسط كراريسي وانا ذاهبه للمدرسه مع اجمل دعاء تحيطني به وانا اهرع علي السلم لابدء يومي البريء ، احلم بجدتي تاخذني في حضنها تبعد اشباح الليل وعفاريته ، احلم بحضن حبيب يبتسم في وجهي فور مااستيقظ ويمنحني اجمل كلماته غزله ، صباح الخير ياحبيبتي ، صباح الخير ياحبيبي ، احلم بكف ابنتي الناعم وذراعها المحب يلتف حول عنقي محبه ودفء ، احلم بوطن كنت اعرفه واستيقظت من النوم فوجدته رحل وتركني لكل الاشباح والاوجاع يمزقني الشوق كل يوم وكل لحظه !!!!

كأن الحياه ضيقه كمثل ثقب الابرة ...اه من مخاوفي وتخوفاتي .... ساستيقظ يوم لن اجدني ، ملامحي غير ملامحي وبيت غير بيتي ووطن غير وطني !!! ساستيقظ يوم لن اجدني ، هذه الاغنيات غير التي احبها ، هذه الافلام غير التي اعرفها ، هذه الشوارع الصامته ليست شوارعي ، هذه الجهامه علي الوجوه تخيفني ، الاسلحه البيضاء المخبأه تحت الملابس تروعني ، الاخبار الكاذبه والكلام التافه وردود الافعال الساذجه تجنني ، ربما انا مجنونه فعلا ، لكن كل ما يحدث حولي افقدني والامان والطمأنينه والغد القادم لااعرفه ولا انتظره ، اقضي وقتي انقب في ذكرياتي واغانيها وابتسامتها الحقيقه ودفئها واحضان حبايبها واحلامها ، انقب في ذكرياتي واعطي كل الحاضر ظهري ، كله لايحدث ، كله لااعرفه ولاارغب اعرفه ، لااحبه ولن احبه ، كل الحاضر لايخصني ولااخصه ... لاانتمي اليه ولن انتمي !!!! ساستيقظ يوما لن اجدني ، لن اجدني ولا بيتي ولا وطني ، ولا البشر الذين اعرفهم وكنت احبهم ، ولا الطمأنينه التي كانت لاتبارحني ففقارقتني وتركتني ريشه في مهب الريح تتقاذفني المخاوف والاوجاع!!!

كأن الحياه ضيقه كمثل ثقب الابرة ...

اكره كل هذا الصخب ، اكره الكلمات البارده التي تخرج من ثقوب سوداء تحتل الارواح الكاذبه ، لماذا يأتي صوتكم كمثل الانصال المشحوذه يمزق روحي ويبعثرها وكل الذكريات في بحار الوحشه !!! اكره كل الانفعال الذي تعبروا عنه " بحزق " لانكم كاذبين والله العظيم كاذبين ، لو كنت صادقين لوصلتني كلماتكم كمثل حبة النعناع تذوب في فمي بسهوله وتنعشني ، لكنكم كاذبين ، كلماتك ملوثه بمذاق الشبه ، تكوي وتوجع وتحرق وتؤلم وتفسد حاسه التذوق وطزاجه الروح ....

لماذا لااصدقهم .... سؤال سألته لنفسي مائه مره بل مليون ، لماذا رغم كل الحماس الذي تدعوه وترسموا ملامحه علي وجوههكم لااصدقكم لماذا رغم كل الانفعال المبالغ فيه لايصلني ماتقولوه ، لماذا اري زيفا يلون الوجوه والاصوات والمشاعر ، لماذا كل هذا الكذب !!!! لماذا كل هذا الكذب ، هل لاصدقكم ، عفوا لن اصدقكم ، فحين كنت اصدقكم كنت لااحتاج كل هذا الانفعال ، كنت اصدقكم بمنتهي التلقائيه والفطرية ، الان ، لااصدقكم ولااصدق اقوالكم ولا تصرفاتكم ولا مشاعركم ولا اي شيء !!! لااصدقكم ... الكذب يلمع في العيون لحد يعمي القلوب ببريقه !!! الارواح جفت كمثل احطاب الشتاء وبردت مثل طبق الحساء الذي افسدت البروده مذاقه ، حين يحاصرنا الكذب بمنتهي الانفعال والقوة لايبقي لنا الا الفرار ... لكن الحياة ضيقه كمثل ثقب الابرة والعقدة التي تخنق ذيل الفيل تمنعنا حتي من الفرار !!!!

