العقلاء يمتنعون !! للمجانين فقط !!!!!!!!!

انا قرفانه جدا ... وده عادي خالص القرف حق لكل مواطن ، واللي مايقرفش رغم كل حاجه تقرف حوالينا بيبقي زي الكحكه في ايد اليتيم ، عجبه ... والكحك خلص لان العيد عدي من زمان !!!!!! وباي حال عدت ياعيد !!!!! ومقاومه القرف حق مشروع جدا ... وعلشان تقاوم القرف لازم تبقي زي الليمون ، اللي قالوا عليه في المثل ، ليمونه في بلد قرفانه ، علشان تقاوم القرف تبقي زي اللمون ، حراق مزززززززززز ، حراق لو اتحط علي الجرح ، مززززززززز لو اتحط علي النفس المعوجه يعدلها!!!

اذن اللمونه هي الحل !!!! اللمونه علاجا للقرف !!!!!
لكن انا مش حاكون لمونه ابدا ، صفرا ومززره وبتحرق !!!
مش حاكون لمونه ابدا ، وده موقف مبدئي جدا ، لاحامزمز في عين حد ولا حاحرق حد ولا حاصفر علي حد !!!! وليه اعمل كده ، ماهو سعد باشا قال مافيش فايده ، والمثل الشعبي قال اللي اختشوا ماتوا وقال الرجوله ادب مش هز كتاف !!! يعني كل حاجه معروفه ومفهومه والبضاعه كلها في السوق ، كل واحد ينقي منها اللي يجيي علي هواه !!! ابو العريف انا اياك ، الناس كلها تبقي تفاح وموز وعنب وبطيخ ساقع ومانجه هندي وانا اللي حاكون لمونه مزززه !!! ابدا ، لا والف لا !!! لن اكون لمونه واللي قرفان معاه ربنا بقي!!!

ماعلينا !!! ولا علينا ، انا هنا في مدونتي وبراحتي !!! والباب يفوت ستين جمل !!!
كنت بقول ايه ، اه بقول اني قرفانه جدا ، وقرفي يستند لكافه المواثيق الدوليه التي تبيح القرف بكافه اشكاله وصوره !!! قرفانه لاني مش فاهمه ، وانا بزعل قوي لما مش بفهم ، لاني رايي اني بت لهلوبه وبافهم كويس ، لكن ليه حد مضلم النور وخازق عيني وبيقولي شوفي ، الله ماتولع النور ياعم خلينا نعرف نشوف علشان نعرف نفهم اللي شايفينه ، واوعي ياعم صباعك ده اللي خازق عيني ، شيل صباعك من عيني ، علي راي خالد الذكر سعيد صالح ، اي ياعيني اي ياعيني ، ولع النور ياعم علشان نعرف نشوف ونفهم ، لكن فهم في الضلمه يبقي عما حيثي والعما الحيثي يعمل صداع وغممان نفس ، وغممان النفس نوع من انواع القرف ، والقرف مالوش حل الا الليمون!! ماقلت من الاول ، اللمونه هي الحل !!!!!!!!
علي فكره ، اللي يقعد حد في الاوضه الضلمه ويخزق عينه ويقوله شايف ايه وفاهم ايه ، يخش النار !!! بس هيه !!!!

مش فاهمه ، رغم ان الناس عماله تتكلم ، بس بتتكلم علشان ماتقولش حاجه ، لك لك لك لك لك بالضمه ، لك لك لك لك بالضمه ، كلام كتير قوي لكن محدش بيقول حاجه ، والناس كذابه ، كل واحد عامل انه فاهم الكلام اللي مابيقولش حاجه ، والله ينور عليك ياحبيبي ، كلامك عظيم عظيم عظيم ، اموووووووووووووووو ، يعني بوسه كبيره ، الناس كذابه لانها لو قالت مش فاهمه ، اللي بيتكلم وعمال يلك ده يزعل ، وانا مقدرش علي زعل الجميل ، وان شاله امي مافهمت حاجه ، عادي يعني ، هما اللي فهموا عملوا ايه ، طيب لك لك لك لك لك بالضمه ، كلام كتير قوي ، لكن محدش بيقول حاجه ، جمل تقريريه غامضه بلا مضامين ، الشمس طلعت ، ياسلام ، بقي هي الشمس طلعت ، ايه الحلاوه دي ، ايه العبقريه دي ، ياواد ياعبقري ياللي عرفت ان الشمس طلعت !!!!!!!! لك لك لك لك لك لك بالضمه ، وبعدين حصل ايه بعد الشمس ماطلعت ، الجو حر ، الدفا حلو ، الدنيا مطرت ، حصل ايه !!! ماحد يقول كلام مفيد ، كلام مفيد علشان الناس تفهم ، ولا هي الناس بتكلم بعضها واخر سعاده ان بعضها كمان مش فاهم بعضها !!!!!!!! اما مصيبه والله !!!
علي فكره برضه ، اللي يتكلم كلام لك لك لك لك بالضمه ومايقولش حاجه ويزعل ان الناس مش فاهمه حاجه ، برضه يخش النار !! بس هيه !!!!

