من غير عنوان !!!!

اولادك ليسوا لكم
اولادكم ابناء الحياة

جبران خليل جبران



اهدي كلماتي لكي يانني عيني
وادعي ربي يسعدك

يعني كده خلاص ؟؟؟؟؟؟؟؟ حابطل ااقول لها حترجعي امتي ؟؟؟ حابطل افضل صاحيه لغايه ماترجع !!! حابطل اخش اوضتها قبل ماانام ، الاقي الغطا واقع من فوقها اغطيها وابوسها وانام !!! حابطل اسمعها الحصص السبع كل يوم ، سوقي علي مهلك ، ماتتاخريش ، خلي بالك من نفسك ، باطلبك مابترديش علي ليه ، ماتكليش بره ، اتغطي كويس ، خدي جاكته معاكي ، ماتغسليش شعرك وتخرجي بيه مبلول !!!! حابطل افكر فيها باعتبارها في اولي حضانه وحاروح اجيبها من الحضانه حالاقيها اتخطفت ، فطول الوقت احفظها اسمها ورقم التليفون وعنوان البيت واسم بابا ايه واسم جدو ايه واسم ماما ايه ، خلاص حاصدق بجد انها كبرت وانها خلاص خلصت الحضانه والابتدائيه والاعداديه وخدت الثانويه العامه واتخرجت من الجامعه واشتغلت و........... حاصدق انها حتمشي من بيتي وتتجوز ، ويكون ليها بيت وتلعب ربات بيوت وتطبخ لنا وتضايفنا وتجيب لنا احفاد صبيان وبنات ........ حاصدق كل ده مره واحده كده !!!!

كده خلاص .... البنت الصغننه كبرت .... اللي نزلت اشتريت لها سلوبيت بمبه عليها ارنب ، واشتريت لها عضاضه علي شكل قمر تعض فيها واضحك واكركع واقول قمر بيعض قمر !!!! البنت الصغننه اللي وديتها الحضانه وهي عمرها 4 شهور ، اسيبها هي وقلبي مع ماما ديدي الساعه 8 واروح الشغل وارجع جري الساعه 4 استلمها ، تنط في حضني ، اضحك واحس ان الحياه جميله !!! البنت الصغننه اللي اشتريت لها فستان العيد وهي عندها 7 شهور وصممت احط لها في راسها فيونكه ستان والبسها جزمه جديده وزعلت من ابوها لما قال ماتفهمش في العيد واتخانقت معاه وقلت له لا تفهم وحتفهم والعيد يعني العيد انا مش حاضحك عليها والبسها هدوم قديمة !!!

البنت الصغننه كبرت .... اللي اسنانها اتاخرت تطلع فكلمت الدكتوره وانا باعيط ، بقي عندها سنه ومعندهاش اسنان ، فضحكت الدكتوره وقالت لي ، عمرك شفتي طفل ماطلعش له اسنان ، حتطلع ، وياسلام بقي يوم ماكنت باكلها بالمعلقه الصغيره وخبطت السنه اللي لسه حتطلع في المعلقه ، كان فرح !!!! بنتي اسنانها حتطلع !!!!!! البنت الصغننه اللي خرجت بيها لاول مره وهي عمرها شهر ، شيلتها في حضني ، راسها من ناحيه ورجليها من ناحيه ، وكنت ابص علي صوابعها الصغننه واسال نفسي ياتري الصوابع الصغننه دي ، حتكبر زي بقيه الناس ، النونوة اللي كانت لما تعيط او تصرخ ، افتح كتاب دكتور سبوك وادور علي السبب فتتريق علي امي وتقولي كتالوج البنات ، النونوة دي كبرت خلاص ، معقوله ؟؟؟ النونوة اللي كنت اخش عليها وهي نايمه عندها شهور اصحيها علشان اتاكد انها لسه عايشه ، اول ما تعيط ابتسم واسيبها في حالها !!!

