ولكن !!!!!!!!!!!!!!!!!!!

ولكن ...........

ياخبر علي ولكن دي !!! كلمه بنت لذينا ، تقلب المعاني وتبوظ الكلمات ، نسمع كلام حلو كتير وقبل ما نستمتع بحلاوته بجد تيجي لك ولكن ، تيجي لك ولكن تقلب المعني تغير المضمون تشقلب الاحساس ، مش عارفه مين اللي اخترع ولكن دي !!! اللي اخترعها حد عبقري ، قالك الناس تقول مابدا لها وفي الاخر تشقلب كل الكلام وتقول ولكن ، بحبك ولكن ، حاجيلك ولكن ، انا فاهمك ولكن و........ الف مليون حاجه بعدها ولكن ، وبعد ولكن الدنيا تتغير خالص تبقي بعد ولكن غير قبل ولكن خااااااااااالص ....
طيب ياعم او ياعمه ياللي حتقول ولكن ، ماتقول علي طول الكلام اللي عايز تقوله من بعد ولكن ، مالوش لزمه اللي قبلها ، ماتتبدي كلامك من ولكن علي طول ، ليه .... لان ياحرام بتتعب نفسك وفي الاخر اللي بعد ولكن بيلغي اللي قبله ، طب ممالوش لزمه التعب ، مانركز علي طول ، ليه ااقعد اقول كلام وانا عارف اني اول مااخلصه حالغيه مع سبق الاصرار والتعمد ب ولكن !!!
طب مانوفر المجهود ونقول اللي عايزين نقوله علي طول !!!
باكره كلمه ولكن ، باكرها لانها كلمه مراوغه لعوب ، بتغير المعاني ، بتتحط في الكلام علشان تمسخه ، تبوظه ، تغير معناه خااااااااااالص ، باكرها واتمني دايما ان الناس تقول اللي عايزه تقوله من غير ولكن ولا اي حاجه ، تقوله وبس ، تقوله مباشره !!!!
باكره كلمه ولكن ، لاني بحسها سلاح خفي ، فيه غدر ، تسمع ياليل ياعين ، وقبل ما تتسلطن وحتبتدي تنبسط من الليالي ، تجيك ولكن ، يطلع الموضوع لا فيه ياليل ولا فيه ياعين ، ولا فيه اي حاجه !!!
والنبي ياجماعه ، سايق عليكم النبي علي راي ستي ، اللي عايز يقول حاجه يقولها مباشره واللي مش قادره علي حاجه يقول مباشره واللي نفسه او مانفسوش في حاجه يقول مباشره ، لان موضوع ولكن ده مستفز قوي ، فيه استهبال شويه ، متهيالي فيه استهبال كتير!!!!!
وانا مابحبش الاستهبال !!!!
اصلي الحقيقه بفهم الكلام من الاخر ، يعني اول مالزبون او الزبونه يفتحوا بقهم ، احس ان ولكن جايه بسرعه واعرف ان اللي حيتقال بعدها يغير المعني ويعكسه تماما ، يبقي ليه الصداع والواحد يقول حاجات مايقصدهاش لان اللي يقصده حقيقي ، جاي بعد ولكن !!!!!