02 مايو 2010

من كتر الانبساط !!!!!



انا زهقت .....
ارهقت ......... اتخنقت ...........
لغايه امتي حافضل عامله ميتين خمسميت راجل في بعض ، لغايه امتي كل اللي مش لاقي حيطه يسند عليها يسند علي ، لغايه امتي اللي نفسه يدي حد بالبوكس يقول ماهي قويه وتستحمل وبدل البوكس اتنين ، لغايه امتي اللي ايده بتاكله عايز يرزع حد قلم مايلاقيش احسن من وشي او قفايا ، ايه النظام يعني !!!
ايه النظام !!! ليه لما الواحد يبقي محترم تبقي الناس حقرا ، ايه القانون ده ، ايه القانون بتاع تبقي سافل تبقي الناس كويسه ، تبقي كويسه تبقي الناس حقرا !!! قانون ايه المنحط ده ، طيب حاستهبل واعملي نفسي مش شايفه لغايه امتي ، لغايه لما يحصل ايه ، افوت افوت واستهبل واقول مابيحصلش مش شايفه مش واخده بالي ، خلاص اتقرفت بقي !!!
بصراحه بقي شايفه وواخده بالي وباطنش لكن حتي الطناش زهقت منه !!!

زهقت ارهقت اتخنقت ، تعبت بجد ، كنت بحلم ميت حلم تاني ، كنت باحلم اعيش في سلام ، لاحاجه تضايقني ولااضايق حد ، باحلم العب ربات بيوت ، اعمل كيكه وافصل فساتين العيال وابقي زوجه طوع ومطيعه ، لا كنت باحلم اتخانق ولا اثبت ذاتي ولا احقق نفسي ولا اي حاجه مني ، كنت باحلم اعيش حياه بسيطه ، لكن الحياه مااديتنيش فرصه احقق احلامي ولااعيشها ، الحياه فرضت علي القتال ، يااااااااااااه من زمان قوي قوي فرضت علي القتال ، علي كل مستوي ، علي كل جهه ، طيب خلاص بقي ، حنحارب ، طيب حاحارب وانا مبسوطه ، مش حازعل ، مش حاضايق نفسي ، حاحارب وانا مبتسمه ،وفعلا ، كل هبده وهبده علي راسي ، ااقاوح واقوم ، اعمل مش واخده بالي ، اعمل اني مااتوجعتش قوي ، اعمل اني مافيش في حاجه اتكسرت ، اعمل ابو علي ، ولايهمني ، ااقول كده ولايهمني ، ااقول كده وكده انه ولا يهمني ، لكن خلاص تعبت وارهقت وزهقت ، تعبت وعايزه حد يحتوي تعبي ارهاقي يعرف يطبطب علي روحي يفك الخنقه اللي انا فيها ، هي ايه النظريه يعني تبقي جدع تاخد بالجزمه ، هي دي النظريه ، كل ماتبقي جدع تاخد بالجزمه اكتر ، والناس الحقيره الوسخه الندله الانانيه عايشه ومتهنيه ولا زهقانه ولا مخنوقه ولا بتحس اساسا ، تعبت والله جدا !!!

تعبت يادنيا تعبت ، ايه مش حقي اتعب ، تعبت ، متضايقه ، حمولي زادت علي كتافي ، ماشيه علي الحبل باتمرجح ، علي طول حاسه اني حاقع وفي الفراغ لوحدي لاحضن حيتسلقاني ولا ايد تسندني ولا دراع اركن عليه ، ليه انا حاسه كده ، ليه انا حصل في كده ، ليه ماعشتش حياه بسيطه عبيطه من غير حروب ولا مشاكل ، اعمل كيك وافصل فساتين العيال واسمسر من مصروف البيت واتنيل علي عيني واسكت!!

