قررت اكون واقعية جدااااااااااا !!!!

انا قررت ابقي واقعيه جداااااااااااا ... واقعية ، سوداويه ، اكتئابية ... زي كل الناس او معظمهم !!!

زي كل الواقعيين السوداويين الاكتائبيين اللي شايفين ان الاصل في الحياه في مصر للي كانت امي وبعدين بقت مرات ابويا او مابقيتش اي حاجه خالص وكده احسن بصراحه ، الاصل اننا نكتئب ونسود ونزرق ونبقي واقعيين جدا لسابع ارض !!! ولان الواقعيه قرين الاكتئابيه والاكتئابيه قرين الواقعيه ، وهما الاتنين انيل من بعض وازفت من بعض واسود من بعض ، قررت اكون واقعيه اكتئابيه جدااااااااااااااااا ، وخلاص خلاص ، بجد بجد ، اتطعمت ضد قله الدم وضد الانبساط ، ومحطوطه علي كورس علاج قوي جدا ، يطهر دمي من الاجسام الانبساطيه ويحرقه بالرؤي الاكتئابيه العميقه !!! ولو قلت لكم بعد كده اني مش مكتئبه ابقي بقي براحتي واستاهل كل اللي يجرا لي!!!!

بالذمه حد عنده دم ، يعيش في بلد زي دي ، مش واقعي ومش سوداوي ومش مكتئب !!! لا اللي عايش في بلد زي دي ، لازمن ولابد يبقي سوداوي ومكتئب لو واقعي وعنده دم ، لكن بقي لو محلق وحالم ومجنوووووووون وقرر يستعبط ويعمل فيها سعيد ومبسوط ، يبقي بجد بجد هو ده اللي عيان خاااااااااااالص ومحتاج ادويه ومهدئات ومنومات وانتي ديبرشن ويمكن كمان شويه كهربه علي مخه يعدلوه !!!! بالذمه حد عنده دم ، يعيش في بلد زي دي ، ويستهبل ويقرر انه مش مكتئب ، يابرودك يااخي ، ياتناحتك ، ياللي معندكش دم خااااااااالص ، ياجبلة ، ياحيطه ، الاصل زي كوكولا ، اننا لازمن ولابد نكتئب ، لان مافيش حاجه عدله حوالينا ، كل حاجه هباب وزفت وطين وقطران ، كل حاجه نيله!!!

واذا انت ايها المواطن المتحور شبه السحليه ياللي مش حاسس بالهباب والزفت والطين والقطران يبقي العيب فيك يافي احاسيسك اما البلد فهي هباب وزفت وطين وقطران ولو كره المتفائلون والسحالي !!!! ولاني مش معقول حابقي شبه السحليه ، انط من فرع شجره لفرع شجره ولا علي بالي الاحاسيس الجماعيه العظيمه بالاكتئاب النفسي والوطني ، وافضل زي العبيطه استهبل علي روحي واستفز اخوانا المكتئبين اللي شايفين ان في انا شخصيا حاجات جميله جدا لكن ياخساره الحلو مايكملش ، لان ماهو مش معقول تبقي بني ادمه كويسه كده وبتفهمي وبتعرفي تفكري وفي نفس الوقت مبسوطه ، يبقي عندك مشكله دفينه عميقه بلدت الاحساس وتخنت الجلد ، مش قلنا الحلو مايكملش !!!

ولاني باحب المكتئبين رغم انهم مكتئبين ، واحبهم يحبوني ويبطلوا يقولوا ( بس ياخساره ) خلاص يااصدقائي المكتئبين ، مافيش ( بس ياخساره ) خلاص نوهائيا ، لقد خدت قرار عظيم شجاع مهم جداجدا في حياتي ، ربما يكون نقطه تحول عظيمه او نقطه سقوط عظيمه ، قررت اكون واقعيه ، ولاني قررت اكون واقعيه ، قلت طيب من باب الاحتياط الكلي بلغه المحامين ، اكتئب مبدئيا وبعدين ادور بقي علي اسباب اكتئابي ، واكيد مش حاغلب ، لان البلد منيله بستين نيله وحالها لايسر عدو ولا حبيب ، فلابد لابد حالقي مليون حاجه تقرف تخليني اكتئب ، ولما حاكتئب ان شاءالله ، حنبقي كلنا في الهوا سوا ، مكتئبين ومتنيلين علي عينا وعين اهالينا !!!!