البنت الصغننه اللي كانت بتحب الزتون وهي عندها سنتين لغايه مابقي عندها املاح والدكتوره سالتني ، حضرتك يامدام بتاكليها ايه بالضبط !!! البنت اللي خفت اشيل لها اللوز وقلت لا البرد اسهل من العمليات وفضلت لغايه دلوقتي تلومني كل مايجي لها برد ولوزها تلتهب وزورها يقفل ، البنت دي كبرت خلاص !!!!

مفروض اصدق صح !!! حاضر حاصدق!!!! البنت اللي كنت باحكي لها حدوته قبل النوم وافضل اوطي في صوتي واتصورها نامت واقوم اتسحب من جنبها وعند الباب تسالني وبعدين فاضحك وارجع اكمل الحدوته واستناها تنام فانام وهي لسه بتسالني بعدين !!!البنت الصغننه اللي اشتريت لها مريله الحضانه وجزمه بتلمع وشراب ابيض بكور ، كبرت وال ايه حتتجوز بعد يومين !!! وبعد مااشتريت لها مريله الحضانه والجزمه اللي بتلمع ، اشتريت لها فستان الفرح والتاج والطرحه !!! وزي ماخدتها من ايدها وسبتها في المدرسه وهي ضحكت وعملت لي باي باي ، حاخدها من ايدها النهارده واسلمها لعريسها وهي بتضحك وفي منتهي السعاده وبرضه حتقولي باي باي .... وزي ماخرجت من باب المدرسه اكمل حياتي ، النهارده حاخرج من باب الفندق وبرضه اكمل حياتي .... اه هي جزء من حياتي لكن لازم لما تقولي باي باي ، لازم اعرف انا كمان اكمل حياتي !!!

البنت اللي رحت احضر حفله تخرجها من اولي حضانه ، فعيطت لانها بتغني ( فراريو جاكو ) وبتلف في صوابعها وسعيده زي كل الاطفال !!!اللي اشتريت لها لبس المدرسه زي الكبار لما كبرت وبقت في سنه اولي ابتدائي ، اشتريت لها جونله رمادي وقميص ابيض وكرافته حمرا بتتربط زي كرافتته بابا !! .. اللي كان اتوبيس المدرسه بيجي ياخدها وانا ساكنه في فيصل وهي في اول حضانه ، ياخدها الساعه 6 صباحا فاصحيها والبسها واشيلها والشنطه واقف علي اول الشارع في الضلمه استني الاتوبيس واسلمها للمشرفه نايمه وارجع استلمها الساعه 5 مساءا في اخر الدورة بعد كل العيال مايروحوا برضه وهي نايمه !!!! البنت دي كبرت وال ايه حتتجوز خلاص !!! ماشي حاصدق !!!

وزي ما عيطت وهي بتغني في حفله الحضانه ، وزي ماعيطت واسمها بيتنده وهي ماشيه في طابور العرض يوم حفله تخرجها من الجامعه وهما بينادوا علي اسمها وهي طالعه الثانيه علي الدفعه ومتخرجه بمرتبه الشرف ، زي مادموعي بتنزل شلال لما باتصورها النهارده ماشيه في الزفه جنب عريسها ... رحله فرح وعياط ، فرحه وشجن ، قلق وسعاده ، خوف عليها وفرحه بيها !!!

هي دي رحله الامومه والايام والسنين!!!! البنوته النونو ، اللي علمتها ان الالف عصايه والبه طبق تحت نقطه والته طبق جواه رزتين والجيم حضن ماما جواه بيبي والح حضن فاضي والخ عليها نقطه من فوق زي مابابا بيشيلشك علي دماغه من فوق ... والايه ابل والبي بوك والاحمر رد والاصفر يلو والاخضر جرين وعين يعني ايه اي ومناخير نوز وشعر هير ، واقعد احفظها احفظها ولما يجي حد اندها واقول احمر يعني ايه مناخير يعني ايه فتبص لي بصات معناها انا مش لعبه ومش حاقول حاجه وتفضل ساكته لغايه مالضيوف يمشوا !!!!النونو دي خلاص عرفت كل الالوان والاسماء والهندسه الكيمائيه وعرفت الرويعي ودرب البرابره ووكاله البلح وفهمت في المحاره والنقاشه و" السوكوله " ووضبت شقتها وخلاص حتتجوز ..... حاضر حاصدق!!!!!!

