احيانا .............. نخرف !!!
ودي تخريفه كبيرة !!!!
فمحدش يقراها بجد
ولا يعقب عليها بجد
دي مجرد تخريفه
حتحاسبوني علي التخريف كمان !!!
ياللقسوه !!!!
انا حاطلع جورنان ..... وحاعمل له موقع علي النت !!!
ماهو اشمعني انا ... هي جت علي يعني !!!
هو الجرنان ديته ايه ، شويه ورق وشويه محررين واعلااااااانات !!!
اهم حاجه الاعلانات ... الاعلانات هي اللي بتجيب الفلوس ، الماني ، اللارجن ، بكل لغات العالم !!!
انا حاعمل جرنان ، ليه ، مش عارفه ، حاعمل جرنان علشان اجيب فلوس ، لكن علشان اجيب فلوس ، لازم اجيب اعلانات وعلشان اجيب اعلانات ، لازم اقول كلام يبسط اصحاب الشركات والفلوس والملايين ، لازم كلامي ينغشش في راسهم يبسطهم يزغزغهم ولما ينبسطوا يفتحوا خزنه ( عم دهب ) وانا بقي انط في الخزنه واصرخ زي علي بابا ، دهب مرجان ياقوت احمدك يارب ، وممكن اقول برضه يوروزززززز ، دولااااااارز ، ييننننننن ، ثانكس جاد !!!!
عايزه اعمل جرنان ياشعب ، ماهي ماجتش علي !!!
والنبي محدش يقولي كلام كبير ولا كلام بجد ، محدش يقولي عايزه ايه وقضيتك ايه ورايك ايه والكلام الفاشل بتاع الانظمه الشموليه الاستبداديه اللي مش ديمقراطيه ، الانظمه الديمقراطيه مابتسالش الاسئله الخايبه دي ، عايزه جرنان ، اوكي بيبي ، اعملي جورنان!!!
ايه المشكله اني مش صحفيه .... وايه يعني ، مين قال ان الصحفيين لازم هما الي يطلعوا جرايد ومجلات ... اولا ... ممكن الاقي جرنالجي ابن حلال يسلفني اسمه ، مش يسلفه لي بالضبط ، لا يشحته لي ، يديني عليه حق انتفاع ، هو اللي يطلع الجوورنان ، الرخصه باسمه وهو رئيس مجلس الاداره ورئيس التحرير ، وساعتها حياخد مني قرشين وبعدين يصدق نفسه ويعمل فيها فالوط ، الحقيقه مايفرقش معايا انه يعمل فالوط وايه يعني مالبلد ماليانه فلاليط ، صدقوا نفسهم ، هو رئيس مجلس الاداره ورئيس التحرير ، وبكره يتشهر ويطلع في التلفزيون ويستضيفوه في البرامج وفي رمضان يبقي زي الكنافه بيتاكل علي الفطار وعلي السحور وفي غير رمضان زي المضاد الحيوي يتاخد تلت مرات في اليوم ، كل تمن ساعات !!!
اذن ، ممكن اجيب صحفي مغموووور لكنه نفسه يبقي فالوط ، وهو يديني اسمه حق انتفاع وليه نسبه برضه وكله شيلني واشيلك!!!! كل ده بفرض ان لازم صحفي يعمل جرنان .... وطبعا ده مش حقيقي ، ممكن اي حد يعمل جرنان ، حانوتي ، مبيض نحاس ، اراجوز وشه وجعه من كتر البويا اللي كان بيلطعها عليه !! ماعلينا ..... نحن في زمن الحريه ياعزيزي !!!
اي مواطن يقدر يطلع جرنان وبالطبع اي مواطنه ، لاننا مش بس في زمن الحريه ، لان لاننا كمان في زمن المساواه والمجلس القومي للمرأه والخلع !!! اي مواطن واي مواطنه يقدروا يعملوا جرنان !!!
وعليه .............. انا حاعمل جرنان !!!
حاعمل شركه ، والشركه تقدم علشان تعمل جرنان واللي اسمهم ايه دول اللي بيبصوا في الطلبات حيوافقوا علي الجرنان !!! ومايوافقوش ليه ، لاامن الدوله تعرفني ولا حد سمع اسمي ، مواطنه علي باب الكريم !!
وبخ بخ بخ بخ بقي معايا رخصه جرنان !!!
فيه عيل ناصح ابن حرام ، قالي بلاش وجع قلب ، اول مايبقي معاك رخصه الجرنان ،اجريه قانون جديد وانت تلمي الغله كل اول شهر وبلاش وجع قلب ، لاصحفيين ولا كتابه ولا قرايه ، وفلوسك اللي دفعتيها حترجع لك باسرع مايمكن و.... فله ياروحي !!!
الواد كله منطقي يعني لكن ساذج حبه ، ااجر الجرنان ليه ، فلوسي راجعه راجعه ... بقي بقي عندي فرخه بتبيض دهب وااجرها هما ياخدوا الدهب وانا اخد الريش !!! انا اللي حاخد الدهب وافتح كنز الاعلانات ومن طلب العلا نشر الاعلانات !!!! طيب ........... فتح عينك تاكل ملبن !!! الاعلانات دي كنزززززن لا يفني !!!
