حرة .............

حين ترك شفتيها وانتبه لرنين هاتفه ....... انسحبت من حياته ببساطه ..... ولم تندم ابدا
وحين طاردها يحاصرها بحبه ......
سخرت من كذبه المفضوح وزيف مشاعره ...
وهمست في اذنه " ابقي اعمل الموبيل بعد كده سيلنت" وسارت تضحك تآرجح ذراعيها حره ........

الحداد ........!!!!

قالت لم اعد اصدقه ....... وبكت .. كان كلماتها نعيا لوجوده في حياتها ... وارتدت السواد واعلنت الحداد ... ورفضت مقابلته والغت رقمه من هاتفها و........ حين قابلته مصادفه في الشارع المزدحم بالغرباء ...... لم تراه ............

ايه صعبه دي ؟؟؟؟؟؟؟؟؟؟؟؟؟

اكره " طابور السيدات " ذلك الطابور الذي اخترعوه ذات يوم وفصلوا النساء فيه عن الرجال بحجه حمايه النساء من التزاحم وسط الرجال وحمايتهن من " تحرش " الرجال "الشريرين المنفلتين " بهن ، اكره تلك الفكره التي تفترض ان النساء "ضعيفات" يحتجن لحمايه خاصه يعجزن عن توفيرها لانفسهن الا بالعزل بعيدا عن الرجال لان وجودهن جنب الرجال " الوحشين " اشد فتكا وضررا من " النار والبنزين " !!! اكره الفكره الفلسفيه التي تآسست عليها فكره حمايه النساء بشكل خاص اصلهم ياحرام " ضعيفات مهيضات الجناح رقيقات القلب والاحساس دموعهن سريعه " !!! فالنساء يحتجن لمعامله خاصه " طابور - مقاعد - عربيه مترو " لانهن اذا وجدن وسط الرجال لن يقوين علي انتزاع اماكنهن لان الرجال " المفترسين المجرمين " سيجوروا عليهم ويستولوا علي اماكنهن وعلي فرصهن وربما سيتحرشوا بهن لذا وجبت الحمايه والمعامله الخاصه والرعايه " للجنس الضعيف " !!!!!!!!! اكره فكره ان النساء زي " البسكويت " نعاملهم معامله خاصه لحسن "يتفرفتوا !!!!!" ...... اكره فكره ان النساء زي " الورده " نعاملها بحنان ورعايه مبالغ فيها وفي النهايه " نحطها في عروه الجاكته " !!!!!!!! اكره فكره " احب المرآه واحترمها " وعلشان كده احبسها واسكتها وامنعها من اتخاذ اي قرار و" هي الستات عايزه ايه اكتر من كده يامفتريييييين " !!! معرفش راجل مين " ابن عفريته " اللي قرر " يكسح " الستات فقال لهم " ياحلوين ياجمال ياضعاف ياصغننين ..... هاتي بوسه لبابا " !!!! وبعدين رجع عليهم من ورا ضهرهم " خدوا بالكم من النسوان دول فتنه وشر واغواء " وقال لزمايله الرجاله " واحنا ضعاف وبنتفن وبنتغري فيلا نحبسهم يالا نحاصرهم يالا نخوف الناس منهم " !!!!!!!!!! اكره فكره ضعف النساء لانها فكره شريره قصد منها الحصار وليس الحمايه !!! واكره اكثر فكره شر النساء وغوايتهن لانها فكره خبيثه قصد منها العزل والحصار و"اقبضوا علي الساحرات الشريرات " !!!! النساء بشر مثل الرجال بشر عاديين فيهم " الوحش والحلو والجميل والقبيح والمغري والمنفر والقوي والضعيف الطيب والشرير " وبس خلاص !!! ايه صعبه دي ؟؟؟؟؟؟؟؟؟؟؟؟؟؟

المهم اني حاولت وحاحاول !!!!!!!!!!!

ليه رشحت نفسي في انتخابات نادي الصيد ؟؟؟؟؟؟؟؟؟؟؟؟؟ سؤال غريب بالنسبه لي سآله لي ناس كتير وهما قاعدين يآزآزوا لب ويشربوا حاجه ساقعه ؟؟؟؟؟؟؟؟؟؟؟؟
طبعا لما بسمع السؤال ده بيبقي عندي الف اجابه هزليه واجابه واحده جد ساعات باستخسر ااقولها لانها مفروضه مفهومه من غير مااقولها !!!!!!!
ليه رشحت نفسي في الانتخابات ؟؟؟ السؤال العكسي ليه ماارشحش نفسي ؟؟؟؟ وبمعني اصح ليه مليون واحد مابيرشحش نفسه ؟؟؟؟؟
طيب نحكي من الاول ونقول ...........
احنا بلد شعبها غاضب ... من ايه مش مهم .... غاضب من مليون حاجه في مجالات مختلفه ...... يعني بصراحه كل واحد بينام فوق الغضب اللي بيعجبه .....غضبانين ... عندنا ملحوظات سلبيه .. متضايقين من ان كل حاجه بتحصل من غير ماحد يعبرنا ولا ياخد راينا ولا لينا قرار في اي حاجه ....يقولوا ننام ننام ... يقولوا ناكل ناكل .... يقولوا شد الحزام نشده ونرقص ...... يقولوا انت ماما وانت بابا وانت انور وجدي نقول واسماعيل ياسين كمان وان شالله محدش حوش ........ احنا " مفعول به " كبير جداااااااااااااااااا ...... اكبر "مفعول بيه" في التاريخ .... وخلاص ادمنا الحاله دي .. نقرا الجرايد ونشتم ونام .. ننزل الشارع نتخانق وننام .. نتفرج علي برامج السهره الجميله المذيعين يلطموا واحنا نصوت ، المذيعين يعيطوا واحنا نتشحتف ، ونغضب ونغضب وفي الاخر نناااااااااام زعلانين اننا " مفعول بيه " ونشتم في " الفاعل " نشتمه ونلعن ابوه - اي فاعل مش قصدي حاجه محدده لحسن حد يفهمني غلط - نشتم في " الفاعل " ونلعن ابو "المفعول بيه " ونناااااااااااااااااام ....

