الحمار المالطي والبلياردو وفرجينيا الجميله والباب العالي و الحنان المفاجيء ونظريه المصلحه و... انا وانت

بانو بانو بانو علي اصلكم بانو

والساهي يبطل سهيانه

صلاح جاهين

سعاد حسن

( مابفهمش في السياسه )

انا مابفهمش في السياسه !!!
عادي جدا ، مش كل الناس بتفهم في السياسه !!!
مابفهمش في السياسه لكن بافهم في الدراما ( التمثيليات والافلام والمسرحيات والكتابه وعلاقات البشر ) !!!
الحقيقه مش بفهم بفهم ، لا بحس كويس !!!

وحكايه احس كويس دي ممكن تنفع والواحد بيعمل صينيه مكرونه بالباشميل ، او بيعمل قالب كستر بالشوكولاته !!! الواحد يعرف يحس الباشميل خفيف ولا تخين ، المكرونه حتكفي الصينيه او حتفيض !!! حاجات من دي يعني !!!

لكن لما الواحد يقرر يستخدم احاسيسه في فهم عالم السياسه ومايحدث فيه ، غالبا حيتوصل لنتائج كارثيه معقده ، فاحساسي بالنسبه لصينيه المكرونه مايفرقش قوي ، ليه ، لانه ممكن يوصلني اني احرق صينيه المكرونه في الفرن وطبعا كلكم عارفين انه لما صينينه المكرونه تتحرق يبقي المجهود ضاع واللحمه المفرومه كمان وده كله في النهايه امر مقدور عليه ، لكن النتائج الكارثيه في السياسيه ممكن تودي في داهيه وستين داهيه ومليار داهيه ، بالذات ان فيه فروق كتيره بين المكرونه الباشميل والسياسه ، منها ان المكرونه الباشميل افيد واطعم ده من ناحيه ، وكمان لو اتحرقت نعمل واحده غيرها وولا يهمني .....

لكن النتائج الكارثيه في السياسه عامله زي سلق البيض ، عمر حد سلق بيضه وبعد مااتسلقت قد يرجعها بيضه نيه تاني ، اطلاقا مستحيل ، البيض لما يتسلق يبقي اتسلق وخلاص ، وللاسف ماتقدرش ترجع في كلامك وتقول ، لا انا بحب البيض اومليت او عيون ، خلاص ياعسل اتكتب عليك البيض المسلوق ولافيش غيره ، ازلط بقي وبالهنا والشفا ، يقف في زورك يكبس علي صدرك يعلي الكوليتسترول يعمل لك حساسيه ، انت وحظك ، اذن لابد لابد وقت التعامل مع عالم السياسه الانتباه ، لان في معظم الاحوال يؤدي لسلق البيض ، صحيح يبقي حضرتك مش قصدك سلق البيض ، لكنه يؤدي لسلق البيض اللي هو طريق في اتجاه واحد ، لما يتسلق مايرجعش تاني ،وعيش ياحلو بقي!!!!

اذن بالراحه شويه وانت بتفكروا وبتتعاملوا في عالم السياسه الموحش ، لان لو سلقتم البيض ، كلنا حندفع التمن ، اللي بيحبوه مسلوق واللي مابيحبوهوش !!!!

( البلبطة علي الشط )|

ولاني مابفهمش في السياسه وبحرها الغويط واستراتيجياتها وتكتيكاتها ومكائدها ، دايما اقف علي شطها ابلبط ، ماهو الواحد لازم يخلي باله من لغاليغه ، يعني مش كل مايلاقي بحر يرمي روحه فيه ويقول علمني العوم والنبي يااحمد ، ليه ، لان احيانا احمد مايبقاش فاضي ، فيسيبك تغرق وانت بتغني ، ولان احمد ساعات شخصيا مايبقاش بيعرف يعوم في هذا البحر تحديدا !!!

يبقي من خاف سلم ومن وقف علي الشط يبلبط يبقي واقف في الامان ، حتي لو موجه طربشت عليه من البحر ، اهم شويه ميه ونمسحهم وخلاص ، غير انك ترمي روحك زي عبد الحليم حافظ في ( اليم الازرق ) وترقع بالصوت ( اني اغرق اغرق ) لان عبد الحليم كان بيغني علي المسرح وخلص غرق وروح ، لكن انت ايها المواطن ، لو نزلت اليم الازرق ورقعت بالصوت وقلت ( اني اغرق اغرق ) حتكون ياعين امك بتغرق فعلا ولا حد حينفعك لا عبد الحليم ولا نزار قباني ولا انا ....

وزماااااااان ، قالوا العقل زينه في الفاترينه ، وقالوا ، عقلك في راسك تعرف خلاصك ، اذن هذا الجزء اللي راكب جوه ام الجمجمه ده احيانا بيكون ليه لزمه ، ولزمته احيانا انك تفكر ولما تفكر ربنا يهديك وتهمد ولو ماهمدتش براحتك بقي ، نفتكر ساعات القول القديم برضه ( جنت علي نفسها براقش ) وبرضه نتفكر ( ولاتلومن الا نفسك ) ، بس ده ايه ، في حاجه تخصك انت ، اللي يخصك براحتك ، تجني علي نفسك زي براقش ، تلوم نفسك ، براحتك ، لكن في اللي يخصنا ، كلنا شركاء في براقش !!!

لانها لما بتطبل بتطبل علي راس الكل !!! اذن في موضوع يخصنا كلنا محدش يقولي ماهو كل واحد بيتعلق من عرقوبه ، لان عراقيبنا كلنا مربوطه في بعض ، واللي حيتعلق حياخدنا معاه ، اذن حرصا علي عراقيبنا ولغالينا ، في عالم السياسه لازم كلنا نفكر !!!!

ماعلينا .....................
انا مابفهمش في السياسه
وواقفه علي الشط ابلبط
وعقلي في راسي وباعرف احس دراميا ....
والبيض اللي يتسلق مايرجعش ابدا بيض ني !!!!
وعراقيبنا كلنا مربوطه في بعض ومحدش حيتعلق لواحده من عرقوبه ، لا كلنا يانعيش عيشه فل يانموت احنا الكل !!!

( سكه اللي يروح مايرجعش )

دي المقادير ، قصدي المعايير اللي وانا باكتب حالجأ اليها كل شويه ، اصل النصيبه اني مش عارفه انا حاكتب ايه بالضبط ، وده قالقني ، صحيح انا عاده مش باعرف حاكتب ايه والحروف بتجرني من رقبتي وراها ، لكن عاده بتبقي المداخل بتاع الكتابه اجمل والطف من المدخل المنيل اللي انا دخلته ده ، هذا المدخل بيفكرني بحدوته ستي لما كانت تقولي ( سكه السلامه وسكه الندامه وسكه اللي يروح مايرجع )

المدخل اللي ابتديت بيه النوت ده فكري بسكه اللي يروح مايرجعش ، واوعي تقولي يروح فين ، لاني بحقيقي مش عارفه ، جاير يروح في الوبا زي هنادي ، وجايز يروح يجيب الديب من ديله زي فؤاد المهندس بس مايلاقيلوش ديل وجايز يروج يجيب طابعه بوسطه ومايرجعش ، اذن انا وانت في سكه اللي يروح مايرجعش !!!
المقدمه طولت والافكار هربت وبقيت خلاص في حيص بيص !!!

( charchez la femme )

المقادير والمعايير اه ، نسيت اقول حاجه مهمه جدا ، ان الفرنساويين الخبثاء قالو زمان ( charchez la femme) وقالوا كده امتي لما كان يحاولوا يعرفوا قرار اي موضوع ، او سبب اي مصيبه ( شيرشي لافام - charchez la femme ) ...

ابحث عن المرأه ، باعتبار ان المرأه هي سبب كل المصايب ، وده خلافي منهجي بيني وبين الفرنساويين ، لكن مش موضوعنا دلوقتي ، انا دايما افتكر هذا المثل لما اجي ادور علي ال( femme) اللي خلت فلان يعمل كذا ، او خلت فلانه تقول كذا ، ال( femme) هي الدافع وهي العلة والمبرر واحيانا المحرض !!!

( الدين لله والوطن للجميع )

اه كمان عايزه اقول حاجه مهمه .... ههههههههه علي فكره باقول علي كل كلام مهم ، متواضعه جدا الحقيقه ودي صفه باقفشها في نفسي لما باجي اكتب او اتكلم ..... كل اللي اكتبه او اقوله مهم .... ودي غالبا عقده نفسيه لكن مش مهم كلنا معقدين والحمد لله وعادي متعايشين مع عقدنا ، لكن دي عقدتي انا مش عقدتكم انتم ، اذن عادي ، مش لازم تشوفوا اللي انا بقوله مهم مهم فعلا !!!

********* انا اؤمن جدا بان الدين لله والوطن للجميع ، ، اذن انا الحقيقه وبقوه ضد الدوله الدينيه ، اي دوله دينيه ، اي دوله تقوم وتحكم علي اساس ديني اسلامي او مسيحي او يهودي ، وضد اي تسييس للدين ، وضد ممارسه السياسه من منطق ديني ، لان اولا الدين لله ولان كل واحد حر في علاقته بربه وهو في النهايه حيحاسبنا كلنا ،و ثانيا لان بحر الدين واسع بالنسبه لكل الاديان ، مدارس فقهيه واختلافات واجتهادات وسلفيين ومحافظيين ومتنوريين وقصه يطول شرحها ، ولان حتي الناس اللي كلهم واقفين علي ارضيه دينيه وبيقولوا مرجعياتنا دينيه ، الناس دول وهم بيتختلفوا في الامور السياسيه بيتختلفوا لحد التكفير ، وهو امر مخيف ، ليس من حق احد يكفرني لا انا ولا غييري ، وليس من حق احد يحاسبني علي افكاري التي تختلف مع افكاره بمنطق اقترابها وابتعادها من الدين حسب وجهه نظره هو شخصيا فيما يراه الدين الصحيح !!!!

اؤمن ان الدين لله والوطن للجميع ، واومن ان المصري المسيحي اقرب لوطنيتي من الماليزي المسلم ، اه الماليزي المسلم مسلم زيي والفرنساوي المسيحي مسيحي زي ملايين المسيحيين عندنا ، لكن في الوطنيه المصريين اقرب للمصريين من الماليزي او الفرنساوي ، ايضا لاني اومن اننا مسلمين واقباط نشكل نسيج المصريين معا ، وبالتالي لما قالوا طظ في مصر قلت طظ فيك انت واللي يتشدد لك ، ولما قالوا الاقباط مواطنين درجه ثانيه ، قلت هذه ليست مصر التي نعرفها والتي عاشت وتعايشت سنوات طويله بلا تفرقه بين مواطنيها علي سند من الهويه الدينيه وقلت هذا كلام غير مقبول وكلام يفترك البلد كلها من فوقها لتحتها ونتيجته الوحيدة طائفيه وحروب اهليه وكوارث ربنا يكفينا شرها !!!