طبعا حاصدق ، لاننا اشترينا العفش وفرشنا البيت وحطينا السجاد وعلقنا اللوح ورصينا الاطباق والحلل وبعد ماكان فيه طقم حلل لعبه ومطبخ لعبه بنجيبهم من محل اللعب ، بقي فيه طقم حلل تيفال ومطبخ بجد وبيت حيتعمر بانفاسها وانفاس عيالها وتعيش فيه السعاده والفرحه والهنا .... يارب !!! يبقي انا خلاص صدقت ان النونوة كبرت ، والله العظيم صدقت!!

النونو الصغننه اللي الفت لها اغنيه ( الزرافه رقبتها طويله والفيل زلومته كبيره والقطه تقول نونو والكلب يقول هوهو والسمكه بتعيش في الميه والقرد ينطق والكتكوت لونه اصفر والفرخه منقارها احمر ) وحفظتها لها ولكل اطفال العيله ، اللي لما كانت تعطس كنت اغني ليها (امشي عنه روح للدبه نانو دي كبيره وتستحمل عنه ، روح يابرد طوبه للدبه الدبوبه وابعد عن حبيبي وكل اللي في سنه ) واللي لما نجحت في الثانويه العامه الاي جي بمجموع كبير وحتخش الهندسه دبحت لها خروف وعملت لها حفله واجرنا عدة من سيد بسبوسه وطبلنا وزمرنا وهيصا ورقصنا ........ النونو دي كبرت وحتتجوز !!! حاضر حاصدق !!!!! وبقيت اغني لها ماتزوقيني ياماما وخارجه من بيت ابوها ودقوا المزاهر يالا يااهل البيت تعالوا وغاليه ومهري غالي !!! خلاص صدقت انها كبرت ولسه كل يوم حاصدق اكتر !!!

النونوة اللي عيت وهي 3 سنين وطلع لها ( فقافيع في بقها وزورها ) وهاتك ياعياط ، والدكتوره عايزاني اديها دوا علشان الفقافيع تروح وهي مش راضيه تاخد الدوا لانه بيوجع ولما ماتاخدش الدوا الفقافيع تزيد فيوجعها اكتر فهي تعيط وانا اعيط ، لابد من شويه قسوه واكتفها واديها الدوا ، وهي تعيط وانا اعيط !!!!

النونوة اللي وهي نايمه مره ياحرام في اوضتها علي مرتبه علي الارض لان كان عندنا بنات عمتها بايتين معنا ، النونوة دي ، فجأ طار من فوق المكتبة بيت بلاسيتك كبير من بتوع العرايس ، طار ووقع عليها وهي نايمه ، ياحرام صحيت من النوم مفزوعه وشفتها مقطوعه ودم عمال يخر ، نافوره دم ، وصويت ، واجري علي اوضتها ، الاقيها بتصرخ والدم مغطي وشها وهي نايمه ، واستني اشوف ، مش عارفه اشوف لانها عمال تصوت ، خلاص مابدهاش ، امسكها واكتفها واشوف ، وباباها يجري بيها علي المستشفي وترجع شفايفها متخيطه وانا هاتك ياعياط !!!