كمان فيه بيت شعر عظيم جدا من الايام المحترمه اللي خلصت بيقول " مااستحق ان يولد من عاش لنفسه " ......... ماهو الواحد لما يعيش لنفسه يبقي ميت !!! حتي لما يموت مايلاقيش حد يترحم عليه !!!! لانه عاش لنفسه ومات مع نفسه !!! بلا اي قيمه وسط البشر !!! لاقال كلمه طيبه لحد يفتكره بيها ولاعمل عمل صالح لحد يدعي له بسببه بعد مايموت !!!! لكن الايام المحترمه مشيت خلاص ..... وبقينا في الايام السودا ...... بتاعت " يالا نفسي " وبتاعت " ان جالك الطوفان حط ولدك تحت رجليك " وبتاعت " وانا مالي وانا مالي " !!!!!! وخلاص نسينا بيت الشعر والحقيقه نسينا الشعر نفسه وبقينا في زمن " احنا اللي خرمنا التعريفه " واحنا " اللي دهنا الهوا دكوا" ........ طبعا عايشين الايام السودا لكن مش عاجبانا خالص ..... عايشينها وزعلانين وبس ... زعلانين وخلاص ومش لازمنا وجع القلب والقرف !!! مش لازمينا الهم والغلب والدوشه !!!! عايشينها وبس ، نفسنا تتغير طبعا ، لكن تتغير مع نفسها كده وخلاص من غير مانتعب ولا نوجع دماغنا ولا راسنا !!!!!!

كمان ............. محدش عاجبه حاجه ....... وحاسس ان محدش سامع صوته ...... ومحدش معبره ...... ومحدش بيسآل فينا ... والناس اللي فوق ، في مجلس الاداره ولا مجلس العماره ولا مجلس الشعب ولا مجلس البطيخ .... الناس دي قاعده فوق مبسوطه بتبص علينا واحنا تحت وتقول " مين دول " واحنا نصرخ ومحدش سامعنا !!! وننادي ومحدش سامعنا !!!! ونكتب ومحدش يقرا !!!!! الناس قاعده فوق هناك بعيد مبسوطه !!! واحنا قاعدين تحت بنشتمهم وبس خلاص !!!! نشتمهم لانهم مش حاسين بينا مش دريانين بينا مش سامعين صوتنا !!! وحاسين انهم قاعدين فوق علشان بيستفيدوا ويعملوا بيزنس وياخدوا عمولات وسطوه ونفوذ وعلاقات وهما مهيصين واحنا موكوسين !!!!

طيب ياجماعه ليه سايبنهم يلعبوا لوحدهم ... ماتيجوا نهجم عليهم ... نلعب معاهم ... نشاكسهم ... نقول لهم احنا موجودين ... نحاول نكسر حاجز السلبيه اللي احنا عايشين فيه ... نكسر حاجز العزله المفروضه علينا .... ماتيجوا نقول خدونا جنبكم !!!! ماتيجوا نقول احنا الشعب اللي محدش دريان بيه حنحاول - مجرد محاوله - نبقي من اصحاب القرار - ولو كان في دكان صغير او مقله لب او ملعب كوره - حنشارككم قراراتكم حنقولكم الناس عايزه ايه ، ماتيجو يااهل السلبيه والغضب والصمت الموجع والهم المستمر ماتيجوا ننفض غضبنا وسلبيتنا ونحاول نحاول نبقي مره واحده بس " فاعل " مش "مفعول بيه"" ..........

لا لما اي حد يعمل كده - يبقي اكيد مجنون في احسن الاحوال - او مصلحجي - او ليه هدف - طبعا شرير - او عبيط - او حيقول حاجات ومش حيعملها طبعا لان عاجز زينا ، لانه موكوس زينا ، وهما الموكوسين اللي زينا يعرفوا يعملوا حاجه !!!! لما اي حد يقرر يكسر حاجز السلبيه احنا شخصيا نكسر مجاديفه ، نتسلي عليه ، نهبطه ، نقوله مافيش فايده لانه حمار - زيي - ومش قادر يفهم انه مافيش فايده !!!!!!! ههههههههه اما حاجه غريبه جدا !!! احنا ناس اتعودنا علي " اشده علشان يلسعني " ومقتنعين جدا بالمثل " القط مايحبش الا خناقه " وغرقانين في السلبيه ومدمنين " ادرنالين " الغضب والعجز وبس خلاص !!!!!

