20 أغسطس 2010

وانا علي الربابة باغني !!!!




كان عندي 14 سنه في اولي ثانوي بمدرسه الاورمان الثانويه ...
كان يوم دراسي عادي ، صايمين وفي رمضان ... واحنا راجعين من المدرسه ، حد قال الحرب قامت !!! جريت علي الراديو ، اذاعه البرنامج العام من القاهره ، جاءنا البيان التالي .......... الله ده الحرب قامت بجد !!!! ياه ................. فرحت قوي واتخضيت قوي مش فاكره حسيت تاني بايه .اخيرا حاربنا !!!!كل اللي فاكراه من سنه 67 خطاب جمال عبد الناصر وهو بيتنحي ، البيت كله بيعيط ، امي بتقول السوفيت حيقفوا معانا ، ابويا بيلعن ابو السوفيت وابو عبد الناصر ، يوم النكسه كنا رايحين النادي الاهلي عندنا تدريب سباحه ، كنت سبع سنين واختي 3 ، وضبنا شنطه السباحه واستعدينا وبعدين قالوا ماينفعش ، امي كانت بتتوشش هي وجيرانها ، حد قال اسرائيل وقفت مركب في القناه بالعرض قفلت القناه ، قالوا مافيش سباحه ، الراديوا كان بيقول وقعنا 200 طياره وابويا بيقول كذابين وبليل نطفي النور ونقعد في الضلمه ، وامي تدينا شوكولاته وهي بتعيط علشان مانخافش ، وانا باكره الضلمه لكن بنقعد فيها علي طول ، وبابا ودنه علي الراديو والراديو بيوش ، بيدور علي لندن لكن الارسال مش واصل ، ابويا يكلم عمي في التليفون لانه كان في الاتحاد الاشتراكي عايز يعرف ايه اللي حصل ، لكن عمي مابيردش ومابيرجعش البيت ، والشغاله اللي جايه من البلد بتقول للشغاله الكبيره في البيت ، خلاص حنخش تل ابيب ، ابويا يسمعهم وينزل فيهم شتيمه هما وعبد الناصر و.............. عبد الناصر حيخطب في التللفزيون ، وطلع عبد الناصر مكسور حزين ، امي قعدت تعيطت ونسيت تدينا الشوكولاته ، الشغاله العجوزه لطمت علي وشها وقالت مش رجوله يمشي ويسيبنا ، الشغاله الصغيره قالت مايشمي ولا يروح في داهيه ماهو ودا البلد في داهيه ، ابويا صرخ اخرسوا ، ياحرام ، علي طول بابا بيشتم فيهم ، امي قعدت تعيط وبطلنا نروح فريق السباحه وجوز خالتي باينه كان مبسوط لان البلد اتهزمت ، يمكن لان عبد الناصر حطه تحت الحراسه ، وعمي فضل قاعد في الاتحاد الاشتراكي مابيروحش ، وابنه نزل اتطوع في المقاومه الشعبيه وبعدين فجأ بقت اغنيه شاديه ، قولوا لعين الشمس ماتحماش ، بقت اغنيه قليله الادب ، وسمعت البت الشغاله بتتمسخر وتقول ، قولوا لعين الشمس ماتحماش ، اصل الجيش المصري راجع ماشي ، الشغاله الكبيره تضربها باللوكاميه وتعيط ، وتقول لها بطلي مسخره لاقوم اقلع عينيك ، لكنها مابتطلش غني والوليه الكبيره مابتطلش لطم ، النكت انتشرت ، عبد الناصر قال اي ، قالوا له اي ، قال ولا حاجه غزه وراحت !!! و كله من عبد الناصر ، ابويا يقول ، وعمي يقول الامريكان مستقصدينا والشغاله العجوزه وهي بتحط ليهم الشاي تقول ولا مؤاخده يابهوات ، اللي حصل حصل حنعمل ايه بكره ، ويسكتوا محدش يعرف يرد ، امي لسه بتعيط وابويا يتخانق معاها لانها ست نكديه بتعيط لاي سبب ، جوز خالتي فرحان لكن عامل نفسه زعلان ، ستي جت من البلد وابويا صمم تقعد معانا لان الدنيا خطر ، ولزقنا ورق ازرق علي الشبابيك