25 مايو 2010

لسه نفسي اعيط !!!!


القلب تعبان ياخال .... القلب تعبان ياعم ...
القلب مليان هم ...


الدنيا بتتغير بسرعه قوي .... بتتغير خاااااااااااااالص ...كل اللي الواحد كان فاكره حيفضل موجود مابقاش موجود ....حياة زي المرجيحه حبه فوق وحبه تحت ، تدوخ حبه ، تضحك حبه ، تعيط كتير ، انت وظلك وروحك ونفسك مع بعض الدنيا عماله توديك وتجيبك !!!
ولاعمرك تعرف تنزل من المرجيحه ولا توقف دورانها ، ومطلوب منك زي الشاطر تتوازن طول الوقت والمرجيحه عماله تلف وتلف وانت وراحتك ، عرفت تتوازن براحتك ماعرفتش برضه براحتك ماهي رقبتك انت اللي حتتقطم !!!!

فجأ ... كل حاجه بتوجع تيجي !! كان ساحر شرير نداهم !!! كان حد استخسر فيك الفرحه او حتي الحياد والراحه !!! كل حاجه بتوجع تيجي .... هذا ميعاد الوجع الدوري !!! تفتكر وتفتكر .... تعيط وتعيط .... تزعل تتوجع يصعب عليك نفسك وفي اخر الحفله تقوم تصالح الدنيا رغم انفك وانفها !!! لان لازم بقيه الايام اللي انت عايشها تفضل تعيشها وياريت تعيشها وانت مبسوط او علي الاقل تحاول تكون مبسوط !!! خلاص .... حنفتكر ونتوجع وخلاص !!! حنفتكر ونتوجع ونعيط .... وبكره يوم جديد !!!!

عشت احلم ببيت ، ليه ، لاني من اولاد العائلات المحطمه ، اللي الاب والام يتطلقوا ومايبقاش فيه بيت !!! اي بيت مايبقاش بيت !!!
بيت بابا مش بيت ، بيت ماما مش بيت ، بيت تيته ونينه مش بيت !!! عشت احلم ببيت ، فكل الجدران التي عشت فيها لم تكن بيت ، وكل الاسقف التي نمت تحتها لم تكن بيت ....عشت احلم ببيت ، ولاني عشت احلم ببيت ، ماكانش عندي حاجه تخص اي بيت ، كل حاجتي جوايا ، ذكرياتي اغنياتي جمل احبها صوره اتمني اعلقها علي حيطه البيت احفظ شكلها علشان لما يبقي عندي بيت !!!!
بقيت انا الانسان والبيت !!!
ماشيه شايله بيتي جوايا ونفسي في بيت ، بيت محدش يعرف لاي سبب يحرمني منه ، بيت انتمي ليه وينتمي لي ، يخصني !!!
اتنقلت في حياتي لمليون جدران !!! وولا بيت !!! كنت شنطه في ايد ماما لما تغضب من ابويا وتمشي ، وشنطه في ايد ابويا لما يسيب البيت لامي ويبعد !!! شنطه تتلم فيها هدومي وكراريسي وذكرياتي مستعده دايما للرحيل !!! فقدت معني المكان من شده احتياجي للمكان !!! بقي المكان يخص الناس التانيه وانا اخص نفسي !!! لكني بحلم ببيت !!!

اتجوزت بسرعه وانا صغيره قوي علشان يبقي عندي بيت ، وتصورت اني بقي عندي بيت ، وكافحت كتير علشان اعمل اجمل بيت ، واتنقلت من بيت صغير لبيت كبير ، ونجدت وعلقت ستاير ولوحات وتصورت اني خلاص بقي عندي بيت ، وبعد العمر ماعدي لقيت البيت مش بيتي لاني برضه خرجت منه ، مش مهم ليه ولاازاي ، لكن خرجت منه لانه بيت شخص خرج من حياتي هو وبيته !!! واخيرا اخيرا وانا عندي 49 سنه بقي عندي بيت ، محدش يعرف يخرجني منه ولايحرمني منه ... اخيرا اخيرا وانا عندي 49 سنه مابقيتش شنطه غربه ولا مستودع ذكريات ، بقيت انسانه طبيعيه وعندي بيت !!! لكن وهو ينفع بعد 49 سنه اغير طبيعتي واتغير !!! اه بقي عندي بيت بتاعي بتاعي انا ، باسمي وكهربته باسمي وتليفونه باسمي وحيطانه اخترت الوانها وعملته علي ذوقي وجنوني ، لكن فضلت محسش بالامان ، ماهو الطفل لمايتحرم من بيته يتحرم من الامان ، والست لما تحب وتتخدع تتحرم من الامان .... للاسف بقي عندي بيت لكن معديش احساس بالامان !!!