الحقيقه كمان ربنا سبحانه وتعالي قال لنا الصح وقال الغلط وقال كل واحد يختار وقال االثواب والعقاب و قال الجنه والنار ، اذن يابشريه ، مش من حق حد يتكلم باسم ربنا ولا يتصور انه حيحاسبنا مبكرا بداله ولا انه يهدينا ، وده اساس الايمان واساس الحساب والعقاب ، كل واحد يختار وكل واحد يتحاسب ، ده في الدين ...

لكن في السياسه القواعد مختلفه والمعايير مختلفه ، ومن حقنا نختلف ونتفق ونتخانق ونقترب ونبعد ، ونقول ده صح وده غلط ، وبعض الناس تتطرف وتقول ده خائن وده عميل ، وبعض الناس تتطرف اكتر وتجرد بعض من الوطنيه وتجرد بعض من الانتماء ، وهي جميعها سلوكيات يعني انا مابحبهاش لكن في النهايه في عالم السياسه ممكنه ومتصور حدوثها!!!


ليه بقول الكلام ده ، لان الناس بقت بتنسي اساسيات كتيره كان مفروض انها اساسيات وخلصنا منها ، احساس الناس بالعجز واحساس الناس بالقهر بيخليها احيانا تتحمس لحاجات ولمواقف ضد اختياراتها اساسا ، من منطق اي حاجه احسن من مافيش ، لا اي حاجه مش احسن !!! اي حاجه احسن من مافيش منطق يودي الدنيا في داهيه ، لا اي حاجه ده ممكن يخدعنا وبعدين يودينا سكه اللي يروح مايرجعش وبعدين الدنيا تبوظ وعلي ما نفوق ، تكون البيضه بقت مسلوقه وخلاص!!!!

( فرق تسد )

( شعار استعماري قديم )

ولاني اؤمن جدا ان شعار ( فرق تسد ) هو شعار استعماري قصد منه تفتيت وحده مجتمعاتنا ، والفرقه قد تاتي دينيه (مسلمين واقباط ويهود) او( دينيين ولا دينيين ) وقد تأتي مذهبيه ( سنيين وشيعه ) وقد تأتي عرقيه ( مصريين ونوبيين وبدو ) وقد تاتي من بوابه القوميه ( عرب ، بربر ، فراعنه ، اكراد ، بدو ) وهكذا ...

ولاني اومن دائما ان الاستعمار اي ماكانت البرنيطه او العمه او الطرطور اللي لابسه علي راسه واي ماكان اللغه اللي بيستخدمها واي ماكان لون وشه ابيض ولا احمر ولا اسود ولا اصفر ، في الاول وفي الاخر قصده يستغلنا ويسرقنا وهو عارف كده وعارف اننا عارفين كده وعارف اننا مهما سكتنا مش حنسكت علي طول ، فدايما قبل مانقوم بعد مانفوق من خبطته الاولي ولا العاشره ، بيحاول دايما يلهينا في حاجات تانيه ، اهمها انه يخلينا نتخانق مع بعض ، مين احنا ومين بعض ، حسب كل حاله وكل موقف ، المهم اننا نتخانق ونكسر بعض ببعض ، وهو طبعا يقعد يتفرج ويحوش بينا وفي الاخر لما نتضعض خااااااااالص يخش هو بقي يهبر في الهباير ويلغ في الفته اللي هي اوطانا وثراوتنا و.....الي اخره !!!

واؤمن ان قضايا الوطن قضايا بلا دين تخص كل الوطن ، وان صبغت بصبغه دينيه ، دخلنا في معارك جانبيه ، تضيع القضيه وتفسدها ، لان الجمهور حينقسم حول " دينيه القضيه " رفضا وقبولا بصرف النظر عن موقفه من القضيه نفسها !!! كلام غامض ومش مفهوم !!!!

( الصليبيين والحرب المقدسه !!!! )
فنتذكر التاريخ !!!!

طيب ، لما الصليبيين جم ( من وجه نظرهم ) يحرروا بيت المقدس ، العرب مادخلش عليهم الفيلم ده لا مسلمين ولا مسيحين ، قالوا ده استعمار واحتلال وعلي راي صلاح الدين الايوبي ( فلتدق طبول الحرب ) ....

محدش اتخم لما رفعوا رايات الصليب فوق خوذات الجيوش محدش اتخم ان غرضهم الاصلي كنوز الشرق ، لكن لابد من بيع الفكره للمحاربين بطريقه مغريه ، ماهو مش معقول جيوش اوربا كلها تيجي تحتل بلادنا واللي يعيش يعيش واللي يموت يموت علشان ام كنوز الشرق ، لازم يكون فيه فكره براقه اكتر ، فكره ايمانيه عظيمه ، وهي تحرير بيت المقدس وقبر السيد المسيح من ايدي المسلمين ، ووووواو ، فكره فظيعه براقه جدا ، اذن الحقوا ياابناء المسيح قبر المسيح ، وطبعا لان ابناء السيد المسيح في قلوبهم ايمان ولان معظم تلك الجيوش كانت فلاحين وحطابين علي راي ( فيلم صلاح الدين ) وشباب صغير وناس جهله ، فبس ، لبسوا هدوم الحرب وحطوا الخوذ وركبوا البحر وسابوا بلادهم واسرهم واطفالهم وادعوا لينا احنا رايحين حرب مقدسه ، نحرر بيت المقدس وقبر السيد المسيح !!!!

طبعا هما ، اقصد الملوك والامراء وفرجينيا الجميله ، هما كانوا كذابين وعارفين انهم كذابين ، وعارفين انهم - بلغه السياسه - بيضللوا الناس وبيستغلوا مشاعرهم الدينيه ويأججوها ، حلوه يأججوها دي ، وانه بيدفعوا بيهم في حرب لاهي مقدسه ولا نيله ، وكل المقصود بيها سيطره واستغلال ومصالح اقتصاديه ونفوذ والسيطره علي كنوز الشرق وطرق التجاره ، لكن وهما كذابين وعارفين انهم كذابين ، كانوا بيخطبوا بحماس وبقوه وبصوت عالي وعروقهم تنفر وصوتهم يرتعش من شده الايمان ، والناس تعيط وتصدق وتودع عيالها اللي رايحين يموتوا ، لكن كله في سبيل بيت المقدس وقبر السيد المسيح يهون !!!!

هما كذبوا وصدقوا نفسهم ، لكن مافيش عربي صدقهم ، ليه ، لان الغشاوه الدينيه والابتزاز الديني والتلاعب بالمشاعر الدينيه ماكانش شغال معانا ، كان العرب شايفين ان القصه احتلال حتي لو لبس برنيطه الدين والدفاع عنه ، كانوا العرب شايفين المدافع والابراج والمواد الحارقه القاتله المستهدف بيها بلادهم من ورا الرايات الللي مرسوم عليها الصليب ، الفيلم كله العرب ماصدقهوش ، ولما بقول العرب باقصد مسيحيين ومسلمين ، ولو كان واحد مسيحي عربي وقتها طلع وقال ياجماعه صدقوهم دول رافعين رايات الصليب ، كانت الناس ضربته بالجزمه ، لانه اعمي القلب والبصيره ولان مش قادر يميز الاستعمار والاحتلال ولانه اتخدع بالاكاذيب !!!

لا وكان العرب وقتها اعتبروه خاين للعروبه وللاوطان ، ماكانوش حيدوا له عذر انه مسيحيي ومتعاطف مع رايات الصليب ، كانوا حيقولوا له لا ، تبقي مسيحي حاجه وتغزق عينك وتشوف الغزو حرب مقدسه ودفاع عن الدين حاجه تانيه ، تبقي مسيحي وقبطي علي راسنا من فوق ، لكن تبرر لغزو بلادنا تحت الشعارات الدينيه ورايات الصليب تبقي خاين مش للدين لا للوطن !!!

الدنيا كانت واضحه جدا وسهله خالص !!!!!!!! ولانها واضحه وسهله ، العرب هزموا الصليبيين ( المستعمرين الغازين) وكانت الجيوش العربيه من المسيحين والمسلمين ، محدش قال المسيحين لا لحسن يتأثروا برايات الصليب الغازيه ، لان المعيار كان الوطنيه وكان الجميع مسلمين ومسيحيين كاملي الوطنيه والولاء لبلادهم بصرف النظر عن دياناتهم وعن ايمانهم ............. طيب .......................... ليه بارجع للتاريخ !!! لانه مليان عبر ودروس ، لان احداثه خلصت واحنا براها وبعيد عنها ، نقدر نشوف ونفهم ونحلل واحنا بعيد ، نقدر نحكم بجد !!! واحنا بعيد ومشاعرنا وعواطفنا في التلاجه ، ليه لان التاريخ عدي وخلص وايامه عدت واحداثه خلصت !!!!

طيب ............ نعتبر موضوع الصليبين ده مساله محلوله لانها خلصت وبانت واتضحت ابعادها !!!
لما ندور علي ( femme) في موضوع الصليبين ، حنلاقي ان ( femme ) واضحه جدا ، هي كنوز الشرق والمصالح الاقتصاديه والسيطره علي طرق التجارة ، صحيح ( femme ) هنا لبست طاقية الحرب المقدسه والدفاع عن الاراضي المقدسه واسترداد قبر السيد المسيح من ايدي المسلمين ، وهو كلام كبير وتخين ومثير للمشاعر الدينيه ، لكن الطاقيه دي ماخالتش علي العرب وفضلوا شايفين ال ( femme علي حقيقتها !!!

لو كنا ، بمعني العرب ، صدقنا ، الطاقيه اللي لبستها الجيوش الاوربيه الغازيه علي راسها علشان تخفي اغراضها الحقيقيه ، لو كنا صدقنا ان المقصود الحقيقي هو الدفاع عن المقدسات المسيحيه لو كان المسيحين والاقباط العرب صدقوا الفيلم ده ، ودخلت الجيوش وقعدت وبرطعت في بلادنا واستولت علي كنوز الشرق وسيطرت علي طرق التجاره ، كانا دخلنا في طريق اللي يروح مايرجعش وكانت البيضه اتسلقت وانتهينا ، لو جه بقي بعد كده ناس قالت الحقوا ده استعمار الحقوا ده احتلال ، كانوا قالوا اه المسلمين متغاظين من المسيحين ويمكن حد يتحمس ويقولك - من باب اشعال الفته - الحق ده المسلمين حيهدوا قبر المسيح ، الحقوا دول بيعتدوا علي علي المقدسات المسيحيه وطبعا لازم كان ساعتها المسيحين حيدافعوا عن قبر السيد المسيح - اللي محدش اساسا قرب له - ويالا تقوم شبطه وفين يوجعك والجيوش الغازيه قاعده تضحك علي العرب اللي اتفرقوا وانقسموا وبيتخانقوا واتلهوا علي عينهم مع بعض ونسيونا ونسيوا الاحتلال !!!!
لكن زي ماقلت من الاول الفيلم مادخلش علي حد والعرب حاربوا وحرروا بيت المقدس و............. الباقي انتم عارفينه من كتب التاريخ!!!!!