وبتوع المقاومه الشعبيه بنوا حيطان بالطوب قدام مداخل البيوت علشان لما اسرائيل تضرب قنابل ماتفرقعش في بير السلم ، والصيف كله ضاع في موضوع النكسه ، لاصيفنا ولا روحنا السباحه وامي بطلت تشتري شوكولاته وقالت من ليه نفس ياكلها ، انا واختي سكتنا خالص لحسن تضربنا لانها بقت علي طول عصبيه ، كانت امي تقعد مع جارتها الصبح ، تحكي لهم كلام عمي اللي جايبه من الاتحاد الاشتراكي ، امي كانت مصدقاه ، ابويا كان نفسه يصدقه لكن مش مصدقه ، جوز خالتي فرحان في عبد الناصر وجدتي اللي كان جوزها عمده واقطاعي بتقول ده ذنب جوزي اللي مات مقهور لما خدوا الارض منه وادوهم للفلاحين الاوباش ............... وبقينا لما نروح البلد نعدي علي بيوت بالطوب الاحمر كبيره قوي ، ابويا يتمسخر ويقول دي عاملنها علشان يخبوا فيها الطيارات بدل مااسرائيل تضربها في المطارات ، يتمسخر ويقول ، اذا كنا احنا عرفناها امال اسرائيل حتعمل ايه ، والمشير عبد الحكيم عامر ، مات لا انتحر لا نحر ، مش مهم و.......... بقت الاتوبيسات في الطريق الزراعي تقف في محطه المطار السري ، ابويا يتمسخر علي عبد الناصر وعلي الجيش و.................. مات عبد الناصر !!!
الحرب قامت !!!!
ابويا كان في اعاره في احد الدول العربيه ، وانا وامي واختي ومعانا جدتي ام امي ، ورمضان كريم ، وستي ام ابويا ماتت .... وهو صحيح الحرب قامت ؟؟؟؟؟؟ رجعت من المدرسه ، فتحت الراديو ، هنا القاهره ، في تمام الساعه الثانيه ظهرا ............. كلام كتير كتير معناه ان الحرب قامت والجيش بيعدي القناه ، الاول سمعت وانا متلخبطه ، هو ده كذب زي بتاع وقعنا 200 طياره ولا ايه ، سالت امي ، كانت مهتمه قوي ومصدقه جدا ، ابويا في البلد العربي البعيد والتليفونات مقطوعه ، والبيان العسكري الاول والثاني و................ حلوه بلادي السمره بلادي ، طول الليل لغايه السحور جنب الراديو ، والشغاله تقول الملايكه عدوا مع الجيش ، وامي تقول العساكر كانت بتقول الله واكبر وربنا نصرهم ، وجدتي تقول بركه الايام المفترجه بركه رمضان ........... هو انتم بتكذبوا تاني ولا الكلام ده صحيح ، يعني نفرح ولا ايه؟؟ تاني يوم في المدرسه ، البنات كلها كانت مبسوطه والمدرسين كمان ، واللي باباها ضابط عماله تعيط وكلنا واقفين معاها وجنبها وبنقول لها ماتخافيش ، وفي الفسحه وقفونا طابور وقعدنا نغني بصوت عالي ، الله واكبر فوق كيد المعتدي ، كلنا بنعيط ، بنعيط من الفرحه ، قلقانين لكن مبسوطين ، ايه مافيش مقاومه شعبيه ، مش حنطفي النور ، مش حنبي الحيطه قدام الباب علشان بير السلم ماينفجرش ، الله واكبر فوق كيد المعتدي ، قولو معي قولو معي الله الله الله واكبر ، الله فوق المعتدي !!!! ارجع من المدرسه جري ، اجيب التلات جرايد ، ااقراها كلمه كلمه ، جايز جرنان نسي كلمه التاني يقولها ، البيان العسكري التاتي العاشر ، رفعنا العلم فوق سينا ، يامصر ياعظيمه عبرنا الهزيمه ، وعبد العاطي صائد الدبابات ، حطم كام دبابه ، عشره عشرين ، وايه الصاروخ السام سته ده ، ده صاروخ بيشيلوه العساكر فوق