16 مايو 2010

مش اي حب .....

احنا زماااااااان كنا الزمان
كنا الهوي من غير هوان
كنا الامان من غير حدود




احنا زمان كنا الزمان

امال دلوقتي بقينا ايه ؟؟؟
بقينا ولا حاجه خالص
بقينا جرح قديم بيوجع لما طاب
بقينا ذكري بتفكرنا بكل اوجاع الغياب
بقينا هجر بايخ بين احبة كانوا ومازالوا احبة
بس جبنا وخوافين
بقينا شكل من اشكال العذاب ...
بقينا دموع بتتمني تنزل لما القلب يوجع
والنسمه بتلامس خدودنا زي انفاس الغرام
بقينا شهقه محبوسه في صدور مش عارفه تتنفس ولا عاجبها الهوا
بقينا عمر طويل مايلزمش حبيبين ماتوا لما اتفرقوا
بقينا الف سؤال عجيب مالوش اجابه
احنا لسه عايشين لمين وليه
هي الايام ليه كتيره ما بتنتهيش
والزمن واقف عند لحظه الوداع
هو ليه الليل طويل والشمس غايبه مش راضيه تطلع
هو ليه الجو برد واحنا في عز اغسطس
هو ليه الراديو ساكت والمحطات مش راضيه تنطق
هي ليه كل الكلمات ماعدش ليها معني
وكل الكتب اصفر ورقها وداب
والمعاني اتلخبطت وشرح الكلمات قال حاجه تانيه غير اللي كان نفسه يقولها
هي ليه الديابه بتعوي بتخوف الاحلام تجينا
هو ليه الكروان بطل يناجي ربه في الفجر ونام
هي ليه الشمس غابت من نهاريتنا وتركتنا للظلام
هي ليه كل الحسابات معقده وصعبه
والظروف اللي اتقابلنا فيه اصعب من الصعوبه
هو ليه لما الحبيب يلقي الحبيب يجري من حبه ويبعد ؟
ليه يهرب ليه يندم ليه يعيط
ليه ينادي محدش ابدا يسمعه
ليه يقول ياريتني ماسبته وجريت
لكن يكون وقت الكلام خلاص خلص
واي حاجه تتقال جديده مايبقاش ليها معني !!!!
احنا زمان كنا الزمان
امال دلوقتي بقينا ايه
بعدنا ليه
خفنا ليه
نسينا كل اللي اتقال بينا
وكل همسه وكل فرحه وهربنا ليه
ليه مشينا كل واحد في طريق
ومسحنا اثار خطوينا من علي الارض
علشان محدش فينا يفكر يدور علي التاني ولا يشتاق اليه
ليه شفنا بس القسوه في علاقه حتوجع
فجرينا جري
ليه شنقنا فرحه كنا لسه حنعيشها
وقولنا مافيش حاجه تفرح
ليه كل المشاعر الجميله ماحافظناش عليها
وكذبنا علي روحنا وقلنا ماهو اصله مش فارق معانا
ليه مافكرناش بعض بالاحاسيس
اللي خرجت من قلبي لقلبك ومن روحك لروحي
ليه ماسمعناش الاغاني اللي كانت يوم بتجمعنا نعيط
والف يوم نضحك ونرقص
ليه ماقريناش الشعر اللي كنت بتقوله بصوتك الجميل
وانا اسرح واغيب في المعاني والصور
ليه مااديتكش شوكولاتايه من اللي انت بتحبها
وانت ماعزمتنيش علي فنجان قهوه من اللي اتعودت اشربه معاك
ليه ماركبناش فلوكه في النيل وقت الغروب ولما هزها الموج
ليه مااستخبيتش في حضنك وانت بالجامد مسكت ايدي وقلت لي متخافيش
ليه مادافعناش عن احاسيس دخنا لما لقناها
ولما اتاكدنا منها معرفناش نحافظ عليها
ليه الدنيا خوفتنا
لما قربنا خفنا ، لما قربنا وكنا خلاص حنبقي اتنين في واحد خفنا جدا
خفنا من الوجع اللي مش عارفين اسبابه
خفنا من الهجر اللي قطع قلب كل واحد منا في شبابه
خفنا من عصبيه تفزع لما تطلع في لحظه الغضب المخيفة
خفنا من صدمات خلاص اعصابنا ماعدتش تستحملها ولا قلوبنا الضعيفه
خفنا جدا لما تاكدنا ان اللي بينا حب
ومش اي حب
لا حب فعلا حب خالص حب جد
خفنا لما اكتشفنا ان بينا مش مجرد مشاعر
لا ده حوار مستمر وافكار بتتقابل صدفه وتكمل بعضها
واهتمامات مشتركه وفرحه تلمع في عيونها
ونقط تتحط فوق الحروف فتعدل كل المعاني وتفسر الصعب
وتشرح الغامض وتكشف السر
وتحل اللغز وتهون الوجع وتخلي الدنيا احلي
خفنا لما لقينا روحنا بندور علي روحنا هناك
كل واحد روحه مشيت وسابت له خواء رهيب
وقالت انت مالكش عندي علاج الا الحبيب
خفنا من لعنه الفراعنه وكل لعنات التاريخ
من سيف مسرور وقصه شهرزاد
من سم روميو وجوليت لما اتقفل في وشهم الطريق
خفنا من علاقه تخلص بموعد علي العشاء
او امضا علي ورقه بدموع تقول خلاص معدش للحب مكان
او خيانه تحرق كل الامان
خفنا من اطلال حتتهد يوم فوق قلوبنا تنزف حب ودماء
خفنا من خرس جديد يقتل الامل ويضيع باقي العمر هباء
خفنا من ضهر في ضهر وكهرباء تحرق الاعصاب والروح
ليه كلامي الكتير خوفك
ليه صمتك الطويل خوفني اكتر
ليه لما حسينا بدفا جرينا جري علي الصقيع
نمنا في حضنه نرتعش خايفين من وهج الدفا
خايفين نتعود عليه ونفقده فنرجع نعيط تاني من جديد
ليه قتلنا مستقبل كان ممكن يحتوينا
ويفرحنا ويعالج جروحنا ويهون علينا الصعاب
ليه قتلنا حلم كان ممكن يصالحنا علي الدنيا الكئيبه
ليه خفنا فجرينا وهربنا وسبنا قلوبنا اسيره
عند روح كانت حتعالج جراحنا
فاحتفظنا بجروحنا ووجعها والمها وهمها
وارتعشنا خوفنا من جرح جديد
ناسين ان خلاص ماعدش فاضل في قلوبنا مكان
ماحرقتوش الايام وجريت
وان كل حلمنا نقابل حد طيب حد يعرف يحبنا
ولما تصورنا ان الاحلام خلاص حتتحقق جرينا
رافضين نصدق ان الايام خلاص قربت تنعم علينا
بفرحه وسعاده وغرام
واحنا اللي كنا معذبين
واتوجعنا من كل الكذابين
فعاقبنا نفسنا وخلصنا من قلوبنا كل ذنوب السنين
عاقبنا نفسنا وسبنا بعض !!!
احنا زمان كنا الزمان
ودلوقتي بقينا ايه
بقينا مجرد مشروع فاشل
مااديناهوش فرصه نجاح
مجرد لقاء عابر
مجرد ليل من غير صباح
كلمه وداع اتقالت واحنا لسه بنقول اهلا وسهلا
وقبل مانخلص كلام
افترقنا وبعدنا وقفلنا الطريق
في وش فرحه جايز كانت تبقي هي اللي بندور عليها
بقينا اتنين غرباء وسط الف مليون غريب
كل واحد فيهم بيدور علي اي حبيب
واحنا لما لقينا الحبيب جرينا وقطعنا كل الخرايط
وقلنا احنا تايهين من زمان يفرق ايه ؟؟؟
عادي يعني خطوه كمان جديده في طرق الندم
اللي مشينا ياما خطوات عليها متعودين علي التعب !!
احنا كنا ومابقيناش ومش حنبقي !!!
وقدامنا الايام كتيره
نزعل فيها علي كل اللي ضيعناه
امال باقي العمر حنقضيه في ايه ؟؟؟؟