النونوة اللي كانت الشغاله بتحميها وهي عندها 5 سنين وفجأ ضلفه الشباك الكبير ، تقع ، اه السلسله اللي ماسكها في الشباك تتقطع فجأ والضلفه تقع ، فين ، علي راسها وفجأ جسمها يعدي من القزاز اللي يسيب فتافيته علي جسمها العريان ، وصريخ وصويت من الحمام واخش الاقي الشغاله مذهوله وهي بتصرخ والقزاز متكسر وهي عيان ، ويانهار اسود ، وابوها يخش الحمام ويصرخ فينا محدش يتحرك ، ويمسك خرطوم الميه وبمنتهي القوه علي جسمها يطرد فتافيت القزاز والحمد لله ربنا ستر ، وشها سليم ومجرد جرح علي ضهرها عايز خياطه ، واجري ياجدع علي المستشفي و...... خياطه وعياط والحمد لله يارب .... وهي نسيت وبتلعب وانا مش عارفه ابطل عياط !!!

النونوة اللي كلموني وانا في الشغل في اخر مدينه نصر ، الحقي اغمي عليها ، كانت في بكالريوس هندسة ، مرهقه من كتر المذاكره ، لكن انا حسيتها من تاني في اولي حضانه والنونوة اغمي عليها ، يانهار ابيض ، واجري وسوق ويارب تستر ، وشويه انيميا وخلاص اتطمني ، حاضر اتطمنت ، لكن مش عارفه ابطل عياط !!!!!!!!!
النونوة اللي لما تكون عيانه ، اتسحب لاوضتها وانام جنبها واحضنها واراقب نفسها وهي تقولي بصوت واطي ، اطمني ياماما انا كويسه ، بركه ياحبيبتي انك كويسه ...... اطمنت ياحبيبتي بس نفسي ابطل عياط !!!!

النونوة دي ، بكره حتتجوز وبعده حتسافر ولما ترجع ، ترجع علي بيتها هي ، ولما حتوحشني حاكلمها في التليفون ، مش كتير طبعا لاني لازم اخرج من حياتها بالقدر والدرجه اللي يخلوها تستقل بجد عني وتعيش حياتها هي بجد مع شريك حياتها ، و............ حاجه غريبه قوي بصراحه يعني كل اللي بيحصل ده !!!

حاجه غريبه لكن مفروض اصدقها واقبلها واعيش واتعايش معاها !!!!
والله يرحمك ياعم جبران .... اولادكم ليسوا لكم ، اولادكم ابناء الحياة !!! والنعمه مصدقه ، والختمه مصدقه ، وحياه ربنا مصدقه ، لكن دي النونوة تاعتي الصغننه !!!! خلاص حتعيش حياتها بقي وانا اكمل حياتي معاها ومع اختها و....... حنتربس الباب وهي بره ، واول يوم رمضان مش حتاكل معانا لانها حتاكل مع جوزها وحماتها ، ويوم واحد من ايام العيد حتيجي تتغدي معانا ، ولازم نرتب وقتنا ، انا وهي نقول ، لازم نعمل ميعاد اسبوعي للقاء علي الاقل ،حاضر نرتب اكيد حنرتب ، وهي واختها يتفقوا ، لازم نكلم بعض كل يوم ، وتلمع الدموع في عينهم ، طبعا لازم نكلم بعض كل يوم .......... وياخبر علي الحياه وغرائبها !!!!!

النونوة اللي كنت اقول لها مين حبيبه ماما ، تقولي اااااااااااانا ، وترسم وتلون ، وتركب الباذل بدأب شديد وصبر رهيب ، اللي عمرها ماكسرت لعبه ، اللي واخده معاها لشقه الزوجيه جنب الصيني والفضيه والعفش الجديد ، واخده معاها امينه عروستها وهي عندها سنتين وقمر العروسه اللي بتنور في الضلمه ودهب الدبه الحمرا اللي بتحبها ، اللي لسه بتكركع زي ماكانت زمان وهي نونو وتضحك وتعيط زيي وتتخبط في بوز السرير زي امي وتعيط لما حد يصعب عليها وفي نفس الوقت قويه وحماله اسيه ، النونوة دي حتتجوز خلاص ، حاضر حاصدق ، والله حاصدق !!!!!!!!