يادنيا والله انا مش حيطه ، مش جبل ، مش صخر ، انا انسانه وغلبانه قوي ، وبحس قوي وبازعل قوي وباخد علي خاطري وباتعشم ويتكسر عشمي طول الوقت ، واعمل عبيطه واني مش واخده بالي ، اعمل اني مش زعلانه ، ااقاوح ، لكن خلاص ساعات باتعب بازهق ، بيصعب علي روحي ، بارهق من المقاوحه ، باحس اني عيله صغيره عايزه حضن امي تطبطب علي ، عايزه حد يشوفني ، مش يطلب مني اشوفه ، عايز حد ياخد باله اني موجوده مش علشان يسند علي ولا يحتمي بي ولا يركن علي ولا يتتاقل ، تعبت والله بجد خالص !!!
وبعدين ، اخر المقاوحه دي ايه ، حابقي اجمد ، ولما ابقي اجمد حيحصل ايه يعني ، حاخد نيشان القوه ، حاخد قلاده الاستحمال ، طيب وكل السنين اللي عدت وانا مقهوره زعلانه متضايقه مين حيردها لي ولا يصالحني عليها ! اخرت المقاوحه دي ايه ؟؟؟ حيشارورا علي ويقولوا الست المقاوحه اهي ، وايه يعني لما يقولوا كده ، حيحصل ايه ، الدنيا حتبطل ترهقني حتبطل تفرهدني ؟؟؟ ولا حيحصل حاجه ابدا ، طظ ، لا ستين طظ كمان في المقاوحه وام المقاوحه !!!
محدش يقولي اجمدي واتنيلي علي عينك ، اصلي جمدت قوي كتير من زمان قوي لما فردهت ، محدش يقولي ماانت ربنا مديكي حاجات كتيره ، لاني عارفه انه اداني حاجات كتيره وباشكره عليها طول الوقت ومقدره قيمتها ، لكن رغم كل ده ، انا وحيده جدا ومرهقه جدا ومخنوقه جدا ، ايوه ربنا اداني حاجات كتيره لكن خلاني جدعه ، والجدعنه دي معناها اني هبله ، الناس بتشوف الجدع المحترم اهبل ، اهبل نضحك عليه ونخمه ونستهبل علي قفاه ، الجدع ده من وجه نظر الناس هو الحيطه المايله ، هو اللي ناكل عيش ونابت علي قفاه ويمكن عيش ومارون جلاسيه ، ماهو مش حيعمل حاجه ، ماهو اهبل ، قصدهم يعني جدع !!!!
طيب ايه اللي حصل ، المصيبه ان محصلش حاجه ، يمكن نقطه ميه صغيره قوي وقعت فوق فنطاس كبير مليان خلاص فاض واتدلدق ، مافيش حاجه حصلت تستاهل الحاله دي ولاحتي ربع ربعها ، حوادث عبيطه في الحياه ، مين اتاخر مين استهبل مين تصور روحه ذكي وقرر يضحك علي ، يمكن حد في الشغل يمكن الشغالين يمكن حد في الشارع كاسر علي وانا سايقه في حالي وكافيه خيري شري ، يمكن حد عمل حاجه متعود يعملها كل يوم ، لكن انا بقي اللي مش انا ، انا مش الصوره اللي بابين نفسي للدنيا بيها ، انا الحد الغلبان الضعيف المستخبي في الضلمه مش عايز حد ينكش له شعره ويضايقه ، مش عايز حد يضايقه ، لانه متضايق خلقه ومستهبل ، مش عايز حد يتاقل عليه لانه خلاص تعب من كتر التقل ومش مستحمل ، يمكن حد رمي النقطه الاخيره فوق الفنطاس ، هي نقطه تافهه عبيطه ولا تستحق ، لكن فجرت جوايا كل الارهاق والغضب والزهق والتعب !!!!
المصيبه اني عارفه ان مافيش قدامي حلول ، لاحابقي ندله ولا حابقي حقيره ولا حابقي انانيه ، ولاحاعرف استغل الناس ولا اضحك عليهم ، المصيبه اني عارفه اني مافيش قدامي حلول ، حافضل متنيله علي عيني وجدعه ومحترمه ، مش حاعرف اتاخر علي الناس ولا اديهم ضهري ، مش حاعرف حتي اشحت منهم الاهتمام ولا اتمسكن عليهم ولا ااقول ده انا غلبانه ومسكينه ، محدش حيصدقني ، تاريخي حيكذبني سلوكي حيكذبني تصرفاتي اللي معرفش اغيرها حتكذبني صوتي العالي حيكذبني