المصريين بالخارج ، ابناءنا الاعزاء النابهين في المهجر ، مع احترامي الشديد ، عايز اقول ليكم كلمتين ...
ياريت تسمعوهم من غير انفعال ولاعصبيه ولا غضب !!!
المصريين بالخارج ...
سابو مصر علشان مبارك وحش وابن ستين كلب ...
بعضهم اضهد سياسيا ، وبعضهم ابواب الرزق اتقفلت في وشه ، وبعضهم حلم بحياه افضل من اللي بتوفرها الوظيفه العرة والمرتب العرة اللي كان بياخده في مصر !!! مفهوم والله ، مفهوم جدا
المصريين في الخارج ، عاشو بره علشان مبارك افسد مصر هو و نظام الحكم الفاسد بتاعه
وخلي اللي سافر سنه قعد عشره ، واللي سافر يدرس خلص دراسه واشتغل وقعد هناك
لان الحياه في مصر كانت بتنهار كل يوم والعيشه بتبقي زباله اكتر واكتر
مفهوم والله ، مفهوم جدا ...
المصريين بالخارج ، كل واحد منهم نفسه يرجع مصر ، وبيعيط لما بيسمع الاغاني الوطنيه وبتوحشه مصر جدا جدا ومهتم بمصر وحال مصر وبيقرا الجرايد المصرية وبيتابع الفضائيات ومسلسلات رمضان وبيشوف الافلام العربي ، فاهمه جدا جدا
وعايزين مصر تبقي احسن علشان يرجعوا ، طبعا مصدقاكم مصدقاكم جدااااااا
بعضكم هاجر لبلاد المهجر ، وانضم طبعا اول ماهاجر للجالية المصرية في بلاد المهجر وحافظ علي صلاته بمصر وكل سنه ينزل اجازه ولما عياله - اللي خلفهم - في المهجر كبروا ، جابهم مصر وفرجهم علي الاهرامات والمتحف المصري واسوان واكلهم فول وطعميه ووراهم ازي مصر جميله وام الدنيا وانه بيحبها قوي قوي ....... فاهمه والله ومصدقاكم ، فاهمه جدا
المصريين في الخارج
منكم
اللي درس وقعد ومارجعش
واللي اشتغل وقعد ومارجعش
اللي طلع اعاره واللي هاجر واللي نقل حياته واسرته خارج مصر
حقكم تسافروا وحقكم ترجعوا
حقكم تستقروا في بلاد المهجر وحقكم ترجعوا تعيشوا في مصر بعد طول غياب !!!
وانتم مصريين ، طبعا مصريين ، وبتحبوا مصر ، طبعا بتحبوا مصر ، واهاليكم في مصر ، طبعا
وناويين ترجعوا ، اكيد ، امتي ، الله اعلم ، اللي مسافر بقاله سنه واللي مسافر بقاله 30 سنه
عظيم عظيم عظيم جدا !!!!
طيب ، عايز ااقول ليكم كلمتين بقي من نفسي !!!
بمناسبه الثورة والانتخابات والهيصه اللي احنا عايشين فيها واللي مصر بتعيشها بقالها سنه ونص !!!
بالتحديد بمناسبه انتخابات الرئاسه واللي حصل فيها واللي حيحصل ..
بعضكم ....معجبين بافكار الاخوان المسلمين ، حقكم ، بتحبوا مرسي ، برضه حقكم ، بتكرهوا مبارك ونظامه واي حد قرب منه ، برضه حقكم !!!
بعضكم .... محتاس ومش عارف ياخد قرار !!!
بعضكم ...... ثوري ولا يساري ولا مش عارف ايه وعنده نظريات سياسيه عظيمه حوالين طبيعه المرحله الثورية ولا الوطنية والتحالفات مع مين ضد مين ..
كل ده حقكم جداااااااااااااااااا
لكن لما نيجي نقرر مصير مصر الان في هذه اللحظه الصعبه ، الان في مايو 2012 ، مالذي سننتخبه رئيسا للجمهورية واثر ده علي حياتنا ومصير مصر ومستقبلها ، لما نيجي في اللحظه دي نقرر مصير مصر ، مصر اللي احنا عايشين فيها ومش ناويين نمشي منها ولا نسافر ولا نهاجر ولا لينا حتة تانيه نروحها ، مصر اللي احنا ماسافرناش منها لما واجهنا الظروف الصعبه زيكم بالضبط ، ماسفرناش اما لان ماجتش لينا فرصه سعيده زيكم ، او لاننا قررنا مانسافرش واستحملنا - مصر اللي بتحبوها وبنحبها بكل قرفها وعيشتها السوده - وطلع عين ابونا مع الغلاء وارتفاع الاسعار وانهيار الخدمات ورداءه التعليم وتلوث المياة وازدحام الشوارع وقرف العيشه اليومية السودة كل لحظه ، لما نيجي في الوقت ده مايو 2012 نتكلم عن مصير مصر ومستقبلها وحياتنا وحياة اولادنا وحنعمل ايه وحنختار مين رئيسا !!!
