20 مايو 2010

بس مش عايز اسمع ولا كلمه !!!!





للمرفهات فقط اتكلم !!! وعنهم فقط اتكلم ، من لاتعتبر نفسها من المرفهات لاتقرأ كلماتي !!! اصل دي حصه للمرفهات وفش غل !!! فاللي مش مرفهات مالهومش دعوه خالص بالكلام ده وربنا يكملهم بعقلهم ، اه والله !!!! للمرفهات فقط اتكلم !!!

واقصد بالمرفهات ، تلك النسوه ، اللاتي خرجن من بيوتهن للعمل والوظيفه وتحقيق الذات !!!! تلك النسوة ، اللاتي رفضن يقبعن في بيوتهن ، يطبخن ويكوين ويذاكرن للاطفال !!! تلك النسوه ، او معظمهم ، خرجن للعمل متشدقات بكلام كبير عن الحريه والمساواه والاستقلال الاقتصادي واثبات الذات والوجود وكلام كتير فاضي من نوع الكلام ده !!!

تلك النسوة ، المرفهات ، يخرجن من بيوتهن نهارا ويعدن اليها في اسعد الاحوال في وقت العصر وبعضهن تتمادي في رفاهيتها وعبثها وتعمل ساعات اطول حتي تظلم الدنيا ...
مرفهات ، الا يعرفن ان للبيوت احتياجات ، طبيخ وغسيل ، تنضيف ومكوه ، مذاكره وحموم ، شوبنج وواجبات اجتماعيه !!! الايعرفن ان للبيوت احتياجات وانهن بتلك الرفاهيه التي يرفلن في نعيمها يتجاهلن تلك الاحتياجات والواجبات ويقصرن فينا تقصيرا مروعا !!! لم اتحدث عن الزوج واحتياجاته ، فللاسف ليست كل المرفهات من ذوات الازواج ، بعضهن طفش منها الزوج ، طفش طبعا لانه لم يتحمل تلك الرفاهيه التي تنعكس سلبا علي قمصانه وزياره مامته وعزا جوز بنت عم خال ابن عمته ، الست المرفهه التي لاتعطي منزلها وقتا ولا حياتها جهدا ، لاتجد وقتا للزوج ، لاتلبي طلباته كما ينبغي بذمه وضمير وتفاني ، اه بتعمل اللي عليها لكن من غير نفس ومن غير ذمه ، تطبخ بسرعه من غير مزاج ، تغسل بسرعه وساعات ماتخدش بالها من ياقه القمصان المقرحه وساعات كتيره مابتزهرش الغيارات البيضا ، تشخط في العيال وطول النهار تزعق ، وطبعا وقت الجد تدي جوزها ضهرها وال ايه تعبانه مرهقه ماليش نفس !!! خلاص بقي براحتك!!!!

الست المرفهه اللي بتخرج من بيتها تشتغل وتكسب فلوس وكتير تحوش جزء منها وماتصرفوش كله علي البيت ، الست دي مش من حقها تقول اي ولا تقول تعبانه ولا تقول مرهقه ، مش من حقها تهمل جوزها وماتهتمش بيه علي الاخر خالص ، مش من حقها تديه ضهرها وتقوله مرهقه ........... وحد كان ضربك علي ايدك ، حد قالك تسيبي بيتك ومملكتك وتخرجي تتمشكحي في الشوارع ، حد قالك تسيبي دارك علشان يتقل مقدارك ، انت اللي راسك مليانه تفاهات ، ال ايه حريه ، ال ايه اثبات ذات ، ال ايه تحقق ، ويفرق ايه يعني ، يفرق ايه الكلام الفاضي في دورك العظيم والوحيد اللي اتخلقتي علشان البيت والاطفال والزوج ، ايه يعني حتبقي ام علي راسك ريشه ، حتبقي زوجه لابسه سلطانيه الجزيره ، حيبقي بيتك قصر البارون امبان ، ابدا ولاحيفرق حاجه بالعكس بيتك مهمل وعيالك ساقطين وجوزك بيبصبص لستات تانين لانهم هاملاه ووقت الجد بتدي له ضهرك ...............

