باي باي يااوهام !!!!

لعلي اكثر سذاجه مما اتصور !!!
اراهن رهان خسران !!!
اعرف انه خسران !!!
اري مبررات فشله ، اري مبررات خسارتي ، لكني ااقاوح !!!
لااعتقد اني ساقاوح كثيرا !!!
قربت افقد الامل !!!
نعم يسعدني مايحدث ، لكني قربت افقد الامل !!!
لن انتظر اكسب الرهان ، واعتقد اني لن اسعد ان كسبته ، واعتقد اني ساكسبه لكن وقتها لن يكون له قيمه عندي !!!!
لست ساذجه ، لكني متعبه وايام العمر لم يعد فيها ايام نضيعها نهدرها !!!
باي باي يااوهام ... الوقت تاخر جدا علي كل شيء !!!
ولم يعد في الوقت متسع الا لعيش ماهو موجود فعلا !!!
حلو ، وحش ، مش مهم ، المهم انه الشيء الوحيد الممكن !!!
باي باي يااوهام !!!!

باحبه ومقدرش علي بعده !!!!

هذا هو الوطن ....

اعود لحضن امي ، لذكرياتي !!!
انام علي فراشي ، اشم رائحتي ورائحه احلامي فوق مخدته ، هنا نمت وحلمت وفرحت وبكيت !!!
في الغربه لاانام ولااحلم ... الحلم الوردي والكابوس المزعج لايزوراني الا فوق فراشي وانا محاطه بالطمأنينه !!!
الوطن هو فراشي الامن ، هي جدراني التي احبها ، مزركشة بانفاسي وانفاس احبائي ، جدراني انا ، مزينه بلوحاتي التي احبها ، الوان صاخبه فوق جدران صاخبه لمنزل تملكه وتعيش فيه سيده تحب الحياه وتتمسك بها ، هنا وسط جدراني ولوحاتي والوان الصخب التي طليت بها الوسط المحيط بي ، هنا ، اعيش الطمأنينه وانام واحلم بالاحباء والفرحه وابكي دموع الفرج فوق المخده واتقلب في الفراش بثقه لن اقع من فوق حافته ، انه سريري الذي احفظ وانا نائمه مقاساته ، انه حضن امي ، انه حضن ابنتي ، هنا تزورني جدتي وتنصحني وعمتي وتداعبني وخالتي وتشاكسني وامي تاخدني في حضنها ، هنا الوطن والطمأنينه !!!


هذا هو الوطن .....
رائحه الوطن ، رائحه الشوارع ، رائحه جدران منزلي ، رائحه السلم والبسطه ، رائحه فراشي ، ريحه حضن امي وقت ارمي نفسي بين ذراعيها ، رائحه الطيبه التي تلون كل الوجوه المبتسمه المكفهره في خريطتنا ، رائحه النعناع والريحان والياسمين وتوابل الخان العتيق ورائحه الطعميه في الصباح فوق مائده افطار لمه الاسره والعيله ، رائحه االلب الاسمر السخن خارج من الفرن ، رائحه غزل البنات ، السمك المشوي فوق الصفيحه علي بلاج ابو قير ، البيض المسلوق المتدحرج في السمنه وجدتي واقفه باعوامها الثمانين في المطبخ تلونه بالذهبي الرائع ، رائحه الخبيز في بلدتنا الريفيه وبيتها الجميل الذي اصر اعمامي علي بيعه وتقسيم تمنه واهدار التاريخ والذكريات ، رائحه الكعك يوم العيد ، رائحه الليمون الطازج فوق الشجر ، رائحه جدتي لامي ، تلك السيده الطيبه ذات الخدود الناعمه والشعر الاسود الحرير ، رائحتها وهي مريضه علي فراش الموت بعيون حزينه لانها ستفارقنا ، رائحه مدرج كليه الحقوق وكلنا متكدسون فوق بعض نضحك ولانحمل للدنيا هم ، رائحه قاعات المحكمه والبشر معذبون بانتظار العداله والانصاف ، رائحه الياسمين البلدي المجوز فوق شباك اوضتي ، رائحه مكتبي ذلك المكان الذي يعيش ويتنفس بسواعد الرجال ابناءه المخلصين يبحثوا عن لقمه عيشهم بمنتهي الدأب والاصرار والجديه والحب ..... رائحه الوطن ، ورد بلدي علي ياسمين ، ريحه بشر طيبين ، اطفال لسه مستحميين ، ريحه توابل علي بن محوج علي حلبه حصي ، ريحه نعناع في الشاي وريحه كيك لسه طالع من الفرن ، ريحه السميط السخن ، ريحه هوا البحر ، ريحه الدفا ، ريحه الحنان ، ريحه الريحان ، ريحه الشوكولاته بين ايدين الاطفال ، ريحه كورنيش النيل الفجر ، ريحه يود البحر لما تطس في مناخيرك وانت قاعد دافن رجليك في الرمله المبلوله ، حتي ريحه الرطوبه باحبها ، ريحه بيت البلد لما كان موجود قبل مايهدوه ، ريحه الزبده الفلاحي بتسيح في الطاسه وتتطش فوق الفول ، ريحه طشه الملوخيه ،ريحه السمك المقلي متبل بالتوم ، ريحه الفته ام خل وتوم ، ريحه البدنجان المقلي ، ريحه حله الرز المفلفل لما تعملها عمتي ، ريحه دخان الكباب وهو بيتشوي ، ريحه مربه الفراوله الصبح لما خالتي تطلعها من البرطمان بمنتهي الاحترام والفخر ، صنعه ايديا وحياه عينيا ، ريحه عقد الفل اللي يشتريه واد حبيب لبنت صغيره لسه بتحلم بالحب ، حتي ريحه ميه غسل الميتين بحبها ، بحسها مصريه خالص ، فيه ريحه عبق التاريخ وتحنيط الفراعه واحترام الميت في لحظات وداعه الاخيره ، ريحه دخان المعسل فوق الشيشه في الحسين ، ريحه الاطفال اللي لسه مولودين ، ريحه المغات ، ريحه الحنان ، ايوه ماهي الناس الحنينه ليها ريحه ، ريحه مريحه ، طالعه من قلوبهم لقلبك ، ريحه الارض المعزوقه بادين سمر شداد ، ريحه سنابل القمح في الغيطان ، ريحه الذره المشويه علي الكورنيش في المغرب ، دي رائحه الوطن اللي احبه ، رائحه الوطن !!! هذا هو الوطن !!!! هذا هو الوطن الذي اطمئن له وفيه !!! وحين اسافر اتركه وقلبي بعيدا واعيش جوفاء بلا روح حتي اعود ....

هذا هو الوطن ...
الشوارع التي اعرفها واحبها ، الشوارع باشجارها الخضراء الهزيله ، اوراقها مكتومه باطنان التراب الاصفر يغطيها ويخنقها ، الشوارع بارصفتها المكدسه بالباعه الجائلين ، يصرخون ينادون علي بضاعتهم بمنتهي الحب ، هذا اكل عيشهم وقوت عيالهم ومصيريهم لايملكوا غيره ليس لديهم بدائل ، هم يحاربون من اجل الوجود والبقاء ، هم طيبين يتمنوا لو الدنيا اعطتهم اكثر مما اعطتهم لكنهم قانعون بنصيبهم ، لااتضايق من الباعه الجائلين لااغضب منهم لااراهم يشوهوا وجه المدينه ولا يحتلوا ارصفتها ، اراهم بشر طيبين يتمنوا مكان تحت الشمس ، لايزاحموا احد ولا يطمحوا في سرقه مكانه ، كل مايطمحوا فيه يتركوهم يعيشوا ، الشوارع التي اعرفها واحبها ، الشوارع المزدحمه بالبشر الطيبين ، يجروا يدوروا علي مصالحهم ، اللي رايح المدرسه واللي رايح الشغل واللي رايحه السوق واللي رايح يزور حد عيان محجوز في مستشفي حقيره واللي مستني الميكروباص واللي نفسه يروح ينام واللي بيحلم ياخد دش ، اللي شايله خضار واللي شايله عيل علي كتفها واللي شايل مسطره التي بتاعت الهندسه واللي شاريه فستان جديد واللي جابت قماش التنجيد من الوكاله ، شوارع مزدحمه بالحياه ، بشر حلوين طيبين ، شايلين الهم معاهم راييحين جايين ، باحبهم ، باحبهم بزحمتهم بقله نظامهم بهدومهم المتربه بتراب الشارع ، باحبهم وهم مكشرين تعبانين ، وهما بيحلموا بحياه اسهل اجمل ، لكن برضه في طريقهم ماشين ، ووسط التكشيره والبوز ، حد يطلب منهم خدمه ، حد يسالهم سؤال ، حد يحصل له حادثه ، حد يقع ، ميت ايد تتمد ، ميت ايد تساعد ، هي دي شوارعنا الزحمه ، اللي بحبها ، الناس علي وشها ابتسامه صغيره ، ابتسامه مستخبيه ورا الهم والغم والصعوبات ، ابتسامه صغيره علي جنب واحد ، بتقول احنا بني ادمين نفسنا نعيش نفسنا ننبسط ، باحب شوارعنا الزحمه بليل والناس قاعده علي الكباري تتهوا وتشرب شاي وتاكل حلابسه ، باحبهم لما يكون في عروسه وزفه عربيات والناس كلها تزمر وتعمل ازعاج ، اصله ازعاج جميل وطيب ، ازعاج فرحه ، بيجاملوا بعض ، بيحيوا عروسه مايعرفوهاش ، باحب شوارعنا الزحمه وبشرها الطيبين ، باحب منظر العيال داخله المدارس الصبح ، لسه ماصحيتش ، هدومها غلبانه ومعظمها متكرمشه ، الشراب مدلل فوق الجزمه اللي مليانه تراب ، بحبهم يجروا جوه الحوش ويصوتوا من الفرحه ، بحب منظر الموظفين خارجين من الشغل ، من المحكمه ، من وزاره الزراعه ، من اي مصلحه حكوميه ، ناس كتير ، ده بيشتري برتقال وده بيفاصل علي تمن البطيخه ، ده بيجري عايزيجيب عياله من المدرسه ، دول شويه ستات واقفين مستنين اتوبيس المصلحه وهاتك يارغي وضحك مكتوم خجل ، باحب شوارعنا الزحمه ، حتي وقت زحمه المرور ، برضه باحبهم ، اصل الشعب ده طيب وبيحارب علشان يعيش ، نفسه يلاقي لنفسه مكان تحت الشمس ، باحبهم وهم بيحاربوا بيقاوحوا في الحياه ، باحب منظر الشباب خارج من الجامعه ، علي وشهم تعبيرات جميله ، نص صمت نص فرحه نص هم نص قلق ، خارجين مروحين او مزوغين او حيمشوا يضحكوا ويصرخوا ويتخانقوا ، باحب شوارعنا الزحمه ، ستات بحجاب بنقاب بنات لابسه من غير كم ، بنات لابسه بدي ضيق ، طرحه ومكياج ، بنات شعرها منكوش ، شباب حاطط جيل علي شعره ، شباب مربي دقنه وباصص في الارض ، شباب روش وبيعاكس طوب الارض ، باحب التركيبه دي ، باحب الخلطه دي ، باحبها ومابتضايقش منها ، مابقولش ايه اللخبطه دي ، لا احنا اللخبطه دي ، احنا اللخبطه اللي بحبها ، بحب زحمتها في ماتشات الكوره في السوق في وكاله البلح في العتبه في موقف عبود ، زحمه لكن كلها حياه ، ناس عاييشه بجد ، بتقاوح بجد ، بتكافح بجد ، زحمه لكن مليانه حميميه ، ياسلام لو قفشت ابتسامه علي وش حد يبتسمها ويلغيها بسرعه ، ياسلام لما تتلاقي العيون وفجا الناس تبتسم ، تبتسم ليه ، تبتسم لانها بتحب بعض بس مش لاقيه وقت تقول ، لانها متعاطفه مع بعض بس مافيش فرصه تعبر ، الشوارع الزحمه دي زحمه بشر وعربيات وخنقه وعوادم ، هي دي الشوارع اللي بحبها ، هو ده الوطن !!!!