هو ايه الموضوع ده اساسا ، نجيب نونو ، ونقعد نكبر ونربي ونذاكر ونشخط واحيانا نضرب ، والادب بيقول ، امسحي بقك وانت بتاكلي ومحدش يشرب ميه وهو بياكل علشان بتعمل كرش ، ماتكليش وتنزلي البحر معدتك تتعب ، ماتمشيش منكوشه ، كلمي جدك اسالي عليه ، البس شبشب في رجلك وماتمشيش حافية ، اغسلي سنانك قبل ماتنام علشان السوسه ماتكلهاش ، هاتي بوسه لماما اووووووووووومه ، لما تعملي حاجه غلط تقولي لي ، لان الكذب حرام ولان الكذب يوديك في داهيه ، ومهما عاقبتك انا برضه اللي ليكي ، ماتخافيش مني مهما حصل ، وحاضر ياماما وساعات نظره تقول كلامك مش عاجبني بس انا مؤدبه مش حارد عليها وساعات نتخانق بالادب وتقولي لا وانا اصرخ واتخانق وهي تبص لي وكبيرها تعيط وتسكت وصراع في صراع التربيه صراع والمذاكره صراع واختيارات الحياه كلها صراع ، لكن المركب مركبها هي ، هي اللي بتجدف وهي اللي الهوا بيودي شراعها يمين وشمال ، وانا باقول دايما يارب نجيها لكن بتخوض في بحار الحياه وعواصفها !!!

رحله طويله ، رحله فرح وعياط ووجع وسعاده !!! من اول ( واء ) لاولي حضانه لاولي ابتدائي ومن الابتدائيه والمجموع العالي وهديه النجاح للاعدايه ومن التعليم المصري للاي جي ، ومن كليه الهندسه لشركه البترول ، ولآ ، عيب تحطي مانيكير وانت صغيره ، ماليش دعوه مين بيعمل ايه ، لا حتتاخري عن ميعاد رجوعك البيت من النادي ، حتتحبسي اسبوع ومافيش خروج ، لا مافيش حاجه اسمها تباتي عند صاحبتك ، لا ماتبصيش لحد ، ماتقوليش اشمعني ، فلان بيته احلي من بيتنا وهو عنده عربيه واحنا لاي ، لانه اكبر منا واشتغل اكتر منا واوعدك لما نكون انا وابوكي في سنه حنبقي زيه واحسن ، مش مهم صحابك عندهم ايه المهم انت عندك ايه وانك تنبسطي بيه ، لا محبكيش تسافري مع اصحابك الواحد لازم يبقي خفيف ، معزومه في عيد ميلاد مين ، اه اساليه مين ابوه وبيشتغل ايه ، امه بتشتغل ولا لا ، ايوه اساليه ،قولي له ماما مجنونه وتحب تتطمن انا رايحه بيت مين ، ومليون درس ودرس ومليون حصه وحصه ، وانا بقول الحصص وهي بتكبر ، كل يوم بتكبر يوم ، ومن شمعايه فوق التورته وسوسه كف عروسه لسته وعشرين شمعه وابو الفصاده ، ومن مجموع عالي في الابتدائيه للتفوق مع مرتبه الشرف في الكليه ، لسفر تبع الشغل وقلبي يركب الطياره ويعلي وينزل وبنتي فيها ويارب تستر ، نونوة نرقص سوا يوم عيد ميلادها ونعيط سوا لما امي تموت ونشتري الكحك سوا وتقرف من الخروف وهو بيتدبح فتجري بعيد وانا اتريق عليها واقول لها طيب حاشوف لما يبقي عندك بيت حتعملي ايه ، ايام ورا ايام وسنين ورا سنين ، والنونوة اللي قررت احميها لوحدها وهي عندها 4 ايام ووقفت يوم حنتها ارقص قصادها امبارح في الشارع انا وهي بالعصايه علي نغمات المزمار في ليله حنتها ....