وفيه فلوس اصحابها قبط ، يبقي لابد من الكلام عن المواطنه وحقوق المواطن وضرورة تغيير الخط الهمايوني!!!
وفيه فلوس اصحابها بدقن ، يبقي لابد من كلام عن بقاء الماده 2 من الدستور زي ماهي !!
وفيه نسوان هي صاحبه الفلوس ، يبقي لابد من كلام عن المساواة و ان البنت زي الولد ماهيش كماله عدد !!
وفيه شركات اجنبيه هي صاحبه الفلوس ، يبقي لابد من كلام عن حريه الاستثمار وحضاره الغرب !!!
وفيه فلوس اصحابها عرب ، يبقي النبي عربي والامه العربيه الخالده من المحيط الهادر للخليج الثائر وامجاد ياعرب امجاد !!!
فيه فلوس اصحابها بيكرهوا العرب ، وماله برضه احنا اصلنا فراعنه !!!
وفي فلوس اصحابها بيحبوا عبد الناصر ، يبقي ارفع راسك يااخي انتهي عهد الاستعمار !!!
وفيه فلوس اصحابها بيبعوا عربيات ، يبقي احنا مع بيع العربيات والاستيراد وعربيه لكل مواطن !!!
وفيه فلوس اصحابها مابيحبوش العربيات ، يبقي لابد من مهاجمه الزحام والمرور والدوشه !!
زي مالفلوس تقول ، نقول !!!
وزي ماصاحب الفلوس عايز يسمع ، نغني !!
ونربط الحمار مطرح مايحب صاحبه !!!
القضيه واضحه جدا ومافيش اي لبس في الموضوع !!!
مش لظريه مباديء علي راي نور الشريف في فيلم ، مش فاكره اسمه ، الفيلم بتاع لما كان نشال وبقي رجل اعمال عن طريق التهريب من بور سعيد ، كان دايما بيقول ( مش لظرية ) وهي جمله عبقريه تعبر عن الزمن الجميل اللي احنا عايشين فيه !!!
مش لظريه مباديء اطلاقا .... لكن طبعا لازم نتكلم في المباديء وعن المباديء!!! ولا حبيقي الجرنان مفضوح وده عيب وغلط ومايصحش خالص البته !!! ماعلينا .... سياسه الجرنان بتاعي سياسه متوازنه ، وبالبلدي ماسكه العصايه من النص !!! وعمري ماحكون زي اللي رقصوا علي السلم لا اللي فوق شافوني ولا اللي تحت شافوني !!! لايمكن لازم اللي فوق يشوفوني واللي تحت يشوفوني وكلكم تشوفوني !!
سياسه متوزانه يعني ايه يعني انا مش حكوميه ، لكن مش معارضه !!!
انا مع التغيير ، والتغيير يعني ساعات تغيير للافضل وساعات تغيير للاسوء ، مش مهم المهم ان الحركه بركه!!!
انا مع التغيير ، التغيير ساعات لقدام وساعات لورا ، برضه مش مهم وكرباج ورا يااسطي!!!
التغيير .... تغيير سياسات تغيير وشوش تغيير اتجاهات !!!
بس مش مع التغيير قوي ، يعني نص تغيير ، ربع تغيير !!!
انا مع التغيير حتي جوه جرناني شخصيا ، يعني النهارده ااقول كلام وبكره ااقول عكسه ، طبعا مش انا اللي حاقول ، الكتاب والصحفيين هما اللي حيقولوا ، وشعاري واضح ديمقراطيه ياحبيبتي ديمقراطيه ، حريه ياحبيبتي حرية !!! ولان هدفي الحقيقي الفلوس والاعلانات ، فلازم جرناني يبقي معبر عن الشعب وكل طوائف الشعب ولازم يبقي معبر عن كل وجهات نظر كل الناس اللي معاها فلوس حكومه ومعارضه ستات ورجاله راسماليه واشتراكيه دينين وعلمانيين اقباط ومسلمين ، يبقي جرناني معبر بحق بحق عن الشعب كله !!!
اظن كده سياسه الجورنان الاستراتيجيه وضحت جدا !!!!!!!1
طيب ننتقل لنقطه تانيه مهمه جدااااااااا!!!
سياسه التحرير بقي !!! وسياسه التحرير دي مهمه خالص مالص !!!
لازم الي يمسك الجرنان صحفيين مفطفطين ناصحين عيال اوسطجيه شاطرين ليه ؟؟؟؟؟؟؟؟؟؟؟؟؟؟؟
لان لو الجرنان بقي ممل ولا سخيف ولا مابيشدش ، حاقعد اعيط جنب الحيطه وكل الشعب حيسمع الزيطه !! لازم اللي يمسك التحرير عيال اسطوات ، مانشيت ايه وعواميد ايه وصفحات داخليه ايه وخارجيه ايه ، اوعي وشك !!!