انا امان نفسي لكن مين يقدر بس يعتمد علي نفسه ويتطمن لانها موجوده ، اه بقيت امان ناس كتير ، اخدتهم في حضني واديتهم علي قد ماقدرت لكن محدش قدريديني احساس بالامان ، سنين كتيره من العمر عدت لكن الطفله المذعوره اللي مستنيه الباب يتفتح وتخرج منه لسه جوايا ، تتفزع كل ماباب يتفتح وكل باب يتقفل ، العمر ماادانيش الامان !!! اداني حاجات كتيره قوي حتي البيت حصلت عليه بعد سنين طويله اه متأخر اه ، لكن ..... مافيش امان !!!! دايما مستنيه الدنيا تغدر بي !!! المشكله اني حتي لما باحس ان الدنيا حتغدر بي مابخافش ، ماهو انا خفت كتير وخلاص معدتش باخاف ، بس باحس انه مش فارق معايا وده احساس بيضايقني !!! عايزه احس بالامان واخاف من غدر الدنيا ، لكني لابحس بالامان ولا بخاف من غدر الدنيا ، مش بيفرق معايا ، يمكن لاني اتوجعت قوي ومعدش ينفع اتوجع اكتر !!!!

ولاني جربت يعني عائله محطمه وجدران ماهياش بيت وانعدام الاحساس بالامان ، لما اتجوزت وخلفت اعتبرت ان مسئوليتي في الحياه اني احافظ علي الاطفال دول ، امنحهم بيت واسره مستقره وامان ، حاولت حاولت حاولت ، لكن مين قال ان هزيمتك مسئوليتك وحدك ، الحياه هزمتني بعد العمر ماضاع ، يعني ياريت الهزيمه كانت بدري والوجع بدري وخلاص ، لا العمر ضاع وانا مستحمله علشان امنح بناتي الامان وفي لحظه عمري ماحسبت حسابها ، العائله اتحطمت ومابقاش فيه بيت ولا اسره وغالبا ولا امان !!!
وسط هزيمتي ووجعي كانت عيني علي البنات ، عايزه ااقل الخسائر ، عايز ااقل الوجع ، عايز احافظ علي ماتبقي لهم من احساس بالامان، هنا بقي مش مهم انا حاسه بايه ، مش مهم انا عامله ازاي ، المهم البنات ، حاولت علي قد ماقدرت ، اصاحبهم ، اتكلم معاهم ، اوفر لهم بيت ، مافيش حاجه اسمها بيت ماما ، لكن ده بيتهم ، بيتهم هما مش بيتي انا ، حاولت امنحهم احساس بالامان علي قد مااقدر ، لكن ارجع اقول تاني ومين قال ان الهزيمه التي تلحق بك صنيعتك وحدك ، او صنيعتك اساسا ، احيانا تهزم لان قدرك الهزيمه مهما حاولت !!!
وفقدت بناتي الاحساس بالامان ، حتي لو قالوا غير كده ، اتوجعوا من الاحساس بعدم الامان وسكتوا علشان مايزيدوش وجعي وهمي ، وانا ضحكت علشان ماازيدش همهم ، وعدت الايام علينا توجعنا كلنا !!!!