ايام ورا ايام وسنين ورا سنين ، عمري وعمرها .... وهي اجمل حاجه في عمري واللي بتعرف تسعدني لما تبتسم وتخليني عايزه انتحر لما تبوز ، اللي نفسي اجيب لها حته من القمر لكن الدنيا مش في ايدي ، وايدي قصيره ومش كل حاجه اعرف ااقطفها واجيبها ليها ، ايام ورا ايام وسنين ورا سنين و........ وانا باكبر واربي واتابع وااوجه وفجأ .... فجأ بمعني فجأ .... النونوة تاعتي حتتجوز بكره ، وحتلبس الفستان الابيض وتقف في الزفه ونرقص ونطبل واروح من غيرها و........... تبتدي هي حياتها هي وجوزها ويارب يطلع حنين وجدع ويخلي باله منها ، والي يدي بلحه لبنتي تنزل حلاوتها في قلبي !!!!

فيلم غريب .... الحياه غريبه .... ادوار وبنعيشها ، نبتديها صغيرين ونكبر وبعد مانكبر نرجع نصغر !!! وانا اوديها المستشفي وهي صغننه لان ودنها اتعورت واتقطعت ولازم غرزتين ، وهي تسوق بيا السنه اللي فاتت الفجر للمستشفي وتجري وانا عندي مغص وعماله ارجع ،وتبقي هي مامتي وتقولي ، ماتتوهميش ياماما ماعندكيش حاجه !!!! انا ابقي مامتها وبعدين تبقي هي مامتي وبعدين نبقي كل واحده منا مامه التانيه وبنتها !!!!

لما كنت باولد اختها والوجع علي اخره ، لقيت روحي بانده عليها ، هي الوحيده اللي ندهت عليها ، لا مامتي ولا جوزي ، يمكن كنت عارفه ان مامتي حتموت ، وابوها حيطلقني ، وانها هي اللي لي ، هي اللي حته مني ، هي اللي دمها دمي ولحمها لحمي ، ندهت عليها هي ، ندهت عليها كاني باقول لها الحقيني اقفي جنبي تعالي لي ، وجريت علي ولسه فاكره شكلها وانا داخله اوضه الولاده صغنونه عندها عشر سنين وبتاير صيفي جيب وتي شيرت تركواز ، شايفاها وهي بتجري عليها وانا بانده عليها وبيزقوا الترولي وانا باصرخ ، شايفه نظراتها وهي بتقولي ماتخافيش ياماما ، واول ماولدت جريت شافت النونوة وبقت اختها وبنتها ، وهي بقت اختها ومامتها !!!!

ولما كانت اختها بتعمل العمليه في لندن وهي عمليه خطيره واحنا مسافرين احنا التلاته راحين عند قرايبنا هناك ونزلت انا وهي اوضه العمليات مع اختها واول مابنجو اختها وغابت عن الوعي ، كل اعصابي وقوتي فكوا وهاتك ياعياط ، ساعتها هي اللي خدتني في حضنها وهاتك ياطبطبه ، هي حنينه زي امي ، لا كمان يمكن اكتر ، وهي حته مني ويمكن اكتر ، وطالعه زيي ، نضحك قوي وننبسط قوي ونزعل قوي ونكتئب قوي ، نعمل كل حاجه قوي ، نشتغل بجد ونذاكر بجد ، نرقص بجد ونهيس بجد ، وساعات من كتر الانفعال نضحك ونعيط في نفس الوقت .... اما حتته فيلم ............ الجزء الاول منه خلص ... البيبي بقت عروسه والامومه شكلها اختلف وحيختلف !!!

هي حتستقل بحياتها وانا حاكمل حياتي ...وهي دي سنة الحياه وطبيعتها .... هي دي دورة الحياة !!! تبقي بيبي ثم طفله ثم مراهقه ثم شابه ثم النهارده باذن الله عروسه وزوجه وبكره باذن الله تبقي ام !!! وتكبر يوم ورا يوم .. وانا باراقبها واخلي بالي منها واخاف عليها ...