ملامح وشي بتاع الست القويه اللي بتطلع في التلفزيون ، كل ده حيكدبني ، محدش حيصدق اني غلبانه ، ويمكن كمان من ورا ضهري يقولوا الوليه اتهبلت ، ال غلبانه ال ، الناس حتقول ياحرام وبس خلاص ، وياحرام بمعني معلش اجمدي بطلي مياصه ، وحيقولوا ياحرام بصوت واطي قوي ، ليه لاني طبعا من وجه نظرهم مش شكل ياحرام ، انا شكل " ياماما " ، ولانهم عارفين اني حتي ياحرام دي مابحبش اسمعها ومش متعوده عليها وماتليقش علي وبتاعت ناسه تانيه غيري خالص !!! بس انا نفسي حد يحس بجد ويفهم بجد اني ياحرام !!!! يصدق اني ياحرام يشوفني بجد ويعرف اصعب عليه وانا بصوتي العالي وجعيري وثقتي بنفسي ، يعني مش لازم علشان ابقي ياحرام ، لازم ابقي فاتحه بقي وعبيطه وباتمرمغ في الارض ، لا ساعات حتي الناس الاقويا اللي الناس بتشوفهم اقويا بيبقوا ياحرام والله !!!!
عارفه اني مافيش قدامي حلول ، انا حاتنيل علي عيني وحافضل زي ماانا ، وحش حلو بقي مش مهم ، المهم اني حاتنيل علي عيني افضل زي ماانا ، طيب الامل في الناس بقي ، الناس تتغير تبقي لطيفه جدعه تبطل استهبال واستغلال ، طيب هي الناس ماينفعش تاخد وتدي ، بالعدل بالاحترام بالادب ، ماينفعش نبقي لطاف ، محترمين ، كل واحد عارف ايه اللي عليه وايه اللي ليه ، لاحد يستهبل علي حد ولا يستغله ، ماينفعش ،لازم نبقي في الحرب طول الوقت ، ماشينين نتلفت ورانا خايفن من القلم اللي حننسكعه علي قفانا ، لازم نبقي طول الوقت في الحرب ، خايفين من الكمائن المنصوبه ومن والكذابين اللي بيقولوا حاجه ويعملوا حاجه !!!!
واضح ان مافيش حاجه قدامي ، فطريقك ياولدي مسدود مسدود مسدود ، اللي حنبات فيه حنصحي فيه ، شقا في شقا ، ووقت الشقا مايخلص والراحه يحين ميعادها يكون خلاص الفيلم خلص !!!! مافيش حاجه قدامي، ارهق ازهق اتخنق براحتي !!! براحتي خالص افضل كده برضه براحتي ، اتمرد واقاوح ، برضه براحتي ، اهي حياتي وانا حره فيها اعيشها عدل ماشي اعيشها زفت برضه ماشي ، هي حياتي انا وبس خلاص ، واضح ان دي خطواتها ودروبها وطرقها وسككها ، مقفوله ومتنيله وكل حاجه تيجي بالصعب وكل راحه تجري وكل شقا يفضل ، وعلي راي فهد بلان مكتوب علينا قله الراحه ، واضح ان فيه ناس ربنا خلقهم كده ، يحلموا احلام عبيطه تتسرق منهم في السكه ويعيشوا ويموتوا في الحرب !!!
طيب ................ الناس حتفضل هي هي ، الحقرا حقرا ومرتاحين ، والجدعان المحترمين زيي وزي كل حبايبي مكتوب عليهم قله الراحه ، هي حياتهم كده صعبه ، صعبه ليه معرفش ، لكن دايما صعبه ، وهما براحتهم يمشوها وهي صعبه ، يكرهوها لكن يعيشوها وتفضل صعبه ، يفلفصوا يرفصوا يزعقوا يعيطيوا ، براحتهم لكن في الاخر ، لازم نغسل وشنا بميه ساقعه علشان نفوق ونقول ايه المياصه دي ايه الدلع ده ايه الضعف ده ، ده ماينفعش ، انا عتريس انا بلوة سودا انا مش قصير وقزعه انا طويل واهبل ، انا ماكانش لي احلام بسيطه انا قويه انا صنعت خصيصا للخدمه الشاقه !!!!
وهيه انا مش مكتبئه ولا حاجه !!!
انا مبسوطه خالص خالص ، هو ايه مش باين علي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وبس ياسيدي وقامت معيطة " من كتر الانبساط طبعا " !!!!