هنا مابتبقاش الحياه الزوجيه والراجل والحب اللي ضاعوا وخلصوا وغدروا هما الاساس والهزيمه والفقد ، لا بتبقي العيله اللي اتكسرت وكسرت معاها قلوب بريئه عمرك ماكنت تحب ابدا انها تتكسر ، لكنه القدر والوجع وحصار ضربات الايام التي لاتعرف لماذا اختارتك انت لتضربك صغيرا وتضربك كبيرا وتسرق احساسك بالامان وتهدر محاولاتك ومجهودك لمنح الامان للاخرين ....
مش بقول كل حاجه بتوجع جت ، ندهوا بعضهم وجم !!!
افتقدت البيت طول حياتي وافتقدت الامان ولما جه البيت معرفش يمنحني الاحساس بالامان !!!
سنين طويله ضاعت علشان احافظ علي عائلتي واماني بناتي ، لكن بعد السنين ماعدت العائله اتحطمت وضاع امان البنات !!!
سنين فقدت الاحساس بالامان وعملت نفسي مش مفتقداه ولما قلت اه محتاجه امان ، كانت الدنيا ستفت ناسها بعيد عني وخلاص محدش عنده استعداد يدي حد اي حاجه وبالذات الامان ، وتكتشف وسط الزحمه والهيصه ان الدنيا فاضيه فاضيه فاضيه !!!!

الدنيا بتتغير بسرعه قوي .... بتتغير خاااااااااااااالص ...كل اللي الواحد كان فاكره حيفضل موجود مابقاش موجود
طفوله بريئه سعيده خلصت للاسف وخلصت سنينها ...
مراهقه قهرنا فيها وخرجنا من ايامها مانعرفهاش ولانعرف جنونها ...
شباب عدي بسرعه واحنا بنجري ورا الحياه نبنيها ونصارع ونتصارع ونتخانق ونتصالح فيها ..
حب فشل ، طلع كذب وزيف ، سرق معاه ايام العمر اللي الفات وافسد بقيه الايام !!!
وقلب اتكسر واتلصم وقاوح ولسه عايش !!!
احلام خلصت قبل ماتبتدي وكوابيس بدأت ومابتنتهيش !!!
وضحكه بتحارب كل يوم علشان تفضل ترن وابتسامه بتترسم علي الوش لغايه مايتعب من شكلها !!!
امومه بدأت بجنين جوه القلب وحمل ووجع وعدت ايامها مذاكره وتربيه واوامر وخوف واحتياج وفي الاخر تتحول الامومه لمنصب شرفي يتعلق علي الحيطه جنب شهادات المدرسه وبطاقه الرقم القومي .. والعيال تكبر وتعيش حياتها والدايره تلف !!!
حياه زوجيه بدأت وانتهت وبس خلاص من غير ولا كلمه اكتر من كده ، الحقيقه ماتستحقش لانفتكرها ولا نكتب عنها !!!
عيلتي الصغيره فكت نفسها ومنحتني احساس وحيد بعدم الامان ..
عيلتي الكبيرة اللي كنت باحبها واحارب وحدتي بالانتماء ليها ، قطعت قلبي واحب احبائها بيرحلوا واحد ورا التاني !!!
امي مشيت وسابتني ، مش لاقيه حضن اعيط فيه ويفهمني صح !!!
اصدقائي وصديقاتي ، اللي كانوا مابقوش ، واللي بقيوا ماكانوش ، والتاريخ والذكريات دخلت المتحف ووشمت القلب بهمها !!

الدنيا بتتغير بسرعه !!!
خرايط تتقطع وطرق تتلغي واسماء تتنسي واحزان تحتلك وماترضاش تمشي !!!
بشر يرحلوا ، يموتوا ، يغيبوا ، يتغيروا ، يبعدوا
بيت تتمناه وماتحصلش عليه ولما تحصل عليه تكتشف انك ماحصلتش عليه ولما تحصل عليه تكتشف انه مش قادر يمنحك الاحساس بالطمأنينه والامان والدفا ، لان البرد احتلك وانعدام الامان وشم روحك !!! تكتشف انك خلاص خربت !!!
خربت ومعدش فيه حاجه تنفع تصلحك ولا تصالحك !!!