ماعلينا تاني .... طيب ياللي كلكم فاهمين وعظماء كده ، وفاهمين ان لما الاخ قال الشمس طلعت ، كلكم فهمت كل حاجه ، ممكن حد يتواضع مشكورا ويفهم الست الغبيه ، اللي هي انا طبعا ، يفهمها بتقصدوا ايه من المعاني العظيمه اللي تقصدوها بالعباره الموجزه العبقريه العظيمه الشمس طلعت!!! لو الناس بطلت تكذب علي نفسها وعلي الاخرين ، وقالت مش فاهمين ، اللي بيلكلك حيتكلم بوضوح لو عنده بضاعه للبيع او يتخرس لانه مفلس ، فلو اتكلم بوضوح حنفهم والحمد لله نشكر ربنا علي كل نعمه ، ولو اتخرس برضه الحمد نشكر ربنا علي الابتلاءات واهي كلها تكفير ذنوب ، لو الناس بطلت تكذب علي روحها وعلي المتلكلكين ، الدنيا تبقي عظيمه جدا ، مش جدا قوي ، مش جدا خالص ، بس علي الاقل حنفهم اي حاجه في اي حاجه ، ولا هو المطلوب بحقيقي ان محدش يفهم حاجه ونعيش كلنا حمير وفي منتهي السعاده !!!!!!!!! ياواد ياعبقري ياجميل ، ده اللي هو انا طبعا ، مطلوب نبقي حمير ، ده اكتشافي انا بقي ، محدش يرجع يسرقه ويقوله من غير ماينسبه لي ، المطلوب نبقي حمير ، نبقي ، لا مانبقاش ، نفضل ، والفرق واسع جدا ، مطلوب نفضل حمير ، مااحنا حمير حبه صغيرين ، مطلوب بقي نفضل حمير كتير وعلي طول والي الابد زي الافلام الهندي كده ، عرض مستمر !!!

حد بيتكلم علشان مايقولش حاجه ، والناس تعمل ذكيه وتقول انها فهمت اللي ماقالوش ، وهو ينبسط بعبقريته علشان قدر يفهم الناس حاجات هو شخصيا مش فاهمها ومابيقصدهاش ، الناس تنبسط بعبقريتها علشان فهمت اللي مااتقالش ، هههههههههههههههههههه ، مسخره ، الحمير حترفع علينا قضيه والله !!!!!!!!!! الحمير حتزعل وتقول ، لا ، احنا مش حمير زيكم اوي كده !!!!!!!!!! ويالف نهار ابيض ، احنا احمر من الحمير !!! انجاز غير مسبوق في عالم الحيوان وعالم الانسان ، ان الانسان بقي احمر من الحمير من غير مايبلس احمر ، لا ده حمار وحلاوه علي السكين ، حمار رباني !!!