علشان اللي يمسك الجرنان حتي وهو ناوي يلف بيه شندوتشات العيال بتاعت المدرسه ، يضطر يضطر يقرا الكلام اللي تحت ايده ، طبعا احنا شعب بيزهق جدا ، ومالوش روح علي القرايه ولا نفس علي طول النفس ، اذن لابد يكون المانشيت يشد والعنوان يشد اكتر ، وعلي فكره مافيش اي علاقه بين المانشيت واللي مكتوب تحته ............ ليه ، قلتم لي ليه .. اقولكم ليه !!!
فيه ناس بتقرا المانشيت بس !!! خلاص ولا يفرق معاهم ايه اللي مكتوب تحته !!! اذن مافيش مشكله !!!
وفيه ناس بتقرا المانشيت ولما تقرا اللي مكتوب تحته تكون خلاص نسيت المانشيت اذن برضو مافيش مشكله!!!
وفيه ناس جد الجد ، بيقروا المانشيت ويدورا ايه مكتوب تحته ، لو لقي الكلام مش راكب علي بعضه او مالوش علاقه بعضه ولانهم بيحبوا الجرنان بتاعي حيلتمسوا لي العذر وبعدين وقت الجد ، دايما في صحفي لابس مزيكه هو ده اللي حاشتمه واقول كتب كلام مالوش علاقه ببعضه ، اتلخبط ، ولو لزم الامر حاجيبه ازعق له قدام الناس وبعدين اراضيه في السر وسلامتك ، الله يسلمك ياحيبي علي راي الوليه اللي كانت في التورماي بتاع فيلم اللعب مع الكبار وهي بتصقف وعادل امام بيرقص !!
اذن ، سياسه التحرير تعتمد علي جورنالجيه اسطوات يوضبوا الجرنان صح صح !! ومانشيتات مثيره قويه تهز الدنيا !! وشويه مصداقيه في الاول ، ايووووووه في الاول بس ، لغايه مارجل الزبون تقع في الخيه ويتعود علي مع شاي الصبح ودخول الحمام !! بعد مايتعود علي ، سلامتك ، المصداقيه مع السلامه والقلب داعي لها والباقي بقي كل واحد وشطارته !!
والمصداقيه يعني ايه ، يعني بلاش كذب ، مبالغه اه ، هي المبالغه قله مصداقيه !!! المبالغ طريقه جذب للقاريء ورؤوس الاموال الاعلانية !!! وعلي راي الاسطوات زمان لما قالوا ، الخبر مش ان اسد عض انسان ، لا ده خبر عادي ، طبيعي ، الاسد طبعا حيعض انسان !! امال الخبر ايه يااسطوات ، الخبر انسان عض اسد !!! مش لازم عضه قوي ، ممكن يكون جري وراه يعضه ، لكن المانشيت يبقي لازم انسان عض اسد ، عضه وقطعه !!! واوعي وشك بقي !!!!
المصداقيه تعني مافيش كذب ، لكن فيه مبالغه ده عادي ، فيه كمان نسكت !! وطبعا احنا برضه اتعلمنا من الاسطوات ان السكوت من الماظ ، يعني اسكت ماقلوش خبر معين ، معرفتوش يااخي ، عرفته ونسيت اقوله ، وطبعا ساعات يبقي السكوت عظيم ، ليه ، لاني بداري علي شمعه حد مش عايز حد يعرف انها ولعت ، ولان الستر شيمه الكرماء ، طيب نسيت اقول الخبر ، مثلا مثلا يعني ، نائب اتمسك هو بيهرب فيديو من المطار ، اهو الخبر عندي بتفاصيله ، انشر ولا لا ، اسمها انشر ليه ، انشر لو فيه هدف ، حد بيكره النائب وحيعمل عندي اعلان ، ماشي انشر ، طيب حد بيحب النائب وحيعمل عندي اعلان ، يبقي لاعرفت الخبر ولا شفته ، طيب عمل اعلان واحد وسكت ونسيني ، وده معقول اعلان واحد وينساني ، ايه مافيش في قلبه رحمه !!! طيب ازرع الرحمه في قلبه وافكره ، انزل تنويه عن الخبر ايه اللي دافنينه سوا ، يقوم ايه ، يعمل اعلان تاني وياحلاوتك ياسعاده النائب ده انت مصدر رزقي والسبوبه بتاعي ويارب تتمسك كل يوم بالفيديو !!!
اذن ... مافيش كذب !!! مبالغه اه .. سكوت اه .... شويه اخبار صحيحه وسط هيصه كذب ، برضه اه ، والقاريء بتاعنا ذكي وبيفهم وبيميز بين الكذب والصدق ، حيرمي الكذب ويصدق الصدق ، طيب افرض القاريء بتاعنا حمار ، يبقي يفرق معاه ايه الكلام كذب ولا صدق ، ويفرق معايا ايه ااقوله الصدق ولا الكذب ماهو حمار ومامنوش فايده اطلاقا ابسليوتلي !!!!!!!!!!
