05 فبراير 2011

مستندات تعبييرية !!!!


انهم يتصورونا اغبياء !!!!
 ممكن نفكر شويه !!!!


كل شويه ، حد يطلع علينا بصورة ورقه ، معرفش جايبها منين ، مره من موقع جرنان علي الانترنت ومره من شبكه مش عارف ايه ، ورقه ، صورة ورقه ، ومفروض انها رسمية ، مره من وزاره الداخليه ومره من من الدقهليه ، مفروض انه مختوم كمان بختم النسر ، علشان المجرم اللي حيبقي عنده شك زيي كده ان الورقه " مضروبه " تتخزق عينه بختم النسر فيتخرس ويسكت !!!!

طيب نعم بقي ، مالها الاوراق الرسمية دي ، الاوراق الرسميه الحلوه دي ، مكاتبات تثبت ان الداخليه قررت تفتك بالمتظاهرين ، ومكاتبتات تثبت ان الحزب الوطني قرر يبعت بطلجيه يضربوا المتظاهرين ، المهم يعني ،ان الاوراق دي اللي يجمع بينها انها اوراق رسميه طالعه من جهات رسميه قررت تفتك بالمتظاهرين ، ولانها جهات رسميه مجرمه قررت تبقي بجحه وغبيه وتكتب رغباتها دي علي ورق ، علشان حد طيب وابن حلال يلاقي الورق ده ويبقي دليل ضد الجهات دي ويفضحهم بيه في كل حته علي الانترنت والجرايد وماشافوهومش وهما بيتأمروا شافوا المستندات بتاعتهم !!!

طيب نبتدي بورقه وزاره الداخليه ، الاسطي اللي ضربها ، راسه محدوده الحقيقه وتلميذ في عالم التزوير ، ليه ، اولا الاسطي كرمش الورقه ، ال يعني اللي كانت عنده قرر يرميها زي مابنرمي الورقه الملفوف فيها الشندوتش في الزباله ، فبنكرمشها !!! قرر يكرمش الورقه علشان يخش علينا انها كانت مرميه في الزباله ، وحد عبقري ايده طايله ، فتش في زباله وزاره الداخليه فلقي الورقه الجميله دي فقرر ينشرها ويافضيحتك ياوزاره الداخليه يالي زبالتك بتتفتش ويتلاقي فيها مستندات خطيره تتنشر علي الانترنت وتبقي مستند رسمي ضدك !!!!

طيب يااسطي ياعبقري يابتاع ضرب المستندات هو انت ماتعرفش ان وزاره الداخليه مابترميش مستندات في الزباله !!! وانها حتي لو بترمي مستندات في الزباله ، الزباله بتاعتها لسه جوه الوزاره لان الزبال اللي بيشيل الزباله من جوه وزاره الداخليه مابيروحش يلم الزباله علشان حظر التجول ، طيب يااسطي يابتاع ضرب المستندات ، انت ماتعرفش ان وزراه الداخليه زي اصغر شركه فاشله ، عندها مفارم للورق ، بتفرم فيها الورقه اللي مش عايزاها ، طيب انت ماتعرفش يااسطي يابتاع ضرب المستندات ، ان من ايام رأفت الهجان علي راي حد معرفوش في الفيس بوك ، ويوسف شعبان بيعلم رافت الهجان يبقي يحرق الورق اللي مكتوب عليه حاجات سرية !!! وان علي الاقل وزراه الداخليه الايام دي ، في الايام السوده دي ، اذا ماكانش عندها مفارم للورق ، علي الاقل بتحرق الورق اللي مكتوب فيه حاجه خطيره تنفيذا لتعليمات السيد اللواء يوسف شعبان في مسلسل رافت الهجان !!!!

طيب اذن اذن .... الورقه متكرمشه اونطه علشان احنا- اللي مابنفكرش ومش عايزين نفكر - احنا نتصور ان حد كرمشها ورماها والموقع ولا الجريده ولا الشبكه ولا ابصر مين اللي لقاها ، لقاها مرميه ومتكرمشه !!!! والختمه الشريفه كلام فاشل ومستواه عبيط زي افلام الكارتون !!!!ا لو الورقه اتنشرت مكويه وسليمه كده ، يمكن كنت اصدق ان حد سرقها من حد !!!!! واقول جايز فيه لواء اهبل في وزاره الداخليه اتسرقت شنطته في المظاهرات ولما فتشوا فيها لقوا الخطه الجهنميه دي مكتوبه في الورقه فنشروها !!! لكن كرمشه الورقه اكدت لي انها مضروبه ومن حد مالوش في التزوير والضرب !!!!!

وبعدين هي اي ورقه تتنشر تبقي صح ، ليه مافيش كومبيوترات وبرنترات وبرامج فوتو شوب وصور تعبيريه وكله كله !!!! واصغرعيل في اولي اعدادي بيتصور مع اوباما ويضرب مستندات وصور واختام و.......اهي هيصه !!!! اشمعني الورقه المكرمشه دي اللي حنصدقها ، الاخ اللي ضرب الورق وكرمشها ، مستواه الفكري ضحل وخبراته الاجراميه قليله وضرب الورقه بطريقه عبيطه مستفزة !!!!