مش بقولكم انا قرفانه ، ولاني قرفانه ، باهيس ، ولاني باهيس بقول كلام مجانين ، وبعدين ايه يعني ، هي يعني جت علي ، مالناس كلها بتقول كلام مجانين ، وهاتي ااقولك كلمه من ودنك اللي عايزه اكلها ، زي خالد الذكر عبد المنعم ابراهيم مع العظيمه زينات صدقي ، كل الناس بتقول كلام مجانين ، لانه كلام بلا منطق تافه ومتصوراه دورر ، دوررررررررر ، يبقي اذن انا كمان باقول دوررررر ، ولاتعايريني ولا اعايرك الدورررر طايلني وطايلك ، وللمجنون نص البلد ، لا تلت ارباعها ، اكتر من الشحات ، الشحات ليه نص البلد ، لكن المجنون ليه نصها وحته ، ليه ، لان المجنون بيبرق والناس بتخاف من التبريق ، وعايز ياكل ودن الناس والناس خايفه علي ودانها ، والمجنون عامل عاقل قوي ولو الناس قالت له انت مجنون ، يبقي هما اللي مجانين وهو اللي يفضل عاقل ، فالناس بتسكت لانها بتخاف من التبريق وبتخاف علي ودنها وبتخاف من اتهامات المجنون بالجنان فتسكت ، فالمجنون يصدق انه عاقل والعاقلين يخافوا لايتقال عليهم مجانين ، وصلي صلي علي النبي صلي !!!!!!!!!!

مش فاهمه حاجه ، في ايه ، مش عارفه ، انا لو عارفه ااقول علي طول ، مش فاهمه حاجه ، الناس عماله تتكلم ومابتقولش حاجه ، غير ان الشمس طلعت ،طيب وبعدين ، بعد مااتنيلت طلعت حصل ايه ، كلام كتير مالوش منطق مزيف تافه بلا مضمون ، لكن التصقيف مستمر ، وصبح صبح ياعم صبح ، وعلي راي عمنا الليمبي ، بلوبيف بلوبيف ، حد يستجري يقول ان مش فاهم القصيده العظيمه ، بلوبيف بلوبيف ، اللي يقول كده ، يبقي جاهل ومنحاز للبسطرمه علي حساب البلوبيف ، وده انحياز خطير جدا ، له ااثار سلبيه عظيمه ، ونحن لانقبل الانحياز للبسطرمه علي حساب البولبيف ، اذن ، قصيده شاعر الشعراء الليبمي عظيمه جدا ، وبالمره عظيمه يامصر !!!!

كلام تافه عمال يتقال في صور بيانات عسكريه زي بتاعت حرب اكتوبر ، وعبرنا الهزيمه يامصر ياعظيمه ، والناس عماله تصقف ، واللي مش حيصقف يطلع بره ، بره فين ، بره في اي حته ، في الشارع ، والشارع لمين ، الشارع لنا احنا كلنا ، واحنا كلنا بنحب بعضنا ، عادي جدا برضه ، كلها اغاني وكلها مقولات عظيمه ، مين فاهم حاجه بجد !!!!

يارب اللي فاهم لوحده يزور !!! ايه مافيش في قلوبكم رحمه ، محدش قالكم ، حب لاخيك ماتحب لنفسك ، محدش قالهم لقمه هنيه تكفي ميه ، تفهموا لوحدكم ليه ، علي راي خالده الذكر اللي مش فاكره اسمها تفهموا لوحدكم ليه انا وحشه ولا ايه !!! المصيبه اللي فاهمين او بيقولوا انهم فاهمين ، لما يجيي يشرحوا اللي فاهمينه ، يتقصموا شخصيه الملككك الاعظم ، وهاتك يالك لك لك لك لك بالضمه ، وبعدين يضحكوا سعداء جدا ويقولوا للغبيه اللي هي انا ، هههههههههه شفتي الكلام مفهوم ازاي !!!!! اه ياني ياامه ، ياغبيه يااني ياامه ، مش فاهمه والنعمه ، مش فاهمه والختمه ، اعمل ايه تاني علشان تصدقوا ان كلامكم غير مفهوم ، ولا هو العيب في انا ، ماهو علي راي الست ، العيب فيكم يا في حبايبكم اما الحب ياروحي عليه ....