دروس وعبر !!!!
فلنتذكر التاريخ البعيد والقريب

**** لما قامت خناقه الحمار المالطي في اسكندريه ، كان الاسطول الانجليزي بالصدفه واقف قدام المدينه ، ولما الحمار المالطي صرخ وقال حقوق الاجانب بتتعرض للخطرفي مصر ، احتلت انجلترا مصر 70 سنه !!!!
حمايه حقوق الاجانب كانت هي الذريعه والبرنيطه اللي لبسها الاسطول الانجليزي لاحتلال مصر باعتباره ياحرام قلبه رهيف ومايقبلش الاعتداء علي حقوق الاجانب ، لكن ال(femme ) كانت احتلال مصر ونهب مواردها والسيطره علي قناه السويس .... والباقي انتم برضه عارفينه في كتب التاريخ ...........

*** لما حصل الفتح العثماني لمصر ( وانا الحقيقه باقف جامد جدا قدام موضوع الفتح ده ) وبقت مصر ولايه عثمانيه تابعه للباب العالي في الاستانه ( حتي الغي مصطفي اتاتورك الدوله العثمانيه ونقل العاصمه لانقرة 1923 ) وبقي فيه حاجه اسمها ( والي مصر ) خاضع للسلطان ، وقتها قالوا ده فتح عثماني لان دول مسلمين !! وانا الحقيقه مش موافقه لانه كان احتلال لمصر حتي لو كان رافع ايه اسلاميه ، لان احنا اتفقنا ان رفع الرايات الدينيه لايلغي الاحتلال ، والا السعوديه النهارده تفتح مصر وبكره مصر تفتح ايران وبعد بكره ايران تفتح ماليزيا ، لا احنا مااتفقناش علي كده ، مصر مصر وتركيا تركيا ، مصر تفضل مصر ولما يجيي العثمانيين يخشوا مصر بجيوشهم ويحتلوها مايبقاش فتح ، ولما الراجل العثمالي يقوم انا خليفه المسلمين هو حر ، لكن لاحد نصبه خليفه ولا اداه الخلافه ولما يضم بلدنا لخلافته ، يبقي احتلنا حتي لو كان تحت اسم وباب الخلافه !!!! ولما جه سليم الاول واحتل مصر ، او فتحها ، فكر في مصالحه ومصالح بلاده ، مافكرش في مصر ، ولما جمع العمال المصريين المهره ووداهم الاستانه علشان يتشغلوا هناك ، مافكرش في حاله الصناعات المصريه والتدهور اللي حيصيبها لما سحب منها العماله الماهره ، انما فكر في الاستانه وتطوير صناعاتها اليدويه عن طريق استيراد الخبرات من العماله المصريه ، والعماله المصريه اللي راحت طبعا ماراحتش بكيفها ، يعني ماكانتش رحله سياحيه فول بورد ، لا كان اوامر سلطانيه محدش يقدر يقول لها تلت التلاته كام !!!
وطبعا كلنا عارفين ان العثمانيين دخلوا مصر بعدما انتصروا علي السلطنه المملوكيه وانهم في بدايه عهدهم في مصر واجهوا تمردات مملوكيه وثورات من قبائل البدو وفي الحالتين تم قمعهم بمنهي الشده ............... وفضلت مصر تابعه للخلافه العثمانيه لغايه مالخلافه العثمانيه شخصيا اتلغت علي ايد اتاتورك مؤسس دوله تركيا الحديثه !!!!

*** طيب لما جمال عبد الناصر ، امر برحيل قوات الطواريء الدوليه من خليج العقبه ( غالبا العقبه ) في مايو غالبا 1967 ، اسرائيل اعتبرت ده عمل عدائي ضدها ، وطبعا اسرائيل كانت بتعتبر اي حاجه تحصل في مصر من اول ان بواب عمارتنا يخلف لغايه صواريخ القاهر والظافر وانشاء مصنع الحديد والصلب في حلوان ، بتعتبر دي اعمال عدائية ضدها ، ولان اسرائيل زي مااتعلمنا هي مخلب القط بتاع امريكا في المنطقه العربيه ، فطبعا كان يهمها الدفاع عن وحمايه المصالح الامريكيه في المنطقه ، وعبد الناصر كان مضايق الامريكان وعامل اختراعات اشي دول عدم الانحياز واشي تحرير افريقيا واشي دعم ثوره الجزاير واشي حرب اليمن ( بصرف النظر عن رايينا او تقييمنا للحاجات دي ) وكان رافض يخش معاهم في احلاف زي حلف بغداد وغيره ( زي ماكان مكتوب في كتب القوميه العربيه بتاعت سنه رابعه ابتدائي ) باختصار كان قارف الامريكان ورافع شعار ( ارفع راسك يااخي انتهي عهد الاستعمار ) ، طيب هي اسرائيل كانت محتاجه سحب ورحيل قوات الطواريء الدوليه علشان تضربنا في يونيو 1967 ، لا هي كانت حتضربنا حتضربنا ، لكن عبد الناصر سحب قوات الطواريء ، سحبها ليه معرفش ، غالبا برضه اتزق علي كمين ، علشان يسخن ويؤمر برحيل قوات الطواريء الدوليه ، هو خلق الذريعه اللي اسرائيل مسكت فيها بايدها وسنانها وهاتك ياعياط ، عبد الناصر سحب قوات الطواريء عبد الناصر حيضربنا ، رغم انهم طبعا كانوا عارفين حاله الجيش وعارفين ان المشير عبد الحكيم كان متجوز مها صبري ومش فاضي خالص لا للحرب ولا لغيرها وان عبد الناصر بيثق فيه ومسلمه الجيش ومفتاح الكرار ، ماعلينا هوب ، احتلال سينا والجولان والضفه الغربيه !!!!

طيب سينا افهمها باعتبار عبد الناصر سحب قوات الطواريء الدوليه لكن الجولان والضفه الغربيه ليه ، اهو كده بالمره بقي بلاش وجع قلب في الزحمه ، اهي ذريعه هنيه تكفي ميه !!!
الذريعه ..... سحب قوات الطواريء الدوليه ، اللي معرفتش خالص ليه اتسحبت ، مين اللي سخن عبد الناصر يعمل كده ، ( femme ) هي احتلال سينا وضرب مصر واضعافها وتقليص الدور المصري والهيصه اللي عاملها مصر بين العرب وافريقيا وحركات التحرر الوطني ودول عدم الانحياز والحياد الايجابي والتمهيد لزياده الدور الامريكي في المنطقه باعتبار اسرائيل ابنتها بالتبني وليها كلمه عليها ، وضرب واخرج الاتحاد السوفيتي من المنطقه اللي كانت دخلته مصر عندها في الجزاير وفي العراق باعتباره بيسندهم ويسلحهم في مواجهه امريكا ، استمرارا للحرب البارده وتقسيم العالم لمعسكرين ودول مواليه وتابعه لهذا المعسكر او ذاك !!!

**** لما العراق قامت من النوم الصبح وقررت تحتل الكويت ، لان الكويت الشريره بتفسد اقتصادها في الاوبك وبترخص سعر البترول ، ودخل الجيش العربي العراقي الكويت واعلن انها المقاطعه رقم 19 في العراق ، انا شخصيا قلت صدام حسين اتنصب له كمين ، امريكا دخلته الكويت علشان يحتلها ، علشان بعد كده كله يصرخ امسك صدام الراجل المفتري اللي احتل الكويت واعتدي علي سياده الدوله المستقله ، وطبعا الكوايته قعدوا يصرخوا الحقونا ياناس دولتنا اتسرقت منا والخريطه اتلغت ، ولان مستر بوش الاب راجل حنين وسمعه رهيف ، سمع الكوايته وهم عمالين يصرخوا ، انا في وادي وبلادي في وادي ، انا في وادي وفلوسي في وادي ، مستر بوش الاب علي طول قلبه اتأثر وحنيته قامت عليه وهوب ، عمل تحالف دولي لتحرير الكويت ، وهيلا هوب هيلا هوب ، حرر الكويت ودخل العراق وعاقبها والادب سيد الاخلاق ، ولان صدام بعد ما وقع في الكمين قعد يزعق ، لانه احس بالكمين والمؤامره عليه ، قعد يزعق ويهدد الامارات والسعوديه ( اللي كانت اراضيها مقر جيوش التحالف المشتركه ) انهم حيضربهم ويحتلهم ، ويمكن ضرب صاروخ او حد ضرب باسمه صاروخ علي السعوديه ، المهم الخليج كله كان بيصرخ الحقنا يابوش انجدنا يابوش ، ولان بوش الاب حنين قوي ، قرر اولا يحارب لتحرير الكويت طبعا علي حساب الكويت اللي دفعت الفاتوره تالت ومتلت ، وكمان قرر يفرض حمايته علي الخليج المهدد من صدام ودخلت الجيوش وماخرجتش ، وقطر بقي فيها قاعده عسكريه للامريكان ، علشان لما الحنان الامريكي يفيض ، مايضطروش يجيوا من امريكا البعيده ، انما ينطوا في ثانيه من قطر القريبه ، وكل الخليج سدد فاتوره الحرب وفاتوره الحمايه والجيش الامريكي دخل الخليج وماخرجش وكله علي حساب صاحب المحل ، والبترول العربي الخليجي عمال يسدد فاتوره تحرير الكويت والشيء لزوم الشيء !!!

في حرب الخليج الاولي كانت الذريعه لقوات بوش الاب لدخول الخليج وخوض الحرب هي تحرير الكويت الغلبانه اللي احتلها صدام المتوحش لكن ال ( femme ) كانت دخول الخليج والسيطره علي منابع البترول واستنزاف الخليج العربي الغني بسداد فاتوره الحرب الي ابد الابدين وبقاء الجيوش الامريكيه في المنطقه حمايه للمصالح الامريكيه !!!

مش بس كده ، لا كمان الذريعه دي اتخلقت بالعمد !!!
يعني صدام يخش الكويت علشان الكويت تستغيث علشان امريكا الحنينه تستجييب وتبعت الجيوش و............. الباقي انتم عارفينه !!!