الستات المرفهات دول ، من ذوات الازواج او التي طفش منهن الازواج ، مرفهات بشكل مستفز ، كل يوم تصحي من النوم تجري تحط مكياج وتتغندر ولو متحجبه تعدل الطرحه وتلبسها حمرا مع التايير الاحمر وصفرا مع الفستان الكحلي ، تحط مكياج وتلبس وتتغندر وتجري علي الشارع ، وتسيب بيتها يضرب يقلب ، وفي الشغل تضحك مع زميلاتها ويشتموا الرجاله وينتقدوهم واه من رفيقات السوء ، طب ماهو بالعقل لما ستات مرفهات تقابل ستات مرفهات حيعملوا ايه ، غير الكلام الفاضي وقله الحيا ، وترجع العصر او بليل ، ترجع تشوف البيت ، ال ايه حتنضفه بعد وقت العمل ، مهما نضف مش حيكون زي البيت اللي بتنضفه الست المصنونه والجوهره المكنونه اللي قاعده في البيت تنضف وتطبخ وتكنس وتمسح !!! ترجع تشوف العيال ومذاكرتهم ، وطبعا تصوت فيهم وتزعق مش لانهم زي كل العيال قللات الادب ومهملين ولانها زي كل الامهات نفسها عيالها يبقوا احسن عيال ، لا هي بتصوت فيهم لانها عصبيه ومرهقه وهي مرهقه وعصبيه ليه ، علشان بتخرج من بيتها كل يوم تجري وتتمشكح في الشوارع !!!!

الستات المرفهات دول كمان ، من كتر المياصه والدلع ، ال ايه عايزين الزوج والعيله والبيت والمجتمع ينتبه لمشاكلهم ، ال ايه عايزين الزوج يساعدهم في البيوت زي ماهم بيساعدوه في المعيشه والمصاريف ، عايزين المجتمع يغير افكاره علشان يدعم وجودهم ، وماتبقاش الست اللي بتشتغل يااما مسترجله يااما مايصه وخارجه تتمشكح ، ههههههههههههههه ، يعني مش كفايه انهم بيخرجوا ويسيبوا بيتهم من غير تنضيف والخضار من غير طبيخ ، مش كفايه انهم لابيعملوا كيكه كل يوم زي ربات البيوت الناجحات او ساعات يعملوها وتطلع مكتومه ، مش كفايه انهم ساعات بياكلوا عيالهم طبيخ بايت ويمكن يوم يقضوها قرديحي ومن غير طبيخ ، مش كفايه انهم بيعملوا كل حاجه في اخر لحظه يشتروا الكحك قبل صلاه العيد بنص ساعه مش زي الستات الشاطره الشقيانه اللي جوزها بيشتريها لها قبل العيد باسبوع ، يشتروا هدوم المدارس والعيال واقفه في الطوابير مش زي الستات العاقله اللي بتنزل جوزها يشتريهم هو ويدفع هو وتتامر هي ، بينضفوا البيت يوم الجمعه مع ان يوم الجمعه اجازه الزوج مفروض يفضل نايم في سريره للصلاه وهي تعمل له مره قهوه ومره شاي ، تنضف البيت يوم الجمعه مع انه يوم الراحه ، قصدي طبعا راحه الزوج ، طيب وايه اللي جبرها ، ماتنضف البيت اي يوم تاني وتخلي يوم الجمعه للفسحه ، واحنا مالنا بقي انها مش فاضيه غير يوم الجمعه وهو حد جبرها ولا غصبها !!!