خالص انا واقعيه جدااااااااا ، واقعيه خالص ، ومكتئبه كمان ، هههههههههه ، لا كده بقي استفزاز رهيب ، محدش مكتئب يضحك من غير سبب الا لما يكون قليل الادب ، المكتئب الاصيل يضحك ضحكات مريره يعقبها بكاء مرير ، لان مافيش حاجه تضحك والحياه اساسا زي الزفت ، لكن لما واحده لسه جديده في الاكتئاب تضحك ، اولا تبقي قليله الادب ، ثانيا تبقي لسه ماتعلمتش اصول الاكتئاب !!!! ولاني بقيت خلااااااااااص واقعيه ، ولسه بادية في الاكتئاب جديد ، لازم اتعلم اصول الاكتئاب ، اصل الاكتئاب ده صنعه مش كده جهجوني ، هو اي حد يعرف يكتئب ، لاااااااااااااا والف لا ........... الاكتئاب له اصول ومحتاج مجهود عظيم علشان تعرف توصل فيه للدرك الاسفل !!!!

اول اصل من اصول الاكتئاب ان مافيش حاجه ابدا تعجبني ، اي حاجه ، كل حاجه ، ماهو لو اي حاجه عجبتني ممكن هذه الحاجه اللعينه تطلعني من ام الاكتئاب الواقعي اللي انا عايزه اغرق فيه واعوم في بحره الاسود والمهبب مع بقيه الناس ، اذن ، القاعده الاكتئابيه الاولي ان مافيش اي حاجه تعجبني ، ولو عجبتني اي حاجه غصبن عني ، لازم لازم لازم اقاوم هذا الاعوجاج والانحراف غير الواقعي وافتش فيها واكتشف ببصيره اكتئابيه عظيمه في النهايه ان اللي عجبني ده مزيف وابن وسخه ومش حلو ومش كويس و.......... الحمد لله مابقاش عاجبني !!!! يعني لو فريقنا القومي قرر يكسب بطوله افريقيا ، ماينفعش اهيص زي الناس التافهه اللي شبه السحالي وانبسط واضحك ، لا ، لازم اتخلص من ثوب السحليه شويه وادفن نفسي بقوه داخل ثوب الانسان الواقعي ، فبدل ماانبسط من ام انتصار فريقنا القومي ، لازم الاقي حاجه تنكد علي - وعلي الناس كمان بالمره ينوبني فيهم ثواب - في هذا الانتصار ، يعني ممكن اقول ، ان فريق الكوره ده عملوه علشان يلهونا عن مشاكلنا الرهيبه اللي مالهاش حل ، وممكن اشتم الشعب الحقير شويه اللي انبسط من الكوره واقوله يااخي ماتتنيل علي عينك وخلي عندك دم ، كوره ايه اللي بتبسطك دي ، كوره ايه ، انت ماتعرفش ان الاسعار غليت وان الانتخابات مزوره وان الحكومه مستبده وان حسن شحاته بياخد فلوس كتير مش شحات زيك وزي اهلك ، ممكن اقول كمان ، ان الكوره لعبه تافه يهتم بيها شعب سطحي تافهه مااتعلمش في المدرسه انه يهتم بالباليه والموسيقي الاوبراليه والفن التشكيلي ، وطبعا ده لان نظام التعليم بايظ وحقير ومعتمد علي النقل وليس اعمال العقل ، وممكن اوسع اسباب الاكتئاب اكتر واقول ان نظام التعليم الفاشل خرج بهايم من المدارس والجامعات ، والبهايم دول قاعدين عاطلين ، ليه ، لانهم اولا بهايم ثانيا لان التعيين في الوظايف بالكوسه والواسطه والمحسبويبه وبسرعه قبل ماانسي اشتم الحكومه ، ليه ، من غير ليه ماهو فيه يجيي اتنين مليون مليار سبب تتشتم بسببهم ، اشتمها لانها سبب فساد التعليم والمحسوبيه والوساطه والرشوه ، و...... ياشعب معندوش دم ، بدل ماتنبسطوا من الكوره ، حرام عليكم قله الاحساس اللي انتم عايشين فيه ده وروحوا اتنيلوا انتحروا احسن ، واهي اهي اهي اهي ، بقيت واقعيه علي الاخر واكتئابيه جداااااااااا !!!!