ليه رشحت نفسي في الانتخابات ....... لاني عبيطه وغاويه شقا ومؤمنه بالخدمه العامه لاي مجتمع الواحد بينتمي له ، لاني رافضه رتابه حياتي بتاعت من البيت للشغل ومن الشغل للبيت وشايفه ان دي حياه ماتنفعش ماتكفيش ولازم الواحد يعمل حاجه مفيده في الحياه !!! لاني شايفه انه مجتمع نادي الصيد صوره مصغره طبق الاصل من مجتمعنا الكبير فيها نفس امراضه وسلبياته وفي نفوس جمهوره نفس الغضب والسلبيه والمراره بتاعت الجمهور في اي حته ، لاني شايفه اني ممكن اعمل حاجه مفيده !!! وده طبعا كله كلام غريب وفاشل ومالوش لزمه .... بين ناس اتعودت علي الوعود الانتخابيه البراقه " كوبري لكل مواطن " ولان الكلام مش بفلوس فيالا نقول ونقول ونقول " كوبري لكل مواطن - كوكب لكل مواطن - حنوزع ارغفه وفراخ مكتفه " وبعدين الحمله الانتخابيه تخلص وسلامتك الله يسلمك " خالتي وخالتك واتفرقت الخالات " وطبعا المرشحين اللي بيوعدونا لو نجحوا بينسونا ومايعملوش اي حاجه - والمرشحين اللي سقطوا بيقعدوا جنبا جنب الحيطه وننزل كلنا شتيمه في كل الناس ومابين الانتخابات والانتخابات نتسلي ونشتم ونغضب ونااااااااااااام ونفضل مفعول بيه الي الابد !!!!!!!

طيب مش بالذمه والنبي اسبابي دي اللي خلتني ارشح نفسي في حقيقتها كلام مجانين ، كلامي كلام مجانين استحق عليه اني اسقط بجداره !!!!!!!! ست عبيطه جايه من كتب التاريخ والزمن السحيق اللي مشي من زمان ، جايه تقول ، ال ايه خدمه عامه ، ال ايه اسمع للناس ، اليه ايه اتواصل معاهم ، ال ايه مافيش وعود انتخابيه ، اليه ايه اوعدكم ساقاتل من اجل مطالبكم !!!!!! ههههههههههههههههههه امال كلام عبيط بشكل ..... انا لو سمعته من اي حد حاموت من الضحك !!!!!!! وبعدين اسيبه يسقط !!! ولما يسقط ااقوله تعالي اقعد جنبي جنب الحيطه ويالا نشتم ونشتم ونشتم ونشتم !!! ويعيش " المفعول بيه " يعيش يعيش يعيش !!!!!!!!!!!!!!

رشحت نفسي في الانتخابات لاني مؤمنه اني اقدر اعمل حاجه !!! جايز مقدرش وجايز افشل لكن مافيش مانع من المحاوله !!!!! رشحت نفسي في الانتخابات لاني مؤمنه - لغايه دلوقتي - انه مااستحق ان يولد من عاش لنفسه !!! لان عطائي بين الناس ولصالحهم يجعل لحياتي قيمه وهدف !!!!! هههههههههه مش بقولكم كلام عبيط يستحق اني اسقط بجداره !!!!!!!
مش مهم اسقط ولا انجح !!!!! المهم اني حاولت وحاحاول !!!!!!!!
وبس خلاص !!!!!!!

كتر خيرك يادنيا !!!!!!!!!!!!!!

الان حالا فورا ............ ابحث عن اذن تسمعني عن حضن يحتويني عن قلب يدق بنغماتي انا ........
لكني واثقه ان اللحظه التي احتاج فيها كل شيء لن تلبي احتياجي ولن تمنحني ماكنت اتمناه ..........
وغدا ساستيقظ عازفه عن الحنان والانصات وافكر بطريقه عمليه واتصرف بطريقه عمليه ........
ففي اللحظه التي كنت احتاج فيها البشريه اختفت واعطتني ظهرها وولت ....... ولم يبقي لي الا نفسي التي عجزت في هذه اللحظه بالذات عن ارضائى !!!!!!!!!!
كتر خيرك يادنيا !!!!!!!!!!!!!

يعني ايه ؟؟؟؟؟؟؟؟؟؟؟؟؟؟؟؟؟؟

الح عليها تقابله ... جهز كلماته يستجدي مشاعرها ...
توحشه لكنها لا تفتقده ...
يشتاق اليها لكنها تنسي مواعيده ...
يتمني صحبتها لكنها تنفرد بنفسها سعيده ضجره من ازعاجه ...
عاتبها فتبلدت ...
عرض عليها مشاعره فابتسمت ولم تبادله المشاعر ..
كاد يلمس كفها فانتفضت بعيدا .....
حاول معها وحاوللكنها ببرود فرت من حصاره ورسمت علي وجهها ملامح يكرهها ....
سآلها وهو يقوم " الم تحبيني " فاجابته بسرعه " يعني ايه حب " فقذف بثمن المشروبات علي المنضده التي تجلسه عليها وفر هاربا ممتنا للسماء التي انقذته من بين براثنها متوحشه لن تقدر ابدا قيمه مشاعره فحين تقرر ذبحه لن يطرف جفنها ولن تتاثر !!!!!!