كده طيب ، معنتش حالعب معاكم تاني ، لانكم بتلعبوا لوحدهم لعبه مابتقولوش قواعدها وقوانينها علشان نفهم ونلعب معاهم ، لكن في نفس الوقت حرمت اقول مش فاهمه ياروحي عليه ، انا فاهمه كل حاجه وخبيثه وذكيه ولئيمه ، فاهمه اللي انتم ماقلتهوش ، فاهمه اللي انتم بتحاولوا تخبوه ، بتحاولوا تداروه ، اللي بتتكلموا علشان ماتقولوهوش ، واوعي حد يستجري ويقولي انت فاهمه غلط ، لاني حاضطر اقول كلام يقفل المدونه من باب قله الادب وقله التربيه ، ماحدش يقولي انت فاهمه غلط ، لا انا فاهمه صح بقي ، لاانت فهمت غلط واحنا ماقلناش كده ، لا انتم ماقلتوش حاجه وكل واحد يفهم علي كيفه ، اللي عايز يتفهم يقول كلام مفهوم ، اللي عايز يعمل انه مفهوم احسن عقاب ليه اننا نفهمه علي كيفنا بقي ،نحب كلامه نقرف منه ، براحتنا ، كل واحد وقدراته المتواضعه اللي ربنا اكرمه بيها ، انا خبيثه وليئمه وفاهمه كل حاجه ، مش لانكم قلتم اي حاجه ، لا لانكم ماقلتوش اي حاجه ، وانا لما الاقي حد يتكلم كتير ومايقولش حاجه ، افهم علي كيفي وانا حره بقي والحريه حق لكل مواطن في اطار الدستور والقانون والمواثيق الدوليه وعلي راي خالد الذكر احسان عبد القدوس !!!

بس انا لي شويه اقتراحات بناءه في اطار الك لك لك لك لك لك بالضمه السائده ، وفي اطار الكلام كي لانقول شيئا وفي اطار عظيمه يامصر ياام النعم ، وفي اطار الشارع لمين الشارع لنا ، وفي اطار العيب فيكم يافي حبايبكم اما الحب ياروحي عليه ، في اطار كل هذه المقولات الخالده العظيمه ، اقترح صرف علبتين بنادول احمر اكسترا ، احمر لانه يتناسب مع جو الحمير اصحابنا واكسترا لان الدوز اكسترا قوي قوي ، وبنادول لزوم وجع الراس ، صرف علبتين بنادول مع كل لك لك لك لك بالضمه ، ماهو مايبقاش لك لك لك بالضمه وخراب ديار وصداع حيثي ، مين حيثي ده ؟؟؟؟؟؟؟

وااقول كمان ، والتكرار يعمل الشطار ، انا قرفانه جدا وده حقي المطلق ، كل واحد ينام علي القرف اللي يريحه ، واقول اني مش فاهمه حاجه من اللي انتم بتقولوه لكن فاهمه كل حاجه من غير ماحد يقول ، وطبعا ده قارفني اكتر ، لان اللي فهمته مقرف لاتنفع معاه لمونه ولا قفص لمون بحاله ، ولاحتي اغنيه شجر الليمون بتاعت محمد منير ، وطبعا طظ في قرفي ، ايش اكون انا جنب المتلكلكين ، طظ انا مين يعني ، انا ولا حاجه ، حيالله مواطنه عامله فيها ناصحه وهي مالهاش لزمه خالص ، عادي برضه ، طظ في قرفي ، لان فيه مليون حد فاهم كل الكلام اللي بيتقال ومعجب بيه جدا وموافق عليه جداجدا وتصفيق حاااااااااااااد وامووووووووووووووووو!!!!

وياللي علي المالح حود علي الترعه ، ياللي علي المالح حود علي الترعه !!!
اصل المالح مالح والترعه حلوه وعذبه ومااشربش ليه !!!!!!
قرفانه ومش مهم !!!
مش فاهمه ومش مهم !!!
المهم نعيش !!!!!!!!!
ههههههههههههههههههههههههههههه ايه الكلام الفاضي اللي انا كتبته ده !!!
دي القهوه المغليه دي بنت لذين جدا بتخلي الواحد يخرف تخريف رهيب !!!!!!!!
كده برضه ياست انت وانا بقول عليك عاقله وكمل ،كده تخرفي بفنجانين قهوه مغليين !!!
اسكتي بقي وبلاش دوشه !!!
حاضر و...................... بس والنبي محدش عاقل يقرب من هنا لان الجنون معدي ، من فضلكم ومن غير احراج هذا النوت للمجانين فقط والعقلاء يمتنعون !!!!!!!!!!!
باي باي كمبورة !!!!!!!!!