تاني اصل من اصول الاكتئاب العظيم ، اني دايم اكبب المشاكل فوق راسي ، اكببها وامشي بيها حاسه اني متكسحه من كتر مالمشاكل متكببه فوق راسي ، ماهو لو نفضت للمشاكل وعشت عادي كده ، ممكن انسي الواقعيه والاكتئابيه والسوداويه وارجع تاني سحليه حقيره مبسوطه من غير سبب !!! لا والف لا ، لابد من تكبيب المشاكل فوق الراس ، ومهم جدا نعرف حنبتدي نكببها منين من انهي حقبه تاريخيه حنكبب المشاكل ونمشي ، ممكن نقول من ايام الثوره ، اللي مشت الملك الكويس وجابت الضباط اللي مش احرار ، سرقوا قصور الملك والتماثيل واتجوزا الستات بتوع العائلات الارستقراطيه وسرقوا البلد ونهبوها وبسرعه نخش علي نكسه سبعه وستين وضباط الطيران اللي كانوا بيحششوا لما اسرائيل ضربت مطارتنا وطيارتنا علي الارض ، وبسرعه بسرعه نشتم في السد العالي اللي خلي الارض تطبل وحرم الارض من طمي النيل فبارت ، وبسرعه ننقل علي حرب تلاته وسبعين ، انتصار ايه ، ده الهبل اللي فاهمينه انتصار ، دي هزيمه نكسه وكسه ، الثغره والجيش اللي عدي للضفه الغربيه ولولا ستر ربنا كان زمانهم احتلوا القاهره ، وبسرعه نشتم كامب دايفيد حبه ، وبسرعه نشتم قله الديمقراطيه ونشتم الحراميه الصيع بتوع الانفتاح وقبلها نشتم الضباط اللي مش احرار بتوع الانغلاق وبالمره نشتم الاتحاد السوفيتيي ( يعني ايه مابقاش فيه حاجه اسمها اتحاد سوفيتي ، اذا كان هو سبب البلاوي في مصر ، ليه ، لا مش فاضيه اقولك ليه ، المهم انه لازم يتشتم ، طيب خلاص كده حل عظيم ، نشتم الاتحاد السوفيتي المرحوم ) خلصنا شيتمه في حرب تلاته وسبعين وكامبد دافيد ، نشتم مين نشتم مين ، نشتم الحكومه والاحزاب والمعارضه والتلفزيون التافه والسينما الهابطه والاغاني السخيفه ، نشتم المحظوره ونشتم اقباط المهجر ، نشتم الحزب الوطني اللي بينجح بالتزوير ونشتم البرادعي اللي سافر بره ومش راضي يرجع وطبعا نشتم التوريث اللي حيورثوه ونقول الانتخابات بتتزور لانها بتتزور ولانها بتتزور مش حنشارك فيها ولاننا مش بنشارك فيها اصواتنا بتتزور فنشتم الحزب الوطني اللي خد اصواتنا وزورها ولو حد اتفلحس وقال ليه ماانتوش ايجابيين لازم نقوله بمنتهي الوضوح ان وجودنا زي عدمه واصواتنا زي عدمها وعمرنا ماغيرنا حاجه ولا حنغير حاجه يبقي ليه بهدله اللجان الانتخابيه والطوابير وفيه راي واقعي عظيم جدا ، بيقول ان احمد زي الحاج احمد وكله زي بعضه واللي تفتكره موسي يطلع فرعون ومهما انتخبنا البلد بايظه بايظه ومافيش فايده ومافيش امل !!!!