الدنيا بتتغير بسرعه واتغيرت وحتتغير !!!
وانا واقفه فوق المرجيحه باطلع فوق وانزل تحت !!!
بحارب بجدف بعوم بتشقلب واتعدل !!!!
واوجاعي صاحيه مابتموتش وجروحي لسه بتنزف !!!
ونفسي احس بالامان !!!
لكن الدنيا فاضيه قوي ، فاضيه والناس نفسها مقطوع ومحدش لسه عنده طاقه يعالج حد ويديله احساس باي حاجه مابالك الامان!!!!
خلاص .... جرعه الحزن خلصت !!!
عيطت حبه وفضفضت حبه وبعدين ؟؟؟؟؟؟؟؟ ولا قبلين !!!!!
العيشه وحنعيشها ، موجوعين حنعيشها ، مقاوحين حنعيشها !!!
عندنا بيت معندناش ، عندنا امان ماعندناش ، حنعيشها حنعيشها !!!
الكلام خلص ، لكن لسه نفسي اعيط !!!
بكره حاقاوح الدنيا واحارب امها !!
بكره حاخد بناتي في حضني واحاول انا وهما نعالج نفسنا بنفسنا !!
بكره حاصحي الصبح ناسيه ومتناسيه كل ده واضحك واشكر ربنا علي كل نعمه !!!
لكن لسه نفسي اعيط !!!!
.................... ايه الكلام الشخصي قوي اللي كتبته ده وكتبته ليه !!!
كتبته لاني عايزه اعالج نفسي !!!
عايزه ابقي احسن فلازم اعرف احزاني واحاول اتخلص منها واتغلب عليها !!!!
لسه نفسي اعيط !!!
لو عيطت قوي جامد جرعات الحزن اللي بتجري في دمي تركيزها حيقل !!!
زي الدنيا لما تمطر في يوم خماسيني ترابي ، لما الدنيا تمطر الدنيا تبقي انضف واجمل !!!
وهكذا العياط ،لما اعيط ، اغسل همومي واتطهر منها وتعدي او تقل او تتواري !!!
لسه نفسي اعيط !!!!
خلاص كفايه بقي وجع واحزان وخليني افكر في بكره واتمناه جميل واذا ماجاش جميل بعد بكره اكيد اكيد جميل !!!!

هناك 7 تعليقات:

... يقول...

أبكيتيني يا أميرة
الحمد لله على كل حال

غير معرف يقول...

إن للصدق سحر خاص

غير معرف يقول...