الستات المرفهات ، من كتر الرفاهيه والمياصه ، ال كمان ليهم طلبات ، هههههههههههههههه ، وليكم عين تطلبوا اي حاجه كمان ، مش كفايه ان الراجل مضحي براحته الزوجيه وسايب مراته تخرج وتشتغل ، مش كفايه ان الراجل سمح لها تاخد من وقته - طبعا ماهي وقتها هو بالاساس وقته - مش كفايه سمح لها تاخد من وقته لنفسها وتخرج تشتغل ، كمان ليكم طلبات ، ايه البجاحه دي ، صحيح سكتنا له دخل بحماره وطلباته ، وايه بقي طلبات الهوانم المرفهات ، ايه ايه مش سامع كويس ، ايه ناقص تقولي لي انا اطبخ وانت تشطب الطباق ، ماقلتيش كده طيب باحسب ، ناقص تقولي انا اغسل وانت تنشر ، كنت قطعت رقبتك ، طيب خلاص ماقلتيش كده ، ناقص تقولي لي انا اذاكر للعيال وانت تروح تقابل المدرسين بتوعهم في الفصل ، برضه ماقلتيش كده ، شاطره انقذت نفسك ، ايه مش عايزه تروحي معايا لامي ليه بقي هو انا ارمل ، لا انت تروحي لامك من غيري لاني بازهق من قعدتكم !!! ايه مش عايزه تعملي عزومه لاهلي في رمضان ياسلام ، اه احنا معملناش لاهلك عزومه لان اهلك ناس بايخيين بياكلوا عندنا كتير !!!! ايه عايزاني اجي معاكي للدكتور وقت تطعيم البت ، يعني ارجع من الشغل هلكان اجري معاكي للدكتور ، انت كمان هلكانه ، ياسلام هو كان فيه حد جبرك ولا قالك روحي الشغل !!! انا ارجع من الشغل تعبان استريح لاني رجل البيت ، انت ترجعي من الشغل تعبانه مايخصنيش برضه تعملي كل اللي عليك زي كل الستات واكتر مش كفايه سايبك تشتغلي ، مش كفايه سايبك تخرجي ، مش كفايه سايبك تطبخي بليل بدل ما تقعدي معايا في البلكونه ، ايه انا مابقعدش في البلكونه وباروح القهوه ماهو لانك مشغوله ، ايه بتقولي ايه ، حتي لو مش مشغوله ، طبعا ، امال يعني ارجع من الشغل ااقعد في البيت زي الحريم ، طبعا لا لازم اروح القهوه واروح النادي واقابل صحابي واروح لامي واتفرج علي ماتش الكوره من غير دوشه ولا ازعاج ، الله مش انا راجل البيت !!!!

الستات المرفهات دول خنقونا ..... خرجوا من بيوتهم وظلموا رجالتهم وعيالهم واهملوا في التنضيف والغسيل والمكوه ، اه طبعا اهملوا ، بس ولا واحده منكم تفتح بقها ، بقي عيالكم فالحين وناجحين زي عيال ستات البيوت واكتر ، مين قال ، الاحصائيات ، مين اللي عمل الاحصائيات ؟؟؟؟ تلاقيهم شويه ستات مرفهات زيكم عايزين يكذبوا علينا ويخدعونا !!!! بس ماقلت ولا واحده تفتح بقها ، بتطبخوا زي ستات البيوت واحسن ، بس بتطبخوا بليل وتملوا ريحه البيت طبيخ ، او تطبخوا يوم الاجازه وتحطوا الاكل في الفريزر وترجعوا تسخنوه ، بلا قرف هو ده يبقي لي طعم ، الله يرحمها امي واكلها السخن ونفسها الجميل ، ايه بتقولوا ايه ، بتطبخوا بعد ماترجعوا من الشغل ، طيب مش بالذمه حرام عليكم الراجل الشقيان والعيال الغلابه اللي راجعين من المدرسه يستنوا حضراتكم لما تخلصوا مياصه وترجعوا تطبخوا !!! بتقولوا ايه ، بيوتكم نضيفه وبتلمع ، هههههههههههههه ، طيب امتي اخر مره نضفتي النجف ، امتي اخر مره غسلتي السجاجيد ، امتي اخر مره صبتني الحيطان ، ايه بتقولوا ايه ، ستات البيوت مابتعملش ده كل يوم ، ماشي لكن هما قاعدين في البيوت ايدهم فيها ، انتم بقي بتخرجوا وترجعوا ومش مركزين في بيوتكم !!!