في اللحظه دي بالذات ارجوكم ، ارجوكم ، ارجوكم ، فكروا شويه بهدوء بدل الحماس والانفعال والعصبية !!!
فكروا ان الكلام " السهل " اللي بتقولوه والمواقف السياسيه " المبدئية " اللي بتعلنوها ، بالنسبة لينا حياة يومية وعيشه ومصير وان اثار ونتائج تلك الاختيارات حتصب علي راسنا احنا وراس ملايين المصريين اللي عايشين في مصر وماسابوهاش ومش عايزين يسيبوها ....
فكروا ان الكلام السهل اللي بتقولوه والمواقف المبدئية اللي بتعلنوها بتاثر علي حياتنا وبتغيرها واننا - احنا المصريين اللي في مصر - اللي حندفع ثمن كلامكم ومواقفكم من حياتنا اليومية وعيشتنا وعيشه اولادنا واحفادنا !!!!
من حق كل واحد منكم يقول اللي نفسه يقوله ، طبعا من حقه !!
ومن حقنا نقول بالراحه شويه وانت بتتكلموا ، وفكروا اكتر وانتم بتنتخبوا ، احنا مش في مؤتمر سياسي من حق كل واحد يقول وجه نظره ويروح ، طبعا من حقنا !!!!
احنا في انتخابات ومصير بلد عايشين فيها يوم بيوم ولحظه بلحظه ، ومصير شعب حياته كلها حتتغير باي قرار واي تصويت واي اختيار يمين او شمال !!!!
مابطلبش منكم كتير ، باطلب منكم تفكروا شويه قبل ماتاخدوا اي قرار
لان اي قرار حتاخدوه واي كلام حتقوله ، حيأثر في مصير مصر وحياتها
ومصر اللي بتحبوها تستحق منكم شويه تريث وشويه تفكير ..
محدش يزايد علي ويقولي ماانا حارجع !!!
طبعا حاترجع ، اتفضل ارجع ، ولما ترجع بالسلامه وتعيش معانا علي خط النار ، خد المواقف العظيمه اللي انت عايز تاخدها !!! لكن طول ماانت من ضمن ابناءنا في المهجر ، بالراحه شويه وانت بتفكر وانت بتتكلم وانت بتتناقش وانت بتصوت !!!
احنا - دلوقتي حالا - اللي ايدينا في النار وانتم ايديكم في المية الساقعه !!!
لما تتفضلوا معانا وجنبنا وتمسكوا " النار " بايديكم زينا بالضبط ، يبقي قولوا واعملوا مابدا لكم وانحازوا بقوة لهذا او ذاك ، باعتباركم - وانتم عايشين معانا جوه البلد - وقتها حتدفعوا تمن اختياراتكم وقراراتكم وتصويتكم زينا بالضبط !!!! ومحدش ساعتها احسن من حد !!!
لكن دلوقتي وانتم بره مصر ، سفراءنا الاعزاء في الخارج وابناءها في المهجر ، وانتم بره مصر ، بالراحه شوية !!!!ا
بالراحه شويه ، العيشه مش ناقصه سواد ولا مستحمله فلسفه ولانظريات !!!!
هناك تعليقان (2):
......
مبدئيا من واقع اعلان النتائج اتضح انه برغم عظم عدد المغتربين المصرين الا ان عدد المصوتين لا يروى ظمأ لا يغنى من جوع
حتى وان صب فى اتجاه واحد ولمرشح واحد
الغربه تشعل الحنين للوطن ..ويشعر المغترب انه اكثر حبا وارتباطا بالوطن
ويعتقد انه يعلم عن الوطن اكثر مما يعلم المقيمون به
وبعدين الى يقرا كلامك يعتقد ان الى جوة مش عصبين ..اعتقد ان الى جوة محتاجين كمان نقولهم بطلوا تعصب للماضى
واعطوا فرصه للمستقبل
دعوا ما تعودتم عليه وتمنوا الافضل لابنائكم واحفادكم
مع خالص احترامى لجميع الاتجاهات
لكن احزن بنفس الطريقه التى حون فيها انصار بن رشد حين تم احراق ابداعه من قبل من يعشقون الماضى
احزن كما يحزن صحابه كل نبى من اضتهاد من يتمسكون بالماضى ضده ويطردونه ويخرجونه
طويل التعليق
لكن كان لابد منه
تحياتى
....
مجدي السباعي
اتفق معك
لكن حكم الغربه يجعل المتربين يعيشوا ادوار""مجاهدي الغربه "فهم يرفضون ويمقتون اي شئ ووفق مايصلهم فقط من سلبيات من الاعلام
ولذا كنت ضد تصويت المصريين في الخارج
إرسال تعليق