هذا هو الوطن ....
خان الخليلي ، ميدان التحرير ، كورنيش اسكندريه ، سوق العتبه ، حلقه السمك ، ميدان الجيزه ، كوبري الساحل ، محلات بيع الهدوم القديمه في وكاله البلح ، مدرسه الاورمان الثانوي بنات في شارع الجيزه ، استاد القاهره ، سينما سنفنكس الصيفي ، سينما مترو ، الفيشاوي ، الازهر ، الحسين ، الكنيسه اللي في شارع الجيزة ، القلعه اللي علي البحر في اسكندريه ، ملاهي المعموره ، الجحش بتاع الفول ، البرنس بتاع الكبده ، بياع غزل البنات ، عربيه الايس كريم جروبي كلوكلو ، ام حنان بياعه السندوتشات علي كورنيش بحر مشتول في الزقازيق ، محل البن العتيق في الميدان الكبير في المنصوره ، القعده علي بحر العين السخنه في الشط الشعبي ، ترابيزات الخشب القديمه المهكعه في وداي الريان ، كورنيش اسوان والصخور السودا بتلمع تحت الشمس والمراكب بتشق السما وتجري ، محل فلفله في وسط البلد ، جنينه اغا خان ، ميدان فيكتوريا في شبرا ، محل السمك في الدوران ، شط ابو قير والقعده قدام البحر الميت ، الغيطان علي الطريق الزراعي ، بياعين البرتقال علي جنب الطريق ، بياعين السمك علي طريق الفيوم ، بياعين العنب علي الطريق الصحراوي مصر اسكندريه ، النخل المحاوط الطريق الدائري من كل جانب ، هو ده الوطن ، بيوت علي كل لون ، بيوت مدهونه الوان فاقعه ، وبيوت طوب احمر ، فيلل وقصور التجمع الخامس وبيوت فيصل اللي مبنيه من غير ترخيص ، بيوت مشتول بلدنا بالاسمنت المسلح وسط الزراعه ، وبيوت طين بتاعت الفلاحين ، كورنيش ماسبيرو والمراكب مستنييه العشاق والشباب والسواح ، اهرامات الجيزه وعبق التاريخ ، محلات الوكاله ، قمصان نوم علي ملابس داخليه ، علي هدوم بالات علي قماش تنجيد علي شباشب بلاستيك ، صيني وهندي ومصري وماليزيي وعلي كل لون ياباطسته ، سوق التلات كوبيات وحلل ومقاور ومباشر واطقم بايركس واطقم تيفال ، شارع عبد العزيز والتلاجات والغسالات والتلفزيونات ، بلطيم وجبال النرجس والبطيخ ، الاسماعيليه والشمام والفراوله البلدي ، شارع الصاغه في الزقازيق ، عربيات كارو عليها جهاز البنات ، دمياط وشوارع النجارين وموبيليا خشب ابيض علي كل رصيف ، المناصره والعمال المصريين المهره ، جنينه الحيوانات بالجيزه ، بيت الفيل وقفص الدببه تستحمي بميه ساقعه وجزيره الشاي والبط اللي بيعوم في الميه ، القهوه البلدي اللي في كل شارع شيشه وطاوله ودومنو ، الافران اخر ايام رمضان وصاجات الكحك وضحك الستات ، مراجيح الاطفال يوم العيد ، مركب وساقيه وحصان ، نصبه الكنافه والقطايف ليله رمضان ، ساحات صلاه العيد وتكبيراته في الشوارع والميادين ، راس البر وكورنيشها والجربي ، بياع المشبك ولقمه القاضي والفطير ابو سكر ، مركب في النيل ساعه المغرب عليها اتنين حبيبه مستخبيين من الدنيا ، ساقيه الصاوي ساعه حفله علي الحجار ، محطه مصر والناس بتجري عايزه تلحق القطر ، بوفيه المحطه ووجوه الناس عليها الانتظار والوداع والفرحه والحزن ، قاعه المحكمه ساعه حكم البراءه والزغاريد والفرحه ، بوابه السجن والناس واقفه تزور ابن او حبيب خلف القضبان ، ناس تعبانه ومكلفه نفسها وشايله ورايحه لكن مبسوطه لانها حتشوف حد باعدت بينها وبينه الايام ، عربيات الترحيلات يهتف اجمل شبابنا من خلف صندوقها الحديدي اصحي يامصر ، استاد القاهره والناس خارجه من ماتش للفريق القومي كسبانه فيه واعلام هيصه وطبل وزمر وتحيا مصر ، هي دي مصر كورنيش النيل الزحمه ، كورنيش اسكندريه وكوبري استانلي وقت الغروب ، بياعين الترمس والذره ، بياعين الحرنكش والدوم قدام باب المدرسه ، اطفال صغيرين في المدرسه كانوا بيحيوا العلم ومعرفش لسه بيحيوه ولا بطلوا ، حفلات الذكر والله حي الله حي ، الله حي الله حي ، الوطن حي الوطن حي !!!! هذا هو الوطن الذي احبه ولااقوي علي مغادرته وحين ابعد تنسحب روحي واعيش مجففه مخنوقه اتمني اعود لحضن الوطن وحضن امي !!!!

الوطن ... الناس الطيبين !!!
الناس اللي خارجه في الشوارع تجري علي اكل عيشها ، الشغاله اللي بتسيب عيالها وتخرج من الفجر تخدم في البيوت لان جوزها عاطل او طفشان او نايم في البيت او سافر ومارجعش وماتعرفش عنه حاجه ، سواق الاتوبيس اللي طلعان عينه وسط الزحمه وكل الناس بتشتمه ، الواد اللي واقف علي سلم الميكروباص يصرخ عتبه عتبه فيصل فيصل ، سواق التوكتوك اللي مزوق التوكتوك بالنور والاعلام ، مدرس المدرسه الابتدائي اللي واخد العيال وطالع رحله ، حاجب المحكمه اللي يصرخ من قلبه محكمه ، الممرضه في المستشفي ، الست اللي واقفه علي الحمام في واحه عمر ، تسلمك ورق التواليت ومبتسمه ونفسها في جنييه يهون عليها الوقفه ، المحامين اللي عاملين يترافعوا في اوض المحامين ، الشباب اللي رايحين الماتش وماسكين طبل ودفوف وراسمين علي وشهم علم مصر ، عسكري المرور اللي الشمس واكله راسه ، عسكري الامن المركزي المحبوس في صندوق حديد لغايه مايقولوا له اضرب يضرب ، الفلاحه اللي قاعده في السوق تبيع شويه زبده او بيض بلدي ، الستات اللي بتفك عن قلبها وتجري من بيوتها تصلي في الجامع تصلي وتدعي ربنا وتفك عن نفسها وترغي حبه تشتم في الجوز والعيال المتعبه وقله البخت وقصر الايد ، المراكبي اللي قاعد في المركب مستني رزقه من عند ربنا ، بياع اللب في المقله يتفرج علي الناس رايحه جايه قصاده لغايه ماحد يقوله بربع جنيه لب ، بياع البطاطا ، بياعه الدره المشوي ، القهوجي ابن البلد ابو دم خفيف شيشه وشاي ودومنو وطاوله ، اللي واقف قدام الزيت السخن بيقلي طعميه ، المضيفات الصغييرين في طيارات مصر للطيران ، ستات شكلنا مش حلوه ولا جميله لكن مليحه وعندها امل في الحياه وعينها بتلمع ، عامل الاسانسير في اي مبني حكومي كفران طقهان لكن بيتشغل ويقاوح ، منادي العربيات ابو دم خفيف ، الناس اللي خارجه تكافح في الحياه ، البياعين في السوق ، المدرسين في المدارس الحكومه ، البنات اللي بتخدم في الكافياهات لابسه قصير وجيبات قصيره لزوم اكل العيش ، بتاع البخور يلف علي المحلات يخش بالعافيه ويملي المحل بخور ويصرخ صلي علي النبي ، الشحات ابو بدله خضرا يجري في الشارع يدور علي حد يحس بيه ويدي له اللي فيه القسمه ، البقال العجوز اللي لسه بيبيع باتنين جنيه جبنه واتنين جنيه حلاوه ، بتاع المراجيح يوم المولد ، بياع التوت في السوق ، الفكهاني الخضري الفرارجي العطار ، ستات البيوت بتحاول تمشي حياتها بجمعيه وقسط وكفاح ويارب العيال تنجح ، الراجل اللي واقف من الفجر علي عربيه الفول يغسل الخضار في الجردل ويستني زباين الصبح ورزقهم ، العيال اللي قاعده تحت الباكيات في سوق العتبه تلف شوكولاته ، الجزمجي اللي بيلف بصندوقه يلمع الجزم ، الخياطه اللي بتفصل ايده في رجله ، قمصان نوم العرايس العريانه وتقصر البنطلونات الجيز ، عامل الامن الغلبان اللي واقف علي بوابه برج كبير كل اللي داخل واللي خارج مابيصبحش ولا بيمسي عليه ، الناس اللي قاعده علي القهوه لا شغله ولا مشغله ، تلميدات الثانوي خارجين من المدرسه زي الفراشات كلهم امل في الحياه مستنين واد جميل يعاكسهم ، عمال التراحيل اللي وافقين فوق الكوبري شايلين قدوم واجنه ومستنين شغلانه ويوميه بالعافيه تكفي اكل العيال وبكره ربنا يفرجها ، البنات اللي بتغني في الزفه نازله السلالم يامشالله عليها ، الناس اللي بتعزف مزمار بلدي وتغني مواويل صعيدي ، الكهربائي السمكري الطبال النجار ، الفلاحين في الغيط وسط الشمس والنقاريه يعدلوا الجلابيه فوق خيال الماته ويعزقوا الارض ويقولوا يارب ، الصياد بالشبكه يخيطها ويرميها ويقول ياكريم ، الوطن هم المصريين الحلوين الطيبيين الجدعان ، اللي بيقاوحو في الدنيا ولا يتكسروا قدامها ، الناس خارجه من الجامع والكنيسه تقول يارب ، الستات العواجيز بوشوش مكرمشه وابتسامه راضيه وسبحه يرددوا عليها الحمد لله الحمد لله ، الجنايني اللي بيروي الارض بحبه تطلع ورد وفل وياسمين ، العربجي فوق الحنطور ، الكسماري في الاتوبيس ، اللي بيقطع تذاكر السيما ، اللي واقف قدام فنادق الخمس نجوم ياخد العربيه من الرواد ويستني البقشيش ، البهوات المحفلطين اللي عاملين نفسهم ولاد بارم ديله ، غلابه الدنيا فهمتهم ان كل مااتألط مقامه علي ، النقاش الحداد اللي بصلح بوابير الجاز اللي بيسن السكاكين اللي بيبع حماده اللي بيلعب ، بياع البالونات يوم العيد ، بياع الدندرمه الفشار غزل البنات ، رقاصه الدرجه التالته التخينه اللي مالقيتش حاجه تعرف تعملها غير ترقص والناس تتريق عليها ، المصريين الحلوين الطيبين ، بعيوبهم بمشاكلهم بهمومهم بهدومهم الغلبانه بدقنهم الطالعه بجزمهم اللي مش متلمعه بالعمه والجلابيه واللاسه والعبايه ، بالفستان والتايير والبدله السينيه ، بالنقاب والحجاب ، بالمايو والبيكيني ، علي بعض كده ، حلوين قوي طيبين قوي باحبهم قوي !!!!!!!!! لما امشي واسيبهم ، اشوف ناس تانيه في بلاد تانيه ، لا احسهم ولا احبهم ولا افهمهم ، احس غربه تاكلني وتوجعني وعايزه اروح لحضن ناسي الطيبين !!!!

هذا هو الوطن
صوت الست ام كلثوم تصرخ بعيد عنك حياتي عذاب ، عبد الحليم بالاحضان يابلادنا ياحلوه بالاحضان ، محرم فؤاد واحشاني مصر ام القناطر والنخيل والنيل واحلي الذكريات ، الوطن هو علي الحجار ، انكسر جوانا شيء ، مش عارف ليه بتونس بيكي ، اه ياوجع البعاد ، انت طلعتي لي منين ، الزين والزينه ، الوطن هو محمد منير شجر الليمون دبلان علي ارضه ، لو بطلنا نحلم نموت ، علي صوتك بالغنا ، هو ابتهالات النقشبندي في رمضان واسماء الله الحسني ، هو محمد طه وخضرا محمد خضر والصبر ده للعاشقيين احسن دوا ، هو عفاف راضي وامشي عنه روح للدبه نانو دي كبيره وتستحمل عنه ، هو محمد فوزي وماما زمانها جايه وذهب الليل طلع الفجر والعصفور صوصو ، هو محمد قنديل ياحلو صبح ياحلو طل ، هو نجاه الصغيره انا بعشق البحر زيك ياحبيبي حنون وساعات زيك مجنون ، الوطن ، هو صوت الاتوبيسات وزحمه الشوارع ، صوت الهون في السبوع ، صرخه الام اللي بتولد ، هو فرحه الزفه وخارجه من بيت ابوها داخله بيت الجيران لابسه الاصفر والاحمر ومدوخه الجدعان ، هو صفاره بياع غزل البنات ، هو صوت البياعين في السوق ، هو صوت الديك في الفجر مع صوت الادان ، هو غنا التلامذه في رحله القناطر ، هو هتافات شباب الجامعه في المحكمه ، هو صراخ الجمهور لما فريقنا القومي يجيب جون ، هو صوت ماكينه خلط الاسمنت عند عماره بتتبني ، هو الزغاريد لما ننجح او نفرح او البنت تخلف وتقوم بالسلامه او لما العروسه تتزف ، هو صراخ الندابات يوم الميت ونهنهنه العياط والحرقه والوجع ، هو ماتزقيني ياماما اوام ياماما ده عريسي حياخدني بالسلامه ياماما ، هو دقوا المزاهر يالا يااهل البيت تعالي ، هو صوت حجر الطاوله وهو بيطرقع وقت المحبوسه ، هو صوت الصاجات مع بياع العرقسوس ، هو امانه عليك ياليل طول وهات العمر من الاول ، هو صوت مدفع رمضان ، هو صوت تنفيض السجاجيد من البلكونه في تنضيفه العيد ، هو صوت البومب وحرب ايطاليا يوم العيد ، هو دق الكفته في الهون ، هو صوت مخرطه الملوخيه وهي بتجري فوق الطبليه تنعم الملوخيه وتضبظ قوامها ، صوت الهوا بيعدي علي النيل ويخدرنا بهمسه ، صوت المجداف يضرب في الميه في قارون ، صوت الطبل والزمر لما الشيخ يرجع من الحاج ، هو تكبيرات العيد ولبيك الله ماالبيك ، صوت جرس الكنايس وهي بتدق في وسط الليل تقول الليله عيد ، هو صوت ام كلثوم وياليله العيد انستينا وجددتي الفرح فين ، صوت فريد وادي الربيع عاد من تاني ، صوت عبد الحليم يصرخ موعود معايا بالعذاب موعود ياقلبي ولما يفرح والناجح يرفع ايديه ويغني في عيدنا وعيده ، صوت موج البحر في النوه في اسكندريه والموج بيضرب في الكورنيش ، صوت العيال بتتشاقي في الشارع بيلعبوا بلي ، صوت مقشه الكناس اللي بتحف في الارض وماتنضفش حاجه ، صوت امي اللي يرحمها تصحيني من النوم قومي يااموره روحي المدرسه ، هو ده الوطن اللي بحبه !!!!

هذا هو الوطن ....
فنجان الشاي المشروخ بتاعي ، الكنبه المريحه ، حمامي اللي بغني فيه يرد علي صدي الصوت ، عربيتي اللي علي الحجار مكسر قزازها من كتر ماانا رافعه الصوت وعماله اغني معاه ، فنجان القهوه البن المحروق الغامق المحوج بتاعي ، سندوتش الجبنه الرومي المحروق في الفرن اللي بيسلع العيش ، شباكي اللي بيطل علي شارع فاضي في حي بعيد لسه الناس ماعمرتوش بدوشتها ، الطريق الطويل اللي بامشيه كل يوم ، الناس تقلب النور لبعض تقول علي الطريق لجنه ، مكتبي وكرسي المريح ، زمايلي واصحابي واهلي وحبايبي !!!

تعالي في حضني وابكي !!!!!!!!!

ابحث عنك فيك ... زمن طويل اعرفك ولااعرفك
زمن طويل اراك ولااراك ... احدق في عينيك ابحث عن سر دفين يحل لي اللغز ويفك شفرته
زمن طويل اعرفك ولااعرفك ... ملامح وكلمات وتعبيرات لااصدقها ...
ماانتظره لم ياتي وماافهمه لم يقال ومااصدقه مازال فارا شاردا تائها ....
فالروح التي احسها تفر مني ومنك !!
تلك الروح التي اعرف بكل ثقه انها متواريه ومختبئه وفاره من قسوه الايام ومنك !!!