كده تمام !!! لا لسه ........ خلاويص ... لا لسه !!!
فيه ايه تاني في سياسه التحرير !!!
اه .... اهم حاجه التوزان في الصفحات !!!!
علشان كل الناس تقرا وتنبسط !!! وتاكل وتشبع !!!
وكل حاجه تتكتب وعكسها ان لزم الامر ماهي حريه الصحفيين والكتاب ان كل واحد يكتب علي كيفه!!!!
وكده محدش يمسك علي غلطه !!! ياجماعه دول صحفيين احرار زي علي بالضبط !!! كل واحد يكتب علي كيفه ، خلاص مرحله الشموليه والدوله المسيطره علي راسالمال ووسائل الاعلام خلصت خلاص ، دلوقتي سيبه ياحبيبي سيبه !!! كل واحد وشوقه !!!! الصفحات جوه الجرنان وبراه لازم تبقي متوازنه ...
صفحه سياسه ، حته حكومه وحته معارضه ، اشتم مين وامدح مين ، حسب ماالظروف تقول !!!
وممكن اشتم في الاتنين وامدح في الاتنين وعادي جدا !! ماهي الحكومه مش حاجه واحده والمعارضه مش حاجه واحده !! وانا عايز الشعب يعرف كل الحقايق ، كل الحقايق ، امدح في الحكومه لانها عملت كوبري وبعدين اشتم في شركه المقاولات اللي نفذت الكوبري لانها شركه منحطه عملت اعلانات بره وبعد مااشتمها ارجع اشتم الحكومه اللي اسندت الكوبري للشركه المنحطه دي ولما الشركه تقول دي كانت مناقصه وانا كسبتها ، نقول علي ماما ، ودفعت لمين علشان تاخد المناقصه ولما الشركه تحلف علي الميه تجمد انها مادفعت لحد ، حملتنا مستمره وشعارها ، قالوا للحرامي احلف جالك الفرج ، ولما الشركه تبلغ فينا ، يبقي بس امنيه واتحققت ، لا لتكبيل افواه الصحفيين لا لحبس الصحفيين ومظاهرات ووقفات احتجاجيه وكل من له نبي يصلي عليه والمنظمات العالميه تكتب واسمي ينزل في تقرير الامم المتحده بتاع التعذيب لان حصاري جرناني تعذيب مابعده تعذيب !!! والشركه تعمل اعلانات فنرفد الصحفي اللي كتب الكلام الغلط وبيشوه سمعه الابرياء !!! وصلي صلي علي النبي صلي !!!!
وعادي برضه ، ممكن امدح في المعارضه شويه واشتمها شويه ، اصل انا محايد وماليش عزيز ولا غالي ، انا بتاع الشعب ومصلحه الشعب ، المعارضه مش حته واحده دي مليون حته ، امدح حته واشتم حته والغاوي ينقط بطاقيته حموده ، وحموده حبيبي فاهمني وعارف مصلحته وبينقط طول الوقت ولا فيلم الفرح !!!
نرجع لسياسه التحرير !!!
صفحه فن ، ناس تشتم في الافلام وناس تمدح فيها ، نفس الفيلم هو هو ، ليه ، هو ايه اللي ليه ، حريه راي للنقاد !! والفن بقي بحره واسع وشعارنا فيه ، علمني العوم والنبي يااحمد !!! فيه سينما نضيفه وسينما وسخه !!! فيه سينما كلاس وسينما عشوائيات !!! فيه سينما الشعب وسينما المهرجانات !!! واحنا بنحب الشعب وعايزينه ينبسط ومين حيبتدي المزاد !!!! كل اللي بنقوله صح وحقايق ولا بنبالغ ولا بنكذب !!!! دي سينما سودا ، ماهي سودا ياعم اسود من قرون الخروب !!! دي سينما وسخه ، وسخه ياعم بجد زي الغسيل ما بنغسله باوكسي البمبي !!! دي سينما مهرجانات ، طبعا ، ده حتي الناقد نسي ياخد القاموس معاه وهو رايح يتفرج طلع مذهووووووول ومافهمش حاجه !!! وكل كلمه من دول رصاصه ، والرصاصه لاتزال في جيبي ، تطلع الايرادات وتنزلها ، والحق الفيلم ده بيقولوا عليه مسف جدا ، الرقاصه قالعه فيه طول الفيلم ، هما كلمتين كانهم شتيمه وكاني بدافع عنالاخلاق ، لكن انا عارفه تاثيرهم ايه علي البرشامجيه والعيال اللي بيخشوا السينما يعملوا حاجات قبيحه ، جري علي السينما والايرادات تزيد وسلامتها ام حسن !!!