نرجع لموضوع الشيتمه ، طبعا نشتم الاقتصاد الراسمالي الحر اللي الحكومه الرشيده بتتبع منهجه ضد الفقرا ، ونشتم اشتراكيه عبد الناصر لانها سبب خراب البلد ونشتم اشتراكيه عبد الناصر ونقول انها مش اشتراكيه اساسا ، نشتم الانفتاح والانغلاق ، نشتم الاشتراكيه والرأسماليه ، نشتم الديمقراطيه والديكتاتوريه ، نشتم الاعتداء علي حقوق الانسان ونشتم بوتيكات حقوق الانسان ، نشتم المرأه اللي عايزه حقوق ونشتم المرأه اللي خاضعه ومستكينه وراضيه بقليلها ، نشتم الشوارع الوسخه اللي مليانه زباله وبعدين نرمي الزباله في الشارع لانها وسخه وسخه ، نشتم قانون المرور المتعسف اللي غلي قيمه المخالفات وبعدين نشتم ازمه المرور اللي مكرهانا في عيشتنا لان الشوارع زحمه ، نشتم الونش بتاع المرور لانه بيكلبش العربيات ونشتم العربيات اللي راكنه صف تاني وبعدين نركن صف تالت لان البلد بايظه بايظه وماجتش علي ، نشتم انهيار التعليم في المدارس وندي العيال دروس خصوصيه ونقول لهم احفظوا مش مهم تفهموا ولما يطلعوا حافظين ومش فاهمين نعيط لاننا شعب مابيفهمش حاجه ولما المراقبين في اللجان الانتخابيه يمنعوا الغش نزعل ولما الامتحانات تيجي صعبه نزعل والعيال تنتحر ونشتم وزير التعليم واللي بيحطوا الامتحانات وعلي راي طالب عبقري قال في الجرنان ، الامتحان صعب والاسئله محتاجه نفكر فيها ، يانهار اسود ، نفكر فيها ، هي حصلت كمان نفكر فيها ، وبعدين الاهالي تشتم الوزير لانها مش عايزه العيال تفكر عايزه العيال تنجح وهما يعني اللي فكروا عملوا ايه ، فالوزير مشكورا ينجح كل العيال فالاهالي تنبسط شويه وبسرعه ترجع تشتم فيه تاني ، طب ماهو كان من الاول ، جبت الامتحان سهل وخلاص ، وزرا ماتجيش الا بالشتيمه ، نشتم دول الخليج اللي بتعذب المصرين بالكفيل وبعدين نبوس رجل الكفيل علشان يرضي يشغلنا ونقبل نغير الوظيفه والمحاسب يبقي سواق ونقبل ننام عشره في اوضه ونقول اي مرتب هناك احسن من اي مرتب هنا ولاننا بناخد ااقل مرتبات هناك يعاملونا معامله حقيره فنشتم الحكومه اللي سايبه اللي يسوي واللي مايسواش يعامل شعبها معامله حقيره ، لو الحكومه قالت للناس اللي هناك ارجعوا لانكم بتتعاملوا معامله حقيره غالبا الناس اللي هناك حينزلوا فيها شيتمه ويقولوا لها المعاملة الحقيره مع الفلوس احسن من المعامله الحقيره من غير فلوس ، والغرق علي شط ايطاليا بحثا عن اليورهات احسن ميت مره من العيشه في مصر من غير يوروهات ، وبعدين نشتم مين نشتم مين ................................ انتم وشطارتكم بقي !!!

عايزين تشتموا صدام حسين لانه حارب ايران وماوجهش قوته العربيه ضد اسرائيل ممكن ، عايزين تشتموا الجزاير لانها طلعتنا من تصفيات كاس العالم ممكن ، عايزين تشتموا الصين لانها احرجتنا وعملت دوره اوليمبيه رائعه رغم اننا زيها اصحاب حضاره وتاريخ لكن احنا متنيلين علي عينا برضه ممكن مايجراش حاجه ، عايزين تشتموا الحزب الوطني لانه بيزور الانتخابات مايجراش حاجه ، عايزين تشتموا الاحتباس الحراري لانه سخن الجو والشمس نار والتكاييف مش عامله حاجه ممكن وممكن برضه بالمره تشتموا في الحكومه تاني لان التكاييف غاليه فهي متواطئه مع الاحتباس الحراري علينا !!!!