ويوم ورا يوم تكبر قصاد عيني ... ويوم ورا يوم يكون ليها حياتها ، اصحابها ، اسرارها ، اوراقها الخاصه ، هواياتها ، وتبعد عن حضني فتفوته ورا فتفوته ... وتخرج من رحمي حته حته .... اه افضل طول الوقت افكر فيها ، طول الوقت اخاف عليها ، طول الوقت اتمني ليها احسن حاجه في الدنيا ، لكن هي تعيش حياتها وتخوض تجاربها وتفرح وتتوجع وانا باتابعها واقر وشها وملامحها واخاف عليها وانصحها وتسمع كلامي ساعات وتتمرد علي كتير ، تحبني لكن تستقل بشخصيتها ، تحبني لكن يكون ليها حياتها هي ...

ساعات اخاف عليها لغايه مااخنقها ، وساعات من كتر خوفي عليها انسي انها خلاص كبيره واحاول غصب غني اتحشر في حياتها واوجهها وهي تتمرد علي وبادب دايما وعصبيه وعند ساعات ، تقولي بطريقه مباشره او غير مباشره ، انا خلاص كبرت ، انا عارفه ياعيني انك كبرت ، عارفه ياقلبي انك لازم تخوضي تجاربك في الحياة ، لازم تعيشي وتتعلم ، وللاسف احيانا حتتوجعي وكتير ان شاءالله حتنسعدي ، عارفه لكن تقولي ايه بقي عن قلب الام ... قلب الام اللي ربنا عمله رهيف وحنين ومش عاقل ، مابيعرفش يفكر ، يعرف يحب ولاده وبس ، واللي يسعدهم يشيله علي دماغه واللي يضايقهم يبقي عايز يشرب من دمه ، وسنين ورا سنين باعلم نفسي الدرس ، بنتي كبرت ولازم تعيش حياتها ، سنين ورا سنين ، كل يوم انسحب فتفوته من حياتها واديها مساحتها الخاصه !!!!

النهارده بقي وهي خلاص حتشيل فستان فرحها واوراقها وتخرج من بيتها لبيتها ومن حضني لحضن جوزها ، النهارده بقي باقف وافكر ، ياتري كان مفروض فيه حاجه اعملها ليها ماعملتهاش ، قصرت معاها ، ضايقتها ، سلحتها كويس للدنيا ، ربتها كويس ، حتستحمل صعوبات الحياه ، حتواجهها ، حتنتصر عليها ، النهارده بقي ، وهي حتخرج معايا انا واختها وحنرجع احنا لوحدينا وهي تبتدي حياتها وطريق فرحتها باذن الله ، النهارده بقي باسال نفسي اسئله كتيره ، لكن اهم حاجه اني بانسي كل الحصص والدروس اللي حفظتها لنفسي ، بانسي انها كبرت وبانسي ان ليها حياتها وبانسي ان ليها اختياراتها ، بافتكرها بس وهي بتضحك واقول يارب اسعدها ، بافتكرها لما ساعات تعيط وابقي عايزه اجري عليها واخدها في حضني وامسح دموعها ، بافتكر قد ايه الحياه صعبه وموجعه وقاسيه ، واقول من كل قلبي يارب من السعاده اديها وهون دايما عليها الصعب واسعدها !!!!

النهارده بالذات ابقي خايفه عليها اكتر وفرحانه بيها اكتر .... والنونوة القمرايه بتاعتي حتخرج من بيتي وتدخل حياتها الجديده برجلها اليمين .... ويا حبيبتي يارب تنسعدي .... !!!! ويارب خليك معاها واكرمني فيها واسعدها !!! والدنيا ريشه في هوا ، طايره بغير جناحين ، احنا النهارده سوا ، وبكره حنكون فين ، في الدنيا في الدنيا !!!!!!!! .......

بدأت كتابه النوت ده من يومين تلاته وخلصته حالا 7 يوليو 2010 الساعه 10 صباحا !!!