صفحه دينيه ، متطرفين معتدلين محافظين رجعيين متحررين وهابيين سنه شيعه ، وكل الكلام ده بعضه وكل الفتاوي ضد بعضها ، ولو الناس سكتت ننكشها ، ايه رايك يامولانا في كذا ، ومولانا تاخده الجلاله وهاتك ياكلام ، ووقع مولانا في المصيده ، وهوووووبا ، اديله ادي اديله ادي ، مولانا تاني يقول ايه الكلام الفاضي ده ، وواحد مش مولانا يقول الكلام ده غلط وواحد يأيد وواحد يعارض وواحد يشتم وواحد يمدح ومولد وصاحبه غايب والناس تنشغل بالفتوي واللي قال الفتوي واللي قال الفتوي غلط واللي قال الفتوي صح و.... هيصه هيصه !!!
صفحه للمسيحين ، مره نقول سلبيين ومره نقول مضطهدين ، مره نقول اقباط المهجر ومره نقول غلط الاستقواء بالخارج ، مره نقول مالهم ماهم كويسين ومره نقول فين كاميليا وفين وفاء ، ومره نشيد بالبابا لانه وطني ومره نخلي حد يكتب من العلمانيين ويقولوا ابصر وماادرك وننشر مره بيان متشدد وننشر ميت رد عليه ونقول مابيحصلش الكلام ده ، ومره ننشر لحد بيقول الدنيا وردي ونخلي ميت واحديردوا عليه يقولوا دي نيله وزفت وقطران و............ هيصه هيصه !!!
وصفحه حوادث ، فتحيه قتلت جوزها ، تحقيقات النيابه في قضيه فتحيه ، وكل مالناس تنسي ، نقول فاكرين فتحيه لما قتلت جوزها، الطب الشرعي قال ، وهو لا قال ولا حاجه ، هو يعني حد حيدور علي الطب الشرعي قال ايه ، ونقول كلام علي لسان فتحيه ، وكلام علي لسان ضره فتحيه وكلام علي لسان الوليه اللي كانت بتلم الجمعيه وماقبضتهاش لفتحيه ، ونسال جيران فتحيه لون ملابسها الداخليه اللي كانت بتتنشرها علي الحبل قصادهم ايه ، الواد حمو يقول احمر ، يكذبه الواد فجله ويقول كالحه وبهتانه ، حمو يحلف ميت يمين انها حمرا وفجله يحلف ميت يمين انها كالحه وبهتانه و........والشعب يحتاس لون الملابس الداخليه بتاعت فتحيه ايه ، حمرا ولا كالحه وبهتانه !! وفجأ فتحيه تبقي بطله قوميه ، الوليه اللي قتلت جوزها وملابسها الداخليه لونها احمر ولا كالحه وبهتانه!!!
وياسلام بقي لو عرفنا ناخد كلمتين من الواد حمو نصورهم فيديو وعلي الموقع واديها ، مين ييصور ، اي حد ، اي عيل معاه موبيل بكاميرا من اللي بيوزعوهم في السوبر ماركت مع عرض الرز ، الواد يصور حمو وهو بيوصف الملابس الداخليه لفتحيه وازاي كانت حمرا زي البطيخه وبعدين عيل تاني يصور الواد فجله وهو بيحلف طلاق تلاته ان الوليه هدومها كانت كالحه وبهتانه لون وش الواد اللي بيضرب سرنجه في غرزه مانخوليا ، وطبعا ناخد الكاميرا ونجري علي غرزه مانخوليا علشان نشوف وش الواد اللي بيضرب سرنجه علشان نعرف بالضبط لون ملابس الداخليه لفتحيه .......... ويستضيفوني في البرامج التلفزيونيه انا والواد حمو وفجله علشان نفسر المشكله دي ، ولاني عارف السر اخد معايا دكتور عنين في الحلقه ، انا متأبج منه علشان اطلعه في التلفزيون ، وايه رايك يادكتور في الخلاف العنيف بين فجله وحمو ، ولا خلاف ولا حاجه ، الواد فجله نظره علي قده ومابيشوفش صوابع ايده ودول كام يافجله ، دول تلاته ياعسل ، الله واكبر ، الحق بان ياجدعان ، الواد فجله عايز نضاره والدكتور هوب ، يطلع من جيبه نضاره لانه الدكتور الجاهز ، فجله يشوف صوابع ايده ، يقوم حمو يطلع ملابس فتحيه الداخليه اللي كان علقها من حبل الغسيل قبل مافتحيه تقتل جوزها وقتلته لما لقت الملابس الداخليه وقعت من علي الحبل قبل مايلم الغسيل ، حمرا لون الدم لون البطيخ الاسماعيلاوي ، لونها ايه يا فجله ، لونها احمر !!!!!!!!!!!
وتاني يوم مانشيت جبار في الصفحه الاولي والاخيره ، لقد اثبتت الايام ان جرناني له مصداقيه كبيره كبيره وحمو طلع صح وفجله طلع مابيشوفش والدكتور سلامتكو ابو الجدعنه بيحييكم ومنتظركم في عيادته علشان يعمل لكم نضارات زي فجله فتبقي الحياه كلها لونها احمر !!! واخبار فتحيه ايه ياجماعه !!!!!!! صفحه حوادث رهيبه ، تنشر الحقيقه والمستخبي والقرد مخبي ابنه فين !!!