عشت عمرى احارب من وانا طفله بحارب عشان اكون قويه ماحبتش الهزيمه ولا حد يتحكم بكيانى وحياتى كرهت الضعف كرهت الخضوع كرهت كلمه ضل راجل.داريت كتير ضعفى واحتياجى كاى طفله لحضن وامان مافتكرش ذكريات طفوله مافتكرش حاجه منها غير قليل اوى وكلها مش جوة بيتى وكبرت وكبر معايا التحدى ان انا لازم اكون ازاى مش عارفه بس هاكون عدت سنين من عمرى دخلت الجامعه لا حبيت ولا خليت حد يحبنى كنت حاله لوحدى الكل خايف يقرب منها بنت جادعه اه صديقه جميله اه بس حبيبه ماجربتهاش وماكنتش عاوزة اجربها يمكن فى وقت حسيت وسالت ليه مابتحبش مالقتش اجابهيمكن لان انا ماحبتش فمتحبتش وفضلت احارب كانت كل حياتى حرب طويله مافيهاش هدنه ولا راحه كنت بشوف من بعيد اصحابى ودى اخوها جنبها او ابوها اكيد مش الكل اسر مثاليه بس على الاقل فيها حد بيكون سند
اتعودت اكون سند نفسى ماتعودتش اعتمد على حد حتى اوراقى انا اللى كنت بنهيها كل حياتى انا قراراتى صح او غلط برضه انا ساعات كان بيكون نفسى اصرخ ليه ماحدش شايفنى ضعيفه ليه معنمدين انى قويه وتقريبا خلاص ملامحى اتشكلت على كدا فى عز ضعفى تلاقينى بضحك حتى مع اقرب حد الا ناس قليله اوى بتحس بيا من وسط ضحكى بتقدر تطلع دموعى لانها بتكون عارفه انى محتاجاها
كل جرح والتانى وماحدش يحس لانى واقفه صلبه بضحك ودموعى ليا لوحدى لحد ماوصلت لمرحله ان حتى وانا لوحدى مابقتش اعرف اعيط ممكن اتصل باقرب حد ليا عشان افضفض الاقى نفسى بضحك واهزر وصوتى يضيع فى الوجع غير اللى بيكون حافظنى بيقدر يعرف زيف الضحكه
هى دى اقدار اتكتبت علينا ندفع تمن ونسدد حسابات كتير
نحتاج امان بس الامان لما بيضيع مابيجيش تانى
يمكن ننجح ونحقق احلام ونكبر ونوصل لبعيد
نفرح نضحك
وتفضل طفله صغيرة جوانا نفسها فى حضن تنام وتطمن جواه
نفسها فى حد تعتمد على وترمى الحمل على كتافه تحس انها هاتجرى عليه هاتروح بين اديه
يمكن يكون بكرة احلى
يمكن يكون ماليان وعود
نضحك لينا وعلينا
بس لسه بحلم ببيت بتاعى
مش بيت نفسى فى استديو صغير لان مش بحب الاماكن الواسعه
استديو اوضه وريسبشن وامريكن كيتشن
حلم صغير اوى
بس يكون بتاعى
تفتكرى صعب احقق حلمى
مش هاقول انا مين بس عارفه انك هاتعرفينى بقلبك زى مادايما عرفانى ماهو انتى واحد من اتنين اللى بيفهم ضحكى من غير ماتكلم
ويمكن وجودك عوضنى جزء من الامان

اميرة بهي الدين يقول...

Ehab Samra
مبدئيا .. من أروع ماقرأت على الطلاق .. و اسمحى لى أذا تفضلت أن اعتبر تلك المقطوعه مرجعا لى فى كتابات قاده اوحيت لى بها
_______... See More

سيدتى .. نتحول ألى مسافرين مهاجرين رغما عن حلمنا الموروث بالأستقرار .. لحظت تحول الفرد من فلاح ألى ملاح .. نعم .. نتحول من مجتمع مزارعين مستقريين أصحاب أرض لا تتغير معالمها بل يموت أهلها و البيت باقى .. نتحول ألى .. ملاحين .. كل ما نمتلكه مودع فى شنطة سفر .. مكاننا مطيه تتحرك .. سرج سابح أو قلب مركب لا فرق .. لكن .. لا بيت ولا أرض .. نحمل نفوسنا و كل مالنا فى .. شنطة سفر لا أكثر
لا تعتبريها هزيمه .. فقط اعتبريها تغيير لا أكثر .. الملاحين جميعهم يتعايشون مع فقدان الأمان كطابع للحياه اليوميه .. حتى فى لحظات البكاء.. الفلاح يبكى عند شجره .. كانت قبل أن يكون و ستظل بعده .. فحتى ذكريات حزنه ترتبط بعلامه على الأرض يعود اليها وقت شاء .. بينما الملاح .. فحتى بكائه .. ينسكب على أمواج ترحل قبل أن تأتى .. فلا اثر يتركه أبدا ولا حتى لأحزانه .. لكن بوجهة نظر اخرى ... الفلاح مثقل دوما بما لديه حتى ذكرياته .. لا يستطيع الحركه أبدا ألا بالأجبار .. بينما الملاح حر .. متخفف من كل الأحمال .. ألا من بعض حزن فى القلب و شىء من غصه فى الحلق .. و أمل يحمله بين ضلوعه ...سيدتى
استمتعى بالترحال .. لفتره .. و انظرى لحجم التجربه التى حصدتيها أثناء ملاحتك دون بيت .. الترحال أثرى حياتك بشكل ما كان ليحدث لو ظللت بين جدران تحميك حقا .. لكن تحبسك داخلها .. استمتعى بحصيلة ملاحتك حره متخففه من الأحمال .. و الآن .. و بعد أن انتهت التغريبه . و عاد الملاح ألى ارض هى له ولا لغيره .. افتحى شنطة السفر .. اخرجى كنوزا جمعتيها خلال ملاحتك .. زينى بها حياتك المستقره .. وورثيها لبناتك الأميرات .. ابنى بيتا ليس كبيوت الفلاحين .. لكن .. كقصور الملاحين الذين خاضوا التجربه و الغربه .. و عادوا .. لا يأبهون للأمان .. فقدراتهم صارت مشحوذه ولا شىء يخيفهم بعد ما مروا به .. ابنى بيتا يعرف كل من يدخله أنه بيت فلاحه مستقره .. لكنها تفوقت على كل الفلاحين .. خلال تغريبتها السابقه .. و استمتعى الآن بالبكاء عند حائط تمتلكيه و تعودين أليه لو شئت .. فدموعك لن يجرفها الموج بعد الآن .. و ضحكاتك ستحفر نغماتها على جدران .. بيتك
May 25 at 11:19am ·