الحياه ضيقه جدا لان دروبها مليئه بالزيف والكذب والفجأجه وانعدام الموهبه والمبالغه الكريهه فلم يترك للصدق الا مكان قدمه وخطواته يتعثر فيها ويسقط ولايقوم !!!!!!

الحياة ضيقه جدا كثقب الابرة !!!! ضيقه جدا ، ضيقه جدا ، ضيقه جداااااااااااااااااااا ....

فراشة مصبرة في ديوان !!!ا

اشتاق اليك ، فهل تسمعني ؟؟؟

وسط كل مايحدث اشتاق اليك وكيف لااشتاق وانت طمأنينه قلبي وراحه روحي وكل لحظاتي الحلوة التي احبها ... انت الذكريات التي كانت ومازالت الاجمل وتأبي ترحل عني وانا ارجوها لاترحل فالصحراء واسعه وشجرتك المورقه تضلل علي ايامي ... وسط كل مايحدث ، الخوف الفزع القلق الرعب الصمت الوحدة ، وانا اسيرة في عالم ابيض شاحب مثل وجهي المشوب بالخوف ، المحك في ذاكرتي مبتسما فابتسم وتتوهج وجنتاي وتجري الدماء الطيبه في شراييني ، ابتسم واناديك واتمناك تسمعني لتأتي تهدهدني فاطمئن وانسي كل الدنيا واعود صغيرة بلا هم فانام علي ذراعك فتقص علي حدوته القط الابيض وقتما منح قطته المشمشيه قبلة فاضحك وتضحك وننسي الدنيا وكل شرورها ...وسط كل مايحدث افكر فيك اناديك اتمناك تحمل اشعارك وتسمعني كلماتك وتحبني !!! واهمس اشتاق اليك فتمطر الدنيا وتتحقق الامنيات وتتفتح الزهور التي لم يأتي بعد اوان نضوجها وتصبح الحياه احلي واحلي ... اشتاق اليك فهل تسمعني !!!

اشتاق اليك ، فهل تسمعني ؟؟

انا التي كانت حبيبتك ومازلت انت حبيبها وستظل مادام قلبها ينبض وانفاسها تتلاحق والحياه مازالت تجري في روحها !!! هل مازلت اراودك واحتل خيالك واستوطن روحك واسكنك ... هل تتذكرني مثلما دائما اتذكرك ؟؟؟ اتذكرك وزهورك الحمراء تدس اجملها في ضفيرتي الطويله وتلتقط صوري وتراهني اني الاجمل في عيون الكل وفي قلبك ، اتذكرك وبسكوته الايس كريم المليئه بالفراولة والكريز تحملها لي في عز البرد فتدفيني وتنصحني اخلع ملابس الثقيله وامنحك كفي فتحيل الشتاء القارص لربيع حنون ، اتذكرك وانت تقاسمني سر فراشتك المصبرة التي اطلقت عليها اسمي واحتفظت بها بين صفحات ديوانك الاول الذي اهديته لي بكلمات لايفهمها سواء لكنك تفضح عشقك وجنونك وكأنك تنبأت بمصيري وقتما سترحل وسابقي اسيرة ديوانك وكلمات حبك ، اتذكرك وانت تأتيتي ليلة الامتحان في الحلم تغني بصوتك الاجش وتجري لكني احب صوتك وغناءك واحبك واستيقظ باسمه وروحك تجوب غرفتي واحلامي واكتب اسمك في ورقه الاجابه فانجح في عشقك واسقط في كل المواد ، اتذكرك وانت تبكي تحمل حقيبه سفرك راحلا للبلاد البعيده القاحله ، تبكي لان الحياه القاسيه اجبرتك تفارقني ، نسيت وقتها حياتك واصدقائك وامك التي تعشقها وتذكرتني فبقيت دموعك انصالا تمزق نفسي كل لحظه اتذكر فيها قطرات الندي تتسلل من روحك لمنديلي ، اتذكرك وسنوات طويله مازلت غائب فاناديك عل الاثير يحمل ندائي ويذكرك بكل الحب الذي منحته لي سنوات طويله ثم نسيتني وتركتني حائره بين الاطباء ابتلع عقاقيرهم واعشابهم واوخز بحقنهم وتبقي روحي العليلة باعراض مرضها الغريب تثبت فشلهم وشوقي لك ووجعي من غيابي !!!