ابحث عنك فكل مااظهرته حتي الان لم يقنعني بانك انت الذي اراه واحسه واعرفه وافهمه ... ابحث عنك فيك ... ربما تفر من وسط كلماتك كلمه تقول لي من انت ، ربما تكتب حرفا يفك طلاسم كل الالغاز ، ربما تدون تعليقا يشرح لي كل مااستعصي عليه فهمه وادراكه ... ابحث عنك فيك ... ابحث عنك واثقه اني ساجدك مهما تواريت مني ولاعبتني وفررت واختبئت وضللتني !!! ابحث عنك فيك ، واثقه ان الروح التي تسكنني روحك وان الوهج الذي يدفئني وهجك وان اليقين الذي يحتلني بالعثور عليك سيزداد كل لحظه وكل ثانيه واني ساجدك !!!

ابحث عنك فيك .... ايها الطفل البريء الجميل المدلل ، بقلبك الاخضر ومشاعرك البريئه واندفاعك وحمقك وطزاجتك وجنونك ... اعرف اين ستختبيء مني ، ستسصعد للسطح تغني لليمام الابيض ، ستنزل للنهر تبحث عن سمكاته الملونه ، ستندفع للشمس تتمني تاخذها في حضنك ، ستجلس في الظلام صامتا كانك تمثال لايتنفس تغني في سرك كل الاغاني التي تحبها وتمنيت تسمعها لكن احد لم يدرك امنيتك ولم يغنيها لك فاعتدت تغنيها لنفسك سعيدا راضيا ، اعرف اين ساجدك ، سافتح خزانه السكاكر ساجدك قابعا وسطها ، سافتح دولاب الملابس ساجدك تحاول ترتدي عباءه جدك وعمامته تقلد خطوته ومشيته ، سادخل غرفه المكتبه اجدك منكفئا فوق كتاب صعب لاتفهم كل عبارته تحت المكتب في الظلام تفك نقوشه وتحارب صعوبته وتبكي عجزك وتصمم علي الانتصار عليه وفهمه ، سادخل غرفه الذكريات ساجدك امام الساعه القديمه تحاول اصلاح بندولها ، امام صوره زفاف امك تصلح اطارها ، امام كورتك القديمه ترتق ثقوبها وتتمني لو تقذف بها للسماء مثلما كنت تفعل صغيرا ، امام طيارتك الورقيه تركب في ذيلها الطويل قصاصات ساطعه ذهبيه وفضيه وتتمني اطلاقها وروحك في الفضاء ، ايها الطفل المدلل الجميل البريء اعرف اين ساجدك مهما اختبئت فلا تتعبني وترهقني وتستعذب لعبه فرارك مني وتعالي !!!

ابحث عنك فيك .... لااري ملامح وجهك ولا تقاسيم ملامحك ولا تقنعني بانها لك وتعبر عنك ، ابحث عن ملامح اخري لروح عذبتها الايام فاستقوت علي الايام واحتقرتها وتعالت عليها ، ابحث عن ملامح اخري لنفس مثل كنوز القدماء عراقتها اصالتها صدقها هم كل قيمتها الغاليه ، ابحث عن ملامح اخري لاحاسيس كبتها وتكبتها تخاف منها وتخاف عليها تنكرها ولا تفارقها ولاتفارقك ، ابحث عن ملامح اخري لانسان اعرفه جيدا لكنه مازال لم يطمئن للايام مازالت جروحه القديمه تنزف واوجاعه البعيده حيه ومازالت دموعه حبيسه تنتظر حضنا امنا لتنهمر فيضانات تغسل الروح والنفس وتصالحك علي الدنيا ....

ابحث عنك فيك .... واثقه في يوم من الايام بعد تنقيب وحفريات ، بعد وقت طويل وعناء ، بعد مشاكسه ومقاومه وتمرد ورفض وهروب وفرار ، بعد صمت موجع وكلام بلا معاني ، بعد ابتسامات شمعيه ونظرات بارده واحاديث رتيبه ، بعد كل هذا واكثر ، ساعثر علي ضالتي وكنزي ، ساعثر عليك اجمل من كل تصوراتي من كل احلامي من كل امنياتي ، ساعثر عليك .... وقتها ستبدأ الايام الجميله في الحياة !!!
ابحث عنك فيك .... وساعثر عليك ... بلا اي شك !!!
فلاترهقني اكثر وارفع رايتك البيضاء وسلمني روحك وقلبك فهما لي مهما ادعيت غير هذا ومهما كذبت ومهما هربت !!!
سلمني روحك وقلبك وتعالي في حضن وابكي !!!

هل ستمنحني السعاده وتأتي ؟؟؟؟

اشتقت اليك يانصف روحي ، بل كل روحي ..
اشتقت اليك ياكل روحي وكلي انا ..
اشتقت اليك تعرفني ولااعرفني
تفهمني ولا افهمني
اشتقت اليك احتاجك وتحتاجني
فمن الاحتياج للطمأنينه
ومن السكينه
ومن فرحه اللقاء بنصف الروح وكلها
تكتمل سعادتي بك ولاجلك ونعيش !!!
اشتقت اليك يانصف روحي بل كل روحي وكلي
اشتقت اليك تكملني بكل ما نقص مني
انت بقيه الحروف الضائعه
ومعني الكلمات الغامضه
واخر التنهيده التي تنفجر من صدري غضبا واستياء
انت الراحه التي احلم بها في نهايه الطريق المضني
وانت السكينه في عالم موحش مخيف
انت الحضن الامن والملاذ
انت في صعوبات الحياه طوق النجاة
اشتقت اليها يا كل روحي وكلي انا
اشتقت للقوس الثاني ينهي الجمله المفتوحه ويغلق نهايتها
اشتقت اليك نقطه في اخر سطري الطويل يوضح معناه
اشتقت اليك كتاب التفاسير وشفره اللغز وحل الطلاسم وفهمي انا
انت كل روحي وروحي
انت جزء مني شرد ولم يعود لكني انتظره يعود
انت كلي ..
انت من وصفته الايام لي
بلسما للجروح وصبرا للهموم وضحكا للفرح
ودموع حيرة وطمأنينه وعشق
انت جمله الموسيقي التي لايطرب قلبي الا علي نغماتها
وبيت الشعر الذي لايستريح وجداني الا مع كلماته
وانت براح اللوحه المسكونه بالغرام تسعد النفس الكسيره
انت حقول خضراء احلم بمروجها واجري فوق اعشابها
وعصافير تغرد لايسعدني الا تغريدها ورنين نغماتها
وامطار شتويه تغسلني وتزيح عن روحي الصدأ والهم
وقوس قزح يخطفني بين اطياف الوانه يخبئني من اشباح الاسود ورعبه
ومحاره تنام في عميق البحر تنتظر لؤلؤتي في احضانها
انت شمعه حنونه تحتاجها طرقات توهتي وحيرتي
انت شمس حانيه ترسل اشعتها لوجهي كل يوم تقبله وتصبح عليه
انت روحي وكل روحي
انت وليس الا انت لي
انت روحي وروحي
اشتقت اليك تكملني تفسرني تهدهدني
اشتقت اليك توضحني تشرحني تطيبني
فكل حروفي بدونك بلا نقاط
رسومات بلا معني
كلمات بلا مضمون
بعثره لا طائل منها ولا فيها
اشتقت اليك تصحبني
في طريقي الوعر تهونه
في دربي المعتم تطمئني ومعي تكمله
اشتقت اليك ياكلي وكلي روحي
اشتقت لكفك يقبض علي اصابعي
طفله صغيره تسلم قيادها لرجل حكيم
يعلمها الابجديه والاسماء وصنوف الغرام والثقه بالنفس
اشتقت اليك ياكل روحي
ياحامل خرائط كهوف النفس ودروبها ..
يا قاريء ابجديتي ورموزها ..
تحمل مفاتيح بواباتي الموصده وابواب عتقي وفرحتي
تبعد عن الروح حزنها وشجنها وهمومها ..
يامن تراني مغمض العينين
وتحسني وبيني وبينك مائه بلد وقارتين
يامن تفهمني وانا صامته وخرساء
وتحبني وانا مكفهره مثل السماء
اشتقت اليك يانصف روحي ياكل روحي
اشتقت لوجودك
واغاني تطربني
وضحكات صاخبه وفرح
وكلمات حنونه وهمس دافء
وقبله صغيره فوق جبيني تداويني
وابتسامه تطمئني وتعالجني
تبعد عن قلبي وروحي الخوف والوحشة
اشتقت اليك ياكل روحي ..
اشتقت لحلم نعيشه معا
نعيشه اجمل من الواقع الذي لانعيشه
اشتقت للحظه تسرقني فيها وافر معك
اكسر قيودي واحطم اغلالي واهرب من زنزانتي
التي اعيش فيها وحيده لزنزانتك نموت بين جدرانها معا
فالموت معك الف خلود والف نجاة
اشتقت لانفاسك تمنحني اجمل مافي الكون وفي الحياة
اشتقت اليك ياروحي ياكل روحي
انا من غير وجودك نصف ضائع وجزء تائه ينتظر الكمال
اشتقت اليك ولنفسي ووجودي وروحي
فبغيرك الحياه ناقصه ولاتسعدني
هل ستمنحني السعاده وتأتي ؟؟؟؟
ام ساعيش بقيه ايام العمر وحيده بدونك تعيسه انتظرك واشتاق اليك ؟؟؟؟؟؟؟

في انتظار ربيع يثأر لنا من الخريف ويفرحنا !!!!

يافارس الايام البعيده الم يحن وقت حضورك ؟؟ الم تتعب من الترحال والغربه وقهر البعد ؟؟ الم تحن للدفء والونس وحنان حضني ؟؟ الاتسطع ابتسامتي في بهيم الليل تنير دروبك فتتبع قلبك والحاحه يقودك لنافذتي تربط مهرك الاصيل تحتها يصهل يوقظني فاجدك اقمار ساطعه في ليلي تبدله الف نهار بلا ليل ؟؟ الا تهديك انفاسي لطريقك فتتبعها بوصله تنتشلك من توهتك وحيرتك فيشق شراعك الامواج العاتيه مستسلما لرياح الوجد تقودك لمرساي ترمي هلب ترحالك علي شاطئي الساكن يتوق لصخبك ؟؟ الم توقظك ندائاتي في عوالم الصمت التي تواريت فيها تنتظر وقتا مناسب لليقظه فافقت ورحلت عنك الغفوه وبقايا النوم وطردتني من احلامك للواقع تصبو اليه وترنو لبواباته تتمني تحطمها وتاتيني حاملا قلبك الاخضر مهرا مزركشا بالطيبه والحنية والشوق ؟؟؟

يافارس الايام البعيده الم يحن وقت حضورك ؟؟؟ الم ترهق من الوحده والصمت ومناجاة النفس ؟؟ الم تشتاق لاقتسام وقتك واحلامك ومستحيل امنياتك مع من تعتبرك حلمها وامنيتها المستحيله ؟؟ هل مازالت احلامك خاويه الا من وجهي يبتسم في حلمك كلما تأكد انه اسير احلامك ؟؟ هل مازالت كلمات كل الاغاني بلا معني تنتظر ترجمتي لاحاسيسها وفكي لشفرتها وتلاوتها علي مسامعك فتستعيد مفردات اللغه معانيها ونغمات الموسيقي جرسها وامسياتك حميميتها وتستعيدني ؟؟؟؟

يافارس الايام البعيده الم يحن وقت حضورك ؟؟؟ انتظرتك طويلا ومازلت انتظر الن ترق لحالي وتاتي ؟؟ سنوات مرت وانا احدق من نافذتي في الطريق انتظر ظلك يرسم فرحه تفصح عن مقدمك لكن شارعي خالي من ظلالك والفرحه !!! الفصول تعاقبت وانا انتظر ، في الشتاء ارتعد من الحنين وفي الخريف اتوق للحياه وفي الربيع تتفح مسامي لاستقبالك وفي الصيف اسهر والقمر ننتظرك ونسيم البحر يداعب وجهي ووجه ... ملت الفصول مني ولم امل من انتظارك ، الن ترق لحالي وتاتي ؟؟؟ الايام الكثيرة تلاحقت وانا انتظر ، كرهني السبت لاني لااحبه وهرب مني الاحد لانك ابدا لن تاتيني فيه وتكاسل الاثنين فنام وبقي الثلاثاء الحنون يقظا منتبها يسترق السمع لحفيف خطواتك وغار منه الاربعاء فبقي يقظ لم ينم ينتظرك حتي طرده الخميس من لحظه الانتظار واستأثر بكل لحظات التمني لكن النعاس غلبه فجاء الجمعه ومعه باب السماء مفتوح ينتظر الامنيات فتمنيت تاتي لكنك لم تاتي بعد !!! ملايين الثوان فرت ، ملايين الدقائق مرت ، مئات الساعات ماتت وعادت للحياه ، تكره العقارب التي تذبحها ببرود وحشة غيابك ، مئات الساعات ماتت وعادت للحياة ، تنتظرك وتكاد تقبض علي الحلم وتحيا ، تياس من حضورك وتكره الواقع وتموت ... وانا وقلبي وروحي نلهث مع الساعات نحاصر الثواني نقبض علي الدقائق ننتظرك ننصت لخطوتك نترقب صهيل خيلك نصغي لانفاسك ونحلم بقتل الزمن في حضنك وبين ذراعيك ، لكنك لاتأتي وتركتنا لانصال الوقت تذبحنا كل ثانيه عشره مرات !!!

يافارس الايام البعيدة .... الن تأتي !!! مر العمر ياحلم العمر وماتبقي لايكفي للاحتفاء بك ، الن تأتي !!! مر العمر يااحلي ماكنت اتمناه في العمر وبهتت الامنيات وشاخت الاحلام ووهنت عزيمه الانتظار ... الن تأتي !!! مر العمر يااجمل لحظات العمر وذبحتنا انصال الوحده والثوان الفاره من الزمن وكدت ايأس .... الن تأتي !!! مر العمر يافارس الايام البعيده .... في انتظارك في الحلم بك كاد الخريف يسكن الحياة ولايغادرها يهزمني ويهزم ربيعك الذي - بعد - لم تورق اشجاره ولم تتفح زهوره ولم تغرد في نهارياته الطيبه عصافير الجنه ، كاد الخريف يهزمك ، الن تأتي وتطيح به وتلون الحياه ببهجتك وتترك للعالم املا وحلما يقبض عليه فلا تتمكن منه الهزيمه والوجع !!!!