ااااااالو

سمعت صوته فاحبته فاعطاها رقمه ومنحها جسده واعطاها ظهره ونام ..
طلبته تبثه شوقها فلم يجبها فهو في عمله لايحب ازعاجا ..
بكت فلم يري دموعها وارسل لها رساله يعاتبها انها لم تحدد ميعاد لقاءهما القادم ...
رفضت تواعده فتوعدها وغضب عليها وترك لتليفونه الحريه يطلب رقما لا يعرفه ...
وحين سمع صوت ناعم يجيب علي رنينه نداءاته " ااااالو "
ابتسم فهاهي فريسه جديده اوشكت علي الوقوع في فخه ...
تنهد وقال بصوت رخيم مزيف " الو .. ممكن نتعرف "!!!!!!

هل احرق قلبي ؟؟؟؟؟؟؟؟؟؟؟؟

امسكت الرساله ارتبك قلبي احسست روحي خرجت من جسدي المتعب بهواك ترفرف في السماء تحلق فوق الغابات تنفخ في الريح تقوم تحجب قرص الشمس المشتعل بوهج الكلمات وتعود الي فاتنفس ، امسكت الورقه عاديه بلاملامح خاصه ، ملساء تزينها مشاعرك كلماتك احساسك نبضات قلبك انين روحك ، امسكتها فغادرت الدنيا القفراء وحلقت بعيدا ، كآني خطفت من واقعي الجدب واحتجزت اسيره كلماتك انفاسك رائحتك حبك وهيامك وغرامك ، امسكت الرساله وقرآت حروفها الف مره الف الف مره احسست دف مشاعرك يهدم عالمي الامن يقوض جدرانه فوق قلبي المتمرد علي حبك ، قرآت كلماتها جريت بعيني عليها اصل للنقطه التي تغلق السطر في وجهي فاعود مهرولة مذعورة للسطر من اوله استحلبه عذبا في فمي احتجزه ضياءا خلف مقلتي عيني اطرب لنغماته اسكر من خمر غرامك المعتق منذ سنوات وعقود ، امسك بالورقه اودعها ازركشها بقبلاتي اتشممها تتسلل رائحته لانفي لنفسي لروحي لقلبي اتوه بعيدا فرائحه غرامك اغوتني افقدتني وعيي وارادتي وقراري وكلمات حنانك خدرتني حروف غرامك اسرتني همسات محبتك اختطفني لبعيد وبعيد ونفتني بعيدا عن نفسي لكن قررت اتخلص منك ومن حبك ومن كل الهم الموجع الذي منحته لي خيطا منسوجا مع كل الفرحه التي لوحت لي بها تنتظرني لكني ابيت القدوم وعجزت عن الرحيل فاحتجزت في برزخ حبك صماء بكماء عاجزه عن فك الاسر والرحيل بعيدا عن قيوده الموجعه !!!
عجبا والله يارجل ... كل هذا الحب تملكه تجاهي ولا تقوي علي منحي الامان ....... عجبا والله ..... كل هذا الغرام تعيشه ولا تستطيع احتواء مخاوفي وتمردي وفراري ... عجبا والله اتعجب من نفسي اني قويت علي الفكاك من هواك الاعاصيري المدمر ........ قاطعتك وفررت منك واغلقت تليفوني فلم تصل لي ورميت اثواب خيالي التي عرضتها عليها لتعجبك ومزقت صور ذكرياتنا الوهميه التي صنعناها ونحن اسري مقاعدنا نتجول في العالم الرحيب الواسع وسكبت قارورات العطر التي احببتها في خيالك علي جسدي وكسرت اقلام الكحل التي احببتها تزين جفني وتضيء رموشي وتسطع فوق حاجبي واعطيتك ظهري وانكرتك وكآني لم اراك ابدا ولم اسمعك ابدا ولم احبك ابدا !!!!!!!!
وانتهت القصه وبقيت الرساله !!!!! تذكرني بانك كنت واني كنت !!!! تذكرني بحنين انكره ووجع عذبني وهوي ادمنته ولم يدمنني !!! بقيت الرساله تذكرني بالذي كان ومضي !! تذكرني بالذي كان ولم يكن ابدا ، بالذي تمنيه اعيشه ولم اعشه ابدا ..... فقررت اعاقبها بمنتهي القسوه والشده والعنف واحرقها!!!!!!!!!
اعددت لها حفله احرقها فيه واحرقك وانساها وانساك !!! اخترت اغنيه كنت احبها لانك تحبها وقررتها موسيقي جنائزيه لحروف هواك ، اخترت افخر طبق كريستال احبه وقررت وآدها فيه وكدت اشعل فيها النيران ثم تراجعت ، قررت القي عليها نظره ، امتع عيني بسطورك واروي عطشي لك بحروفك ومدادك ، قررت امنحها نظره اخيره وبعدها اقسو عليا مثلما قسيت علي واحرقها مثلما احرقت قلبي وانثرها رمادا مثلما بعثرت روحي .......... وقفزت امامي من بين سطورك ، خيالاتك تتراقص امام عيني ، تداعبني في كفي كما وعدتني ، تهمس في اذني بكلماتك مثلما تمنيت ، تقترب بانفاسك الدافئه من خدي تكاد تقلبني افر منك ومن خيالاتك واشعل القداحه لهبا عاليا وتنوح الموسيقي حولي ترثي كلماتك وذكرياتي وامنياتي واحلامي ، اقترب بلسان اللهب من طرف الورق ، اقسم لك قفزت الورقه بعيدا كآنها تعلم مصيرها وتخافه ، وانطفيء اللهب كآن اعصارا نفخ فيه فهمد.........