*** طيب .... لما بوش الابن بقي ، اكتشف ان صدام حسين عنده اسلحه محرمه دوليه وقنابل نوويه ، ولجان التفتيش النوويه راحت مره واتنين مالقتش حاجه ، بوش الابن كان قلقان قوي علي الكوره الارضيه اللي بيهددها صدام حسين المجرم باسلحته اللي محدش لاقيها ، ولان الكبير كبير ، مش معقول بوش الابن ينام ويشخر ويسيب العالم مهدد بقنابل صدام ، ولان لجان التفتيش فاشله ، ومش لاقيه حاجه ولان الاقمار الصناعيه عارفه امكان الحاجه المستخبيه وعارفه القرد بيخبي ابنه فين ، قرر بوش الابن يضحي ويجي علي نفسه ويبعت جيوش تحرر العراق من صدام المجرم الطاغيه واحتضنت المعارضه العراقيه من اول الاكراد والشيعه لغايه الشيوعين بالاعلام الحمرا ولابد من ديمقراطيه في العراق زي العالم الغربي المتحرر ولابد من العثور علي القنابل والاسلحه المحرمه دوليا علشان العالم القلقان يعرف ينام ويشخر في هدوء ، صحيح اسرائيل عندها قنابل نوويه لكن مش مهم مابتهددش العالم ، صحيح باكستان عندها قنبله نوويه مش مهم مابتهددش العالم ، صحيح الصين عندها لكن الصين عضمه ناشفه علي سنان بوش وامريكا كلها ، صحيح كوريا عندها لكن كوريا فزت في بوش فاتخض وقرر مايقربش من كوريا تاني ، فاضل مين فاضل مين ، اه فاضل صدام حسين ، وهوب ، الطايرات تضرب ( وكانت قايمه من القاعده العسكريه في قطر ) والصوارييخ ترخ علي بغداد والعراق زي المطر والجيوش البريه دخلت من الكويت ومن قطر ومن كل بقعه شريفه في العالم ضد الاسلحه المحرمه دوليا ، واديها ضرب ياجدع ، والجيش العراقي انهزم او جري ، وصدام حسين اختفي وانتصرنا انتصرنا ، والشيوعين العراقين ركبوا الدبابات الامريكاني اللي حررت العراق ورفعوا عليها الاعلام الحمراء وتحيا الديمقراطيه الامريكيه في العراق !!! اصل امريكا ودباباتها بيدافعوا عن حقوق الانسان والديمقراطيه !!! ومااجمل الاستقواء بالخارج !!!!

الذريعه ، فيه اسلحه محرمه دوليا بتهدد امن العالم وصدام حسين راجل متعنت ومش متهم بامن العالم ، ذريعه اتخلقت علشان يبقي فيه مبرر نضرب العراق بالطايرات والدبابات والصوارييخ الموجهه ويبقي فيه مبرر للحرب والتدخل في شئون العراق وتغيير نظامها السياسي بالقوه العسكريه ..
اما ( famme ) الحقيقيه هي احتلال العراق والاستيلاء علي بترولها وعلي راي بعض القوميين واضعاف العرب باخراج دوليه عربيه قويه من ساحه المواجهه مع اسرائيل ( انا شخصيا مش متأكده من الكلام ده برضه كان بيتقال ) باعتبار ان احتلال العراق تم ايضا لصالح اسرائيلي اللي سبق وضربها صدام حسين بصاروخين ايام حرب بوش الاب !!! ( ملحوظه مهمه - محدش يقولي ليه بنقع في الكمين دايما ، معرفش والله ، لكن غالبا ده اللي بيحصل ، كمين يتنصب لينا نقع فينا نخلق ذريعه والذريعه تدخلنا في حرب والحرب تحقق مصالح ناس تانيه غيرنا وندفع احنا تمنها ) ....

( لعبة البلياردو !!!! )

اه والنبي نسيت اقول حاجه كمان ، كان مفروض اقولها فوق وانا باشرح المقادير ، المعايير اللي بافكر علي اساسها وبيها ، هي لعبه البلياردو !!!
و البلياردو دي لعبه مابفهمش فيها خالص ، ماعرفش بيعملوا ايه ، ولا ايه القواعد اللي حاكماها ، كل اللي اعرفه ، ان اللاعب يخبط كوره تقوم الكوره تخبط في كوره تانيه في تالته في رابعه في الخرم ( في الجون ) !!! ا
للاعب البارع في البلياردو عمره مايخبط الكوره تخش الجون علي طول ، لا براعته تبان لما يخبط كوره في كوره في كوره !!!!

وتلاقيهم منفعلين قوي وهم بيرزعوا في الكوره تقوم ديه خابطه ديه خابطه دي وهكذا ............. الانفعال مرتبط غالبا بالبراعه ، لانه بيخبط حاجه بعيد فتخبط غيرها وغيرها وغيرها وجووووووون !!!
وفي فيلم صراع في الوادي كان الباشا زكي رستم مع فريد شوقي الشرير بيلعب بلياردوا !!! يخبطوا الكور في بعض ، يغرقوا القصب وبعدين يعملوا حنينين حيعوضوا الفلاحين وبعدين يقتلوا الشيخ ويلزقوها في عبد الوارث عسر ، وبدل ماعمر الشريف يعرف ينقذ ابوه من المشنقه سليم يطارده لان تار سليم عنده و............. كوره في كوره في كوره في كوره في الجون !!!!

واذا كان لعيبه البلياردوا بيعرفوا يخبطوا كوره في كوره في الجون ، فالسياسين والحكام وقاده الجيوش اكثر براعه ويعرفوا بلياردوا بالسليقه وبالفطره دفاعا عن مصالحهم !!!! يعني لما ابقي عايز احتل منابع البترول في العراق ، مااخشش زي الطوربش كده احتل العراق ، فالناس تقول يع ده مستعمر يع ده محتل ، لا الكلام ده بطل من زمان ، اخبط اول كوره صدام يخش الكويت ، تاني كوره الكويت تصوت الحقونا ، تالت كوره حنحرر الكويت ، رابع كوره حنخلينا قاعدين علشان نحميكم من البوبع صدام حسين ........... جوووووووون !!!! وهكذا !!!!!!1

علشان كده لما اجي افكر في السياسه ، اتابع الكور ، مين خبط ايه وراحه فين ، واللي راحه فين دي حتخبط ايه ..... وفين الجون !!!! ماهو انا مش ساذجه علشان افكر ان الدول والمعاهد الاستراتيجيه واجهزه الاستخبارات مابيعرفوش يلعبوا بلياردوا ، لا بيعرفوا واساتذه وخبرا كمان !!! وحياتنا كلها فوق ترابيزه البلياردو !!!!!!!!! وحياتنا احنا سعادتكم ، احنا وغيرها هي الكور اللي بتقعد تخبط في بعض علشان هما يجيبوا جوووووووون !!!

وعلي فكره ، مش لازم اتكلم عن امريكا البوبع ، ولا اسرائيل ام رجل مسلوخه ، لا ساعات اللي يلعب البلياردوا اضعف خلقه ، صحفي في جرنان ، حزب سياسي ، جماعه حقوق انسان ، دوله لسه مكتوب اسمها علي الخريطه بحبر لسه مانشفش ، وطبعا دول بيلعبوا مع ناس من مستواهم ، عملا بنظريه كل برغوت علي قد دمه ، يجيوا علي اللي اضعف منهم وهاتك يارزع كور !!!
لكن قدام الاكبر والاقوي يسلموا الماتش والعصيان والكور واحنا محاسيبك وحبايبك !!!!
خلاص .... مهم قوي نشوف مين بيرزع انهي كوره علشان عايز يجيب جون من انهي كوره !!!
العمليه مش جهجهووووووووووووني !!! لان البلياردوا له قواعد تخطبيطيه عظيمه !!!

( الحدايه مابتحدفش كتاكيت !!!! )

يانهار اسود علي الرغي !!!!
عايزه ايه ياست انتي .................
عايزه اقول اني - في عالم السياسه - مابخدش اي حاجه بتحصل قدامي ببساطه وسهوله وطيبه قلب !!!
عايزه اقول ان اي حاجه بتحصل قدامي بافكر فيها كتير ، باحاول افهم بتحصل ليه ، بحاول افهم اللي بييعملوها بيعملوها ليه !!!
وطول الوقت ( charchez la femme) علي راي الفرنساويين !!!
فين ال (la femme) الهدف الحقيقي الدافع المصلحه !!!
كمان طول الوقت بادور علي ( خناقه الحمار المالطي ) الذريعه والمبرر علشان اللي بيحصل يحصل !!!
كمان طول الوقت اشوف مين حيشوط انهي كوره علشان تخبط انهي كوره علشان في النهايه يجيب جون !!!!
وراسي عنيده وبتزرجن ، ومابحبش امشي في القطيع ومابحبش سياسه العصا والجزرة ولا باحب اكذب علي نفسي ، لان برضه اللي بيكذب علي نفسه بيخش النار !!!

ولما باجي افهم بافتح عيني ومخي كويس علشان اشوف كويس ، لا الرايات الدينيه بتخمني ، ولا طيبه القلب والحنان بيأثروا في ، ولا باصدق ان الحدايه بتحدف كتاكيت ، ولا بتوجعني دموع التماسيح ولا اي كلام من ده !!!!

اي حاجه بتحصل قدامي ، بافكر فيها كتير ومن غير استعجال ، ليه من غير استعجال ، لاني بافكر لنفسي ، ونفسي يعني مش فارقه مع حد ، اي حاجه بتحصل قدامي بادور علي المصلحه بالنسبه لاطرافها ، مافيش في القانون دعوي بغير مصلحه ، ومن باب اولي في السياسه مافيش تصرف من غير مصلحه ، الدول والجيوش والجماعات السياسيه ما بتتصرفش من منطق الطيبه والقلب الحنين ، الدول والجيوش والجماعات السياسيه بتتصرف من منطق الدفاع من مصالحها وتكريسها وحمايتها ، وهي بتعمل كده بقي ترفع رايات دينيه ، ترفع رايات قوميه ، ترفع رايات مهلبيه كل واحده وراحته ، لكن الرايات المرفوعه دي بيكون الغرض منها الغلوشه واللخبطه وتخزيق العنين ، علشان مانشوفش الحقيقه فين ، ونتخم ونتخدع وناكل الاونطه وبالبالوظه !!!!!!!!!!

طبعا عادي جدا ، انا وانتم والتخين ناكل الاونطه والبالوظه والسم الهاري ، عادي جدا ، نتخم ويتاكل علي قفانا عيش وبطارخ ، لكن برضه الواحد لازم يحاول يفهم ، ممكن يفهم ، وممكن لا ، وساعات مايفهمش لكن يحس ، يحس انه مخنوق متضايق مش مستريح عايز يهرش ، فيصدق احاسيسه ويقولي اللي بيحصل ده مش عاجبني ليه معرفش ، لكن اكيد حاعرف !!!!!!!!!