يافارس الايام البعيده ... القمر مهزوم خلف الغمام يبكي ظلمه ووحشه !!
الشمس مخنوقه خلف اعاصير التراب وجنون العواصف !!!
الربيع يقاوم الخريف ويفر من مقصله سبتمبر وجفافه وجفاءه !!!
العصافير صمتت تنتظر من يطلق سراح تغريدها !!!
البحر سكن وكادت الطحالب السامة تسكن شواطئه !!!
الورود والزهور اغلقت اوراقها علي الامنيات الحبيسه ونامت !!!
الموسيقي خرست وكسا التراب اصابع البيانو واوتار العود وخنق الناي !!!
الاطفال لم تعد تضحك واحتقنت وجوهها البريئه بحمره القهر !!
الفرحه هاجرت من يقظتي وتركتني اسيره الاشباح التي لاتجد من ينازلها !!!
الحلم كاد يفر ياسا ويتركني !!
الانتظار مل مني ومن طول بالي وقدرتي علي التحمل والتحمل !!!
الن تاتي وتعيد للكون نواميس وجوده !!!

يافارس الايام البعيده !!!قرب الايام وتعالي .... مامضي اكثر كثيرا من كل ماهو باق !!! قرب الايام وتعالي ، كدت اقول فقدت الامل او اكاد افقده !!!!

من كتر الانبساط !!!!!

انا زهقت ..... ارهقت ......... اتخنقت ...........
لغايه امتي حافضل عامله ميتين خمسميت راجل في بعض ، لغايه امتي كل اللي مش لاقي حيطه يسند عليها يسند علي ، لغايه امتي اللي نفسه يدي حد بالبوكس يقول ماهي قويه وتستحمل وبدل البوكس اتنين ، لغايه امتي اللي ايده بتاكله عايز يرزع حد قلم مايلاقيش احسن من وشي او قفايا ، ايه النظام يعني !!!
ايه النظام !!! ليه لما الواحد يبقي محترم تبقي الناس حقرا ، ايه القانون ده ، ايه القانون بتاع تبقي سافل تبقي الناس كويسه ، تبقي كويسه تبقي الناس حقرا !!! قانون ايه المنحط ده ، طيب حاستهبل واعملي نفسي مش شايفه لغايه امتي ، لغايه لما يحصل ايه ، افوت افوت واستهبل واقول مابيحصلش مش شايفه مش واخده بالي ، خلاص اتقرفت بقي !!!
بصراحه بقي شايفه وواخده بالي وباطنش لكن حتي الطناش زهقت منه !!!
زهقت ارهقت اتخنقت ، تعبت بجد ، كنت بحلم ميت حلم تاني ، كنت باحلم اعيش في سلام ، لاحاجه تضايقني ولااضايق حد ، باحلم العب ربات بيوت ، اعمل كيكه وافصل فساتين العيال وابقي زوجه طوع ومطيعه ، لا كنت باحلم اتخانق ولا اثبت ذاتي ولا احقق نفسي ولا اي حاجه مني ، كنت باحلم اعيش حياه بسيطه ، لكن الحياه مااديتنيش فرصه احقق احلامي ولااعيشها ، الحياه فرضت علي القتال ، يااااااااااااه من زمان قوي قوي فرضت علي القتال ، علي كل مستوي ، علي كل جهه ، طيب خلاص بقي ، حنحارب ، طيب حاحارب وانا مبسوطه ، مش حازعل ، مش حاضايق نفسي ، حاحارب وانا مبتسمه ،وفعلا ، كل هبده وهبده علي راسي ، ااقاوح واقوم ، اعمل مش واخده بالي ، اعمل اني مااتوجعتش قوي ، اعمل اني مافيش في حاجه اتكسرت ، اعمل ابو علي ، ولايهمني ، ااقول كده ولايهمني ، ااقول كده وكده انه ولا يهمني ، لكن خلاص تعبت وارهقت وزهقت ، تعبت وعايزه حد يحتوي تعبي ارهاقي يعرف يطبطب علي روحي يفك الخنقه اللي انا فيها ، هي ايه النظريه يعني تبقي جدع تاخد بالجزمه ، هي دي النظريه ، كل ماتبقي جدع تاخد بالجزمه اكتر ، والناس الحقيره الوسخه الندله الانانيه عايشه ومتهنيه ولا زهقانه ولا مخنوقه ولا بتحس اساسا ، تعبت والله جدا !!!

تعبت يادنيا تعبت ، ايه مش حقي اتعب ، تعبت ، متضايقه ، حمولي زادت علي كتافي ، ماشيه علي الحبل باتمرجح ، علي طول حاسه اني حاقع وفي الفراغ لوحدي لاحضن حيتسلقاني ولا ايد تسندني ولا دراع اركن عليه ، ليه انا حاسه كده ، ليه انا حصل في كده ، ليه ماعشتش حياه بسيطه عبيطه من غير حروب ولا مشاكل ، اعمل كيك وافصل فساتين العيال واسمسر من مصروف البيت واتنيل علي عيني واسكت!!
يادنيا والله انا مش حيطه ، مش جبل ، مش صخر ، انا انسانه وغلبانه قوي ، وبحس قوي وبازعل قوي وباخد علي خاطري وباتعشم ويتكسر عشمي طول الوقت ، واعمل عبيطه واني مش واخده بالي ، اعمل اني مش زعلانه ، ااقاوح ، لكن خلاص ساعات باتعب بازهق ، بيصعب علي روحي ، بارهق من المقاوحه ، باحس اني عيله صغيره عايزه حضن امي تطبطب علي ، عايزه حد يشوفني ، مش يطلب مني اشوفه ، عايز حد ياخد باله اني موجوده مش علشان يسند علي ولا يحتمي بي ولا يركن علي ولا يتتاقل ، تعبت والله بجد خالص !!!
وبعدين ، اخر المقاوحه دي ايه ، حابقي اجمد ، ولما ابقي اجمد حيحصل ايه يعني ، حاخد نيشان القوه ، حاخد قلاده الاستحمال ، طيب وكل السنين اللي عدت وانا مقهوره زعلانه متضايقه مين حيردها لي ولا يصالحني عليها ! اخرت المقاوحه دي ايه ؟؟؟ حيشارورا علي ويقولوا الست المقاوحه اهي ، وايه يعني لما يقولوا كده ، حيحصل ايه ، الدنيا حتبطل ترهقني حتبطل تفرهدني ؟؟؟ ولا حيحصل حاجه ابدا ، طظ ، لا ستين طظ كمان في المقاوحه وام المقاوحه !!!
محدش يقولي اجمدي واتنيلي علي عينك ، اصلي جمدت قوي كتير من زمان قوي لما فردهت ، محدش يقولي ماانت ربنا مديكي حاجات كتيره ، لاني عارفه انه اداني حاجات كتيره وباشكره عليها طول الوقت ومقدره قيمتها ، لكن رغم كل ده ، انا وحيده جدا ومرهقه جدا ومخنوقه جدا ، ايوه ربنا اداني حاجات كتيره لكن خلاني جدعه ، والجدعنه دي معناها اني هبله ، الناس بتشوف الجدع المحترم اهبل ، اهبل نضحك عليه ونخمه ونستهبل علي قفاه ، الجدع ده من وجه نظر الناس هو الحيطه المايله ، هو اللي ناكل عيش ونابت علي قفاه ويمكن عيش ومارون جلاسيه ، ماهو مش حيعمل حاجه ، ماهو اهبل ، قصدهم يعني جدع !!!!
طيب ايه اللي حصل ، المصيبه ان محصلش حاجه ، يمكن نقطه ميه صغيره قوي وقعت فوق فنطاس كبير مليان خلاص فاض واتدلدق ، مافيش حاجه حصلت تستاهل الحاله دي ولاحتي ربع ربعها ، حوادث عبيطه في الحياه ، مين اتاخر مين استهبل مين تصور روحه ذكي وقرر يضحك علي ، يمكن حد في الشغل يمكن الشغالين يمكن حد في الشارع كاسر علي وانا سايقه في حالي وكافيه خيري شري ، يمكن حد عمل حاجه متعود يعملها كل يوم ، لكن انا بقي اللي مش انا ، انا مش الصوره اللي بابين نفسي للدنيا بيها ، انا الحد الغلبان الضعيف المستخبي في الضلمه مش عايز حد ينكش له شعره ويضايقه ، مش عايز حد يضايقه ، لانه متضايق خلقه ومستهبل ، مش عايز حد يتاقل عليه لانه خلاص تعب من كتر التقل ومش مستحمل ، يمكن حد رمي النقطه الاخيره فوق الفنطاس ، هي نقطه تافهه عبيطه ولا تستحق ، لكن فجرت جوايا كل الارهاق والغضب والزهق والتعب !!!!
المصيبه اني عارفه ان مافيش قدامي حلول ، لاحابقي ندله ولا حابقي حقيره ولا حابقي انانيه ، ولاحاعرف استغل الناس ولا اضحك عليهم ، المصيبه اني عارفه اني مافيش قدامي حلول ، حافضل متنيله علي عيني وجدعه ومحترمه ، مش حاعرف اتاخر علي الناس ولا اديهم ضهري ، مش حاعرف حتي اشحت منهم الاهتمام ولا اتمسكن عليهم ولا ااقول ده انا غلبانه ومسكينه ، محدش حيصدقني ، تاريخي حيكذبني سلوكي حيكذبني تصرفاتي اللي معرفش اغيرها حتكذبني صوتي العالي حيكذبني ملامح وشي بتاع الست القويه اللي بتطلع في التلفزيون ، كل ده حيكدبني ، محدش حيصدق اني غلبانه ، ويمكن كمان من ورا ضهري يقولوا الوليه اتهبلت ، ال غلبانه ال ، الناس حتقول ياحرام وبس خلاص ، وياحرام بمعني معلش اجمدي بطلي مياصه ، وحيقولوا ياحرام بصوت واطي قوي ، ليه لاني طبعا من وجه نظرهم مش شكل ياحرام ، انا شكل " ياماما " ، ولانهم عارفين اني حتي ياحرام دي مابحبش اسمعها ومش متعوده عليها وماتليقش علي وبتاعت ناسه تانيه غيري خالص !!! بس انا نفسي حد يحس بجد ويفهم بجد اني ياحرام !!!! يصدق اني ياحرام يشوفني بجد ويعرف اصعب عليه وانا بصوتي العالي وجعيري وثقتي بنفسي ، يعني مش لازم علشان ابقي ياحرام ، لازم ابقي فاتحه بقي وعبيطه وباتمرمغ في الارض ، لا ساعات حتي الناس الاقويا اللي الناس بتشوفهم اقويا بيبقوا ياحرام والله !!!!
عارفه اني مافيش قدامي حلول ، انا حاتنيل علي عيني وحافضل زي ماانا ، وحش حلو بقي مش مهم ، المهم اني حاتنيل علي عيني افضل زي ماانا ، طيب الامل في الناس بقي ، الناس تتغير تبقي لطيفه جدعه تبطل استهبال واستغلال ، طيب هي الناس ماينفعش تاخد وتدي ، بالعدل بالاحترام بالادب ، ماينفعش نبقي لطاف ، محترمين ، كل واحد عارف ايه اللي عليه وايه اللي ليه ، لاحد يستهبل علي حد ولا يستغله ، ماينفعش ،لازم نبقي في الحرب طول الوقت ، ماشينين نتلفت ورانا خايفن من القلم اللي حننسكعه علي قفانا ، لازم نبقي طول الوقت في الحرب ، خايفين من الكمائن المنصوبه ومن والكذابين اللي بيقولوا حاجه ويعملوا حاجه !!!!
واضح ان مافيش حاجه قدامي ، فطريقك ياولدي مسدود مسدود مسدود ، اللي حنبات فيه حنصحي فيه ، شقا في شقا ، ووقت الشقا مايخلص والراحه يحين ميعادها يكون خلاص الفيلم خلص !!!! مافيش حاجه قدامي، ارهق ازهق اتخنق براحتي !!! براحتي خالص افضل كده برضه براحتي ، اتمرد واقاوح ، برضه براحتي ، اهي حياتي وانا حره فيها اعيشها عدل ماشي اعيشها زفت برضه ماشي ، هي حياتي انا وبس خلاص ، واضح ان دي خطواتها ودروبها وطرقها وسككها ، مقفوله ومتنيله وكل حاجه تيجي بالصعب وكل راحه تجري وكل شقا يفضل ، وعلي راي فهد بلان مكتوب علينا قله الراحه ، واضح ان فيه ناس ربنا خلقهم كده ، يحلموا احلام عبيطه تتسرق منهم في السكه ويعيشوا ويموتوا في الحرب !!!
طيب ................ الناس حتفضل هي هي ، الحقرا حقرا ومرتاحين ، والجدعان المحترمين زيي وزي كل حبايبي مكتوب عليهم قله الراحه ، هي حياتهم كده صعبه ، صعبه ليه معرفش ، لكن دايما صعبه ، وهما براحتهم يمشوها وهي صعبه ، يكرهوها لكن يعيشوها وتفضل صعبه ، يفلفصوا يرفصوا يزعقوا يعيطيوا ، براحتهم لكن في الاخر ، لازم نغسل وشنا بميه ساقعه علشان نفوق ونقول ايه المياصه دي ايه الدلع ده ايه الضعف ده ، ده ماينفعش ، انا عتريس انا بلوة سودا انا مش قصير وقزعه انا طويل واهبل ، انا ماكانش لي احلام بسيطه انا قويه انا صنعت خصيصا للخدمه الشاقه !!!!
وهيه انا مش مكتبئه ولا حاجه !!!
انا مبسوطه خالص خالص ، هو ايه مش باين علي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وبس ياسيدي وقامت معيطة " من كتر الانبساط طبعا " !!!!

الحياه اصبحت مخيفه جدااااااااااااااااااااااااااااااا !!!!!