الستات المرفهات دول خنقونا ، الست تخرج تشتغل تصرف نص فلوسها علي الهدوم ، ايه بتوفر لي اشتري ليها كسوه ، هو انا كنت اشتكيت وقلت لها الحقيني ، وبعدين انا اشتري علي قد امكانياتي واللي مش عاجبه يشرب من البحر ، وتصرف نص فلوسها التانيه علي نفسها ، اشي تجيب شويه فاكهه معاها ، ومين طلب منها !!! تشتري هدوم للعيال ، كده والله تبوظهم وتفسدهم وتخليهم مش راضيين بحياتهم ، تشتري مكياج وبرفان ، لمين ، ليه ؟؟؟؟ لا طبعا لنفسها للناس اللي بتشوفهم في الشارع ، شفتي بقي ، البيعه خسرانه ازاي ، لاقرش بتحوشيه ولا جمعيه بتقبضيها وسنين ورا سنين وماعلمتيش قرش للعيال ينفعهم ، يعني محرومين من امهم وكمان ماشلتيش ليهم قرش ينفعهم !!!!!!!!!


بس بس .... مش عايز اسمع ولا كلمه ، كمان حتقاوحوني ، بس ، ولا واحده منكم تفتح بقها !!! ولا واحده منكم تقول العيشه صعبه والقفه ام ودنين يشيلوها اتنين ، ولا واحده منكم تقول نجاحي في شغلي واثبات ذاتي ووضعي المهني !!!! محدش يقولي الزمن اتغير والدنيا بقت غير الدنيا ، ولا واحده منكم تقول بلعب دور ست البيت والمرأه العامله في وقت واحد وطلعان عيني !!! ولا واحده منكم تقول تعبانه وعمري ماابشتكي !!!! ولا واحده منكم تقول نفسي ااقعد في البيت !!!!!! بس بلاش كلام فاضي ، كل كلامكم رفاهيه في رفاهيه ومياصه وقله حيا !!!! وبعدين يااختي ماتقعدي في البيت ، وتعيشي علي قد دخلي واللي ممعاهوش مايلزموش !!! ولاتقولي لي هات لي ولا جيب لي !!! لاتقولي العيال نفسهم ولا العيال مانفسهمش !!! علي قد لحافي مدوا رجليكم وبلاش دوشه !!!