هناك 6 تعليقات:

مها العباسى يقول...

ياااااااااااااه

مها جمال يقول...

طب ايه العمل
نعملمش شايفين مش نلفع نستهبل نعمل مش واخدين بالنا برضو بناخد على دماغنا
صدقينى يامرمر كلناهذا الشخص من غيراى مبالغةولا نقص

Loulou يقول...

انا كمان هاعيط من كتر الانبساط

hamma يقول...

في إنتظار المشهد التالي
يجب أن نستعد قبل إنطفاء الأنوار وملازمة كل واحد لمكانه................

غير معرف يقول...

ـ أضحك ولا اعيط يا حبوبى يا عصفورة يا ديناصور كانت نفس اللجظات اللى قولتلك فيها العبارة دى من ذمان قوى
ـ اقولك قضا احف من قضا ولا اقولك قدر احمق الخطى و لا اقولك غلبت اصالح فى روحى علشان محدش بيصالحها .
ـ رغم اننا شايفين ده كويس من ذمان لكن لما قريته دلوقتى إدانى إحساس جديد شوية
ـ إن ربنا اللى خلقنا عارف ان ميكفيناش صفة واحدة قوية بس او ضعيفة بس ذى بقية البشر اللى خلاص بيتعامل معاهم الناس بصفة واحدة بس ضعبفة يا عينى عليها قوية تشيل و تستحمل لا اداناالصفتين مع بعض كرم منه يعنى و تميز ليناو الثمن لازم ندفعه و انت ست العارفين مفيش حاجه من غير ثمن و دايما احنا ههههههههههه المطالبين بالدفع و من غير كمان ما حد يطلب مننا وكمان من غير حمدا" ولا شكورا" و طبعا" الناس متغاظة وتحسدنا علشان ربنا إدانا صفتين و هما أداهم صفة واحدة بس فيخدوا مننا كل انواع العطاء و يضيقونا حتى الطبطبة ( إللى إحنا محتاجينها علشان نواصل العطاء )يستخسروها فينا ليه للأننا عاوزبن الطبطبة بشروطنا ( الطبطبة مع إحتفاظنا بكرامتنا ) لأ مش لازمهم و فين يوجعك .
ـ بس يا ستى تفسير جديد موحى من كتابتك
ـ وربك كريم يجعلنا نتقابل علشان نطبطب على بعض و نعيط سوا و نضحك سوا و يديكى أحلى حاجة يخص بها عبيده الحلوين روعة موهبة التعبير بالكتابة و يدينى متعةموهبةالقراءة .
و صباحه ومساءه فل يا احلى حبوبى

غير معرف يقول...

لو إن نصف صفاتك التي نسبتها إلي نفسك حقيقية
فثلاثة أنصاف منك يستطيعوا تغير العالم
..
لو سئلتني رأيي الشخصي ؟
لا أظن العالم سوف يتغير قريباً
وطبعاً ليست المشكله في العدد
..
وهذا رأي غير هام فلا تلتفتي له كثيراًً
..
أحب أن أقول أيضاً
إني سمعت ذلك الحديث من كل من عرفتهم تقريباً وإن إختلفت الألفاظ ومكان إعلان إعترافاتهم الخطيرة
..
معظم الناس لا يرون العالم كما هو ولكن كما هم
..
أعتذر لإغضابك من جديد
..
أنتظر تدوينة حقيقية
..
والسلام