لااصدق ما رأيته من صور منشوره في الصحف وعلي الانترنت !!!!!!!!!!!!!
جثه شاب مصري " قاتل " مقتوله وممثل بها ومعلقه فوق احد اعمده النور باحدي قري الجنوب اللبناني !!! لااصدق هذا !!! اهل قريه يجتمعوا علي اقتناص شخص مجرم من ايدي البوليس وهو يمثل جريمته ويمزقوه ويقتلوه ويمثلوا بجثته ثم يعلقوها علي عمود نور ويتحلقوا حوله يصوروا جسده الممزق المسربل بدماءه بالموبيلات !!!!

اين المدنيه التي تتحدث عنها البشريه !!! موجوده في نشرات الاخبار والكتب والبرتوكلات الدبلوماسيه اما نفوس البشر مازالت فجه بدائيه مثلما هي منذ ايام الانسان البدائي واهل الكهف !!! حتي الحيوانات المتوحشه غير المروضه في غاباتها لاتفعل مثل هذا الفعل البشع الشنيع !!! لااصدق مارايته !!!

ولن اقبل اي تبريرات من اي نوع هذا الشخص " المصري " مجرم قاتل ، ارتكب جريمه شنعاء ، قتل طفلين بلا ذنب ولا جريره ، فينزل عليه القانون عقابه !!! فليعدم بامر المحكمه وتنفذ عليه العقوبه بلا رأفه ولاشفقه !!! لكن القصاص منه بايدي اهل الضحايا واصدقائهم واهل بلدتهم وتمزيقه والتمثيل به ، امر لايمكن قبوله او فهمه ابدا !!!!

ماحدث لايقبل ولايمكن يقبل !!! لن اقبل اي تبريرات من اي نوع تبرر لقريه الجنوب اللبناني مافعلته في الشاب المصري !!! فحتي المجرم عتيد الاجرام المأجور الذي يقتل بدم بارد وبلا شفقه ، له ضمانات قانونيه ، ولايقبل ابدا ان يقتص منه اهل المجني عليهم والا تحولنا لغابه متوحشه مخيفه !!! يبدو والله اعلم اننا - اي البشر والبشريه - قد تحولنا فعلا لغابه متوحشه مخيفه !!! تملكتنا البلاده والرغبه في القصاص وشرب الدماء !!! ماحدث جريمه بريريه شنعاء لايمكن قبولها ولا الصمت عليها !!!!

والا لماذا تلعنوا باب زويله والرؤوس المنزوعه من اجساد اصحابها والتي علقت عليها حتي اكلت الطيور جيفتنا !!!! ماحدث غير مقبول ومخيف !!! مخيف !!! مخيف !!!!! واكثر ما يخيف نزوع بعض الناس لتبرير ماحدث باعتبار ان الشاب المصري مجرم متوحش !!!! لقد اقتنص الناس لانفسهم سلطه القانون والحكم علي الاخرين !!!

بعضهم يبرر قتل الشاب المصري في لبنان علي ايدي الضحايا لانه مجرم قاتل متوحش قتل طفلين ، اذن يستحق يمزقه اهل الضحايا ويمثلوا بجثته ويعلقوها علي عمود النور !!! ارجوكم تذكروا ، بعض الناس ، بل كثيرهم ، يردد ويروج ويتمني الحكم بالبراءه لحد رجال الاعمال المشهورين ليس باعتباره بريء ، ليس باعتباره لم يحرض علي الجريمه ، لكن باعتبار ان القتيله سيده من وجه نظرهم ساقطه قتلها حلال وحتي لو قتلها حرام ليس مقبولا - من وجه نظرهم - تضيع بسببها حياه رجلين " من خيره الرجال " !!!
يانهار اسود علي اللي بيحصل في الدنيا !!!
الحياه اصبحت مخيفه جدااااااااااااااااااا!!!

غرفة المرايا !!!!!

في غرفه المرايا يعتقل نفسه ويرفض الخروج منها !!!

غرفه كل جدرانها وارضها وسقفها مرايا لامعه !!! لايري الا نفسه ، ينظر حوله لايري الا خيالات ، لايري الا نفسه شكله ملامحه تفاصيله !!! نفسه تحاوطه من كل الاتجاهات ، يري وجهه في مرآة ويري ظهره في الاخري ، هذه تظهر نظره عيناه وتلك تظهر منابت شعره والثالثة تظهره طويلا والرابعه تظهرا ككوره باقدام قصيره ورقبه قصيره وراس كبيره منبعجه !!! في غرفه المرايا يعتقل نفسه ، عالمه هو نفسه ونفسه هي عالمه ، الاخر ليس موجود في غرفه المرايا ، الاخر لم يدنس هوائها لم يلوث ارضها لم يفسد طبيعتها ، غرفه المرايا هي الانا العليا له ، عالمه الخاص بمفردات لايفهم معناها غيره وحركات لايستوعب دلالاتها الا هو !!!
نفسه ثم نفسه ثم نفسه ، من الامام من الخلف ، من فوق من تحت ، من الجانب الايسر والايمن ، نفسه وفقط !!! هي مفردات عالمه وتفاصيله وصورته الكليه !!!! نفسه ذاتيته ماهيته الانا هي اوصاف لعالمه الخاص جدا ، عالم ضيق جدا لايتسع لغيره ، مراياه لاتظهر الا وجوده ، عالم واسع جدا يحتويه ونفسه وروحه ووجوده وكل مايخصه وفقط !!!!
ولد ذلك الطفل البائس في غرفه المرايا .... سار خطواته الاولي صوب المرأه فلم يري الانفسه ، جلس امام المرآه الجانبيه فشاهد ساقيه امامه فصرخ فزعا ، يتحمم امام المرآه يري جسده العاري يتصور فنا بديعا ، يغني امام المرأه ويتلاعب بصوته وحنجرته فتنعكس نبرات صوته علي المرآه وترتد له فيطرب يتصور نفسه مغنيا رائعا وكيف يعرف انه صوته اجش خشن بارد سمج وهو لم يسمع الا نبراته تخرج من احباله الصوتيه فيرتج بدنه انفعالا وفرحه بالحشرجات التي يسمعها يتصورها طربا !!!
ولد ذلك الطفل البائس في غرفه المرايا لكن احد لم يقل له ان العالم اوسع بكثير من تلك الغرفه الزجاجيه المعتقل فيها ، ولد في تلك الغرفه فتصور كل العالم يشبهها تصور كل العالم يشبهه ، تصور كل العالم يدور حوله يهتم به يراه ولايري غيره ، اليس كل العالم مثل غرفته الزجاجيه ، اليس كل العالم هو غرفته الزجاجيه نفسها ، نعم العالم هو غرفته التي يزركش جدرانها بصورته البديعه !!! هكذا ولد وكبر ونضج وشاخ انسان مشوه لايري الا نفسه في الحياه هو مركز الكون واطرافه ، هو اهم شيء بل هو اهم الاشياء ، هو الاهم ولا شيء له قيمه خارجه خارج وجوده خارج نفسه ، هو العالم والعالم هو !!!!!!!!!
لكن الطفل المبتسر الذي ولد لم يري الا وجهه وظهره ووجوده ، هذا الطفل المبتسر خرج من حضانته ليتعالم مع العالم الخارجي لكن وهج مرايات غرفته وقبره ، وهج المرايات عمي عيناه وافقده البصر ، لايري في الحياه الا نفسه ، صورته وانعكاساتها في اعين الاخرين ، خرج للعالم الخارجي لايري الانفسه في كل شيء ، وحين اجبر علي التعامل مع العالم الخارجي تعامل معه كمثل تعامله مع الغرفه الزجاجيه بمرايات جدرانها ، العالم لايكون عالم الااذا اعترف له واقر بمكانته الزائفه كاهم الاشخاص والاشياء والموجودات ، انا الاهم ، انا المهم ، من يؤلمني فهو مجرم ومن يسعدني فهو بطل وماافكر فيه هو الصواب وماارفضه هو الخطايا ومن اكره خلق ليكره ومن احبه لايستحق الا الحب ليس مني بل من كل البشريه !!!
خرج من غرفه المرايا للعالم يحملها معه تحت جلده وفي روحه ، هي معياره للعالم الخارجي ، من يشبهها عالم حقيقي ومن يتناقض معها عالم مزيف ، خرج من غرفه المرايا يحمل جدرانها في عينيه ، يبحث عن صورته في صور الاخرين من يشبهه هو الاجمل ومن لايشبهه ليس موجود !!! خرج وهو محور الكون ومركزه والا علي الدنيا السلام !!!!
من يتحمل التعامل مع شخص كريهه مثل هذا الشخص المبتسر التافهه !!!! لااحد يتحمل !!! لكنه يتصور ان تحمله فريضه علي كل انسان فريضه وواجب وضروره !!! فالناس كلها خلقت من اجله من اجل اسعاده من اجل ارضاءه من اجل خدمته !!! افكاره هي الاصح وتصرفاته هي القدوه واحلامه اوامر وسلوكه نموذج حتي تفاهته وثقل دمه مثل عظيم يلزم الاحتذاء به !!! لكن البشر خارج عالمه الوهمي لم يقبلوا قوانينه !!! لم يرضخوا لضروراته !!! لم يخضعوا لاحلامه وتصوراته !!! البشر خارج عالمه تعاملوا معه باعتباره مجرد واحد من ملايين ، طارت الريشه من علي راسه منذ زمن بعيد ، تعاملوا معه باعتباره شخص عادي وربما اقل من العادي عديم المواهب بلا كفاءه بلا قيمه ، فتحول البشر خارج عالمه لاعداء ينكروا وجوده العظيم الذي تسبح باسمه المرايات والجدران ، تحول البشر خارج عالمه لاعداء يلزم محاربتهم لردهم للصواب والعقل والحكمه لردهم للانتباه للحقيقه العظيمه انه مركز الكون واهم اشخاصه بل شخصه الوحيد المهم !!!
شخص مبتسر تافه بلا قيمه حقيقيه ، يتشاجر مع الحياه لانها تنكره ولاتعطيه وجود وقيمه وعظمه مثل مرايات جدران غرفته وقبره!!! شخص مبتسر تافه بلا وجود بلا فائده بلا معني يتشاجر مع الحياه وبشرها ، يمزق وجهه وشراينه يهددهم يتشاجرويصرخ يروعهم يدس مسدسه تحت ضلوعهم يبكي ويستجدي ويتمرمغ علي الارض ، يهدد ويتوعد يستجدي ويتوسل ، انا موجود انا موجود ، انا اهم شخصيه في الكون انا محوره وسبب وجوده وان لم تصدقوني اسالوا جدران غرفتي ومراياتها !!!
وفي يوم غامت شمسه ولم تظهر ، ضاق به الجميع ، بعدما حاولوا معه بكل الطرق اعادته لصوابه ، العالم ليس انت ، لست مركز الكون ، لست اهم اشخاصه ، انت شخص عادي محدود الامكانيات ، انت شخص عادي لست مميز ولست الاميز ، مثلك ملايين ، لكنهم طيبيون يقنعون بحالهم ويرضخوا لامكانياته ، العالم ليست انت ، اخرج من نفسك انسي روحك ، البشر لم يخلقوا لخدمتك ، لست الاهم ولم تكن ، لست الاهم ولن تكن ، لكنه لايسمع ، يسمع اصوات الاخرين همهمات غير مفهومه لايقبل تفسيراتها ، من لايشكر فيه حديثه لغو تافه من لا يمجده اخرق احمق لايفهم ولن يفهم ، ضاق به الجميع ، ضاقوا من نرجسيته التافهه ، ضاقوا من الانا العليا التي لاترتكن علي انجازات او امكانيات او قدرات الا خلل عقلي نتيجه الاحتجاز المستمر في غرفه المرايات ، ضاق به الجميع .... وفجأ امسك طفل صغير بحجر مشحوذ وقذفه علي الغرفه الزجاجيه فتهاوت جدرانها فوق راسه تصدعت مثل روحه تكسرت مثل نفسه انهارت مثل وجوده ، حجر مشحوذ في يد طفل صغير هدم عالمه الهش المزيف !!!!
اذا صادفتموه ذات مره يصرخ في الخلاء انا مركز الكون انا الاهم انا اعظم شخصياته ، اذا صادفتموه يلوم الحياه لانها لم تعطه مايستحقه يلوم البشر لاهم يلغوه وهو الاهم وجودا ، اذا صادفتموه تجنبوه وابعدوا عن طريقه وتذكروا انه مبتسر لم ينمو ولم ينضج كما كان مفروض ، فقد احتجزته الايام في غرفه المرايا الزجاجيه بين البؤر المحدبه والمقعره فلم يري الا نفسه وفقط وخلا كونه من اخر غيره !! اذا صادفتموه تجنبوه فقد اكتشف البعض انه مازال يقبض في جيوب ملابسه علي شظايا من المرأه المكسوره يتوعد بها من لا يراه الاعظم والاهم يتوعدهم بتمزيق وجدانهم ووجوهم وطمأنينه نفوسهم !!! اذا صادفتموه تجنبوه واحموا ارواحكم ونفوسكم من الندوب والجروح التي قد يحدثها في قلوبكم وارواحكم بشظاياه المسنونه !!!!
شخص مبتسر تافه بلا قيمه يتوعد الحياه وبشرها بشره واذيته لانهم يرفضوا يكون مرآته يروا صورته ووجوده فقط !!!! تجنبوه ولاتحاولوا علاجه فقد حاول الكثيرين قبلكم مساعدته لكنه يتعالي حتي المساعده والعون !!! يبدو ان قدره يبقي وحيدا في عالم خالي الا منه !! يبدو ان هذا قدره الذي لن يفلح ابدا في الفكاك منه !!! هل اشعر بالشفقه عليه !!! لااعرف !!! ربما حتي هو لايستحق الشفقه !!!!

افتقدك جدا !!!!

لااشتاق اليك !!! لا توحشني !!!
اخبرك بمنتهي الصراحه بمشاعري تجاهك !!!
لااشتاق اليك !! لا توحشني !!!
فقط اشتاق لكورنيش النيل بصحبتك !!
هل تذكر ليله مشينا من اول النيل لاخره !!! كنت تحكي لي حكايه لااذكر تفاصيلها الان ، لكنها شدتني ، كنت تضحك وانا اضحك ، كنت احس العالم دافء ورياحه نسيم جميل ، كانت رائحه الورود تحتل انفي ورئتاي ، كانت موسيقي لااعرف مصدرها تنبعث خلفيه لنبرة صوتك ، كنت سعيده بكلماتك بتفاصيلك بصحبتك ، كانت انفاسك تؤنسني ، لااعلم كيف مشينا كل هذه الخطوات ، هل كنت اطير ؟؟ لااعرف ، كانت خطواتي راقصه وخطواتك تحملني تحلق بي فوق قمم السحب الوردية المنخفضه ، لااعلم كيف مرت الساعات الكثيرة قصيرة ، كنت اشتريت لي كل عقود الياسمين التي تحملها البائعه الصغيرة ، يومها اخذت منها كل الياسمين التي تحمله فمنحتك ابتسامتها البريئه ، كللت شعري ومعصمي وجيدي بعقود الياسمين ورميت بقيه الزهرات تحت قدامي بساطا فواحا .... يومها اسعدتني كما لم احس من قبل ...... اشتاق لكورنيش النيل بصحبتك لكني لااشتاق اليك!!!