اذن نكبب المشاكل فوق راسنا ونمشي ، لا مافيش حاجه عدله نجيب سيرتها ، لان اي حاجه عدله نجيب سيرتها تبوظ الواقعيه والمود الاكتئابي العظيم ، وبعدين حاجه عدله ايه يعني ، ماعندناش حاجه عدله اساسا ، قطر الصعيد اتحرق والعيال غرقوا في البحر لما قرروا يسافروا اوربا يجيبوا يورهات وييعيشوا عيشه فل مش عيشه سودا زيينا والعباره غرقت ، ورئيس وزراء اليابان استقال لان شعبيته قلت واحنا رئيس وزرائنا رايح يتجوز وسايبنا نخبط راسنا في الحيطه ، وافريقيا حتقطع عنا النيل لاننا معندناش بعد استراتيجي ولا فاهمين حاجه والمدرس ضرب التلميذ فمات والعيش فيه طوب و الراجل اللي معندوش دم قرر يعمل تبادل زوجات علي الانترنت ، معندناش حاجه عدله ابسليوتلي ، المعارضه السياسيه ضعيفه ، لا هي مش ضعيفه ، هي الحكومه بنت الفاصوليا هي السبب في ضعفها ، بتحاصرها وبتمنع الناخبين يصوتوا ليها او عليها ، والمعارضه هزيله مش راضيه تلتحم بالشعب والشعب ابن فاصوليا كمان مش راضي يلتحم بالمعارضه لانه شعب مش عارف مصلحته والناس عماله تتكلم وبس ، محدش راضي يعمل حاجه مفيده ولما حد يجيي يعمل حاجه مفيده مايعرفش يعملها ، ليه ، لان الشعب متعلم وحش وهو متعلم وحش لان نظام التعليم بايظ ونظام التعليم بايظ ليه لان الحكومه السبب والحكومه السبب ليه ، لان الحكومه مابتحبش الشعب وعايزاه يفضل جاهل علشان تعرف تحكمه وتتحكم فيه !!!!!!!!!

اهي اهي اهي اهي ، كده انت ميت فل وسته وتسعين ، كببت المشاكل كلها فوق راسك لغايه ماضغطك علي وراسك الحمد لله حتنفجر ، ادي الانجازات ولا بلاش ، تبقي واقعي سودوي اكتئابي ضغط يعليا راسك توجعك نافوخك ينفجر !!!!!!!!! فنعيط ونعيط بقوه جدا لان واحد اكتئابي لم يتحمل الاكتئاب وماااااااااات !!! اخث عليه اخث ، يموت ويستريح ويسبنا نكتئب لوحدنا!!!!!!!!!!!!!!!!!!! مهم جدا لكل الاكتئابيين واللي حيبقوا ببركه دعا الوالدين اكتئابيين بسرعه ، انهم مايشوفوش حاجه عدله ابدا ، دايما يشوفوا نص الكوبايه الفاضي او تلت ارباعها ، ولو اتعموا في عينهم وشافوا حاجه عدله بسرعه بسرعه يعودوا لقواعدهم سالمين ويكتئبوا تاني وبسرعه !!! لان مرض اللاوقعيه ممكن يتنشر بسرعه جدااااااااااااا في الدنيا ويلونها ويخليها بمبي والعياذ بالله !!! وهي لازم تبقي سودا علي الكريم وسودا برضه علي اللئيم!!!!