كتافهم يضربوا بيه الدبابات ، وبدأوا يذيعوا في التليفزيون صور العبور ، والكباري العائمه تترمي في الميه تتتفتح ويوصلوها ببعض ويعدي عليها ( السيارات المجنزره ) يعني ايه مجنزره مش مهم ، المهم ان الجيش بيعدي ، نصرخ بصوت عالي ، الله اكبر فوق كيد المعتدي ، خلاص ، امي بطلت تعيط ، ابويا بعت تلغراف من البلد اللي هو فيه يبارك لمصر بالنصر وجدتي ام امي نسيت موت جوزها مقهور علشان خدوا الارض وبقت تدعي للجيش بالنصر في كل صلاة و............... بقينا مبسوطين !!!
ويابنات يابنات ، الحقوا السادات حيخطب في التلفزيون ، وكلنا قدام الشاشات ، سكت هوس ، وطلع السادات واتكلم وحي القوات المسلحه المصريه وكلنا معاه وهاتك ياتصقيف وعياط وفرحه و............ ومنظر الاسري الاسرائيلين في التلفزيون ، وعساف ياجوري ، عساف ياجوري حد مهم في الجيش الاسرائيلي اتأٍسر ، واسرائيل مش مصدقه ، وانت فين ياموشي ياديان ، الراجل اللي كان مغطي عينه بعصابه سودا زي القرصان والوليه العفريته جولدا مائير !!!!!! وصباح الخير ياسينا مارسيت ماراسينا !!!
وحررنا القنطره شرق !!!!!!!! ورفعنا العلم !!!! وسمعنا عن الجيش التاني الميداني والجيش التالت الميداني !!! وحطمنا خط بارليف وقهرنا اسطوره الجيش الاسرائيلي الذي لايقهر !!!!
و....................................... ايه اللي حصل بعد كده !!! الحقيقه مش مهم ، مفاوضات سلام اتفاقيات صلح ، كله مش مهم !!! سينا اتحررت في الاخر ، منزوعه السلاح مش منزوعه السلاح ، مش باصدق الكلام ده مهما اتكتب في اتفاقيات !!! سينا جزء منا ولينا عليها كامل السياده وطظ في الاتفاقيات واللي مكتوب فيها !!! وطابا رجعت ، بالتحكيم بالعفريت لكن رجعت !!!! وسينا رجعت كامله لينا ومصر اليوم في عيد !!! ايه حكايه الحرب دي .... الحرب قالت ان الشعب المصري عمره لاحيتهزم ولا حيموت !!! الشعب المصري موجود وقوي وعايش وحيفضل عايش !!! قالت ان المصريين لما ضحوا بالدم الغالي مصر انتصرت !!! وبعد سبعه وتلاتين سنه ، لسه جسمي بيقشعر لما بافتكر يوم 6 اكتوبر 10 رمضان لسه بارتجف من الفرحه وحب البلد ، لسه بافتكر زينه شباب مصر وخيره رجالها وهم شايلين السلاح وبيعدوا وبيرفعوا العلم المصري ، بافتكر الرجاله اللي ماتت وسابت وراها ستات وعيال مش من حق حد يبوظ تضحيتهم ويقول لهم بس البلد بقي شكلها ايه النهارده ، بافتكر جرحي اكتوبر والرجاله اللي زي الفل اللي اتقطع رجله واللي اتقطع ايده ، بافتكر اغاني الحرب وكلمات السادات يوم ماخطب في مجلس الشعب ، وحيي القوات المسلحه المصريه التي صار للوطن درع وسيف !!! سبعه وتلاتين سنه ولسه باحب البلد وباخاف عليها ولسه باكره اسرائيل وحافضل اكرهها ولسه باومن بالشعب ده وبقوته وباحترم تضحياته وابطاله وشهداءه !!! و................ مابحبش اكل الشوكولاته اللي كلتها ايام النكسه واحنا مطفين النور وقت الغاره !!!!
كل سنه ومصر بخير !!!
والشعب المصري بخير !!! وتحيه لابطالنا وشهداءنا وقادتنا ، اللي صنعوا هذا النصر العظيم بتضحياتهم ودمائهم !!!!
وتحيا مصر !!!