لااشتاق اليك ، لم توحشني !!!
فقط اشتاق للحلم الوردي الذي زرتني فيه في تلك الليله الموحشه البارده التي نمت فيها ارتجف حزينه ، ليلتها زرتني ، معك قفص عصافير كبير ، عصافير خضراء تغرد ، يومها غنت عصافيرك كل الاغنيات التي احبها ، غنت عصافيرك الالحان التي تسعدني والكلمات التي تشجيني والمعاني التي احبها ، يومها تشاجرت معي ، ايقظتني من وسط دموع الهم التي كانت تحاصرني ، تشاجرت معي وجذبتني عنوه لاغسل وجهي بماء بارد ، منحتني زجاجه عطر عتيقه اهدتها لك امك ، رششت منها قطرات كثيره علي شعري وكفاي ، رشتت منها خلف اذني ، فاحت رائحه العطر في الحلم وفي الحياه ، تشاجرت معي لاني لم افكر فيك قبل النوم ، تشاجرت معي واخبرتني انك تفكر في كل ليله قبل النوم فلاتداهمك الكوابيس ابدا ، تشاجرت معي لاني نمت حزينه باكيه ، سالتني هل نسيتني ، لم تنتظر اجابتي ، لمعه عيناي اجابت علي سؤالك ، كانت تسطع بوهج الفرحه ، يومها منحتني خلخال من وردات القرنفل الاحمر وثوبا من جزيره هواي وتاج زهور ابيض ، غردت عصافيرك فرقصنا واتسع الحلم ليصبح مثل الحضن الدافء للانسانيه كلها ، هل تذكر كيف امسكت اناملي وسحبتني صوبك ثم ابعدتني ، كنت اضحك وكانت العصافير تغرد وكنت تهمس باجمل كلماتك الرقيقه في قلبي المشتاق لوجودك .... كان اجمل احلامي وكنت الزائر الاجمل الذي داهمني في الحلم ...... اشتاق للاحلام في وجودك وبصحبتك لكني لااشتاق اليك !!!

لااشتاق اليك ، لم توحشني !!!!
فقط اتذكر يوم جلسنا نحدق في البحر ، هل تذكر ذلك اليوم ، كان البحر ازرق يسطع بزبد الموجات الصغيرة ، كانت الشمس تتوهج بدفء حميم ، كان نسيم البحر يهب علينا برائحه الانتعاش ، كانت الرمال بارده كاننا ندس اصابعنا وسط كريات الثلج الصغيره ، كانت نخله صغيره تكاد تثمر بلحها المسكر تتمايل بجذعها اللعوب والنسيم يتخلل سعفها ، هل تذكر ذلك اليوم ، كنت اشتريت لي كتاب ابحث عنه ، احضرته من اخر الدنيا وفاجئتني وانا جالسه علي البحر صامته افكر فيك ، سحبت مقعد وجلست بجواري ، حين لمحتك ابتسمت فتحركت سحابه فضيه ورات وجه الشمس اللاهب ، هل انهمرت امطار وقتها لااعرف ، لكن قطرات بارده غمرتني ، منحتني الكتاب واسطوانه عليها اغاني كنت احبها ونسيت ، ذكرتني بها ، راقصتني علي البحر ، بنيت لي قصر علي الرمال ودافعت عنه لم تسمح للماء يهدم شرفاته ، اخذتني للشرفه البحريه الكبيرة ، زينت شعري بزهيرات الفل التي تزين سور شرفه القصر ، يومها راقصتني علي البحر ثم اختطفتني للشرفه التي فرشت ارضها بالمرمر الوردي ، هل تذكر ، انزلقت بين ذراعيك وكدت اسقط ، لكنك حملتني بين ذراعيك ، هل هذا الصوت الحنون صوت دقات قلبك ، هل قلت لك وقتها ان نظره الفزع التي لمحتها في عينك كانت اجمل نظره حب شاهدتها في حياتي !!! اتذكر يوم جلسنا نحدق في البحر ، اسير علي الرمل بخلخال محبتك ، تتحول حبات الرمل تحت اقدامي لقطرات ندي ويتحول النهار المزدحم بالافكار البارده لفجر ينبلج بحنان اسطوري ..... اشتاق للبحر معك ، لشرفه قصرك ، لقطرات الندي وخلخال القرنفل ، اشتاق للازرق الحاني في صحبتك لكني لااشتاق اليك !!!!

لااشتاق اليك ولاتوحشني !!!
انت لاتفارقني ، لاتغادرني ، تحتلني ولاتجلو عني ، كلماتك في اذني ، همساتك في قلبك ، روحك تسكن روحي ، نفسك تشاركني نفسي ، انت لاتفارقني ، في ظلمه الليل الموحش اتأنس بك ، في لحظه الفجر الحنون اسمعك ، في وسط الضجيج والزحمه اري عيناك تساندني ، في لحظات الحزن اسكن في حضنك واطمئن بدقات قلبك ، في لحظات الوحده اقبض علي كفك ولااتركك ، في لحظات البروده تدفئني انفاسك ، في اللحظات القاسيه من الحياه اتذكرك فتتلاشي القسوه ولايبقي لي الا الفرحه احساسا وحيدا !!!

لااشتاق اليك ولاتوحشني !!!
فقط افتقدك جدا واتمناك !!!
افتقدك جدا واتمناك !!!!
فانت منحت حياتي مذاق خاص جدا ومعني ، وحياتي في ثوان غيابك لاتعجبني !!!
افتقدك جدا واتمناك !!!!

انت اتغيرتي قووووووووووووي !!!!!

انتي اتغيرتي قوي !!!
دي اتغيرت خااااااااالص !!!
معني اسمعه كتير !!!
احيانا يتقال علي سبيل الذم والشتيمه !!!
واحيانا يتقال علي سبيل المدح والاندهاش !!!
جمله اسمعها كتير بصياغات مختلفه ، اتغيرت !!!!

بدأت افكر ، اتغيرت لايه ، اتغيرت عن امتي ، كنت ايه وبقيت ايه ، واخده بالي اني اتغيرت او باتغير ولا مش واخده بالي ؟؟؟؟ طيب اللي بيشتمني بيشتمني ليه ، كنت عاجباه الاول وبقيت دلوقتي مش عاجباه !!! واللي بيندهش بيندهش ليه ، مش مصدق اني كنت حاتغير كده ، وكده ده ايه احسن ولا اوحش !!! خلاص ماليش دعوه باللي بيقولوا ، وباللي بيقولوه !!! ماليش دعوه بيهم !!! انا رايي ايه !!!!

لا كده المدخل مش عاجبني ، مش عاجبني انا رايي ايه ، متحفزه علشان ارد !! علشان اللي بيشتمني ااقوله مالكش تشتمني ، يمكن اقوله اه قاصده اتغير ، معجبه بالتغيير اللي حصل لي ، يمكن متحمسه علشان اشرح للمندهش ان مافيش مبرر لاندهاشه !!! اذن هذا ليس حواري انا ، ليس حواري مع نفسي ، لااتحدث في موضوع يؤرقني انا او يشغل الي انا ، لا ده حواري مع الاخرين !!! اللي بيشتموني واللي مندهشين مني !!! حواري معاهم هما !!! انا حاتكلم بس عن اللي بيشتموني ، اما المندهشين فالحقيقه اني لااجد مبرر لاندهاشهم !!! وهذا موضوع اخر !!!

نبتدي باللي بيشتموني !!!! مالكم بقي !!!!
طيب نجيب الشريط من اوله ..... انت اتغيرت خالص ، يمكن معاها تؤتؤتؤ ، وتؤتؤتؤ دي استنكاريه لولبيه معناها انهم مصدومين او حتي مش مصدقين التغييرات الوحشه اللي حصلت لي !!!
نجيب الشريط من قبل اوله .... انا كنت ايه ، لما كنت في الجامعه ، كنت فتاه متمرده جدا ، علي كل حاجه ، علي كل السلطات ، الابويه والامويه وسلطه الدوله طبعا ، كنت متمرده لكني كنت ساذجه ودي مش شتيمه ، دي مرحله سنيه عمريه ، كنت ساذجه ، بريئه حالمه ، اصدق كل اللي بيتقال ، اللي اومن بيه اصدقه جدا ولما اصدقه اتحمس له ، ولما اتحمس له اندفع في طريقه بلا تفكير بلا تروي ، الم يقولوا اندفاع الشباب وحماسهم ، كنت بطله اندفاع الشباب وحماسهم ، متمرده ، صداميه ، الغريب اني كنت مؤدبه جدا ، يعني متمرد بادب مندفعه بادب ، تراث عائلتي وقيم تربيتي بقيت بداخلي لم تخرج منه ابدا ، في الجامعه كنت متمرده ، عندي افكار سياسيه جميله خليط من بقايا المرحله الناصريه التي تريبت في ظلها وخليط من افكار عمي الاكبر الذي كنت اعتبره قدوتي ، كنت احمل تلك الافكار بشكل ساذج بريء ، اتصور ان مالايعجبني سوف يتغير بسرعه ، والامر لايحتاج الا شويه جهد واخلاص ، طبعا من الشباب اللي زيي وقتها لان العواجيز اللي زيي دلوقتي متخاذلين لايقدموا علي التضحيات بحق وحقيقي !!!

في الجامعه دخلت حزب التجمع ، حزب اليسار ، كنت واحده من شباب كثر ، تمردنا علي الفوارق الطبقيه والعائلات وعلي المجتمع الذي كان يتحول لمرحله الانفتاح الاقتصادي ويتخلص من الثورة الناصريه بكل تفاصيلها الاجتماعيه والسياسيه ، تمردنا علي كل مايحدث حولنا ، كنت ضد السادات ، ضد الانفتاح ، ضد الصلح مع اسرائيل واتفاقيه كامبد دافيد ، ضد كل الحاجات دي لكن مش عارفه مع ايه ، انا ضد قضايا واضحه لكن مش مع اي قضايا واضحه ، كنت اعتبر روحي يساريه ، دخلت حزب التجمع وفور دخلته لم تعد القضايا النظريه لها اهميه ولم اشغل روحي بالتحليلات والمواقف ، ده حزب ناس جدعه وانا معاهم علي الحلوه وعلي المرة ، دخلت حزب التجمع وانشغلت بقضايا عمليه كتيره ، الاشتراك في اصدار نشرة صحفيه ، التطوع في لجنه الدفاع عن الحريات ، زياره اسر المعتقلين ، دوامه العمل الحزبي خدتني مع سنين الجامعه ، كنت مع حزب التجمع وباحب الناس اللي فيه وبالمناسبه لسه بحبهم جدا ، لكن بشكل عاطفي وجداني فيه شويه سياسه صغيره والباقي افكار حالمه بريئه زي العشرين سنه اللي كنت شايلاهم وقتها فوق كتفي ، وحزب التجمع منحني التمرد الاكبر ، يعني مش بنت متمرده وبس لا كمان عضوه في حزب التجمع !!! واوووووووووووو !!!!

هل لما دخلت حزب التجمع حزب اليسار والعمال والفلاحين والعداله الاجتماعيه اصبحت اخري غير التي اتت من عائله من الطبقه المتوسطه انتمي لفرع ثري نسبي في اسره متوسطه الحال ، هل تخلصت من عاداتي الشخصيه ، هل طردت من داخلي قيمي الاجتماعيه ، لا ، انا كنت متمرده علي بعض سلوكيات اسرتي وعائلتها الكبيره ، سلوكيات اقطاعيه متعاليه علي البشر ، وكنت باحب عبد الناصر وتجربته واغاني الثوره وباكره اسرائييل التي ضربتنا في سنه 67 ، ولما سمعت اغاني عبد الحليم حافظ اللي منعها السادات تتذاع في الراديو صوره صوره صوره ، سمعتها بتتذاع من مقر حزب التجمع في سليمان باشا يوم عيد الثوره سنه 1979 ، دورت علي المكان اللي بتتذاع منه الاغاني وطلعت السلم ودخلت لقيت احتفال بالثوره قعدت وصقفت وعيطت لان عبد الناصر مات واسرائيل احتلت سينا ولان اغاني الثوره اللي كنا بنرقص عليها في المدرسه ماعندناش بنسمعها ولان السادات زار القدس وارتكب الجريمه الكبري ولاننا مش حنرمي اسرائيل في البحر ، انه خليط وجداني عاطفي رهيب قادني لسكه حزب التجمع واليسار ...

اختياري لحزب التجمع لم يكن موقف سياسي ولم يكن موقف ثقافي ، لم يكن اختيار ايدلوجي ، كان حبا للوطن بطريقتي الطفوليه الساذجه ، حنين للماضي الذي كنت احبه والوطن الذي كنت احبه بالطريقه التي كانت !!! اعترف اني لم اقرأ في السياسه قبل دخول حزب التجمع ولم انشغل بعد دخوله بالقراءه السياسيه ، لم اقرأ في الماركسيه رغم ان كثيرين اعتبروني ماركسيه بما اني عضوه في حزب التجمع ولست ناصريه ، لكني لم اكن ماركسيه ولا ناصريه ، كنت مصريه احب الوطن ببراءه الشباب وحنين الماضي والقلب الاخضر والتمرد علي السلوكيات الطبقيه الاقطاعيه الظالمه التي يمارسها بعض ابناء عائلتي الاقطاعية !!!

لما دخلت التجمع ، لقيت ناس حلوه ، يعني ايه حلوه ، مش عارفه ، وانا بأرد بعقليه بنت عندها عشرين سنه ، لقيت ناس حلوه ، جدعه ، بتحب مصر ، بتتكلم كلام كله حماس ، لما تسمع اي حد فيهم تصقف قوي قوي من قلبك ، الكلام يعجبك ياثر فيك ، و......... بقيت يساريه ، هكذا وصفت في ايام الجامعه ، وبصراحه اللي كان بيقول علي كده كان عنده حق ، ماانا عضوه في حزب التجمع ومش ناصريه وضد السادات حابقي ايه يعني !!!