ولاني صاحبه الجرنان ، حابقي شخصيه عامه جدا خالص !!! كل الناس حتعزمني في حفلاتها وسحورها وطهور عيالها لان لساني مبرد والصحفيين عندي مابيرحموش ومايحبوش يخبوا حاجه عن الشعب !!!! وبعد مااتعزم في كل الحفلات ، ابقي مقرر علي كل البرامج ، ايه رايك في اسعار الكوسه ، الكوسه طول عمرها خضار مايع ابن كلب مالوش اكيله ومايستحقش يغلي ، ايه يااستاذه العبقريه دي !!!!!!!! ايه رايك في خرم الاوزون ، طظ في خرم الاوزون واللي خرم الاوزون ، احنا المصريين اصحاب الحضاره والتاريخ خرمنا من قبله التعريفه !!!! ويسالوني رايك ايه في المسلسلات واقول واقول ، ورايك ايه في المنتخب القومي واقول واقول ، ورايك ايه في تبادل الازواج والزوجات واقول واقول ... ومره والتانيه اطلع ببلاش وبعده كده ماينفعش ياجماعه ماعنديش وقت خالص ، ايه اقطع نفسي اموت نفسي ، والساعه بكذا ، وبكره بكذيين وبعده بعشره كذيااااااااات وفتح عينك تاكل ملبن ، ولما واد معد مايرضاش يعزمني ولا قناه ماترضاش تدفع ، يبقي علي نفسها جنت براقش ، ليه ، لاني عندي جرنان مليان صفحات وهدفي حمايه الشعب من البرامج التافهه والقنوات السفيهه وهاتك ياتقطيع بالموس في وشهم وهما حرين ، هما اللي جابوه لروحهم !!!!!!!!! ويابلحه ياحلوه يامقمعه شرفتي اخواتشششيك الاربعه !!!!
اعمل صفحه سياسه خارجيه يكتبها واحد مايعرفش اسماء الدول ، ليه ، لانه يعك براحته ولان السياسه الخارجيه مابتفرقش مع حد ، صحفي سريح من اللي نفسه اسمه يتكتب في اي صفحه حتي صفحه الوفيات ، تعالي ياواد انت مسئول عن صفحه السياسه الخارجيه ، ولامؤاخذه ياابله يعني ، اكتب ايه ، اكتب اللي انت عايزه ، اي حاجه مش عن مصر ، خش علي النت وشوف كاتبين ايه وانقشه ، كلمتين من هنا وكلمتين من هنا والمركب تمشي !!!
طبعا ماتنسوش الكوره والمنتخب والاتحاد ومين غلب ومين حيغلب ، وعايز الصفحه كلها كتاب ، واحد اهلاوي وواحد زملكاوي وواحد تبع غزل المحله ، ايه نزل الدرجه التانيه وماله ماهو علشان يبقي بيعبر عن دروي المظاليم ، وواحد مع احتراف اللعيبه وواحد ضد الاحتراف ومع الانتماء وواحد ضد المنتخب اللي بيصرف فلوس الشعب والساحات الشعبيه اولي وواحد مع المنتخب والتمثيل المشرف وواحد نفسه يروح الصين مع الفرق الاوليمبيه وهاتك يامدح فيهم وواحد نفسه يطلع اسكندريه يقعد يومين علي البحر ينزل شيتمه في الصين والفرق الاوليمبيه الموكوسه بنت الموكوسه اللي عمرها ما نصفتنا لا بميداليه دهب ولا صفيح حتي !!! صفحه الكوره والرياضه مهمه جداااااااااااا ... لان الجمهور بيحب الكوره وبيشتري صفحات الجورنان فوق البيعه !!! واذا ماكنتوش مصدقني ، اسالوا ماجد في اعلانات اتصالات !!!
وطبعا اوعي تنسي بختك اليوم والاسبوع والشهر والسنه !!! وخلوا بالكم من التوازن في الابراج ، سته حظهم اسود وسته حظهم بمبمه وبكره العكس بالعكس وشعار الصفحه خلي عندك امل في بكره!!!!ا
كده بقي الجرنان تمام التمام !!!!
سياسه استراتيجيه متوازنه !!!
سياسه تحريريه متوازنه !!!
سياسه اعلانيه متوازنه جداااااااااااااا!!!! واحنا عمرنا ما نبيع ضميرنا علشان اعلان ولا نبيع قلمنا علشان حمله اعلانات ولا نبيع شرفنا علشان مال الدنيا ، ومابحبش الابقاق ، اللي ناوي يدفع ويشتري شرفنا يورينا فلوسه !!!!
وطبعا كل حاجه حننشرها علي الجرنان حانشرها علي الموقع ، وافلام فيديو اديها والخبر طازه وسخن وبنار الفرن ، ومن الموقع بتاعي للنت كلها و........... زغرطي ياللي ماانتيش غرمانه ، وهاتك يانقل وهاتك ياشير و............ ايه ياواد الذكاوه دي ايه الشطاره دي ، ده وانا والمكسحين اللي معايا بقينا مصدر من مصادر الاخبار العالميه والدوليه و......صلي صلي علي النبي صلي!!!