اللي ناجح في شغله اوعي ينبسط !!! وتنبسط ليه يابعيد ياللي معندكش دم !!! وكل المصايب دي حواليك !!!!
اللي مبسوط بعياله لازم يتعالج ويبطل ينبسط !!! وينبسط ليه اذا كان عيالك اللي انت فرحان بيهم مستقبلهم اسود ومنيل وطريقهم مسدود مسدود مسدود !!!
اللي اشتري جزمه جديده وفرحان بيه ، لازم نفكره ونقوله ان الجزمه الزفت الجديده حتمشي بيها علي ارض منيله بنيله لان الحكومه مغمضه عينيها عن السرقه فالمقاول الحرامي سرق الاسلفت وبقت الارض كلها حفر ونقر والجزمه الجديده بسرعه ان شاءالله حتبوظ وساعتها حتكتئب وتتنيل علي عينك ، فاحنا راينا تاخدها من قصيرها وتكئتب من دلوقتي !!!!
اللي بيحب مراته ومراته بتحبه ومبسوطين ببقي ، لازم لازم مانسيبهمش مبسوطين ، ليه ، لان لما الفقر بيخش من الباب الحب بيهرب من الشباك ، ايه ، ماهماش فقرا !!! كمان مبسوطين ومش حاسين بالفقرا اللي حواليهم واللي عيشتهم زفت وطين وقطران ، ياقله الدم ياربي ، وبعدين بكره مراتك تتخن وانت بكره جوزك يصلع ويشخر وتبطلوا تحبوا في بعض ولما حتبطلوا تحبوا في بعض حتتقهروا ولما حتتقهروا حتكرهوا حياتكم ، الله ، ماقلنا من الاول ، مابتسمعوش الكلام ليه ، ماتكرهوها بقي بسرعه علشان نونس بعضنا كلنا ونبقي مكتئبين كارهين حياتنا مع بعضييييييييينا !!!!
انت ياافندي ياللي شبه السحليه انت وماشي تضحك من غير سبب ، مشكلتك ايه ، بتضحك ليه قوي كده ، قريت نكته ضحكتك ، ياتافه ، وايه يعني نكته ضحكتك ، ماهوفيه مليون نصيبه ماتضحكش ، اشمعنيي سبت النصايب كلها وضحكت علي النكته ، كله من ثوره يوليو الي طردت الملك ونيمت القوالب وقومت الانصاص وخلت الناس بتضحك علي النكته ، ياشيخ روح شوف حالك كده واتنيل علي عيينك !!!
وكمان ليكم نفس تتفرجوا علي التلفزيون ، معندكوش دم صحيح ، حتشوفوا ايه في الزفت التلفزيون ، برامج تافهه ، ايوه تافهه ، بتبسطكم ، ااقول ايه ، ماهو انتم تافهين زي البرامج دي بالضبط ، بتحب عالم الحيوان ، ياعم روح ، ماتشوف عالم الانسان المنيل شكله ايه ، بتحب ام كلثوم ، ام كلثوم دي زي الافيون بالضبط خدرت الشعب المصري وهي السبب في النكسه لان الناس اتعودت تسمعها وتشرب حشيش وتنبسط ، ولان الناس انبسطت نسيت انه لاصوت يعلو فوق صوت المعركه ، فلما صوت المعركه دب في ودانهم ماسمعوهوش وهكذا وصلنا لكل النتايج السوده اللي احنا عاييشين فيها دي!!
انتم يابني ادمين ، ياللي شبه البني ادمين ، مبسوطين مبسوطين ليه وعلي ايه ، علي العراق علي فلسطين علي غزه علي ايه علي خيبتكم ، مبسوطين من ايه ، علي الغلا علي الفساد علي قله الاخلاق علي الفساد والرشوه ، مبسوطين من ايه وعلي ايه علي خيبتكم ، الشوارع كلها زباله والمرور زحمه واللنبي بوظ السينما وسعد الصغير بوظ الاغاني والحزب الوطني بوظ الحياه السياسيه وحقوق المرأه والخلع بوظوا النسوان وفيلم النوم في العسل احرج الرجاله ويسرا ان شاءلله حتطلع لكم في مسلسلات رمضان عشر سنين كمان ، مبسوطين من ايه وفرحانين علي ايه ، علي خيبتكم !!!

اذن ................ القاعده الاصوليه الاولي في فن الاكتئاب انك ماتشوفش حاجه عدله !!!! القاعده الاصوليه الثانيه في فن الاكتئاب انك تكبب المشاكل كلها فوق راسك وتحس انك اتكسحت ومايبقاش منك اي رجا او فايده !!! القاعده الاصوليه الثالثه انك تشوف نص الكوبايه الفاضي وممكن كمان جدعنه يعني تدلق نصف الكوبايه المليان علشان تبقي طبلت وهبتت علي روس الكل !!! القاعده الاصوليه الرابعه في فن الاكتئاب انك تشتم كل حاجه واي حاجه ومايعجبكش العجب ولا الصيام في رجب وماتبقاش عارف انت عايز ايه او يتعمل ازاي واي حاجه تتعمل ماتعجبكش وتتمني عكسها وحتي لو جابو لك لبن العصفور برضه مايعجبكش لانهم ماجابهوش خالي الدسم ...