طبعا يساريه لكني انا شخصيا لم اسال نفسي ابدا انا ايه ، هل انا فعلا يساريه ؟؟؟!!!! المهم ، فضلت عضوه في حزب التجمع سنين ، عملت حاجات كتيره ، اشتغلت في فرقه مسرح الشارع ، فريق مسرح من الشباب المتطوعين يعملوا مسرحيات ويلفوا بيها علي اعضاء الحزب في المقرات المختلفه مش بس مقر وسط البلد ، طبعا قصه فريق المسرح دي قصه جميله قوي ، لانها مساحات حريه للشباب بنات وولاد ، نمثل سوا ونتأخر ونتفسح سوا ونضحك مانبطلش ضحك ، عمري ماسالت نفسي اشمعني يعني اتجمعنا في حزب التجمع ، مااحنا كان ممكن نعمل فرقه مسرح في اي حته تانيه ، لكن الشباب ربنا خلقه مايسالش نفسه علي حاجه ، لما يكبر بقي ومايبقاش شباب ، يقعد يفكر ، يلاقي اسئله كان مفروض يجاوب عليها وهو صغير ، يلاقيها لسه مستنياه وماجاوبش عليها ..... في التجمع اتعلمت حاجات كتيره واستفدت جدا واكتسبت خبرات مفيده ، حلوها ومرها ، اشتركت في اصدار نشره صحفيه ، كان اسمها التقدم ، كانت جميله ولها مضمون هادف ، حضرت مؤتمرات سياسيه كتيره قوي ، كلماتها مليانه حماس ، خطب مليانه حماس ، بيقولها ناس قدموا تضحيات عظيمه في حياتهم اتحسبوا واتسجنوا يبقي اكيد كلامهم الحماسي الجميل ده كله صح ، ولما اتخرجت من الكليه وبقيت محاميه اشتغلت في لجنه الدفاع عن الحريات احضر تحقيقات النيابه مع المحابيس وازورهم في السجن وازور اهلهم واهزر مع اطفالهم واحبهم ، واشتم في البوليس واشتم في الحكومه المجرمه اللي بتحبس الناس الشرفاء ....

تجربه اعتز بيها ، لكن بجد بجد معرفتش ابتدت ليه ولا انتهت ازاي ، ابتدت لما كنت متحمسه ومصدقه جدا وانتهت لما فقدت حماسي ، مش حاقول بطلت اصدق ، لكن حاقول بطلت اصدق اني شخصيا حاقدر اعمل حاجه مفيده للبلد من خلال الحزب ، مش فكره اني احضر اجتماعات الحزب واسمع خطب واحضر مؤتمرات واشتم البوليس والحكومه ، لا فكره حاعمل ايه للبلد !!!
لقيت روحي مش بعمل حاجه للبلد اللي دخلت الحزب اساسا علشان باحبها ، لقيت ان اجتماعاتي جوه الحزب والتمثيل في فرقه المسرح والمؤتمرات اللي بحضرها واصقف فيها بحماس جدا جدا جدا ، مش معناه اني باعمل حاجه للبلد !!! فيه حاجه مهمه جدا ، ان حزب التجمع كان علي صدام مع السادات من اول لحظه ، الصدام ده بيخلق حاله تحدي رهيبه ، يعني الناس يتقبض عليها وتطلع وتدفع التمن وتضحي ومقرات الحزب تتقفل وجرنانه يتصادر وبعدين يتوقف والنشره اللي بنعملها تتصادر ، اجواء نضاليه عظيمه تخلي الواحد يفضل متحمس ويفضل عضو بالحزب ، لكن ليه وعلشان ايه ، مش مهم ، لان السؤال نفسه في الاوقات العصيبه تخاذل وتراجع وخيانه ، السادات بييضرب الحزب مش معقول نقف ونفكر احنا هنا ليه !!!!

وهكذا جريت الايام وعدت السنين !!! قابلت ناس كتير كويسه قوي ، قابلت ناس وحشه ، وحشه بالمعني الطفولي كذابه منافقه تصرفاتها غير كلامها ، قابلت شباب كويسين وشباب حقيره ، قابلت ناس عواجيز محترمه جدا وناس اي كلام ، عادي يعني زي اي حاجه !!! وفجأ !!!! خلاص مش عايزه افضل في الحزب !!! لو علي لجنه الدفاع عن الحريات ااقدر اقوم بالعمل ده من داخل نقابه المحامين ومن خلال اني محاميه !!! نشره التقدم خلاص بطلت اشارك في اصدارها ، فريق المسرح خلاص مابقيت عضوه فيه ، بحب مصر ولسه بحبها لكن مش عارفه ليه انا موجوده وليه دخلت اساسا وليه افضل عضوه في الحزب !!! ،
هل من حق الانسان يعيد التفكير في اختياراته ، لكن في نفس الوقت مايبقاش وحش !!! كنت باحلم بمصر تانيه ، هل مصر الناصريه ؟؟ لا مش بالضبط ، يمكن الناصريه كان فيها مشاكل مع الديقراطية ، الناس اتحبست واتعتقلت ، الحياه السياسيه اتأممت ، هل ده كان كويس ، كان وحش ، معرفش ، حقيقي معرفش ، كان فيه تعذيب في السجون والمعتقلات ، اه ده عارفه انه وحش وغلط ، لكن ايه موضوع الديمقراطيه ده ، وهل ديمقراطيه يعني انتخابات واحزاب ، ولا اللي كانوا بيقولوا عليها ديمقراطيه اجتماعيه واخواتي تلبس وتاكل والمجتمع كله يتقدم ونحتفل بعيد العلم وعيد الثوره وصلاح جاهين يقول شعر وعبد الحليم يغني !!!
طيب لما دخلت التجمع يمكن كنت فاكره ان الاحلام بتحقق بسرعه وبالنوايا الحسنه وبالحماس ، لكن الواقع وتجاربه كشف لي عن هبل التفكير بالطريقه دي ، كنت فاهمه ان شويه حماس يغيروا الدنيا ، ومعاهم شويه اخلاص يبقي خلاص ، وسع ياجدع قطر الثوره ماشي ماشي ، جاي جاي !!! لكن الواقع كان بيقول حاجه تانيه ، اولا هل الناس كانت عايزه قطر الثوره يرجع !!! الثوره ماكانتش حفلات عيد الثوره والاغاني ، الثوره كانت ارض اتاخدت من الملاك وشركات اتممت ومجتمع مقفول بيبني نفسه لكن رابط الحزام علي وسطه ، هل كان المجتمع كله رابط الحزام علي وسطه ولا فيه ناس رابطه الحزام علي جنبها وهاتك يارقص واستمتاع بالثوره وكنوز الثوره ، قضايا عمري مافكرت فيها ، ولاحد قالي افكر فيها ازاي ، كنت بحب البلد وعايزه اعمل حاجه مفيده ليها ، كنت باحب بابا جمال ، اه زعلانه انه مش ديمقراطي لكن مش زعلانه اوي لان كان فيه حاجات تانيه باحبها خلتني اطنش !!!
هل من حق الناس تعيد التفكير في اختياراها في ضوء تجارب واقعيه عاشتها ومرت بيها ، كشفت لها عن حاجات كتيره ماكانتش فاهماها ولا مقدراها ، طبعا من حقها ، ومش من حق حد يقول انت غلط وانت صح ، الكلام اللي علي البر دايما سهل ، انا اللي مريت بالتجارب ، انا اللي اتصدمت ، انا اللي اتوجعت في قلبي واحساسي وقناعاتي ، انها اللي اتهزمت ، لما اتحمست جدا والناس غلطتني ولما فقد حماسي والناس غلطتني !!!!
عادي الحياه هي اساسا التجارب ، لما خرجت من حزب التجمع ، فضلت احب الحزب واحب الناس اللي فيه ، اه اختلف معاهم في افكارهم في اطروحاتهم في مواقفهم لكن باحترمهم ، علي الاقل هما عارفين عايزين ايه وشايفين يوصلوا له ازاي ، هما لسه مصدقين ، هما لسه متحمسين !!!!!
طبعا اثناء وجودي في حزب التجمع واجواء اليسار دخلت في ازمات من وجه نظري كانت غير منطقيه ومازالت غير منطقيه ، اسمع همز ولمز جوه الجامعه وجوه الحزب وبعد كده جوه النقابه وفي اجواء اليسار ، دي مش يساريه بجد دي برجوازيه ، ليه ياعم الحاج ، ده انا يساريه خالص والله العظيم ، لا ، لا ليه ، لاني يساريه فهذا يفترض طبقا لنمط التفكير السائد ، يفترض اني ابقي واحده مش شيك ، الله انتم مش بتقولوا انكم بتدافعوا عن الشعب الكادح الغلبان ، بتلبسي شيك ليه ، كان الشعب واللي يفكر في الشعب لازم كله ييكون غلبان ومايبلسش شيك !!!

الحقيقه الموضوع ده اثر في جدا ، كنت عايزه ابقي يساريه خالص ، وبالتالي قررت ماالبسش شيك ، البس عادي ملخبط اي كلام ، لان الشياكه صفه برجوازيه وانا يساريه او هما بيقولوا كده !!! لكن انا بحب الشياكه وبحب اللبس الشيك وتناسق الالوان ، مش مهم انا بحب ايه ، ده موضوع ثانوي تافهه !!! لاني يساريه مفروض مايبقاش عندي طموح في حياتي ، طموحي مفترض كله يكون سياسي ، للوطن والحزب ، لكن انا عندي طموح شخصي عايزه انجح في شغلي عايزه البس كويس عايزه اعيش كويس ، انا يساريه - زي مابيقولوا - لاني عايزه الناس كلها تعيش كويس مش لاني عايزه انا اعيش وحش !!!! علي فكره ماكنش حد بيقول الكلام ده بشكل مباشر ، لا ابدا ، لكن دي كانت افكار سائده شارده ، تتردد وتتناقل علي السنه الناس ، فجأ تحس بلوم وادانه ليساريه لابسه شيك وبتستفز الشعب وانا محتاسه مش فاهمه طيب اعمل ايه علشان ارضي الشعب رغم ان الشعب عمره شخصيا مااشتكي لي انه مستفز مني ...

وربنا يرزقك بزميل في الحزب ولا زميل في الجامعه يساري خالص جدا موت ، يتريق علي لاني عضوه في نادي الصيد ، وياعيني علي الشعب واللي بيدافعوا عن الشعب ، الله ماهو نادي الصيد ده انا عضوه فيه من وانا عيله صغيره ، اه لكن ده مكان البرجوازيين ، ماهو ابويا وعيلتي كده لكن انا مش كده ، اعمل ايه يعني الغي العضويه امشي من النادي ، محدش يرد علي ولا عنده اجابه ، لكن اخييه ياللي عضوه في نادي الصيد ، ولان الواحد شاب وصغير وعبيط يخبي انه عضو في نادي الصيد ومايروحوش او لو راحه مايقولش لحد انه راحه ، فلما اتقفش في نادي الصيد تبقي فضيحه !!!! ههههههههههههههههههه عبط جدا والله !!!!

طبعا كمان تعرضت من وجه نظري لتجارب موجعه في العمل السياسي ، لكني لن اسردها ولن احكيها ، فهي تجارب خاصه لايهم احد اجترار احزانها ، ربما اتصدمت في الناس ، ربما اتصدمت في فكره اتساق الناس كلامها مع سلوكها ، ربما اتصدمت لما واجهت انقسامات وخلافات عميقه بين الزملاء داخل الحزب وفوجئت بيهم بيواجهوا بعض بقسوه وضرواه فظيعه وكنت اظنهم ملائكه ابطال تاريخيين لااطماع شخصيه ولا مجد زائف ولا مراكز يسعوا لها لكني فوجئت بضرواه الخلاف وحدته بشكل فظيع كنت لااعرف وقتها ان السياسيين مثل كل البشر فيها عيوب ووميزات ، بشر وليسوا ملائكه ، لكني حتي اكتشفت هذا الاكتشاف الخزعبلي كنت اتعورت كتير ، في قلبي في قناعاتي في احاسيسي !!! ربما اتصدمت من اكتشافي المتأخر لحقيقه العمل المطلوب منا كاعضاء حزب معارض بمقارنه جهدنا المتواضع مع حقيقه الواقع وضراوته وقسوته ، فالامنيات لاتكفي لتغيير نظم الحكم الذي تحميه الدوله بكل اجهزتها ، لكنا وقتها كنا لانملك الا الامنيات مع الاخلاص والحماس واندفاع الشباب ، ربما اتصدمت من حجم الهزائم الواقعيه التي منيت بها داخل الحزب وخارجه في معارك كنت اتصور اني والحزب سنكسبها بالضروره ، السنا متحمسين مخلصين محبين للوطن لماذا لم نكسب تلك المعارك ، لماذا خذلتنا الناس لماذا تخلت عنا ونحن نحبها لماذا لم تصدقنا وتؤمن بنا كما كنا نؤمن بها ونعمل لصالحها !!!

صدمني الواقع وقت اكتشفت قسوته بالمقارنه بالاحلام الورديه الحالمه التي كنت اعيش فيها .................... وزي مادخلت من غير مبررات منطقيه عظيمه خرجت من الحزب من غير مبررات منطقيه عظيمه !!!!
ببساطه وهدوء ، دخلت الحزب شابه متحمسه وخرجت احمل اسم محاميه يساريه ، وهو اسم لم يضايقني ولم يزعجني لكن انا فسرته علي مقاسي انا ، يساريه يعني بتحب الشعب والوطن ، ده مفهومي لليساريه اللي انا جزء منها وبس خلاص !!!
لكن لما خرجت من حزب التجمع فضلت محاميه يساريه ، كل قضيه عامه ، سياسيه ، تنظيمات توزيع منشورات اضراب عمالي اعتقال متظاهرين في معرض الكتاب في المعرض الصناعي توزيع ملصقات ضد اسرائيل ، كل قضيه عامه احضر فيها ، اترافع واشتغل كمحاميه مش كمناضله يساريه ، لا في المحاماه قررت اكون محاميه شاطره بصرف النظر عن اني يساريه ولا مش يساريه !!! لكن لما حد يتقبض علي ، اجري جري احضر معاه التحقيقات والمحاكمه ، عدا طبعا قضايا التنظيمات الدينيه ، ومفهوم طبعا ليه ماكنتش باحضر معاهم اولا لاني ست ومش محجبه ولان كل محاميهم رجاله ولاني كمان ماكنتش متعاطفه معاهم ولا موافقه علي افكارهم وهما الحقيقه برضه ماكانوش بيرحبوا بي وسطيهم !!! خلاص خلصنا !!!!