اميرة بهي الدين يقول...

Mohammad Hwehy
يااااااااه بقي
ماشين شاسيلين الدولاب احلم وارمي في الدولاب عيش وارمي في الدولاب كل ما تعجبنا حاجه نشيلها لبكره طيب هانشيلها فين برضه في الدولاب حتي الحزن لما يستعصي علي العين تكبه برانا نسيبه مطرحه في الدولاب
البني ادم هو الدولاب
عمال يحوش جوه ذكرياته واحلاه ماضيه ومستقبله وعايش فيه الحاضر وكل ده والدولاب بيتقل
يتقل... See More
يتقل
هايهتنا مكانا ولا هانكمل طريق
نضحك علي روحنا وندهنه ابيض
وشويه روز
شويه سماوي لا خليه اصفر
!!اصفر
اه .. اصل الاصفر بيدي احساس بالصفاء
راااااااااااااااااحه لما تسرح في الصحرا تحس بالبراح
فوق فوق فوووووووووووووووق
براح ايه
دا هو حته دولاب
والدولاب انت
وانت اتمليت
ومليت
مكانك
ارفعوه
ارموه
بكل افراحه واحزانه
احلامه واوهامه

ياااااااااااااااااه يا افوكاتوا
مش في وقتها خالص
حرام عليكي

بس تعرفي
اصدقائي وصديقاتي ، اللي كانوا مابقوش ، واللي بقيوا ماكانوش
لا
اللي كانوا ماكانوش
واللي بقوا استنيت ابقي انا اللي بقيت معاهم
بس خساره
حكموا عليا زي ما الدنيا ما حكمت
دا انا طلعت وسخ قوي
ياخرابي

تصبحي علي خير

اها صحيح
انا كمان مصدق قوي
ان بكره اللي جاي شموس

بس مش عارف ان كان بكره اياه ده جاي اصلا ولا اهو حلم يتقل الدولاب

تصبحي علي خير
تصبحي علي خير
May 25 at 11:00

اميرة بهي الدين يقول...

Amal Kamal
اميرة يااميرة .. مش لاقيه كلام بعد كل التعليقات اللى قريتها .. انت انسانه صادقة قوى مع نفسك.. وجريئة فى مواجهتك وحساباتك ورؤيتك ليها وللدنيا حواليكى ..ياريت نقدر نتعلم ده منك .. ياريت

اميرة بهي الدين يقول...

Faten Khalil
النوت دي كانت صدمة بالنسبة لي :::: أحتمال لأني ما تخيلتش أن فيه حد ممكن يواجة نفسه زي ما أنتي عملتي يا أميرة وقدرتي كمان تترجميه لكلمات مكتوبة ... وصدمتني لأني لقيت عندي كلام كتير ومليون سؤال محتاجة أسألهم لنفسي .. الدنيا سرقتني وكنت ناسياهم
Wednesday at 12:37am