اهم القواعد الاصوليه في الاكتئاب هو السخط من كل حاجه واي حاجه والاحساس بالمراره من كل حاجه واي حاجه ولما تتنيل علي عينك وتضحك تقول الله مااجعله خير ، ليه ، لان ان شاء الله المصايب كلها حترف علي دماغك انت وكل اللي تعرفهم ، دي الروح اللي لازم تعيش بيها طول الوقت ، مافيش فايده وممكن كمان غطيني ياصفيه وصوتي !!!!

اوعي تفكر مجرد تفكير انك تعمل اي حاجه ايجابيه تقاوم بيها روح الواقعيه والاكتئاب ، اولا لانك بالضروره حتفشل ، ثانيا لانك لانك لو قررت تعمل اي حاجه مفيده او ايجابيه حتفوقونا وتخروجنا من حاله الاكتئاب العظيمه التي نسعي اليها بكل قوتنا وجهدنا ، باختصار ولانك حتفشل حتفشل ولان مافيش فايده يبقي ليه بقي تحاول تعمل اي حاجه مفيده ، ياعم تعالي تعالي استخبي تحت اللحاف معنا وانت ياصفيه صوتي ، صوتي قوي قوي ، غطيني وصوتي !!!!!!!!

ولاننا مكتئبين ، تعبانين ، قرفانين ، مكسحين ، مش عايزين نعمل حاجه ولا لينا نفس نعمل ايه حاجه ، بنتحول لمن غير مانحس او حتي واحنا حاسين لصفر كبير مالوش لزمه وده طبعا لاننا مكتئبين مايفرقش معانا ، نتحول لصفر علي الشمال ، لاحد يعمل حسابنا ولا يراعي خاطرنا ولا يفكر فينا ولاننا مكتئبين ، تعبانين ، قرفانين ، فالشتا زي الصيف والتخن زي الرفع والقبح زي اللا قبح ونسمع اي حاجه وناكل اي حاجه ونتقرف من اي حاجه ، وبعدين يجي حد فلحوس يقولك احنا اللي سلبيين مابنعملش اي حاجه مفيده وسايبين الدنيا تخرب وقاعدين ننعق زي الغربان ، حنقوله ياعم الفلحوس انت حل عن قفانا ، ماتخرب ولا تولع يفرق ايه ، ونشتم ونشتم ونشتم ونشتم ، والضغط يعلي ، واللي ياخد ادويه اكتئاب ياخد ، واللي بيحشش يحشش اكتر ، واللي بيشرب خمره يدمن ويتدهول ومايدراش بنفسه ، والنسوان تاكل كتير وتطخن ، ودكاتره الرجيم تشتغل ودكاتره النفسي تشتغل وتجار الحشيش يهيصوا و.................... تفضل الانتخابات تتزور ويفضل المرور زحمه ويفضل التعليم بايظ ومتنيل و............ نحمدك يارب ان كل حاجه حتفضل بايظه علشان نفضل علي درب الاكتئاب سائرون نشتم ونشتم ونشتم ونشتم !!!!!!!!!

ويانهار اسود ومنيل بستين نيله ، ده انا بقيت واقعيه بشكل رهيب !!!!!!!!!!!!!! وبقيت طبيعيه بشكل رهيب وبقيت اكتئابيه بشكل رهيب !!!! كده بقيت مثقفه جدا زي كل المثقفين المكتئبين ، وتخلصت من ثوب السحليه وتفاهه الشعب وحب الكوره !!!! كده بقيت تمام جداجدا !!!!!!!!!

لا لا ، اخرس انت وهو ، محدش يقولي عمار يامصر !!! عمار ايه وعباس ايه ، الحاله نيله نيله نيله !!!! لامحدش يقولي علي الحجار كويس ، ايه يعني كويس وسط مليون حاجه زفت !!! محدش يقولي حسن شحاته خلي فريقنا ياخد كاس افريقيا 3 مرات ، وايه يعني لكن طلعنا من كاس العالم !!! محدش يقولي ان الشعب المصري رغم كل شيء لم يفقد روحه وجدعنته وحبه للحياه !!! لان الليى حيقول كده يبقي حالته العقليه صعبه جدا ولسه مابقاش واقعي وان شاءالله لما حيبقي واقعي زيي حيشوف ان الشعب زفت وروحه زفت وحكومته زفت ومعارضته زفت ومثقفينه زفت وفنانيه زفت والنيل زفت والعيشه زفت والكبار زفت والصغييرن زفت والستات زفت والرجاله زفت و........... وانا وانت زفت وستين زفت كمان !!!!!!!!!!!!