اشتاق اليك .... هل تسمعني ؟؟

وحتي لو لا تسمعني ولن تسمعني .... مازلت اناديك واتذكرك ولااطمئن الا لك واشتاق اليك وافتقدك !!! ربما الشوق لايكفيك ، ها انا اصارحك اني مازلت احبك .... فهل ستسمعني ؟؟؟؟

من غير فزلكة !!!ا

جايين في وشنا وماشين عكس الاتجاه بمنتهي الفتونه !!!!

ببساطه من غير مقدمات ولا فزلكه !!!

المصريين بيعتبروا ان الحرية هي الفوضي وعدم احترام القانون !!

ويعتبروا ان مخالفتهم للقانون ميزة وحق ، ومخالفه معارضيهم للقانون جريمه تستحق التشهير والتجريس وربما الاعدام !!!

الحريه هي الفوضي ... السير عكس الاتجاه والركن في وسط الشارع صف وصفين ، البناء علي الاراضي الزراعية وتعلية العقارات بالمخالفه للقانون ، القاء القمامه في الشارع ورمي " الردش " المكسر علي الكباري والطريق الدائري ، افتراش الشوارع والارصفه لبيع البضاعه فاسده او مهربة او مجهوله المصدر دون التقيد بتاريخ الصلاحيه ولا دفع الضرائب ولا الالتزام بسياسه التسعير ولا حقوق المستهلك ، عدم الالتزام باشارات المرور ولا السرعات القانونيه ولا السير في الحارات المرورية وغيرها من السلوكيات اليوميه المنفلته!!!

الحرية هي الفوضي .... هي مخالفه القانون ، اي نص قانوني يمكن مخالفته ، ممنوع سير الاتوبيسات علي الكوبري ، بعد الثورة الاتوبيسات تمشي علي الكوبري ، ممنوع سير التوك توك في الشوارع الرئيسيه ، بعد الثورة التوتوك تمشي في الشوارع الرئيسيه ، ممكن الركن عمودي علي الرصيف ، بعد الثورة العربيات تركن عموديا علي الرصيف !!!!

الحرية هي الفوضي ... والحجه السهله المعروفه ، ماهو مافيش حكومه !!!! وكان المواطن المصري سيعيش فوضوي حسب كيفه ومزاجه وبراحته - سواء ضايق الاخرين او لم يضايقهم - حتي تردعه الحكومه بعصاها وبوليسها وقوانينها الرادعه ، اما الالتزامات الاخلاقيه والروادع الشخصيه واحترام الغير وحقوقه ، فهذا لايعرفه المصريين ولايلتزموا به ، المصريين يعتبروا الحريه التي يحبوها هي الحرية المطلقه بلا اي قيود ولو جار سلوكهم علي الاخرين واعتدوا علي حقوقهم ...

الحرية هي الفوضي هي مخالفه القانون ...

مظاهرات اهالي المساجين تطالب بالافراج عن ابنائهم بنصف المدة ، حتي المحكوم عليهم في قضايا المخدرات والقضايا الماسه بالشرف ، لكن القانون لايسمح بهذا الافراج !!! مش مهم ، مش مهم القانون بيقول ايه المهم احنا عايزين ايه واهي ثورة بقي والثوره عايزه مظاهرات والمظاهرات بتجيب نتيجة وتضغط علي الحكومه اللي بتعمل حساب المظاهرات وتحقق مطالبهم !!!

ناس تضرب رؤسائهم ومديريهم بالجزم ، باعتبارهم حراميه او مستغلين او من اذناب النظام وبقاياه ، مافيش قانون ولا محاكمات ، ضرب بالجزم وهتاف وشتيمه والاخرين يتعاملوا مع الموضوع عادي باعتبارهم يستاهلوا ويشيروا الخبر علي الفيس بوك وتوتير وهات ياضحك وتريقه ويستاهلوا ، طيب ده اللي حصل ده جريمه اعتداء علي الاخرين ، لو مجرمين يعاقبهم القانون ، لسه حنستني القانون ، بالجزمه وعلي ام راسه وعقبال الباقيين !!!