هناك 9 تعليقات:

يا مراكبي يقول...

الله عالبوست الجميل
عجبتني جدا الفقرة اللي بتتكلمي فيها عن إختلاف وجهات النظر فيما بعد الإنتصار حول بنود معاهدة السلام وخلافة

كل الكلام ده بيفرغ الإنتصار من معناه ومحتواه ودلالاته ونتائجة النفسية التي لا تمحى

الإنتصار ده في حد ذاته لحظة مميزة جدا للأمة دي وكل ما قبلها وبعدها لا يقلل من عظم شأنها أبدا

يا مراكبي يقول...

الله عالبوست الجميل
عجبتني جدا الفقرة اللي بتتكلمي فيها عن إختلاف وجهات النظر فيما بعد الإنتصار حول بنود معاهدة السلام وخلافة

كل الكلام ده بيفرغ الإنتصار من معناه ومحتواه ودلالاته ونتائجة النفسية التي لا تمحى

الإنتصار ده في حد ذاته لحظة مميزة جدا للأمة دي وكل ما قبلها وبعدها لا يقلل من عظم شأنها أبدا

قوس قزح يقول...

اسلوبك جميل بيحسسنى انك حد قريب من القلب لكل بيت مصرى و بيروى عنه ذكرياته
انتى مش بتحكى عن اميرة و الشيكولاتة اللى كرهتها ..لا انتى حكيتى عن جيل من الاطفال مرت عليهم محنة فوق فهمهم و كمان فوق فهم اللى اكبر منهم
حتى وقت الفرح مش فاهم هى حقيقة و لا لا
احييكى على البوست ده اللى عيشنا حالة مرت على شعب مصر

محمد ناصر الدين الهلالى يقول...

أحييك على هذا البوست الصادق والرااااااائع تحية من القلب للقلب لانه نابع من القلب وزى مابيقولوا كده أوريجينال أوى لان حضرتك حكيتى فيه ذكرى حقيقية وتفاعل بيت وأسرة مصرية معها وقتها ، ياليت كل من عاش زمانها حكى لنا عنها كما حكيتى . تحياتى لك

http://www.facebook.com/hala.elmongy يقول...

حكيتى تفاصيل ما كان يحدث فى كل بيت مصرى
نفس التفاصيل و اذاعة لندن و الاتحاد الاشتراكى و بكاء الامهات و بكاء الاطفال بالتبعية لان ماما بتعيط
بجد حكاية كل بيت و كل عيلة
تسلمى يا اميرة و يسلم افكارك

د.رشا سمير يقول...

اد ايه حسيت بمشاعرك وقدرتي توصليها بمنتهي الاحترافية..انت قلم جميل متمكن وطبعا انسانة اكاد اشعر بمصر تجري في مسامها

L.G. يقول...

وصباح الخير يا سينا .. ما رسيت مراسينا
أأقولك ايه سلم قلمك فعلا بعض الكلمات نور البوست ده لو أقدر والله كنت حطيته في مناهج المدارس يدرس لأجيال كل كلمة قولتيها ليها وقع في قلبي عظيم القيمة . وجدت دموعي تنزل من كلماتك تذكرت جملة عشان مصر تعيش اغلى الناس بتموت في فيلم العمر لحظة .. سلمت يداك وقلبك وعقلك .. أنعم الله عليك بقوة الكلمة يارب
من اجمل ما قرأت .. من أجمل ما قرأت حقاً
التحية لا توفيك حقك
سماح

رحــــيـل يقول...

:) اكتر بوست او موضوع نقراه ويحسسنا فعلا بفرحة اكتوبر من غير سرد لتفاصيل واحداث عملية وطويلة
وصلتنى مشاعرك جدا حسيت الفرحة والخوف والقلق والضلمة وحسيت الانتصار
تسلم روحك

محمد فاروق الشاذلى يقول...

الإحساس رائع جدا، مصر التى لا تموت رغم كل شيئ، تبقى رغم كل الظروف، تنهض بعد كل عثرة، تلك هى مصر التى يكرهها الكثيرين، ويحبها المصريين الحقيقيين.