طيب ، هي الورقه دي اتنشرت ليه ، اتنشرت علشان نكره الداخليه ، الله مااحنا بنكره الداخليه واللي عملته في الامن السياسي واللي عملته في المتظاهرين ، بنكرهها وبنطالب بمحاكمه حبيب العادلي وكل اخوانه ممن تسببوا في الانفلات الامني والاعتداء علي المتظاهرين والجرائم اللي ارتكبت ضدهم ، بنكرهها وعايزين نفتح الملف كله ، واللي اتقتل ناخد حقه ، واللي اتضرب ناخد حقه ، واللي اتسحل ناخد حقه ، ماهو ده احساس الناس كلها وموقفها ، طيب امال ايه ، لا الورقه الزباله المضروبه دي اتنشرت علشان الناس تكره حياتها وتفقد الثقه في كل شيء وتفقد الثقه في الدوله كلها - مش في حبيب العادلي ورجالته - تفقد الثقه في الدوله كلها وساعتها ، الفوضي هي الحل و........... شعللها شعلل ولعها ولع !!!!

نيجي بقي للورقه التانيه بتاعت الدقهليه !!!!
حنبعت بلطجيه يضربوا المظاهرات والمتظاهرين ، وحنصرف لهم وجبه !!!! والورقه مختومه بختم النسر !!!!
طب والنبي مختومه بختم النسر ليه !!!! علشان البلطجي اللي حيجهز البلطجيه يبقي معاه مستند رسمي ضد البلطجي الاكبر اللي حرضه علي ضرب المتظاهرين !!!! اصلي سعادتك ياافندم لازم يكون معايا مستند رسمي لاخلاء مسئوليتي !!!! والله العظيم كلام يضحك ويبكي ويحزن ويخلي الواحد يلطم علي وشه !!!!

وبعدين هي في الايام السودا اللي اتحرقت فيها الاحياء ومباني المحافظات وكل الناس قاعده في بيوتها بما فيها الدوله ورجالتها وكله ، في الايام دي ، حد بيكتب جوابات وبيختمها بختم النسر !!!! دي الدنيا ولعت واتحرقت والاقسام اتحرقت والمساجين هربت ، وحظر تجول وقوات مسلحه ، ووسط كل هذه الاحداث المنيله بستين نيله ، وسط كل ده ، فيه ختم نسر قرر البلطجي الاكبر يختم بيه جواب للبلطجي الاصغر علشان يبعت ناس تضرب المتظاهرين ويصرف له وجبه وبدل !!!!! ولا هو كل حاجه اتحرقت الا ختم النسر علشان عليه حارس زي العين ماعليها حارس كده ، والحارس خد الختم شاله علشان محدش يخصم منه يومين لانه بدد العهده وبعدين ختم بيه الجواب علشان البلطجي اللي حيجهز البلطجيه يبقي متطمن ان معاه جواب رسمي يخلي مسئوليته وقت الجد لانه بينفذ تعليمات البلطجي الاكبر وعلي راي المثل ، والنعمه ماانا دي اختي هنا !!!!!

طيب حد حيسالني امال جابوا ختم النسر منين ، اول كل حاجه في مصر قابله للضرب باعتبارنا احنا اللي خرمنا التعريفه ، ثانيا القص واللزق والنسخ والتركيب بتاع الكومبيوترات ماخلاش لولاد الحلال حاجه ، ثالثا زمان ايام البدائيه كان المزور العبقري يسلق بيضه ويقشرها ويحطها علي صوره اي ختم ، تقوم البيضه تشف شكل الختم ولما يختم بيها وهي لسه سخنه علي ورقه ، تحط صوره الختم !!! وبعد كده يعمل بالبيضه ايه ، ياكلها طبعا في ربع رغيف !!!!!

ايه ياجدعان ، اللي بيضربوا الاوراق الفاشله دي مابيحترموش عقولنا ليه ، حد قال لهم علينا اغبياء ومابنفهمش!!!! عيب والله ، ياللي بتضربوا الورق ، احترموا عقولنا وتعاملوا معانا بطريقه ارقي من كده شويه ، باعتبارنا بنفهم حبه صغيرين والشغل الرخيص بتاع تلامذه الاعدادي مايخيليش علينا !!!! بلاش نظريه المستندات التعبيريه دي ، ده لما الاهرام بجلاله قدره ، عمل صوره تعبيريه الدنيا قامت وماقعدتش وكل الناس قفشتها حتي اظهر عيل في كي جي تو ، بلاش نظريه المستندات التعبيريه دي عيب احترموا عقولنا !!!!