حاعمل جرنان !!!!
ده احسن مشروع استثماري !!!!
يجيب فلوس ولا الهيروين !!!!
الناس بتحب اللي يشتم في الحكومه ، نشتم في الحكومه !!!
مش كل الناس يعني، فيه ناس برضه ماتحبش نشتم في الحكومه بلاش ياسيدي نشتمها ولو اين يعني هي الشتيمه بتلزق !!!
الناس بتحب المعارضه بس مش قوي !!! ندلع المعارضه لكن مش قوي !!! الناس عايزه تعرف الحقيقه ، الحقيقه دي لعبتي ، شويه حقيقه علي شويه مبالغه علي شويه كذب علي شويه استهبال !!!
كتاب راي ، طبعا ، احسن كتاب راي ، يقولوا كل حاجه ، ومحدش يعترض علي كلامهم !!!
سيبوهم براحتهم مااحنا كلنا عارفين ان محدش بيقرا ليهم ولو قروا ليهم كلامهم مالوش لزمه ولا حيفرق !!!!
صفحه حوادث تهتم جدا بالقباحه اصل الواقع رديء جدااااااااااااااا ماتقوليش دي حوادث فرديه مابتعبرش عن الشعب ، ملعون ابو الشعب ، تمانين مليون معرفوش يسيطروا علي راجل مجنون خطف بنت في خرابه ، يستاهلوا اللي يجرا ليهم ، تمانين مليون معرفوش يمنعوا بت تشم كوله تحت الكوبري ، يبقوا يستاهلوا اللي يجرا ليهم ، تمانين مليون مش عارفين مش عارفين يمنعوا راجل يلبس نقاب ويخش يسرق ، محدش يقولي ده غسيل وسخ ، وسخ مين ياعم ، الجرنان كله مغسول باوكسي البامبي !!! انا بابصر الشعب باخطائه بعيوبه علشان ايه ، علشان يبقي احسن ، واذا مابقاش احسن ، يولع بقي انا مالي ، المهم يشتري الجرنان !!!
ماتنسوش الفن !!! ماتنسوش تعملوا كده كل شهر او شهرين ، صفحه بايخه من اللي محدش بيقراها ، ال ايه تجارب ناجحه ، ال ايه فن راقي واوبرا وباليه ، ال ايه متاحف وسياحه ، الصفحات دي مهمه جدا ، لانها الاعلانات المستتره ، بنقبض ومانقولش ، مانكتبش عليها اعلانات لكن هي اعلانات والقراء اذكياء من اول كلمه يقفلوا الصفحه ويمكن يقطعوها خالص من الجرنان ، اصله كلام بايخ ومرصوص من غير روح ، واد حمار يكتب عن الباليه ويقولك كساره البندق في الاسواق بمناسبه رمضان وواحد تاني يقولك اوبرا عايده جنب موقف عبود بالضبط !!! صفحات ممله وبايخه ومحدش بيقراها بس لازم لازمن لازمن ليه ، لانها تدي الجرنان مصداقيه ورقي وسلمي لي علي المترو !!!!
كده اتفقنا ، كده استبينا !!!!
موضوعين بس لسه نفسي اتكلم فيهم وبعدين انا اتكلم براحتي ، انا صاحبه الجورنان وصاحبه الكوره !!!
الموضوع الاول ، مش عايزه اي صحفي محترم يتشغل معايا ، ولاي اي صحفي له مبدأ ثابت او وجه نظر محترمه !!!
الصحفيين اللي بجد ، المحترمين اصحاب المباديء اللي ليهم موقف بجد ووجه نظر ،مش عايزه اشوف ولا واحد منهم عندي لا هو ولا خياله ، ليه ، لانهم محترمين ، هو ده مش سبب كاف اني ابعد عنهم !!! اذن اي صحفي محترم وصاحب وجه نظر مالوش دعوه بجرناني خالص البته ..... اتفقنا !!!
انا عايزه الصحفيين اللي متلطعين زي الهم علي القلب ولا شغله ولا مشغله ومنفسنين وتعبانين وجواهم غل وحقد ومش لاقيين حته يكتبوا فيها ولا علي ورق التواليت حتي !! دول ممتازين ، حيخشوا الجرنان وحوش نفسهم يغلوا فشهم في اي حد ، يعني حياكلوا النجيلة ويهيصوا ولازميني .... ولا ااقولكم ، ولا صحفيين ولا حاجه ، نجيب شويه عيال صايعه وبعدين احنا نعملهم صحفيين ، احنا نقيدهم في النقابه ويبقوا صحفيين ملاكي بتوعنا شخصيا ، لا يهربوا منا ايه ويتشهروا علي قفانا ايه ، ماانا حامضيهم علي وصولات امانه قبل مايشتغلوا تمن الشهره ووجع القلب والقيد في النقابه !!! وبعدين دي عيال وسخه وحتفضل وسخه ، لو سابتنا حتروح لحد تاني بس وسخ برضه ، وده معقول ، وهي حتلاقي اوسخ منا فين ، هي حتقعد معانا ومعانا حتكبر وتتشهر وتبقي ميت فل وعشره!!! والناس حتحتار فيها ، شويه يقولوا معارضه وشويه يقولوا حكومه وشويه يقولوا ولا حاجه !!! ومن الجرنان العامر بتاعنا للفضائيات والتلفزيون والقنوات الارضيه والمحليه والدوليه و.............. شيلني وشيلك !!!
