15 مايو 2010

صوتك في قلبي فرحة !!!!!





صوتك في قلبي فرحه !!!

شلالات ماء بارده تطفيء حرائق لاهبة

اعاصير تنام فوق فروع الشجر العالي وتسكن

طفل يكف عن البكاء ويلون وجهه بابتسامه الشبع

عروسه تلبس تاج الفرحه وتنتظر العريس

ام تستقبل ابنها في الميناء بعد سنوات الغياب بدموع الشوق

اغنيه كنت عايزه اسمعها من زمان

كلمتين عتاب والباقي كله حنان

دمعتين سخنين وضحك كتير رنان

خوف ولهفه وقلق علي اعز انسان

جواب وصلني بعد مافقدت الامل

نغمه حلوه وسط مليون صوت نشاز

عصفور طليق هرب من نبال الصيادين

نجمه بتلمع وسط اشباح الليل الحزين

همسه قالت لي كل الكلام اللي كنت باسمعه

لكني كنت لسه عايزه منك ومنك بالذات اسمعه

علشان اتطمن وانام !!!


صوتك في قلبي فرحة !!!

امنيه كنت بادعي يارب تتحقق

حلم اصحي من نومي

الاقيه واخدني في حضنه اقول لعله خير

دموع كتيره مسحتها من فوق خدي

وانا مكسوفه مش عارفه ابرر حزينه ليه

ضحكه مااقصدهاش تهرب مني

اداريها وانا مرتبكه لاني مش حاسه بفرح

كلمه طمأنينه كان نفسي اصدقها ومابصدقهاش

حدوته قبل النوم تطمني

فتجيني امي في المنام

وترجعني لرحمها وتحميني من الديب والتعلب المكار

وامنا الغوله وكل الشريرين


صوتك في قلبي فرحة !!

صوتك في قلبي فرحه !!!

نقطة مطر تنزل علي ارض بور تطرح غابات

لحظه دفا لرضيع بيترعش من اليتم والحرمان

بق ميه يشربه تايه في الصحراء عطشان

كف يطمن طفل مرعوب خايف حيران

جرعه دوا لمريض قالوا مافيش امل في شفاه فيشفي

ونس الامل بين الحياري التايهين

لما يشوفوا من بعيد كوخ منور

قشايه يتعلق بيها غريق وسط محيط هادر

والغريب انها تنقذه

صوتك في قلبي كل حاجه حواليا كنت مابعيشهاش

ولما سمعت صوتك رجعت الالوان للدنيا ومعاها الامان

ونمت راضيه سعيده من غير مااحلم

لان الحلم عشته اجمل في الحقيقه من كل الاحلام !!!



اهداء خالص .....

الي صديقتي الجميله اللي عارفه نفسها !!!!





هناك 4 تعليقات:

مها العباسي يقول...

مين اللى طمن روحى وبروحه قوانى

غير معرف يقول...

كاااااااااااااان.

manoola يقول...

أميرة

هي دي الاصحاب
هو ده الاحساس
هي دي الكنوز اللي لا تفنى

مها العباسي يقول...

دموع كتيره مسحتها من فوق خدي

وانا مكسوفه مش عارفه ابرر حزينه ليه