القيت نظره اخيره علي اعترافات حبك علي رساله غرامك علي ورقتك الحنونه اراك تمنحني قلبك في سطرها وسطرك الاخير يوجعني ، فاشعل القداحه ثانيه واقترب من الورقه التي يخطف انتباهي سطرها الاول اسمعك تهمس " حبيبتي " انفخ في القداحه اطفي لهبها واكاد اقذف بها بعيدا واطوي الرساله واخبئها بين ضلوعي بين جفني بين اورده قلبي وشراينها ،وحين تصورت اني صفحت عنك وسامحتك واني اشتاق اليك وكدت ابوح لك بغرامي الدفين الذي انكرته عليك ، تذكرت الوهم الذي بعته لي وصدقته ، تذكرت الكذب الذي حاصرتني به وامنت بك ، تذكرت فرارك الدائم نصل وجع لاتنزعه ابدا من قلبي ، تذكرت برودك امام لهيبي وهيامي وغرامي ........ قررت احرق الرساله واشعل النيران في بدنها سطورها حروفها رائحتك حبك وعودك غرامك فرراك فيه شخصيا ...... قررت اعاقبك واشعل النارفي الكلمات الوحيده التي قلتها صادقا حين بثتني حبك " حبيبتي " قبضت علي ورقه الرساله واشعلت القداحه و........ قفزت شعل النيران لبدن الورقه تآكلها ، رايت حروفك تتواري تسطع ثم تتواري رايت كلماتك تتاكل تنتفض مثل قلبي ثم تتاكل ، اوجعني قلبي قبضت روحي حوصرت نفسي ، احسستني احترق احسستني اكوي بنيراني التي اشعلتها نيرانك ، شاهدت النيران تاكل قلبي الذي اسرته بين سطورك ، شاهدت النيران تكوي فؤادي الذي استجار بك وفر لاحضانك وهرب مني ، شاهدت مشاعري تتبدد دخان اسود غليظ سميك يخنق ، شاهدت مشاعرك تتبعثر رمادا اسود يطيره الهواء سما اتنفسه اتنشقه يحتل رئتي قلبي نفسي يخنقني يقتلني ، شاهدت حروف الحب تتلاشي سمعت انين الحا وبكاء الباء وعويل الياء وصراخ التا ، احسست حبك يستغيث بي من قسوتي وبطشي وعنفي ، تساقطت دموعي تطفيء حريق رسالتك ، ملحا مرا يتناثر فوق كلماتك يبرد التهابها اشتعالها ....
تذكرتك باردا بعيدا محبا قاتلا بخيلا ، تذكرتك قاسيا موجعا ، شممت رائحه حريق الرساله تختلط برائحتك دخانها بانفاسك ،تذكرت وجعك هجرك صدك ، صمتت دموعي وتوارت وتركت نيراني تآكل بدن رسالتك وقلبك ..... لن اصدقك بعد اليوم مهما قلت لن احن اليك مهما حنوت لن اشتاق اليك مهما تعذبت ..... اكلت النيران الرساله وحروفها واحاسيسك وشوقي ........ اكلت النيران الرساله وبعثرت حروفك وحنيني ذرات سوداء تتطاير متبعثره في الفضاء .........
وتصورتني نسيتك وبرآت منك و............... لكن ذاكرتي الشريره تحفظ كلماتك وحروفك وهمساتك ......
تصورتني نسيتك وبرآت منك ومحوت اخر اثر لك في دنيايا ......... لكن الان فقط ايقنت اني واهمه !!! فهمساتك " حبيبتي " تطن في راسي في اذني في قلبي في عقلي في نفسي في روحي لاتحتاج احرف ولا كلمات ولا نقطه اخر السطر !!!!!! ايقنت اني واهمه فقد احرقت الورقه وبقيت كل معانيها وحبها وعذابها تحلتني تحتل قلبي !! هل احرق نفسي !!!!!!!!!!!!!!!!!! هل احرق قلبي ؟؟؟؟؟؟؟؟؟؟؟؟؟

وبعدين نرجع نعيط !!!!!!!!