ناس علي الفيس بوك وتويتر وعلي التليفونات الخاصه ، تعرض وتشير وتتناقل فيديوهات ( صوت وصورة او صوت بس ) عباره عن تجسس وتصنت علي الاخرين ( اي اخرين مابيحبوهمش ) علي لقاءاتهم مع الاخرين او علي مكالماتهم التليفونية او حواراتهم الشخصيه ، ناس بتتكلم في حوارات خاصه تقول كلام ابيح شتيمه شخصيه او سياسيه ، ننسي التجسس والتصنت وانه يشكل جريمه قانونيه ، ونحاكمهم علي خصوصياتهم باعتبارها تخصنا جميعا ونعاقبهم عليهم ونشهر بيهم ونفضحهم بسببها ، محدش ساعتها يفكر ان كل اللي بيحصل جرائم يعاقب عليها القانون ، ههههههه ، سلم لي علي القانون وقوله خالتي بتسلم عليك وبتقولك طظ فيك ، وبمنتهي راحه الضمير ، ننسي الجرائم التي ارتكبت في حقهم ونمارس حريتنا في فضحهم والتشهير بهم ، ماهو شعارنا الحريه كل الحريه للشعب ( اللي هو احنا ) ولاحريه لاعداء الشعب ( اللي هما مش احنا ) ونشتم وننبسط ونهيص وكأن التجسس علي ( اللي مش احنا ) حلال وعظيم وميت فل وعشره !!!

ناس طول عمرها تتكلم عن حقوق الانسان وتشتم النظام البائد لانه معادي لحقوق الانسان وبيخترقها ولا يحترمها مع معارضيه ، فجأ بمناسبة الثورة ، تتكلم عن العزل والحرمان السياسي ومحاكم الثورة رغم ان كلها اجراءات معاديه لحقوق الانسان واجراءات استثنائيه غير دستوريه وغير قانونيه ، لكن بدام مع الخصوم والاعداء والمعارضين للثورة وفلول النظام وبقاياه ، يبقي حلال حلال ومرحب به !!! وطبعا لو حاولت تقول الكلام ده غلط ، يطلع ميت حد يقولك فاكر امن الدوله كانت بتعمل ايه ، فاكر التزوير ، شايف الفساد ، وكأن هما كانوا مجرمين وايامهم خلصت ومن حقنا احنا بقي نبقي مجرمين ونشربهم من نفس الكاس اللي شربوا الناس منا ...........!!!!ا

البلطجيه يخوفوا الناس ويروعوهم ، فالمحاكم العسكريه تحكم عليهم بالسجن سنين طويله ، وناس تقول ليه قدام القضاء العسكري ده مش قاضيهم الطبيعي وناس تقول ازاي محاكمات تتم بليل او يوم جمعه او من غير محامين ، لكن الناس كلها تقول وايه يعني ماهم بطلجيه ويستاهلوا اللي بيجرا لهم .... وكان ضمانات حقوق الانسان لنا وليست لخصومنا ( السياسين او البلطجيه او الاتنين ) !!!!

السلفيين يهدوا الاضرحه لانها حرام ( حسب تصورهم ) يهدوها بدراعهم ، واهل اطفيح يهدوا الكنيسه لان بيتعمل فيها اعمال ( حسب تصورهم ) وفي قنا يقطعوا ودن الراجل لان فيه في عمارته ست " بطاله " وهو علي علاقه معاها ، طيب هي فعلا ست " بطاله " ؟، طيب هو فعلا علي علاقه معاها ، طيب ده حلال ده حرام ، ده قانوني ده مش قانوني ، مين من حقه يقيم سلوك الاخر ومين من حقه يعاقبه لو عمل حاجه حرام !!! مش مهم دي كلها قضايا فلسفيه قدام التلاعب بمشاعر البسطاء الغيورين علي دينهم ، وهوب ، يالا نعاقبه ويلا نقطع ودنه !!! الناس تزعل لان السلفيين زعموا انهم اقاموا الحد علي الراجل " القبطي " رغم ان الحدود مافيهاش قطع " ودان " لكن محدش ياخد باله ان كل الموضوع فيه اعتداء علي حريته الشخصيه وعلي سمعه الست ، شويه ناس قرروا ان الست بطاله والراجل علي علاقه بيها ، ظلم او حقيقه مش مهم ، ثم قرروا يعاقبوهم علي هذا التصرف ، بصرف النظر عن راي القانون فيه ، وقرروا ينفذوا العقاب بايديهم .... احنا بقينا احرار ، نقيم ونحكم ونعاقب وبراحتنا !!! حريتنا صح وحريه الاخرين مالهاش وجود !!!! وادي نفسي الحق بالتصلصص علي بيوت الناس وانتهاك حرماتهم الشخصيه ، فاقرر انا ان جاري ( اللي مابحبوش ) بيعمل حاجه غلط في بيته واستعدي الناس عليها والناس تصدقني ونضربه ونعاقبه ونهيص ونطبل وحريه ياحبيبي حريه !!!! ايه الجنون والفوضي دي !!!!

الحرية هي الفوضي !!!

الفوضي بكل طريقه !!!