اهي اهي اهي ، زهقت بسرعه قوي من الواقعيه !!!! زهقت جداااااااااااااااا !!!
انا شايفه الدنيا جميله والبشر حلوين وطيبين وجدعان وروحهم حلوه وقلبهم علي جارهم واخوهم ووقت الجد تلاقيهم مافيش احسن منهم ولا زيهم ، شايفه ان الوحش النهارده حيتحسن بكره والمشاكل مهما كترت ليها حلول ، شايفه ان الدنيا فيها الوحش والحلو ، الحلو نمسك فيه بايدينا واسنانا والوحش نحاول نصلحه ولو معرفناش نحاول تاني وعاشر ، شايفه ان الانتخابات بتتزور لكن عندي بطاقه انتخابيه وباروح كل انتخابات ، جايز صوتي النهارده مالوش قيمه بكره اكيد حيكون له ، شايفه اني لما ابذل مجهود في شغلي وابقي جد ابقي بحاول اغير الدنيا حتي لو مااتغيرتش النهارده لكن اكيد حتتغير بكره ، شايفه صحيح ان نظام التعليم بايظ لكن شايفه ان فيه كتاب وادباء وفنانين في مصر وكل يوم بيزيدوا ، شايفه ان دول افريقيا مش حتعرف تقطع النيل عن مصر مهما عملت ، شايفه ان فيه ناس في البلد دي حلوين وجدعان وبيحبوها وبيحاولوا يحسنوا اوضاعها ولو اتكسروا النهارده بكره حيقوموا تاني علي رجليهم ، انا شايفه ان اجيال الشباب احسن من اجيالنا بس بشرط نبطل نبوظهم ونبطل نكئبهم ونسود الدنيا في وشهم، انا شاييفه بجد وبحقيقي ان عمار يامصر ، شايفه ان الذوق العام بيفسد لكن فيه ناس بتقاوم وبتتمسك بالذوق والجمال والرهافه ، شايفه ان فيه غنا هابط لكن فيه اغاني ومطربين محترمين وان الناس بتحاول وتحاول ، شايفه ان عمار يامصر ، حتي لو كنا عايشين في عصور الانحطاط المملوكي النهارده ، فمسيرها تخلص ، لما نقاوم ونرفض ونتمسك بالحياه ونحاول نبقي احسن ، ده كلام رومانسي فاشل لكن بيدي الناس امل في الحياه ، واكيد احسن من الواقعيه السودا والفوضي الخلاقه وحريق القاهره !!!

علي فكره عصور الانحطاط المملوكي القديمه خلصت وماكسرتش مصر ولا خنقت روحها واتكتب عنها سطرين في كتاب التاريخ ، انها كانت وانتهت وبقيت مصر !!!!!!!!! ومنه لله ناظم حكمت لما قال ( ان اجمل الايام التي لم تاتي بعد ) ومنه لله صلاح جاهين لما قال ( حاسب من الاحزان وحاسب لها ، حاسب علي رقابيك من حبلها ، راح تنتهي ولابد راح تنتهي ، مش انتهت احزان من قبلها ، عجبي )

تصدقوا بايني احب اكون سحليه علي اني اكون واقعيه !!!!!!!!!
اصدقائي المكتئبين باعتذر ليكم جدااااااا ماقدرتش ابقي واقعيه اكتئابيه زيكم !!!
اصدقائي المكتئبين باعتذر ليكم جدا وبصراحه باديكم العذر انكم لاتبصوا في وشي ولا تصبحوا علي !!!!
لكن للاسف انا بحب الحياه وباحب مصر وباشوفها امي وستي وتاج راسي مهما كانت ومهما حصل ودايما دايما عندي امل عايشه بيه وحاموت بيه كمان !!!!!!!
ههههههههههههه حالتي ميئوس منها صح ، طب دوروا لكم بعيد عني عن حد ينفع يكتئب وبسهوله وهم كثر بالمناسبه!!!! باي باي ياواقعيه باي باي يااكتئاب !!!
وعمار يامصر !!!!!!!!!!!!!!