( المهم ........ المهم )

المهم ..............................
غزه متحاصرة .... اسرائيل المجرمه محاصراها !!!
مليون ونصف فلسطيني محاصرين في غزه ، بيعيشوا اسوء واقسي الظروف الانسانيه ....
حماس هي الحكومه المنتخبه في غزه ، وحماس كانت ومازالت معترضه علي اتفاقيات اوسلو التي علي اساسها عاد ياسر عرفات والقياده الفلسطينيه واقاموا السلطه الفلسطينيه 1994 ، حماس معترضه لانها مؤمنه بالعمل العسكري ولاتؤمن بالتفاوض والاعتراف باسرائيل ، ماشي حماس حره في اختياراتها السياسيه والعسكريه ، حماس مختلفه مع السلطه الفلسطنيه وابو مازن لحد معروف للجميع ، مين غلطان مين مش غلطان فيهم مايخصناش ، المهم غزه محاصره ، مليون ونصف فلسطيني محاصرين اقسي انواع الحصار !!!!

طيب ..... مين يفك الحصار ؟؟؟؟ اسرائيل ، مش راضيه ، لانها ضد سياسه حماس اللي مازالت منتهجه المقاومه المسلحه ورافضه التفاوض ، اسرائيل بنت كلب ودوله عنصريه صهيونيه حقيرة ، لكن عندها القوه تفرض الحصار علي غزه ....
مين يفك الحصار .... حماس ، حماس نفسها طويل ومش مستعده تقبل مالم تقبله من اجل فك الحصار عن المليون ونصف فلسطيني والضغط علي اسرائيل من اجل فك الحصار بيدي حماس ارضيه سياسيه لان الحصار ظالم فعلا للمليون ونصف فلسطيني ....

طيب مين يفك الحصار ، مصر ، وهو فتح المعبر المصري يؤدي لفك الحصار عن شعب غزه ، طيب مصر مابتفتحش المعبر طول الوقت لاسبابها ، عاجبانا مش عاجبانا الاسباب برضه مش مهم ، لان معندناش قوه ، واقصد الرافضين لقرارات واراده مصر ، معندهمش القوه لاجبار مصر علي تغيير قرارها السياسي ... ده الواقع !!! عاجبنا مش عاجبنا هو ده الواقع !!!!

طيب فيه حسبه تانيه في الموضوع ، مش مجرد فلسطين واسرائيل ، لا فيه حسبه اسمها حماس ، اللي هي فصيل فلسطيني ذو مرجعيه دينيه اسلاميه ، وهو يعلن هذا ويفاخر به ، ده حقه برضه ومش موضوعنا ، وفيه في مصر جماعه الاخوان المسلمين ( المحظوره حاليا ) اللي هي جماعه معارضه للنظام المصري ، هي من حقها تعارض النظام ، وحماس الفلسطينيه بتنسق شغلها مع الاخوان المسلمين ، الاتنين واقفين علي ارضيه دينيه واحده ، وحماس بتشتم مصر لانها مش بتفتح المعابر والاخوان المسلمين بيشتموا مصر لمليون سبب من وجه نظرهم بما فيهم انها بتشارك في حصار ( الاخوه في غزه ) ....

دي كلها حاجات واقعيه ومتشافه ، يعني مش محتاجه ذكاء علشان الواحد يشوفها ، طيب الحكومه المصريه شايفه ان حماس كلما قويت ده حيدعم وجود وقوه الاخوان في المجتمع المصري وهو امر بتقلق منه الحكومه مش بس لا فيه ناس كتيره تانيه بتقلق من الموضوع ده ، لانهم مختلفين مع طرح الدوله الدينيه او الدوله ذات المرجعيه الدينيه اللي بيطالب وبينادي بيها الاخوان وده من حقهم برضه !!!

ولما حماس دفعت الفلسطينين الغزاويه لكسر الحدود المصريه ، وهو عمل اعتبرته الحكومه المصريه عمل عدائي ، الاخوان اعتبروا ان ده عادي لان من حق حماس تحاول تفك الحصار عن غزه حتي لو علي حساب الحدود المصرية ، ناس كتير من المصريين اعتبروا ان ده عمل عدائي ووافقوا الحكومه علي وجه نظرها وطبعا هما والحكومه اتلعن ابوهم علي السبحه لانهم مع حصار غزه حصار الشعب الفلسطيني الحصار غير الانساني ....

وبكده بقي الموقف كالاتي .... احنا ضد الحصار ، لكن شايفين ان فك الحصار مش حيكون عن طريق مصر ، وهما ضد الحصار ، وشايفين ان مصر لازم تفك الحصار من ناحيتها بصرف النظر عن اسرائيل ولو مصر مافكتش الحصار من معبر رفح ، نشتم مصر لانها بتشارك في حصار الفلسطينين في غزه ، في نفس الوقت نشتم مصر في المظاهرات اللي بيطلعها الاخوان في مصر ( اللي نفسهم يشتموا الحكومه ويكرهوا الناس فيه لالف مليون سبب غير موضوع غزه ومش حيلاقي فرصه احسن ولا اجمل من انها بتشارك في حصار الفلطسنين في غزه ) لكن في نفس الوقت بيكون في مظاهرات التضامن مع غزه والمطالبه بفك الحصار عنها مصريين كتير ضد اسرائيل وضد الحصار لكن في نفس الوقت مش مع حماس لا في مرجعيتها الدينيه ولا مع سلوكها مع السلطه الفلسطينيه .......... ماعلينا برضه ...

كثيرين في العالم ضد حصار غزه وكثيرين حاولوا ارسال قوافل طبيه وغذائيه لفك الحصار بتوصيلها للشعب الفلسطيني في غزه ، ينجحوا يفشلوا ، لكن بيحاولوا .....

( اسطول الحرية !!!)

وسط كل ده ................ يطلع علينا اسطول الحرية اللي يقرر يبحر في البحر المتوسط مستهدفا الوصول لغزه عن طريق البحر لفك الحصار وتوصيل المعونات الانسانيه لشعب غزه المحاصر !!!

طيب اسطول الحريه ده كان متصور حيحصل ايه بشكل واقعي ، متصور ان اسرائيل حتسيبه يجبرها علي فك الحصار عن طريق البحر ويكسر ارادتها بتوصيل المساعدات الانسانيه لغزه ؟؟؟؟؟

كانوا متصورين كده ، طيب وبانهي امارة ؟؟؟؟؟؟؟؟؟؟ تاريخ اسرائيل معانا ، هيبه المجتمع الدولي عليها ، انحياز امريكا لينا علي حساب اسرائيل ؟؟؟؟ طيب ماانوش متصورين كده ، طيب كانوا متصورين ايه ؟؟؟؟؟؟؟ بشكل واقعي بقي مش بشكل عاطفي والنبي !!!!

طيب كانوا متوقعين ان اسرائيل حتقاومهم حتستوقفهم حتعتدي عليهم ، وكده تبان للعالم كله انها مجرمه وانها مصممه علي حصار شعب غزه وانها ضد المعونات الانسانيه ، ماشي ، افهم انهم كانوا فاهمين كده ومستعدين لكده ، اسرائيل حتمنع السفن توصل باي طريقه والسفن حتزعق وتقول شايفين الاسرائيلين المجرمين ، بس حنقول الكلام ده لمين ، حنقول للمجتمع الدولي والمحكمه الجنائية الدوليه ؟؟؟ طيب هي اسرائيل من امتي بتعمل حساب للمجتمع الدولي ولا يفرق معاها المحكمه الجنائية الدوليه ؟؟؟ وتاريخ مذابحها الكثيرة مع العرب والفلسطينين قديم ، وشتمنا وشجبنا وادنا و............ السلام عليكم ورحمه الله وبركاته !!!

اذن ..... اسطول الحريه ، مفترض انه كان يعلم ان اسرائيل ستتصدي له وتقاومه وتدافع عن استمرار ارادتها في حصار غزه !!! ورغم كده مش فارق معاه المقاومه دي ، لان محاوله كسر الحصار عمل نضالي في قول وجهادي في قول اخر ومايفرقش معاه الصدام مع اسرائيل !!!! طيب برضه !!!!

اسرائيل وقعت في كمين ضرب اسطول الحريه ، اذا تصورنا انها وقعت فيه علي غفله ، والعالم كله صرخ وشتم وندد ، لان اسرائيل المجرمه ضربت اسطول مدني شايل مساعدات مدنيه واغاثه للمحاصرين ، كده تحقق الغرض من العمل الجهادي النضالي ؟؟؟؟؟ كده اثبتنا للمره المليون ان اسرائيل مجرمه !!! واثبتنا ان شعب غزه محاصر ، واثبتنا ان الناس بتحاول تكسر الحصار من باب الانسانيه ، لكن اسرائيل المجرمه ماتعرفش الانسانيه !!!!

كده الكلام بسيط وسهل .... وماتش البلياردو كده ممل ومتوقع وعادي ....

اسطول الحريه قام بعمل نضالي جهادي ، اول كره ، استفز اسرائيل ، تاني كوره ، اعتدت وهاجمت اسطول الحرية ، تالت كوره ، العالم كله ادان اسرائيل ، رابع كوره ، وازداد تضامنه مع غزه ............... جون !!!!
هو الجيم كده بس ؟؟؟؟ بسيط كده ساذج كده ؟؟؟؟؟؟؟؟؟
مش حارد بس حارجع للسؤال ده تاني بعدين .................

مال تركيا بقي ومال الموضوع ؟؟؟؟؟؟؟؟

هل تركيا هي الداعي والمنظم لفكره اسطول الحرية ؟؟؟ واقصد هنا تركيا الدوله ؟؟؟ ام تركيا حكومه حزب العداله والتنميه؟؟؟
واذا كانت تركيا منشغله لهذا الحد بحصار غزه ، كيف تضبط ايقاع التناقض بين هذا الاهتمام والانشغال الانساني بحصار غزه وعلاقتها باسرائيل تلك العلاقه المتميزه منذ سنوات طوييله كانت ومازالت ؟؟؟؟؟؟؟؟؟؟

منذ متي كانت تركيا مهتمه بالشأن الفلسطيني ؟؟؟ ام اهتمامها محصور بحصار غزه من منطق انساني ، ام دعما لحماس بما يفصح عن ذلك الدعم توافق فكري اسلامي بين الحزب التركي والحركه الفلسطينيه " الاسلامية " !!!!

والنبي اوعوا حد يقولي مش وقت الاسئله دي ، لان تركيا دلوقتي عايزه تفك حصار غزه وده موضوع مهم جدا ولازم نقف كلنا وراها وخلاص ، ليه ، لاني من حقي ومن حق كل الناس انها تفهم هو ايه اللي بيحصل بصرف النظر عن الحنيه والانسانيه ودموع التماسيح والشحتفه !!!!