طيب بتوع المستندات التعبيريه والبيضه والورق المكرمش بيعملوا كده ليه ، اللي بيضربوا الورق واللي بينشروه ، بيعملوا كده علشان المصريين يكرهوا حياتهم اكتر واكتر ، كل ده مقصود من فقدان الثقه وكل واحد يستخبي جوه نفسه ويكره الدوله ويخاف منها ويحس انه مفعول به ضعيف قليل الحيله المؤامرات بتحيط به من كل جانب ومايصدقش حد ومايسمعش لحد ويستخبي جوه نفسه اكتر واكتر ، وساعتها مش حيكون عنده متلازمه استكولهوم زي مالدكتور علاء الاسواني تفضل مشكورا وشخص حالتنا النفسيه كلنا ، لا حيكون عنده متلازمه بولاق الدكرور اللي تخليه يجهز سنجه ويجري ورا اي حد يقوله صباح الخير ويدبحه بهدوء شديد لان تحت ايده مستندات رسميه مختومه بختم النسر تثبت ان مافيش فايده في البلد ولا في الحياه نفسها ، يبقي كمان وبتقولي صباح الخير؟؟؟؟؟!!!!

اتقوا ربنا في شعب مصر وفي مصر !!! الدنيا مش ناقصه شعلله ولو ولعت حتحرقنا كلنا محدش بعيد !!!!
وربنا يحفظ مصر من كل شر اللهم امين !!!!

ملحوظه " الصور علي الانترنت وعلي الفيس بوك ، وفكرت انشرها وبعدين قررت مااوسخش المدونه بتاعتي باوراق مضروبة وعبيطه كده " !!!!

هناك 4 تعليقات:

غير معرف يقول...

انا مازن

اميره انتى تعرفى رايى فى الل حصل من قبل كده انا كنت مع الناس اللى فى الشارع لحد يوم الجمعه و عارف انى فى ناس ركبت متاكد من ده برده كنت معاهم لحد يوم التلات لما الرجل قال خلاص انه مش هيجدد و عين عمر سليمان و كل الكلام ده الناس اللى فضلت قاعده قاعده ليه عايزين ايه اكتر من كده عايزين تونس لا اكثر فوضى مدمره لكل اللى فى الدوله موصلوش لاى حاجه ناس حاوت و نجحت انها تركب الموجه تركب افعال كان يراد بها اصلاح حقيقى لكن للاسف استغل ده اسوء استغلال انا خايف من الانقسام اللى هيحصل بعد كده فى البلد ما بين الناس دعاه الفوضى و دعاه تهدئه الامور الناس بتكلم عن التضحيات و هى قاعده فى البيت بتضحى بناس شغالين باليوميه و ناس شغالين فى السياحه غير حاجات كتير اكتر من كده و يقول لازم نضحى طيب هو كده مش فاهم انه تحول الى ما يحاربه بدون ان يشعر بيضحى بناس تانيه عشان هو يحقق حاجه فى دماغه و اصبح الناس فريقين فريق متظاهرين و الاخر عملاء للنظام ده من وجهه نظر المتظاهرين و فريق مخريبن و دعاه فوضى و فريق دعاه تهدئه و الحفاظ على مصر فى وسط كل ده ناس استغلت الكلام ده كله و قعدت تشحن فى ناس اساسا مشحونه و مش ناقصه من الاساس انها تشحن تركه الكراهيه زادت اوى ما بين الناس بعد ما كانت اتلغت من الاساس فى الايام اللى فاتو اعتقد ان ده الوضع الوحيد اللى كله يتمنى انه يطلع غلط عشان بلده هنعمل ايه هندعى عشان مصر

غير معرف يقول...

براوة يا اميرة ،، براوة يا استاذة ،، عرفتي تفندي موضوع المستندات ده تماما

من فضلك بقي تكتبي حاجة علي ضباط وعساكر الشرطة اللي اتنكروا في زي بلطجية وراحوا ميدان التحرير وفي جيوبهم كارنيهات الشرطة

علشان قال يتعرفوا علي بعض
وكأن كلمة السر بتاعة ثلاثي اضواء المسرح ماتخلقتش لسة
الفيل في المنديل ....... والفلة في المنافيلة

غير معرف يقول...

براوة يا اميرة ،، براوة يا استاذة ،، عرفتي تفندي موضوع المستندات ده تماما

من فضلك بقي تكتبي حاجة علي ضباط وعساكر الشرطة اللي اتنكروا في زي بلطجية وراحوا ميدان التحرير وفي جيوبهم كارنيهات الشرطة

علشان قال يتعرفوا علي بعض
وكأن كلمة السر بتاعة ثلاثي اضواء المسرح ماتخلقتش لسة
الفيل في المنديل ....... والفلة في المنافيلة

غير معرف يقول...

من مجدي السباعي
اميره هانم تسمحيلي اصحح حاجه تثبت كلامك ""التعليمات والتوجيهات والخطط السره"لاتكتب بل تقال فقط ..ولو فكرنا ثايه نجد ان في كل عمل او وظيفه التعليمات العليا بيقولهلنا الكبير بالبق لامؤاخذه فما بالك ان تعليمات قتل شعب؟؟؟..لكن ماينشر هو هبل يعتمد في نشره وتصديقه علي شبقنا ولهفتنا لمعرفه وترديد اي كلام ثم تاتي الخطوه الثانيه نقسم انه حدث ومن معلوماتي الخاصه جدا مع اني اكبر شخصيه اعرفها هي بواب عمارتي
تصحيح اخر..يوسف شعبان بيقوله احرق الورقه في رافت الهجان..ده علشان الحبكه الدراميه ليس اكثر