الموضوع التاني ..... ان جرناني العامر بصراحه بصراحه حيكون مالوش اي وجه نظر !!! ولا موقف ، ولا مبدأ ، ده الموقف الثابت اللي حاثبت عليه ، اني مالوش موقف ، عادي جدا بتستغربوا ليه ، هو انا اول واحده ماليش موقف ، عادي جدا ، ناس كتيره مالهاش موقف وعامله ان ليها موقف ، عادي خالص وبلاش حنبله بقي !!!!
اوضح حاجه مهمه كمان ، ممكن في لحظات ااجر الجرنان مفروش ، مش كله يعني ، لا صفحتين تلاته ، ااجره مفروش لحد مزنوق فينا وماله برضه الناس لبعضيها ، ووبعدين بعد شويه ، ااجر صفحتين تلاته تانيين لحد تاني مزنوق في كلمتين برضه !!! ياجدعان دماغكم ماتروحش لبعيد ، خليكم حلوين ، دي مسانده ومساعده والناس لبعضيهم ، ايه علاقتي انا بقي بالكلام اللي بيكتبوه ، واحد مزنوق افك زنقته ، اديله صفحتين تلاته اربعه يكتب فيهم براحتهم قضاياه هو وبعدين لما يمشي ، عادي جدا ... محدش يقولي بقي معندكيش موقف ، ياسلام ، موقف ايه ، ايه علاقه المواقف بالجدعنه والاخوه والايجار المفروش ، هو لما نقف مع بعضينا نتشم ، اه ياشعب قلبه قاسي وجاحد !!!
لا لا عيب بقي محدش يقولي بيشتروا قلمي ، فشر ، انا قلمي محدش يعرف يشتريه ، انا ممعايش قلم اساسا ، وعيب برضه محدش يقولي اني ارزقيه ، لا واللي حيقول علي ارزقيه حاقوله ياستين ارزقي ، وعلي راي المثل ، لاتعايرني ولا اعايرك الهم طايلني وطايلك ، ده مش معناه اني ارزقيه ، ده عقليه بزنس والبزنس بيحب الخفيه وفتح عينك تاكل ملبن ، وبعدين هو انا يعني باجر الصفحات لنقابه السواقين ، ماانا باجر الصفحات دي لتيارات سياسيه برضه ومن حقهم يتكلموا ، مش كفايه انهم مكبوتين مكتومين ، يعني اساعدهم ابقي وحش وكخه ، ولا اضيق عليهم واسيبهم مقهورين زي كل الناس ، عيب محدش يقولي ارزقيه ولا بابيع قلمي ولا شرفي ، لان الشرف لايكيل بالبتنجان علي راي الابله بمبه كشر !!!
انا كده وضحت موقفي وحلمي !!!
حاعمل جورنان واتشهر واعمل فلوس وابقي صاحبه موقف وقضيه !!!!
وياناس ياشر كفايه ار !!!!
وعلي راي الوليه ساميه بتاعت الجرجير ، اللي غيران مننا يعمل زينا !!!
والجرايد واصدار الجرايد حق لكل مواطن !!!!!!!
وباحب الناس الرايقه اللي بتضحك علي طول !!!!!!!!
وسلامتها ام حسن وام محمد ....... اه وام جرجس كمان لزوم الوحده الوطنيه والمواطنة !!!!!!
هناك تعليق واحد:
أميره
كدا اتطمني... ها تلاقي الف صحفي وصحفي يشتغل في الجورنان بتاعك ... لا ذمة ولا ضمير... شماعات ماشية لابسة هدوم الفضيلة والمباديء والافكار النيرة... وتروحي تتفسحي في الغردقة... تلاقي اللي كنتي فاكراه نبراس... قاعد سكران طينة وفي وسط الناس... ويتشال بس مش على الراس زي ما بيحصل في الجورنان.. لا بيتشال من تحت الباط... وكل اللي كتبه ما كان الا فرقعة سكران انبسط وزاط
ها تلاقي منهم كتير فما تقلقيش
وموقف ثابت ايه بس .. امال ليه عملوا الميكروباص.. ماهو اكبر دليل انا ما بقاش في موقف او رأي
اكتبي كل اللي تكتبيه
بجدعنة او حتى بنداله ها تلاقي اللي يشتريه
ماهي الناس بقت غاوية فضايح وكلام كتير
المهم انه لا يودي.... ولا يجيب
إرسال تعليق