طيب .... بصرف النظر عن الدوافع الدفينه لدي الاتراك والتي دعتهم للمشاركه في اسطول الحريه ، او للترويج لفكرته كما قالت بعض الصحف والمواقع ، مالذي كانت تتوقعه تركيا وهي دوله بها مؤسسه عسكريه قويه ولها نفوذ وقوه ، مالذي كانت تتوقعه تركيا من صديقتها الصدوقه اسرائيل وقت تري سفن اسطول الحرية تسعي لكسر الحصار الاسرائيلي علي غزه وفتح معبر مائي لدعم غزه وتوصيل المساعدات لها ، مالذي كانت تتوقعه تركيا من صديقتها اسرائيل ، هل كانت تتوقع ان تفتح اسرائيل للسفن والمواطنين الاتراك عليها ذراعيها وترحب بهم ؟؟؟؟ ام كانت تتوقع ان تقاوم اسرائيل تلك السفن بكل طريقه بلا روادع قانونيه او اخلاقيه او دوليه كشأنها دائما ؟؟؟

هل كان من ضمن حسابات انقرة ، ان تعتدي اسرائيل علي مواطنيها علي تلك السفن ؟؟؟ واذا كان هذا الاحتمال احد حسابات انقرة ، وقبلته ، ماهي المصلحه التي قدمتها انقرة علي حساب سلامه مواطنيها ، ماهي المصلحه الاهم التي تسعي اليها تركيا من وراء المشاركه في اسطول الحرية الي حد تقبل مجرد الفكره النظريه - او الواقعيه - بالاعتداء علي مواطنيها ؟؟؟؟

الحقيقه اني كمان وقفت قوي قوي ، قدام موقف الشارع العربي ، اللي اول مااسرائيل ضربت سفينه اسطول الحريه ، عمل حاجتين ، نزل شتيمه في اسرائيل وده طبيعي ومنطقي وعادل ومتكرر وعلي راي بعض الصديقات والاصدقاء شجبنا وشتمنا وادنا كالعاده وبس !!! الحاجه التانيه اللي عملها الشارع العربي انه نزل شتيمه في الحكام العرب ،كانه اكتشف الحكام العرب بسبب ضرب سفينه اسطول الحريه ، حاجه غريبه جدا ، زي مايكون شيتمه الحكام العرب بيريح العرب ، اللي هما بيشتموا الحكام وفي نفس الوقت مابيعملوش اي حاجه خالص لا مع فلسطين ولا مع شعوبهم ، لكن شتيمه الحكام العرب بتريح ، علي الاقل يبقي عندنا شماعه نريح نفسنا علي قفاها ، احنا مانعملش حاجه ، نشتم اسرائيل ونشتم الحكام العرب ونشتم السلبيه ونقطع وشنا بامواس القسوه والعجز وبس خلاص !!! كام ميت مره عملنا الفيلم ده وكام مره قلنا نفس الكلام !!! الحقيقه بمناسبه حصار غزه كانت مصر كل مره بتتشتم ، المره اتشتمت حبه صغييرن نسبيا وبعدين اول مالمعبر اتفتح ، الناس اعتبرت ده واجب علي مصر وخلاص ورجعت تشتمها تاني حبه صغييرين زي بقيه الدول والحكام العرب !!!!

الجديد المرة دي ، ان فجأ اردوغان رئيس وزراء تركيا بقي بطل العروبه والاسلام ، اول مااتضرب اسطول الحريه تحول من مجرد رئيس وزراء تركيا مهما الي بطل العروبه ( لان فلسطين عربية ) وبطل الاسلام ( ( لان اهلنا في غزه مسلمين ويلزم مناصرتهم - والحقيقه الموضوع ده حيرني بجد ، هم فعلا المليون ونصف مليون مواطن فلسطيني في غزه كلهم مسلمين ، ولا فيهم مسلمين ومسيحين؟؟؟ ولا لما الناس بتقول اهلنا في غزه مسلمين بتقصد حماس اللي هي الحكومه اللي بتحكم غزه وبتوصفها باعتبارها حكومه مسلمه علي اساس انها تمثل تيار ديني اسلامي ) وكمان بالمره ، هما المليون ونصف فلسطيني اللي محاصرين في غزه ، اخواتنا في العروبه اخواتنا احنا مسلمين واقباط ولا اخواتنا احنا المسلمين في الاسلام وبس !!!

اردوغان رئيس وزراء تركيا بقي بطل العروبه والاسلام ، لانه كمان زي ماناس كتير وصفته ( الراجل الوحيد اللي اتكلم ، وقال كلام جامد وقوي ) باعتبار ان بعض مواطنيه كانوا علي ظهر اسطول الحريه اللي اسرائيل ضربته ، وانا لما بقول مواطنيه باقصد متطوعين ، لااقصد وفد حكومي ولا وفد عسكري ولا جيش ، ولما المتطوعين دول مات منهم 9 اردوغان وجه حديث شديد اللهجه لاسرائيل ولما وجه حديث شديد اللهجه لاسرائيل بقت تركيا بطله وبقي هو رمز العروبه والاسلام ونزلت المظاهرات شايله اعلام تركيا يوم جمعه الغضب ضد اسرائيل لانها اعتدت علي اسطول الحرية !!!

وتحولت قضيه حصار غزه لقضيه اسلاميه فقط ، حكومه اسلاميه مقاومه رافضه التفاوض وشعب مسلم محاصر يسانده دوله اسلاميه ورئيس وزرائها المسلم الذي يرأس حزب اسلامي " معتدل " كما يصفوه !!!!
ياسلاااااااااااااااااااام ؟؟؟؟؟؟؟؟؟؟

( هو ايه اللي بيحصل بجد ؟؟؟؟؟ )

ايه التحولات الدرامية الفظيعه دي في الموضوع !!!!!!!!
اولا ......... قضيه فلسطين بالاساس كانت قضيه عربيه تخص كل العرب مسلمين ومسيحين ، وعمر ماحد قال لنا انها قضيه اسلاميه تخص المسلمين بس ، يمكن لما حماس انتخبت في غزه غيرت لغه الخطاب العربي للغه خطاب اسلامي ، هي حره تغير خطابها زي ماهي عايزه ، لكن احنا كمان احرار نفهم الموضوع ازاي ونشوفه ازاي !!! لان تحويل الامر لقضيه اسلاميه وفقط له تداعيات خطيره علي موقف ناس كتيره ( عرب وغير عرب ) من هذه القضيه !!!!

ثانيا ............. ايه حكايه تركيا دي !!! هي تركيا مش كانت ومازالت صديقه صدوقه لاسرائيل من قبل حكومه اردوغان ووقت حكومه اردوغان !!! هو مش فيه تنسيق عسكري ضخم بين المؤسسه العسكريه الاسرائيليه والمؤسسه العسكريه التركيه !!! وده كله معروف وثابت واي حد يعمل ( سيرش علي النت ) حيلاقي مليون معلومه تؤكد الكلام !!!

طيب هي مش اسرائيل اعلنت دولتها علي الارض الفلسطينيه سنه 1948 ، من ساعتها لغايه موضوع اسطول الحريه ، تركيا كانت فين وعملت ايه لصالح قضيه فلسطين !!! ولا هو الامر ان الحكومه التركيه المسلمه بتتضامن مع غزه تحديدا باعتبار شعبها شعب مسلم محاصر وباعتبار ان حكومتها المنتخبه حكومه اسلاميه وان هذا التضامن اخذ شكل تنسيق اسلامي بالاساس ( ارجوكم مراجعه ركاب السفينه التي ضربتها اسرائيل ، من هم ، ماهي انشطتهم السياسيه والعامه سواء الاتراك الجزائريين المصريين ...... الي اخره ) علي فكره انا عارفه ان السفينه كان فيها شويه مسيحين وكان معاهم قسيس بيصلي بيهم زي ماظهر في الافلام ، لكن وجودهم لايلغي مااقوله ، لانهم هما يعتبروا انفسهم يقوموا بعمل انساني واغاثه محاصرين من باب الانسانيه والاخرين معهم علي ذات السفينه يعتبروا انهم بيعملوا عمل جهادي تضامني اسلامي بين مسلمين محاصرين ومسلمين رايحيين يكسروا الحصار ويدعموا الحكومه الاسلاميه المحاصره والشعب المسلم المحاصر !!!!

طيب واذا كان الحكايه كده ، ان تيارات من الاسلام السياسي سواء التركي او المصري او الفلسطيني او الجزائري او غيرها قرروا من باب التضامن الاسلامي والعمل الجهادي الاسلامي التضامن مع شعب مسلم محاصر ومحاوله كسر حصاره لانهم - اي تيارات الاسلام السياسي اي ماكان اسمها الحزبي او المؤسسي او الجهادي - يروا ان القضيه اساسا قضيه اسلاميه ليس الا ، اذا كان الامر كذلك ، ليه مابيقولوش ده بصراحه ووضوح ، لان في النهايه وبمنطق المكسب والخساره السياسيه ، هم اللي حيقشوا في النهايه حصاد كل الحركه الغاضبه الاحتجاجيه اللي متصوره انها غاضبه ضد اسرائيل لحصارها مواطنين عزل في ظروف لا انسانيه بالغه القسوه ، طيب هما من حقهم يقشوا ولحسابهم حصاد كل تلك الحركه الغاضبه ، لكن ايضا من حق الغاضبين ان يفهموا هما غاضبين ليه واللي طالبوهم بالمظاهرات وحمسوهم لها وحرضوهم عليها مين هم ، يعني مانحطش طاقيه ده لده ونلخبط ابو قرش علي ابو قرشين ونلبس الناس مزيكا !!!

اذا كان كل مايحدث ليس الا اعمال اسلاميه جهاديه من بعض تيارات الاسلام السياسي لصالح حكومه اسلاميه وشعب مسلم محاصر ، علي من يقوم بهذا ان يعلن صراحه عن اهدافه ومستهدفاته علشان الناس التانيه تحدد مواقفها في ضوء ده وعلي اساسه !!! لكن اللخبطه المقصوده واستغلال مشاعر الغضب عند الناس وابتزاز مشاعرهم الدينيه و اللخبطه دي مش كويسه ومش صح !!!!

ثالثا ... ثم هي تركيا عملت ايه فعلا وواقعيا علشان تبقي بطل العروبه والاسلام ؟؟؟؟؟؟؟ مازالت تحتفظ بعلاقتها الخاصه المميزة الاقتصاديه العسكريه مع اسرائيل ويتبادلا الخبرات العسكريه ( اللي اسرائيل بتستخدمها في ضرب الفلسطين في غزه وغير غزه ) والخبراء و......... الي اخره !!!!
بالنسبه حتي لموضوع حصار غزه واسطول الحريه ، فبعض مواطنيها هما اللي كانوا علي السفينه او السفن دول ، لا وفد رسمي حكومه ولا تركيا خدت قرار لا من البرلمان او من غيره باتخاذ موقف سياسي او عسكري ضد اسرائيل تضامنا مع فلسطين ( غزه وغير غزه ) ، تركيا لما اسرائيل اعتدت علي السفينه ، خاطبت اسرائيل خطاب شديدد اللهجه لانها اعتدت علي مواطنيها في المياه الاقليميه واعتبرت ان اعتدائها علي السفينه هو ارهاب دوله ........... وهددت اسرائيل (صديقتها الصدوقه ) انها اي تركيا لن تقف مكتوفه الايدي !!!
وقال رئيس وزرائها في تصريحات للتلفزيون التركي ان اسرائيل داست علي القانون الدولي وانها لاتريد السلام في منطقتها !!!! واعلنت انقره انها ستشارك في اسطول الحريه الجديد الذي يجري اعداده وسيرسل لغزه !!!!!