بس بس .......... ولا واحده منكم تفتح بقها ، بوظتم المجتمع ، وافسدتم بقيه النسوان ، كل واحده النهارده ال ايه نفسها تشتغل ، ال ايه نفسها يبقي معاها قرش يأمن لها المستقبل ، نفسها تنجح زي فلانه وعلانه ، بس بس ولاواحده منكم تفتح بقها ، كل المصايب اللي في المجتمع انتم السبب فيها ، البطاله ، طبعا ماانتم خدتم اماكن الشغل وخلتيم الرجاله صيع قاعدين علي القهاوي ، التفكك الاسري ، طبعا ، وهي كل واحده لما تخرج تتمشكح وتسيب بيتها وجوزها يبص لغيرها ويطلقها ويمشي يبقي مين السبب !!! الادمان والمخدرات والتطرف والارهاب ، الله ماهي العيال عايزه ام تخلي بالها منهم ، لا اب ايه ، الاب بيشتغل ويكدح ويتعب ، لما العيال تنحرف تبقي مسئوليه الام اللي عايشه مستهبله في الدينا ومابتخليش بالها من عيالها ، ايه بتقولوا ايه ، ان انتم مالكوش دعوه ، كمان بتقاوحوا ، اما مصيبه والله ، انتم سبب زحمه الشوارع ماهي النسوان لو كنت في بيوتها كانت الشوارع فضيت ، انتم سبب التحرش ، ماهي النسوان لو كانت قعدت في بيوتها ماكانش الشباب الغلبان اتغري بمناظرهم وهدومهم ومياصتهم واتحرش بيهم ، انتم سبب انتشار نسبه الطلاق ، ماهي كل واحده منكم مستوقيه بمرتبها وعامله ابو علي ومش فارق معاها راجل يصرف عليها ولا لا ، اسهل كلمه خلاص طلقني ، لا زمان كانت النسوان بتستحمل وتعيش لان وشها في الحيطه ، دلوقتي لا كل واحده منكم واقفه علي الكورنيش بتتهوا واي كلمه صغيره ولا نزوه ولا جوازه في السر ولا شويه بخل ولا صوت عالي وقلمين ، طلقني ، طبعا ماهي مستوقيه بفلوسها ومرتبها ، مش بس كده لا كمان علمتم بناتكم مايقدروش الحياه الزوجيه ولا يستحملوا الرجال ، الله ماهو اقلب البت علي فمها تطلع البنت لامها ، البت شافت ماما راحه الشغل وجايه من الشغل وشنطتها فيها فلوس وبتسمع صوتها وهي بترد علي ابوها وتقوله انا زيي زيك ، وكمان زيي زيك ، شوف الجراءه شوف البجاحه ، يانهار اسود ، خلاص بقي ، تطلع البنات مستوقيه زي امهاتها ، ويبقي الطلاق علي ودنه ، مش مصدقني ، طيب ماتسالوا بتوع الاحصائيات !!!! انتم سبب الازمه الاقتصاديه الطاحنه ، ايوه ، ليه ، يعني ايه ليه ، اهو انتم السبب وخلاص ، وحابقي اقول بعدين ليه مش مهم دلوقتي!!!!!!!!!!!! باختصار كده ، انتم سبب كل البلاوي ، البطاله والتحرش وزحمه الشوارع والتفكك الاسري والادمان والمخدرات والارهاب والتطرف وزياده نسبه الطلاق وسبب الازمه الاقتصاديه الطاحنه ، وايه كمان مش فاكر لكن اكيد حافتكر !!!!! الستات المرفهات ، اللي بيشتغلوا !!! بوظتم الدنيا منكم لله !!!!

بالمناسبه بقي احب اقول حاجه ، انتم كمان فاشلين في شغلكم ، عايزه اروح بدري علشان العيال ، عايزه ارضع ، عايزه اجازه وضع ، حامشي بدري علشان العيال خارجين من المدرسه ، حاروح بالبت للدكتور ، حماتي ماتت ، ايه قله الادب والكلام الفاضي ده ، يعني كمان فاشلين في شغلكم واعذار من اعذار ، هو الشغل حيستناكم ولا حيستني دلعكم !!!!

لا لا ........... مش عايز اسمع نفس ، محدش يقولي وزيره وسفيره ، صحفيه ومحاميه ، شغاله وبقاله ، دكتوره ومدرسه ، تشتغل في السنترال وممرضه في المستشفي ومدرسه في الجامعه ، محدش يقولي مهندسه وخبيره في المحكمه وماموره ضرايب ، محدش يقولي سيده اعمال ومديره ، ال مذيعه ومعده برامج واعلاميه ، ال صيدلانيه وجراحه وعالمه ذره ، ال محاسبه ومصممه ازياء ورئيسه مجلس اداره ، هههههههههههه لا وكمان ضابطه شرطه وقاضيه !!! محدش يقولي الستات نجحتم في كل مكان ، ماهم نجحوا علي حساب البيت وحساب العيال ، هو المجتمع باظ من شويه !!!!