هناك 3 تعليقات:

غير معرف يقول...

وبعدين معاكى بقى يا حبوببى .
الصورة اللى انتى مختاراها رد كافى على ليه لإن القلب اتفلق نصين

غير معرف يقول...

من مجدي السباعي
اعلم انها مدونه رومانسيه بس يظهر مااعيشه الان جعلني اقراءها علي انها تعبر عن حالنا وخصوصا
بقينا الف سؤال عجيب مالوش اجابه
احنا لسه عايشين لمين وليه
هي الايام ليه كتيره ما بتنتهي
فعذرا اميرتنا

أسامة جاد يقول...

هو ليه لما الحبيب يلقي الحبيب يجري من حبه ويبعد ؟
ليه يهرب ليه يندم ليه يعيط
ليه ينادي محدش ابدا يسمعه
ليه يقول ياريتني ماسبته وجريت
لكن يكون وقت الكلام خلاص خلص
واي حاجه تتقال جديده مايبقاش ليها معني !!!!
احنا زمان كنا الزمان
امال دلوقتي بقينا ايه
بعدنا ليه
خفنا ليه
نسينا كل اللي اتقال بينا
وكل همسه وكل فرحه وهربنا ليه
ليه مشينا كل واحد في طريق
ومسحنا اثار خطوينا من علي الارض

شكل الكتابة وفصل الجمل في سطور منفصلة أحالني للكتابة الشعرية .. وانت بالتأكيد تعرفين الإيحاء المتولد من صورة الكتابة .. النص ذاته فيه مناطق شعر متوهجة رغم حرصك على كسر النمط الذي قد يتولد من صوت او جرس أو قافية .. غير ان وجدانية الحالة .. المتولدة بالتأكيد من دفء الأغنية يسمح بتجاوز السردية المقصودة في كتابتك إلى حميمية الكتابة الشعرية (الكتابة بالسطر الشعري) ودفئها .