طيب .......... صح النوم ياتركيا ، هو انت ماكنتيش تعرفي الا بمناسبه اسطول الحرية ، ان اسرائيل بتدوس علي القانون الدولي !!! اذا كنت ماعرفتش طول 62 سنه ان اسرائيل داست وبتدوس علي القانون الدولي من ايام اعلان دوله اسرائيل 1948 حتي احداث اسطول الحرية ، ايه اللي عرفك الايام دي الحكايه الغريبه دي !!!!!!!!!!! طيب ماتسالي الفلسطينين والعرب اسرائيل داست كام مره علي القانون الدولي وعملت كام مجزره عربيه وضربت طيارتها مقرات منظمه التحرير في تونس واعتدت علي سياده دوله تانيه وقتلت عالم الذره المصري لما قرر يساعد العراق في مفاعلها النووي ، وقبلها ضربت مدرسه بحر البقر المصريه وقتلت اطفالها التلاميذ وارتكبت مليون مذبحه عربيه من اول دير ياسين لغايه قانا ................................ مليون ومليون حاجه !!!! مكتوبه ومدونه وموثقه في كتب التاريخ والجغرافيا وفي المرثيات والاشعار والافلام العربيه والمصرية والفلسطينيه واللبنانيه ....

كنت فين ياتركيا طول ال 62 سنه دول وانت صديقه اسرائيل وبتساعديها عسكريا وبتتعاوني معاها اقتصاديا ، كنت فين ، ايه محدش قالك الكلام ده قبل كده ، صوت العرب كان واطي قوي ماوصلكيش طول ال 62 سنه ، ولا بس لما اسرائيل استوقفت اسطول الحريه واعتدت علي ركابه وقتلت 9 من مواطنيك بقت دوله بتدوس علي القانون الدولي !!!!!!! ولا لما حماس قالت اسرائيل مابتحترمش القانون الدولي فجأ سمعتي !!!!!

صح النوم ياتركيا ............ هو انت ماكنتيش تعرفي الا بمناسبه اسطول الحريه ، ان اسرائيل لاتريد السلام في منطقتها ، اولا احنا بنعتبر هذه المنطقه منطقتنا احنا العرب مش منطقه اسرائيل !!! ثانيا ماهو من 62 سنه واسرائيل مش عايز السلام في منطقتنا ، حاجه مش جديده يعني !!! وهما كل مره يضربونا ويرجعوا يعيطوا ويقولوا الحقونا المتوحشين الارهابيين ، ده حتي الجيش الاسرائيلي اللي حاربنا واحتل اراضينا العربيه وقتل اطفالنا العرب ، اسمه جيش الدفاع الاسرائيلي !!!! الله من 62 سنه ماسمعتيش ان اسرائيل مش عايزه سلام في منطقتنا وفجأ بس وبسبب اسطول الحريه سمعت واعلن رئيس وزرائك حديث ناري في التلفزيون التركي قال فيه اكتشافاته الحديثه العظيمه دي ان ( اسرائيل داست علي القانون الدولي ، اسرائيل لا تريد السلام في منطقتها - عفوا اكرر هي ليست منطقتها هي منطقتنا احنا العرب)!!!!!!!!!!

( هو نقح في الانسانيه ولا ايه ؟؟؟؟)

ايه الحاجات الغريبه دي !!!!!!!!!! تركيا صحيت من النوم فجأ اكتشفت ان صديقتها الصدوقه اسرائيل ، داست علي القانون الدولي ، ومش عايزه سلام !!!! طيب تركيا حره تصحي من النوم براحتها وتقول مابدا ليها ورئيس وزرائها يعمل تصريحات زي ماهو عايز !!!

ده يخلينا نطلع مظاهرات نشيل علم تركيا ونحلف بحياه رئيس وزرائها ( الراجل الوحيد مش عارفه في تركيا ولا في بلاد العرب ولا من المسلمين ولا ايه ، مش عارفه لما وصفوه بانه الراجل الوحيد كان مين يقصد ايه ) وننصبها بطله العروبه والاسلام ؟؟؟؟!!! ولا ننسي العروبه لانها مش مهمه خالص ومحدش خلاص بقي بيصدق فيها ولاننا مش حنرمي جتته العروبه علي تركيا ، لا بسبب ان تركيا صحيت من النوم بعد 62 سنه من الغفوه واكتشافها الرهيبه ان اسرائيل داست علي القانون الدولي ومش عايزه سلام في منطقتنا ، بسبب التصريحين دول تركيا بقت بطله الاسلام ورفع المتظاهرين اعلامها فوق رؤوسهم !!!

طيب ماهي دي نفس تركيا صديقه اسرائيل ، ماهي دي نفس تركيا اللي بتتعاون مع اسرائيل اقتصاديا وعسكريا !!! ولا ده مش مهم ، كفايه الجملتين دول علشان الناس تهتف لما تموت ان تركيا بطله الاسلام!!!! بالذات ان كمال اتاتورك كان انهي الخلافه العثمانيه واغلق الباب العالي في الاستانه ونقل العاصمه لانقره وانشغل ببناء تركيا الحديثه اللي نفسها الايام دي ومني عينها تخش الاتحاد الاوربي زي بقيه دول اوربا !!!

ايه بقي اللي فكر تركيا الدوله ، ولااقصد تركيا الحزب الاسلامي " المعتدل " اللي بيحكمها الان بموضوع الاسلام والجهاد الاسلامي والنضال الاسلامي والاغاثه الاسلاميه والخلافه الاسلاميه !!!! ايه اللي فكر تركيا بالموضوع ده اللي كانت تركيا شخصيا قفلته من زمان !!!!!!!!!!!!!!

صحيح ياتركيا وياسياده رئيس الوزراء التركي السيد اردوغان ، ايه اللي صحاكم من النوم سيادتك يعني بالنسبه للموضوع ده تحديدا ؟؟؟؟؟؟؟؟ ايه الرغبه في نصرة العرب والوقوف معاهم ؟؟؟ طيب ايه اللي فكر سيادتك يعني بالعرب مااحنا بنتخانق مع اسرائيل من سنه 1948 ؟؟؟؟ ايه الوقوف مع القضايا العادله للشعوب التي ترفض الاحتلال وتطمح في حريتها واستقلالها ( طيب اخبار الاكراد وحزب الشعب الكردي ايه مع سعادتك يعني ياتركيا ) و( وايه اخر اخبار موضوع قبرص والخلاف التركي اليوناني علي تلك الجزيره مع سعادتك ياتركيا !!!!!!!) ولا هو موقف حضرتك هو موقف عقائدي اسلامي اسلامي - بدأ من نجاح حماس في الانتخابات التشريعيه في غزه ثم حصار غزه ثم الاعتداء الاسرائيلي علي شعب غزه المحاضر - بين حكومه اسلاميه واغاثه اسلاميه وحكومه مقاومه اسلاميه وشعب مسلم محاصر؟؟؟؟؟؟؟؟؟؟؟؟؟

طبعا لازم اقول لحضراتكم ، ان تركيا بعد انتهاء الخلافه العثمانيه لم تكن لتحلم بان ترفع الجماهير العربيه اعلامها وتهتف بحياة رئيس وزراها باعتباره بطلهم القومي ( لدرجه ان فيه ستات خلفت اطفال الايام اللي فات سمتهم اردوغان ) ، تركيا عمرها ماكانت تحلم ان مئات الالوف من العرب تحمل اعلامها الحمراء وتلوح بها باعتبارها زعيمتهم !!! لكن اسطول الحريه والتسعه اتراك اللي قتلوا فوق السفينه التي تم الاعتداء عليها من جانب اسرائيل ، منحو تركيا كل هذا الفخر وكل هذه القيمه في نفوس المسلمين والكثيرين من العرب !!! بل واضافوا حسبما قالت الكثير من الصحف زخم قوي وجديد للصراع العربي الاسرائيلي !!! بل وتمادي البعض وقال ان تركيا خلاص دخلت فعلا مواجهه مع اسرائيل لان اردوغان قال ( ان تركيا لن تقف مكتوفه الايدي ) والحقيقه انا مافهمتش تركيا حتعمل ايه يعني ، ختخش حرب مع اسرائيل لصالح العرب تحريرا لفلسطين !!!

بالمناسبه هو الكلام ده صحيح ؟؟؟ ان تركيا فعلا ناويه تخش حرب مع اسرائيل وتنضم للصراع العربي الاسرائيلي دفاعا عن فلسطين !!! ولا ده مجرد كلام ابن عم حديث للاستهلاك المحلي والدولي وعمل شهره وهيصه وزعامه ويااردوغان ياارجل راجل في رجالتنا ومئات الالوف من الاعلام التركيه يلوح بها في الهواء اعجابا وتمجيدا للتصريحات الناريه التركيه !!!! انا شخصيا معرفش ، جايز فعلا تركيا عايزه تخش حرب مع اسرائيل !!! لكن اللي انا متأكده منه وانا مغمضه عيني ، ان تركيا لو دخلت حرب مع اسرائيل مش حيكون علشان خاطر سواد عيون العرب ولا سواد عيون فلسطين ، يمكن ساعتها عايزه تبقي زعيمه الامه الاسلاميه وكل تيارات الاسلام السياسي يقفوا وراها وهوب فجأ مره تانيه اعلان الخلافه العثمانيه وفتح الباب العالي في الاستانه وكل اوطاننا ترجع من تاني تاني تاني ولايات عثمانيه خاضعه وتابعه للباب العالي !!!

يمكن ساعتها تكون بتوري الاتحاد الاوربي العين الحمرا ، اهو انت مش راضي تقبلني معاك وعندك ، طيب خد بالي مني بقي ، انا زعيمه المسلمين وانا الباب العالي وانا اللي لي الكلمه والشورة !!!! يمكن بتقول لهم والله ده انا كويسه دخلوني معاكم ، ده انا حتي ليس تاثير فظيع علي الشعوب دي ، من تصريحين ناريين هتفوا باسمي ورفعوا اعلامي ، انا اللي حاعرف اسيطر عليهم لحسابكم واخليهم يسمعوا كلامكم !!! يمكن حاجات تانيه انا لسه مش عارفاها ، لكن اللي متاكده منه ان كل تحركات تركيا الان لصالح تركيا ومصالحها ومشاريعها الاستراتيجيه مش لصالح اي حد تاني حتي لو حلفت علي الميه جمدت !!!!!!!!!