لا لا لا ........... مش حاسمع قصصكم الفاضيه ، يعني ايه راجل طلق مراته ، عادي ماهو حقه ، يعني ايه مالقيتش تعيش ، ليه مالهاش اهل يساعدوها ، مالهاش اهل ، طيب والراجل ماله بقي !!!!!! يعني ايه جوزها عيي ووقفت جنبه وساندته ، العيا ده بتاع ربنا كمان حتعايرونا بيه !!!! يعني ايه جوزها اترفد من شغله ووقفت جنبه ، الله ماهو عادي ماهي الست الجدعه مفروض عليها تقف جنب جوزها ولا ايه !!!! ايه ايه ..... لولا ان الستات بتشتغل ماكانتش تقدر تخفف عن الزوج احماله في الازمه الاقتصاديه ، ومين بقي اللي اشتكي ولا طلب منها ، لولا ان الستات بتشتغل ماكانتش تعرف تنفع نفسها لما تتطلق فجأ ، الله ده استثناء هو احنا حنخترع نظم علشان الاستنثاء ، لولا ان الستات بتشتغل ماكنتش عرفت تقف جنب جوزها المريض ولا جوزها المرفود ولا جوزها العاطل ، دي كلها استثناءات ، الاصل ان الراجل لا مريض ولا مرفود ولا عاطل وان الديك ديك والفرخه فرخه والراجل راجل البيت ، بطلوا فلسفه ودوشه ووجع راس !!!


لا لا لا.... مش حاسمعكم ولا اسمع ولا كلمه منكم !!! بتشاركوا في تنميه المجتمع ، ليكم دور عظيم في بناء المجتمع ، بتساعدوا الاسره وتزودوا دخلها ، بتتفتح مدارككم وتربوا عيالكم تربيه احسن واصح ، ههههههههههههههههه ، مين اللي قال لكم الكلام الفاضي ده وحشره في دماغكم !!! منك له ياقاسم ياامين انت وصلاح جاهين وهدي شعراوي والافوكاتوا فاطمه والمجلس القومي للمرأه والمواطنه والكلام الفاضي ده كله ، الست مالهاش الا بيتها!!!!

ايه ، بتقولوا ايه ، نفسكم ترجعوا تقعدوا في البيت وتتدلعوا وتتهنوا !!!!!!!
بلاش كلام فاضي ، كل واحده منكم يالا تقوم تغسل وشها وتروح الشغل بس لما ترجع لا تشتكي ولا تقول تعبانه ولا تقول زيي زيك وتفكر نفسها دايما بان الديك ديك والفرخه فرخه !!!! مفهوم ؟؟؟؟؟؟؟!!!!.............. ستات مرفهات عايزين كسر رقابيهم صحيح !!!!!

هناك 5 تعليقات:

يا مراكبي يقول...

Like :-))))

سبهللة يقول...

أول مرة آجى عندك
ارفع لك القبعة وانحنى ليكى ولكلامك

يسلم فمك

hamma يقول...

إحساسي أنك ذهبت الى بعيد
لديا حالتين :
- واحد زوجته تعمل بأوقات مختلفة يعني مرة بالليل وأخرى بالنهار .... ووجد راحته في كل شيء(حسب رأيه طبعا)
وآخر ماجرى له البيت سرق بما يحتوي حتى أواني الطبخ شالوها.....الخ
- واحدة تعمل بالنهار و زوجها يعمل بالليل دائما..... شغل الليل يكسب فيه أحسن من النهار
لنتخيل العيشة شكلها أيه؟

medolegend يقول...

رائعة...تقبلى مرورى وتحياتى

غير معرف يقول...

ههههههههههه تجنني والله
والله والله والله .. مافيش احلي من الدلع والبطجه والقعده في البيت :))))))