خرجت من حزب التجمع !!! لكن فضلت مصنفه باعتباري يساريه ومحاميه يساريه !!! وانا مازعلتش زي ما قلت من التصنيف ده !!! باعبتاري حددت له معني محدد معني وماليش دعوه الناس بتشوف الامر ازاي !!! عشت سنين حياتي ، زوجه وام ومحاميه "يساريه " وبعدين ابتديت اهتم بقضايا المراه واكتب في الموضوع واذاكر وادرس واسافر مؤتمرات واضفر ده مع شغلي المهني ، يعني ناشطه في مجال المرأه باكتب واعمل دراسات وفي المحاماه باترافع عن الستات في قضايا الاحوال الشخصيه مع بقيه انواع القضايا ، قضايا سياسيه كنوع من العمل التطوعي وقضايا مهنيه مختلفه ...... وعملت مكتب مهني بذلت فيه جهد كبير ونجح وكبر ونجحت وكبرت انا وفريق من المحامين اللي اعتبرهم كلهم اخواتي وولادي واصحابي ، وتجربه مكتبي دي قصه اخري ، المهم نجحت كمحاميه وشغلي كبر وحققت نجاح معنوي ومادي وطبعا ده انعكس علي حياتي!!! وهنا كانت المصيبه السودا !!!!!!!!!!!!!
لا قبل المصيبه السودا ، عايزه اقول حاجه ، لما خرجت من حزب التجمع ، قعدت ادور علي حاجه مفيده اعملها للبلد ، اه للبلد ، ماهو باين انا من نوع البشر اللي ماينفعش يعيش لنفسه وبس ، لازم حاجه جنب نفسي ، يمكن ده بيدي حياتي معني ، بيديها قيمه ، اعمل ايه للبلد ، اشتغلت في حركه حقوق الانسان وكانت تجربه لمده 8 سنين محتاجه نوت تانيه ، حاولت علي قد ماحاولت وبذلت مجهود ولما لقيت روحي عندي اشكاليه منهجيه في التعامل مع فكره حقوق الانسان نفسها ، روحت ، ماقلتش انتم غلط وانا صح ، ولا انا صح وانتم غلط ، لا روحت وبس !!! انا كده لما الاقي الدنيا مابقيتش بتاعتي اروح !!!! وبس خلاص !!!
بعدها قررت اشتغلت في موضوع النساء وحقوق النساء والتمييز ضد النساء ، الاول اشتغلت مع نفسي وبعدين حاولت ابقي مع بقيه الناس ، وبعدين اكتشفت بسهوله وبساطه اني ماينفعش اكون مع حد ، مش حاقول مش عاجبني مش حاقول اللي بيعملوه مش بيعجبني ، لا حاقول انا حاجه وهما حاجه ، مين احسن مين اوحش مش موضوعنا ويمكن انا اوحش لكن برضه مش موضوعنا !!!
في الاخر قررت اعمل كل اللي باعمله من بيتنا ، يعني افضل يساريه من بيتنا ، واشتغل في موضوع المرأه من بيتنا واهتم بقضايا حقوق الانسان - حسب وجهه نظري في الموضوع - من بيتنا ، لكن انا موجوده وصديقه الكل ومستعده اخدم لما يكون اللي حاعمله مفيد وكويس ، لكن مش مفيد من وجه نظري يبقي خلاص !!! ماهو طبعا الاساس هي وجهه نظري مش اي وجه نظر تانيه !!!

نرجع بقي لموضوع المصيبه السودا وشغل المكتب والفلوس !!! لما كسبت فلوس من شغلي ، كانت مصيبه سوده في اوساط معينه ليه ، لاني مش بس خرجت من حزب التجمع !!! ومانيش يساريه بجد لاني ست اليطه ومتأنتكته وبالبس زي البرجوازيين مابيبلسوا وعضوه في نادي الصيد ، لا كمان بقيت محاميه باكسب فلوس !!! علي فكره دي مش فلوس وسط الفلوس ، دول تلات تعريفه يستروا ويعلموا العيال ويعملوا منظر اجتماعي مقبول ، لكن شويه الفلوس دول اكدوا اني لم اكن يساريه اساسا !!! فطموحي البرجوازي ابن اللذين لم يتركني وقت دخلت الحزب وهو السبب في الخروج من الحزب وهو السبب في اختياراتي لشكل شغلي في المحاماه لم اعد اهتم بالقضايا العماليه وقضايا الفقراء بل بقيت اترافع في قضايا شركات ورجال اعمال واكسب فلوس وغيرت العربيه ونجدت الصالون واشتريت تلفزيون ملون 32 بوصه وبقي عندي طموح اركب عربيه اخر موديل وياسلام لو بي ام دبليو !!!! ياالعار !!!!

طيب ممكن ادافع عن نفسي ، ايوه عندي طموح مهني ، ايوه نفسي اركب عربيه اخر موديل ، لكن مش معني كده اني بقيت وحشه!!! ولا بقيت حكوميه !!! ولا بقيت مش بحب البلد !!!! ومازالت مؤمنه بالعداله الاجتماعيه والانحياز للفقراء ونفسي مصر تبقي احسن ومازلت اترافع في القضايا السياسيه العامه ومؤمنه بحقوق الانسان وحقوق المرأه .......... دفاع مرفوض ومش مقبول وانت اتغيرت !!! اخيه !! اللي بيشتموني ويقولوا لي اتغيرت اخيه اعيه ، كانوا عايزين مني ايه ، وهما شخصيا عملوا ايه !!!!

صديق لي سافر اول مااتخرجنا لفرنسا يعمل دكتوراه هناك وقعد 25 سنه ورجع من هناك علشان بيحب البلد !!! انا لما سافر ماعاتبوش وقلت له انت بتتخلي عن البلد في وقت هي محتاجه فيه كل ابناءها المخلصين !!! لما خد الدكتوراه من السربون ماقلتش له انت كنت في السربون وانا باقف علي باب سجن طره علشان ازور المعتقلين !!! لما عاش 25 في فرنسا ما قلتش له انت كنت في فرنسا وقت ماكنت انا ساكنه في فيصل لما كانت بوص وترعه ولسه الطريق مااتعملش !! لما رجع معاه دال نقطه واصبح بيقدم نفسه للمجتمع باعتبار الدكتور اللي واخد دكتوراه من فرنسا ويرفع اتعاب شغله عن اتعاب شغلي انا المحاميه الغلبانه اللي ممعايش لا دال نقطه ولا دكتوراه من السربون ولا باتكلم فرنساوي لبلب ، وقتها ماقلتش له انت برجوازي !! واقول ليه انا مش زعلانه منه !!!

فجأ صديقي ال ايه البلد خنقته والفساد ومافيش ديمقراطيه ، فجا صديقي بعد مارجع من فرنسا نفسه البلد تتغير ، طيب يادكتور ماتخش اي حزب ، لا كلهم مالهمش مصداقيه ، طيب اعمل حزب ، لا ، طيب خلاص ، لا خلاص ازاي ، لازم نقعد نشتم في البلد طول مااحنا قاعدين ، نشتم في الفساد والانحدار والانهيار ، نشتم في الناس الجهله السلبيين ، نشتم في الحكومه سبب كل المصايب ، نشتم في الاخرين ، لما قلت بطل تشتم كل الناس ، بص لي نظره ناريه رهيبه وقالي انت اتغيرت خاااااااااااااااالص وفقدتي حماسي وغيرتي موقعك !!!!!!!!!!!!!
ولما قابل صديق مشترك ، نزل شتيمه في ، انا اللي اتخليت عن مباديء وغيرت افكاري وراكبه عربيه اخر موديل ومعنتش باهاجم الحكومه !!! لما صديقي قالي كلميه وهديه ، قلت لا لا حاكلمه ولا هاديه ، لاني لو اتكلمت معاه حاردح له ، حاقوله تعالي بقي انت عايز مني ايه وانت بتعمل ايه ، واشغل الردح ، ولاني بحبه ولسه باقيه عليه مش حاقوله حاجه خالص وبس خلاص !!!!! واحد صديقي مالوش دعوه بالسياسه خالص ، او كان له فيها شويه وبطل وسافر ورجع وسافر ورجع وعمل فلوس ومركز وظيفي عالي جدا ، شافني قريب ، قالي الله ده اللي سمعته طلع صحيح وانت اتغيرت خالص ، وطبعا وراها تؤتؤتؤتؤ ، وابتدي يشرح لي ازاي اني اتخليت عن القضيه اللي كانت قضيتي واني مش مستعده للتضحيه وغيرت موقعي ومش عارف ايه ............ معرفش ليه مارديتش عليه وقلت له وانت عملت ايه او بتعمل ايه !!! معرفش ليه ماقلتش له ، معرفش ليه ماقلتش له زعلان من عربيتي ليه وانت راكب عربيتها تمنها تلت مرات ، لكن انت حلال لك لانك سافرت واتغربت وحوشت ، لكن الناس اللي كانوا مناضلين مفترض نفضل مناضلين ومضحيين وجرابيع وصعاليك واي حاجه غير كده نبقي انحرفنا وبعنا القضيه واتغيرنا خالص تؤتؤتؤ !!!!

ساعات برضه الواحد يتعكبل في حد مليان حماس وغالبا بيكون شاب ، يتكلم بحماس واندفاع وجراءه وتمرد !!! والله يرحم ايام الشباب ، طبعا اسمعه بهدوء واحاول مااخش معاه في صدام ، لان افكاره بريئه ساذجه حالمه ، لكن ساعات مايبقاش قدامي حل اخش معاه سجال ، وقتها يبص لي بصه عميقه معناها ، طبيعي تقولي اللي بتقوليه ماانت اتغيرت !!!!!!!! وطبعا وراها تؤتؤتؤ !!!

اصدقائي اللي من سني واكبر شويه واصغر شويه ، شايفين كل اللي شفته واكتر ، لكن مقررين مايشوفوش ، مقررين يكتئبوا وبس ، والاكتئاب رمز الثبات علي المواقف الثوريه السياسيه العظيمه ، انا مكتئب لان الحياه زفت والسياسه زفت وكل حاله زباله ، طيب انا بقي مش متنيله مكتئبه ، يانهار اسود ، مش مكتئبه ، الله معندكيش دم ماانتيش حاسه بالمصيبه اللي البلد والمعارضه والسياسه فيها ، انت مش مكتبئه ، لا ، طبعا ماانت اتغيرتي خلاص ، وبعدها طبعا تؤتؤتؤ الاستنكاريه !!!!

طيب ياجماعه .... ياللي زعلانين اني اتغيرت ، تؤتؤتؤتؤتؤتؤ ، كنتم عايزين مني ايه ؟؟؟؟ كنتم عايزيني ابقي ايه !!! اعمل ايه !!! افضل جوه حزب التجمع وكده ابقي مااتغيرتش ، مااركبش عربيه اخر موديل لاني كنت بقيت برجوازيه ، اشتغل في مكتبي بس قضايا العمال والفلاحين ببلاش اما القضايا التانيه لا ، والا يبقي ده دليل علي اني اتغيرت ، تؤتؤتؤتؤتؤتؤتؤتؤ !!!!

للاسف انا فعلا اتغيرت !!!
كبرت وعديت الخمسين وفقدت حماس الشباب واندفاعهم وهوسهم وحمقهم وقله خبراتهم !!!
كبرت ومريت بتجارب موجعه وسيئه ومهزومه علمتني ان الحياه ليست احلام والسياسه ليست هوايه وعواطف وان التغيير يحتاج تضحيات كثيره جدا وليس كلام اجوف وهيصه !!!
كبرت واشتغلت كتير وربنا وفقني في شغلي وقدرت استر نفسي وعيالي واعيش عيشه لائقه معقوله او اكتر من المعقوله شويه !!!
لكني مازلت احب البلد وشعبها واتمني غد افضل ... واحاول بكل الجهد في العمل ومجال حقوق الانسان والمرأه والكتابه والتاثير الشخصي ان اكون انسان له قيمه ومعني ودور متواضع!!!
اذا كان هذا التغيير كريه وذنب وجريمه فانا معترفه بذنبي وجريمتي !!!
اذا كان هذا التغيير يغضبكم لاني تخاذلتم لماذا لا تخرجوا السيوف من اجربتها وتهرلوا لساحات المعارك!!!
اذا كان عدم اكتئابي يغضبكم فيؤسفني لااملك لكم شيئا ، اعيش حياتي رغم كل صعوباتها ومشاكلها والهم العام اعيشها سعيده راضيه ابذل كل مااقوي عليه من جهد بكافه الاشكال وفي كل المساحات الممكنه !!!
نعم تغيرت !!! لكن بدون تؤتؤتؤتؤتؤتؤتؤ !!!!!!!!!!
وعلي راي عبد الحليم حافظ
وختاما لك الف سلام ومحبه وشوق وغرام !!!!!
كلامي خلص !!!! لا لسه .... كنت اتمني الدنيا تكون غير الدنيا والواحد يفضل متحمس زي ماكان شاب ومصدق زي ماكان شاب والاحلام تبقي قريبه واخواتي تلبس وتاكل ومصر تبقي اعظم البلاد نهضه وحضاره وثقافه ودور اقليمي وعداله اجتماعيه وكنت مستعده - ومازالت - ااقدم اي حاجه توصلنا لده ، لكن مش ذنبي ان الاحلام بعيده وايدينا قصيره !!!!
انا اتغيرت اه ، مابقيتش صغيره ، لكن لسه متحمسه للحياه وباحبها ومتحمسه للبلد وباحبها ونفسي اعمل حاجه مفيده ومقدرش اعيش لنفسي بس لان مااستحق ان يولد من عاش لنفسه فقط !!! لكن باعيش علي قدر دماغي ماتوديني مش علي قد دماغ ناس تانيه ماتفكر وتقول !!!
علي فكره حاجات كتيره اتغيرت في لكن لسه متمرده وجدا جدا كمان !!!!!!!
وتاني علي راي عبد الحليم حافظ
ختاما لك الف سلام ومحبه واشواق وغرام !!!!!