وبعدين هي تركيا ماتعرفش ان اسرائيل الشريره الي داست علي القانون الدولي الابنه البكر لامريكا اللي تركيا بتحبها موت وفاتحه بلادها ليها لقواعد الطيران والقواعد العسكريه ، وماتعرفش ان امريكا عضو في حلف الناتو حلف الاطلنطي اللي تركيا مش عضوه فيه لكن برضه نفسها ومني عينها تخش فيه ، طيب وهي تركيا لما تقرر انها مش حتقف مكتوفه الايدي قدام اسرائيل علشان سفينه الحريه ، تدعو لاجتماع لحلف الناتو ؟؟؟ ليه ؟؟؟ علشان ايه ، علشان حلف الناتو يضرب اسرائيل اه اه علي ايديها لانها ضربت سفينه الحريه ، ولا علشان تركيا تقول لحلف الناتو انا مش حاسكت علي فكره فيخافوا ويضغطوا علي اسرائيل ، ولا علشان يقولوا لاماتزعليش نفسك تعالي العبي معانا في الحلف احسن وخشي الاتحاد الاوربي ، ولا ايه الحكايه بالضبط ؟؟؟

اين المصلحه ياتركيا ؟؟؟؟؟؟؟

فين ( la femme ) في فيلم تركيا الجديد ده ، بصرف النظر تركيا بتقول ايه ....
فين مصلحه تركيا اللي عايزه تحققها من الموضوع ده ، ماهي اصل تركيا ماصحيتش من النوم فجأ بقت دوله قلبها طيب ودمعتها قريبه وانسانيتها نقحت عليها فجأ و عايزه تاخد اجراءات من اي دوله بتدوس القانون الدولي ومش عايزه سلام في منطقتها ( قلت منطقتنا احنا ) .... وقلت مليون مره الحدايه مابتحدفش كتاكيت !!!

طيب فين المصلحه ياتركيا !!! طيب هل جزء من المصلحه اللي عايزه تحقيقها ان الشعوب العربيه والاسلاميه تهتف باسمك وترفع اعلامك وتقول ان رئيس وزرائك ( ارجل راجل في رجالتنا ) واذا كانت دي جزء من المصلحه ، فين بقيه المصلحه ، مش بس كده ، اذا كانت دي جزء من المصلحه ، هي فعلا جزء من المصلحه ولا دي مقدمه للوصول للمصلحه اللي انت عايزاها !!!!!!!!!!

( بالمناسبه حد يعرف مين اللي وزع علي المتظاهرين يوم جمعه الغضب الاعلام التركيه ، مين كان عارف ان الناس غضبانه من اسرائيل وحتحرق علمها وتدوس عليه وبتحب تركيا وبتموت فيها ونفسها ترفع اعلامها اعجابا وحبا ، فجهز مئات الالوف من الاعلام علشان تبقي طلبات واحلام الناس اوامر ......... مين الي وزع الاعلام التركيه في ايدي المتظاهرين المصريين يوم جمعه الغضب ؟؟؟ وبالمناسبه لما جهز الاعلام قبل المظاهرات علشان يوزعها ، كان عارف ان الناس المتظاهره حيبقي نفسها موت تشيل اعلام تركيا فجهزها ليها ولا ايه الحكايه ... وبالمناسبه بره علي حساب مين الاعلام دي ؟؟؟؟؟؟؟ "يعني هي اسئله بايخه بس بجمله بقي !!!! )

هي تركيا بتعرف تلعب بلياردو .... زي زكي رستم وفريد شوقي في فيلم صراع في الوادي ، طيب عارفه الجون اللي نفسها تحققه ، لكن طبعا مش حتلعب ( شلح ) كده من الاول وتقول انا عايزه ايه ، الموضوع عايز شويه نباهه وتكتكه ، طيب اول كوره خبطتها انها فجأ اهتمت بقضيه فلسطين وتحديدا انسانيتها نقحت عليها لما سمعت عن حصار الفلسطينين المدنيين في غزه ، ثاني كوره خبطتها هي وجود بضعه مواطنين علي سفينه من سفن الحريه ( علي فكره بعض الاخبار اللي اتنشرت قالت ان لجنه ما تركيه مش عارفه اسمها بالضبط هي اللي بدأت في بيع فكره كسر الحصار عن طريق البحر والسفن سواء بين الاشخاص او بين الدول - لكن طبعا حتي لو الخبر ده صحيح فتركيا الحكومه والدوله مالهاش دعوه لان كل مواطن حر يعمل اللي هو عايزه ) ..... ثالث كوره اسرائيل خبطتها هي الاعتداء علي السفينه وقتل 9 من مواطنين تركيا وهو موضوع مش ممكن يعدي علي خير ومظاهرات عربيه واسلاميه وعالميه وغضب وشجب وادانه وشتيمه في الحكام العرب المتقاعسين دوما وفي مصر بالمره ويمكن يوصل لجرجره اسرائيل للمحكمه الجنائيه الدوليه ...... رابع كوره خبطتها هي تصريحات ناريه وخطب برلمانيه واكتشافات رهيبه ان اسرائيل بتدوس علي القانون الدولي ومش عايزه سلام وتهديدات لاسرائيل ان تركيا لن تقف مكتوفه الايدي ( وطبعا اسرائيل ومن وراها امريكا ركبهم ارتعشت من تهديدات تركيا ) .......... خامس كوره الناس تحلف بحياه اردوغان وترفع اعلام تركيا بطله الاسلام واللي رئيس وزرائها ( ارجل راجل في رجالتنا ) .......... سادس كوره لشه مش عارفاها لكن الخمس كور المعروفه مع الكوره السادسه المجهوله حيخلوا تركيا تصوت وتقول جوووووووووووووون !!! يمكن بعدها تنسي حماس وغزه المحاصره وترجع صديقه اسرائيل لان الصداقه بينهم والتعاون الاقتصادي العسكري مؤسس علي مصالح متبادله للطرفين مش جهجهوني كده !!!!!!!!! حد يعرف ( الكوره السادسه والاخيره قبل ماتجيب تركيا جون هو ايه ؟؟؟؟)


طيب هو فيه حد بيفكر مصدق ، ان كل مواقف تركيا وخطبها الناريه و............ الي اخره سببه نقح في الانسانيه وصحيان مفاجيء من النوم علي اكتشافات مهوله ان اسرائيل لاتحترم القانون الدولي وانها لاتريد السلام ، وهي اكتشافات لاتستطيع تركيا تصالح نفسها ولاتعرف تعيش اساسا طول ماهي موجوده في الدنيا ؟؟؟؟؟؟؟؟؟؟؟ طيب اذا ماكانش الموضوع نقح في الانسانيه يبقي ايه وليه ؟؟؟؟؟؟؟؟؟

( خلاص خلصت )

اخلصي !!!!!!!!
حاضر حاخلص بسرعة !!!
1- الفيلم كله مش مريحني ومش داخل دماغي بصرف النظر عن تفاصيله واهدافه المعلنه واطرافه المعلنه برضه !!!
2- الفيلم ده محتاج فهم ووقفه وتصدي ( من غير ابتزاز ديني او قومي من اي حد علي اي حد ) لان تركيا بتسعي لدور اقليمي جديد في المنطقه ( برضه بتاعتنا ) والدور ده حيبقي اساسا علي حساب مصر ( بصرف النظر عن رايكم في الحكومه ومواقفها ) وتقليص او محو دورها الاقليمي وتسعي لهذا الدور تحقيقا لمصالحها اللي هي لسه مااعلنتش عنها ولا قالت ايه هي بالضبط !!!
3- ان الفيلم ده حيشتغل فيه ممثلين كتير ، يمكن كل واحد منهم مش فاهم ايه الحكايه اساسا ويمكن مايكونش قرا سيناريو الفيلم ، لكن هو عارفه دوره ومصدقه وبيعملي بمنتهي الاخلاص والجديه !!!
4- ان العالم اتغير عن عام 1506 لما اسس سليم الاول الخلافه العثمانيه واخضع لها كل الولايات والامصار من ضمنها مصر ، العالم اتغير والخلافه الاسلاميه او العثمانيه او اي حاجه دي ولا تلزمني خالص ولاحاصدقها ، لان رفع مثل تلك الشعارات له اثر عاطفي علي الناس اللي بيكون مطلوب تاييدهم عمياني علشان اللي رافع الشعارات دي يعمل ما بدا له باعتبار الناس مأيداه وماشيه وراه !!! فمحدش في اي لحظه يقولي ماهم مسلمين واحنا مسلمين ، لاننا اتفقنا في البدايه علي معايير كتيره للاتفاق ليس من ضمنها ان اي حد يقول انا مسلم المسلمين يمشوا وراه ، او يقول انا مسيحي المسيحيين يمشوا وراه !!!
5- ان الكوره السادسه لسه مجهوله ، اللي لما تركيا حتخبط كل الكور فيها حتجيب جون ، شكل الجون نفسه لسه مش باين لكن فيه لعبه بلياردوا بتتلعب علي مستوي عالي جدا من الكفاءه والبراعه !!!!
6 - لو بعنا عقولنا وقلوبنا للفيلم ده وصدقناه ومشينا وراه ، مش حتبقي مجرد صينيه مكرونه واتحرقت في الفرن ، لا الدنيا كلها حتمشي في اتجاه يستحيل الرجوع عنه او منه ( نظريه البيضه المسلوقه )

( خاتمه !!!)

انا عارفه ان كلامي ده ولا حيفرق مع حد ولا حيفرق في حاجه ، لكني لسه عايشه وبالتالي لازم افكر واقول رايي ، لان الميتين بس هما اللي لا بيفكروا ولا بيقولوا رايهم .......
علي فكره اوعي حد يفتكر اني مابحبش تركيا بالعكس انا لما رحت انطاليا اصيف هناك انبسطت قوي وكتير باشتري هدومي تركي !!! لكن الحب حاجه والفهم حاجه تانيه ، يمكن اللي ودانا في داهيه ( اي داهيه من اي نوع وكل نوع ، اننا لما بنحب مابنفكرش !!! غلط ، نحب مانحبش لازم نفكر ونفهم ...........

اخيرا خالص خالص خالص ........... هي قضيه فلسطين خلصت ومابقاش فاضل فيها اي حاجه غير غزه !!!!
اخيرا خالص خالص خالص خالص ...... مافيش حاجه بتحصل في الدنيا جهجووووووني وبالذات في عالم السياسه القذر ومصالحه الاستراتيجيه !!!
اخيرا خالص خالص خالص خالص .......... قالوا زمان ( ان كنتم نسيتم اللي جرا ... هاتو الدفاتر تتقرا ) ....