مافيش حكومه ، كما يقول الناس ، مافيش قانون ، فيه حريه يعني فوضي !!!!

ولو حاولت في اي لحظه تقول للناس ان اللي بيحصل غلط لانه اعتداء علي القانون او الحريات الشخصيه او حقوق الانسان او حقوق الاخرين وحرياتهم ، تتهاجم وتتقطع لانك ضد الشرع او ضد الدين او ضد الاخلاق او ضد الحريه الشخصيه او مع الحكومه واذنابها وفلولها وديولها ، تتهاجم لان كل الناس مبسوطه بمساحات الحريه الجديده اللي بيعيشوها ، هما احرار والباقي لا ، هما احرار والباقي لا.... !!!!

ولما القانون يتضرب الجزمه ..

نبقي في غابه ..

ولما نبقي في غابه ..

كل واحد ياخد حقه بدراعه ..

سواء من مديره او رئيسه او من النظام او من الجيران ..

كل واحد ياخد حقه بدراعه وتبقي فوضي عارمه مخيفه موحشه !!

ويبقي الانسان رخيص رخص المطواه اللي بيشيلها سواق التوك توك علي الدائري ومستعد يغزك بيها لو ضايقته !!! او رخص السنجه اللي شايلها البلطجي وهو قاعد يبيع بضاعه فاسده وبيضحك علي الناس بيها وقافل الشارع ومعطل المرور ومستعد يقطع رقبتك بيها لو ضايقته !! او رخص السطرين اللي بيتكتبوا علي الفيس بوك او علي تويتر واللي بيكتبهم ثوري متعجرف شايف انه صح وثوري جدا وانك متخاذل ومش ثوري خالص وانك لابتدافع عن القانون ولازفت المشكله انك من فلول النظام وهو قرر يكشفك ويجرسك ويفضحك بمنتهي الثورية!!!!

طيب وعلي ايه يامصر ، خلاص ياجدعان ولا حد يزعل نفسه وعيشوا حريتكم الجديده بمنتهي السعاده !!!

اضربوا القانون بالجزمه !!!! واستمتعوا بالفوضي وبالغابه الجديده اللي بنعيش فيها !!!!

بس خدوا بالكم ، لما نبقي في غابه و نطلق التمانين مليون علي بعض تبقي وقعتنا سودة !!!!

وهي غالبا فعلا ان وقعتنا بقت سودة خلاص !!!

بالمناسبه ، عارفه ان الشعب كان عايش في كبت وقهر وفساد ورشوه ومحسوبيه وتعليم بايظ واعلام سيء وازمه اقتصاديه واجتماعيه وطبقيه من 30 سنه .. علشان محدش يقولي الحكايه دي ويفتكرني مش عارفاها !!!! عارفاها لكن ده مش معناه ان الناس تعمل مابدا لها ، وحتي لو الناس " العامة " عملت مابدا لها فمفروض ان النخب الثقافيه والسياسيه ماتقبلش منهم اي حاجه باسم الحرية لان دي مااسمهاش حريه ، دي اسمها فوضي !!!

ده رايي بالمناسبه مع احترامي لكل اراءكم !!!

تحديث .... 3 ابريل ..

*** بعد مانشرت النوت ، حصل احداث جمهور الزمالك يوم السبت 2 ابريل مساءا ... وهي حاله بلوريه واضحه لكل مااتحدث عنه !!! الحريه يعني الفوضي ، مافيش بوليس يضربنا يبقي ننزل نكسر ونقطع ونضرب ونقلع هدومنا ونعيش الحريه باروع صورها !!!!

**** بعد مانشرت النوت صحيت الصبح رايحه شغلي يوم السبت ، لقيت المرور غريب جدا ، عربيات جايه في وشنا ، المشكله ان العربيات طالعه الطريق الدائري لقت حادثه ، قررت العربيات تلف عكس الاتجاه وتنزل ، لما نزلت كان ممكن تخش يمين وتمشي عادي لكن تلف حته كبيره ، طيب وتمشي يمين ليه مالشمال حلو ، وفي وش العربيات عاكس ومعكوش ، ماهو لافيه امناء شرطه يسحبوا رخصنا ولا فيه حكومه تقبض علينا وعيش الحريه ياحبيبي ، حريه ياحبيبي حريه ... حانزل كمان الصورة اللي صورتها لمشهد العربيات !!! هنا بقي لا فيه ثوره مضاده ولا فيه فلول الحزب الوطني ، هنا فيه قله ادب وقله اخلاق !!! ببساطه وبوضوح !!!!ا