يالا نفتح صندوق العفاريت تاني ............ وماله ........
مالهم بقي الرجاله ومال الستات !!!!!!!! انهي رجاله وانهي ستات ؟؟؟؟؟؟؟ طيب حاقول اهو واوضح ...
مش باقصد بس رجاله - يعني كبار - وستات - يعني كبار - !!! لا ممكن مالهم الشباب بالشابات !!!!! يعني الكلام ده ينطبق علي الذكور والاناث في كل الاعمار والظروف ......... كلام عام بايخ !!!!!!
راجل ..... اي راجل ....... يعجب بست ... جميله .. لطيفه .. جسمها حلو ... منطلقه ... دمها خفيف ......... شخصيتها جميله .. ذكيه .. شاطره ... موهوبه ...... كل ده كويس ومافيش مشكله !!!!!
معجب بيك ... اهلا وسهلا ....
يزود العيار شويه .......... بحبك .. وانا كمان بحبك !!!!!!
بقولك ايه بغير عليكي !!!!!! طيب احترم غيرتك !!!! بلاش تتباسطي مع الناس ..... حاضر .. وطبعا بالذات الرجاله !! زمايلك قرايبك اعملي بينك وبينهم حاجز !!!!!
ولانها - يعني الست المقصوده - بتحب الراجل المقصود ... تقفل علي روحها شويه ، بلاش هزار مع الزملا .. بلاش تباسط مع القرايب ..
مبسوط ياحبيبي !!!!!!
لا سكتنا له دخل بحماره ................
بقولك ايه لبس ملفت للنظر ... ياريت تاخدي بالك .. خدتي بالك ... طيب ياريت تغيره الاستايل بتاعه شويه ... مفتوح بلاش مقفول اه ، قصير لا طويل اه ، ضيق لا واسع اه .......
وافقت الهانم لانها بتحب !!!!!
خطوه كمان !!!!!!!
شعرك ملفت لميه ...... لمته ....... غطيه ؟؟؟ ليه ؟؟؟؟ كده بغير عليك وكمان ربنا قال !!!!!!
الله طيب ياعم انت .... محبتش واحده من الاساس ليه بتلبس زي ماانت عايز ومغطيه راسها !!!!
لا اخد واحده جميله مختلفه وبعدين بالحب اخنقها شويه شويه شويه واغير شخصيتها واظبطها واسيطر عليها واتحكم فيها !!!
وباسم الحب ........ اسمعي كلامي
باسم الحب ........... اعملي اللي انا عايزه
وباسم الحب ........... انسي نفسك وافتكريني !!!!!!!
والمصيبه ان بنات كتييييييييييييير وستات كتيييييييييييير تتنازل وتطنش ، تتنازل وتعمل اللي الراجل عايزه ، تتنازل وتريح راسها ، تتنازل وتكبر نافوخها ...... ويوم بعد يوم تفقد حته من نفسها ، يوم بعد يوم تتغير لواحده تانيه مش معجبه بيها ومش بتحبها ...... وتصحي في يوم من النوم تلاقي روحها مخنووووووووووووقه وتلاقي روحها بقت واحده تانيه !!!!!!!
ياعم الحاج ...... مالستات كتير ...... اشكال والوان وموديلات وعلي كل شكل وصنف ياباطتسته !!!
ماتنقي ياعم الحاج واحده وفقا لمواصفاتك اللي انت مؤمن بيها ، يعني خد واحده تريحك علي طول ، واحده بتعمل اللي انت عايزه قبل ما تطلبه منها ....... لا ده مابيحصلش ....... لازم عم الحاج ياخد وينقي ويحب واحده بتضايقه بسلوكها بافكارها بطريقه لبسها بطريقه تفاعلها مع الاخرين ...... وبعدين عم الحاج يتخانق ويزعق ويتقمص و" ولو بتبحبيني اعملي اللي عايزه " و " لو بتبحبيني اسمعي كلامي "
وشويه تنازلات في شويه تنازلات و............. هيه هيه هيه نجحت في تغييرها في تحويلها في تبدليها وبقت واحده تانيه خااااااااااالص ...
الله طيب ليه ياعم الحاج ... مالطيب احسن ... ماكنت خدت واحده علي هواك
بدل ماتاخد واحده منطلقه وتكببها او واحده بتشتغل وتقعدها في البيت او واحده كاشفه شعرها بتحجبها !!!
مالسوق فيه كتيرررررررررر قوي !!! ليه بقي وجع القلب ده !!!!!
ويؤسفني اقول لكم ان النساء عندما تفقد نفسها وتتبدل تفقد في حقيقه الحال علاقتها الحيويه بالحياه وتفقد احيانا الرغبه في الحياه ذاتها!!!!!!!!! طيب ليه ياعم الحاج ماكان من الاول !!!!!!!!
وانت " ياابلتي " ماتفتحتي عينيك وتركزي !!!!! ولا يعني لازم الفاس تيجي في الراس والدنيا تتعك علشان تنتبهي انك بتتخنقي وانك متضايقه وانك ( مش انت !!!!! ) وبعدين نرجع نعيط!!!!!!!! اما والله قصه غريبه قوي !!!!!!!
ياعم الحاج ماتختار اللي تناسبك من الاول .. واني ياابلتي ماتاخدي بالك انتي بتتزحلقي علي فين
ولا لازم نتخانق ونعيط ونلعن ابو اليوم اللي شفناك فيه !!!!!!!!!!!

نموتهم يعني ...... ولا نعمل ايه ؟؟؟؟؟؟؟؟؟؟؟؟

يالا نفتح صندوق العفاريت ........
المطلقه ..... تلك السيده التي بلا رجل .... اما تركها لعيب فيها - من وجه نظره - واما تركته لعيب فيه - من وجه نظرها - وليس مهما من ترك من ، فالمجتمع الجميل الذي نعيش فيه ، يعتبر السيده المطلقه هي السبب في الطلاق وهي المسئوله عنه وهي المدانه لحصوله ، فلو كانت السيده المطلقه " نصاحه وعاقله وبتحافظ علي بيتها وراجلها " ماوقع الطلاق ، هكذا قرر المجتمع انها مسئوله ولانها مسئوله فهي مدانه ولانها مدانه فغالبا " شايفه ليها شوفه تانيه " واذا لم تثبت الايام انها " هي اللي شايفه شوفه " وان الرجل الذي كان زوجها وهو اللي " شافه شوفه تانيه وتالته وعاشره " فهي برضه مسئوله " معرفتش تحافظ عليه وتصونه وتكفيه وتلمه و.... " مسئوله يعني مسئوله !!! بس خلاص !!!

اذن المشكله الاولي التي تواجهها المطلقه المشكله الدفينه في نفوس المحيطين بها انها المسئوله عن خراب البيت !!!! طيب ماشي وبعدين ، ولا قبلين !!! هم بيدينوها وخلاص !!!!!!

المشكله التانيه ان المجتمع مازال يخاف من المطلقه ، النساء تخاف من المطلقه لانها في الاغلب " خطافه رجاله " ستخطفهم او تنوي تخطفهم او احتمال تخطفهم ، باعتبارهم " الرجاله المخطوفين " يعني " ياحرام غلابه ومخطوفين بقي !!!" ، النساء تخاف المطلقه لانها " خطافه رجاله " ستنقض بانيابها ومخالبها وسحرها و" قله ادبها " علي الرجل الزوج الجميل اللطيف ، ولان الستات مش لازمها وجع دماغ وسين وجيم ومش لازمها " تحرس " علي جوزها " اللي ياحرام حيتخطف " ولانها تؤمن جدا بان " الباب اللي يجي لك منه الريح سده واستريح " ولانها تخاف من العفريت ومش " عايزاه يطلع لها " فالبعد عن السيده المطلقه ، مهما كانت لطيفه او مؤدبه او مكسوره الجناح والقط ياكل عشاها ، البعد عن السيده المطلقه غنيمه وخلاص !!!! وهكذا فجآ تجد المطلقه نفسها مستبعده بصنعه لطافه من اوساط اجتماعيه وصداقات ودوائر علاقات كانت موجوده فيها قبل الطلاق ، مش لان دمها تقل بعد الطلاق ، لانها بقت خطر جداجدا!!!

موضوع عبيط جدا ، ست معاها جوز ، واحتمال يكون جوز جزمه واحتمال يكون مالوش لزمه واحتمال يكون دمه تقيل ، تبقي الستات مطمئنه وامنه لان ذلك الجوز - اي ماكان وصفه - سيمنع تلك السيده من " البصبصه " للراجل ياحرام " اللي احتمال يتخطف " ، وحين يرحل ذلك الرجل عن حياه تلك السيده لاي سبب ، ينسي الناس وبالاخص النساء ، طبيعتها واخلاقها ويستبعدوها ويبعدوا عنها و" الباب اللي يجي لك منه الريح سده واستريح " و " سوري ياحبيبتي مشغوله قوي مافضيتش اكلمك ، سوري ياحبيبتتتتي مش فاضيه ااقابلك !!" موضوع عبثي وعبيط لكن واقعي وحقيقي ..... طيب ده الستات ، مابتحسش بالامان علي اجوازها اللي نفسهم يتخطفوا وبيتلككوا علشان يتخطفوا وبيرقعوا بالصوت طول الوقت " اخطفيني والنبي " الستات مابتحسش بالامان علشان كده " بلاها مطلقات " !!!

مش بس كده !!! لا كمان لان المطلقات ممكن يعني ممكن مثلا .......... غير الانسات !!!! الانسات عذراوات !!! والباقي مفهوم اما المطلقات فهن مطلقات مباحات مستباحات .......... والباقي برضه مفهوم !!!!!!!

الرجاله بقي علاقتهم بالمطلقات موضوع تاني خالص خالص ....... راجل نفسه " يمهيص " ، " يحب في التليفون " ، "يتمايص" وفيه مطلقه موجوده ، اذن المطلقه متاحه ، اذن المطلقه ممكن نتمهيص معاها وعليها ، هي متاحه ممكنه وغالبا " بتستنشق " علي شويه مياصه كما يري الرجاله !!! فالراجل المتجوز - بعضهم طبعا - يجد في السيده المطلقه فرصه متاحه للمهيصه والمياصه و" التحمرش " ويتعجب الرجال جدا حين ترفض المطلقه المياصه والمهيصه ، يتعجبوا ويخافوا منها لانها " تبقي بترسم علي تقيل " يخافوا منها لانه مش عايزين رسم علي تقيل ولا تدبيس ولا توريط هما عايزين بس " شويه طراوه " اما اذا حتقلب " ريح واعاصير " وعلي ايه ياعم مابلاش دوشه !!! والرجال او بعضهم ينتقي المطلقه " للمياصه والمهيصه " لانها من وجه نظرهم اكيد تحتاج رجل وتعاني من الجفاف العاطفي ومحرومه و "ماحتصدق !!!!!!" ويري الرجل في نفسه طبعا الصلاحيه "لدلدقه" الحنان والمياصه والاستهبال اللي محتاجاه الست المطلقه " قليله الادب طبعا " ولو الراجل ده " اتقفش من مراته " يبقي الحجج والاعذار جاهزه " اغرتني اغوتني استضعفتني " هههههههه وطبعا الست مراته "جاهزه " تصدق ان المطلقه اللي جوزها "اتقفش " بيكلمها او بيتمايص عليها ، جاهزه لتصديق انها هي التي اغرت واغوت وخطفت !!!! مش مطلقه !!!!! و" هو احنا نسيب النار جنب الكبريت وبعدين نقول ولعت ليه " طبعا لا اذن يلزم ابعاد النار اللي هي الست المطلقه عن الكبريت اللي هو الراجل الغلبان اللي تم اغواءه واغراءه ويانهار اسود كان حيتخطف كمان !!!!!........

ده جانب من مشكله الرجاله مع الستات المطلقه !!! رؤيتهم لها باعتبارها متاحه مباحه !!! الجانب الاخر خوفهم منها ، ليه ، لانها مطلقه فاضيه فلو قررت هي الاقتراب منه ، تبقي ناويه علي تدبيسه سودا ومشكله وخراب بيوت ، والرجل المتزوج ياحرام عايز يهذر ويتمايص وبس !!! اما بقي جواز وعلاقه جديه وتدبيس !!! فيع ويع ويع ويع !!!!!

واكم من رجال استباحوا نساء مطلقات او حاولوا استباحتهن وعندما فشلوا ، طبعا المثل العربي الجميل " ال...... تلهيك وتخلي اللي فيها فيك " وعلي طول جري لمراته وحاسبي وحرصي ، فلانه صاحبتك المطلقه بتعاكسني وقلت لها عيب وحرام ومراتي صاحبتك ولافيش فايده ، وطبعا الست نفسها تصدق جوزها وعندها شكوك في صاحبتها المطلقه بانها جاهزه للمعاكسه والمهيصه ، فشكوي ال....... وكذبه يتحول لحقيقه وتاني " الباب اللي يجيلك منه الريح سده بالاسمنت والمقاطعه واستريح " !!!!!!

طيب ده الراجل اللي نفسه يتمهيص .... فيه راجل تاني مانفسوش يتمهيص ولا حاجه ... راجل منضبط بيحب مراته وبيته وحريص عليهم ولكن ....... مايمنعش نشرب قهوه والقهوه تجر عشا والعشا يفتح باب الشيطان !!!! وساعات راجل تاني منضبط بيحب مراته وبيته وبرضه حريص عليهم جدا ، يلاقي المطلقه وحيده لاانيس ولا جليس ، تصعب عليه طبعا لانه " حوووووونين " ولانه " حووووونين " يبقي نفسه يدلدق حنان وعواطف بس في التليفون وهاتي تليفونك وخد تليفوني واحنا اصدقاء طبعا اصدقاء و....... الاحترام والجديه و" الو ازيك اخبارك ايه طبعا طبعا " وهاتك ياكلام باعتبار الست المطلقه راجل !!!!!! ههههههههه !!!!! لا ده احنا اصدقاء خالص فعلا !!!!!

وعادي جدا اكلمك زي الرجاله زي الستات " يفرق ايه " ولا يفرق حاجه غير انك جبان !!!! للاسف مش قادر تقول ان ليك صديقه !!! لان مراتك " ياحرام " عقلها صغير ومش حتقدر تصدمها ان بتكلم واحده ست وكمان مطلقه " فتضحك علي مراتك باعتبارك بتكلم راجل وتكلم صديقتك باعتبارها راجل ..... لا والله راجل فعلا !!!!!!!!!!

طيب نعمل ايه يعني ....... نموت المطلقات سبب الشرور والاغواء والخطف !!!!!!!!!!
هههههههههههههه والله ستات كتيره " عيشتها زفت ورجالتها زفتين " نفسها ترد تقول اه ، لانهن مهددات جدا و" الفتنه نائمه لعن الله من ايقظها " !!!!!!!!!

طيب ............ اه نسيت اقول حاجه مهمه جدا ، يمكن يعني يمكن ، تطمن الستات المهددات ، ولو اني رايي يعني ان مافيش حاجه في الدنيا تطمنهم !!! ليه !!! لان كل واحده عارفه من جواها " ان جوزها بصباص وعينه زايغه تتدب فيها ميت رصاصه وانه نفسه يتخطف بس يلاقي فرصه !!!!!!!! ...... نسيت ااقولكم حاجه مهمه جدا ..... ان غالبا معظم المطلقات بيبقوا خلاص " كرهوا الصنف " و" كرفوا رجاله " ومابيبصوش لرجاله حد لا بعيد ولا قريب ، لان تجاربهن الفاشله كشف لهن المستور واوضحت لهن طبيعه معظم الرجال التي يزيفوها حتي لاتظهر !!!! معظم المطلقات لا يفكرن اطلاقا في " تعليق " جوز واحده تانيه لانهم عارفين ان " احمد زي الحاج احمد " معظم المطلقات لا يفكروا ولا يرغبوا في خطف رجل سواء جوز لواحده تانيه او مش جوز حد !!!!!
هل كده حتتطمنوا ؟؟؟؟؟؟؟؟؟ هههههههههههههههه طبعا لا !!!!!!!!!
معظم المطلقات مش عايزين الرجاله تبطل تتمايص عليهم وتتحرش بيهن قولا ولفظا واسلوبا ، هل الرجاله حتبطل تتمايص وتتمهيص ؟؟؟؟؟؟؟؟؟؟؟؟؟ طبعا لا !!!!!!!!!
خلاص براحتكم بقي !!!!!!!! وياايتها المطلقات فلتستمعن بحريتكن وحياتكن بلا قيود بلا اعباء بلا " قرف " !!!!!!! لنتحمل المجتمع رجاله ونساءه ، فهذه ضريبه الحريه التي تتمرغوا في بهجتها !!!!!!!!!!