اكتب وانا مشحونه جداجدا ... كلي عواطف !!! كلي دموع معلقه خلف مقلتي!!!
اكاد انفجر من الانفعال من الحب من الامنيات من الرجاء!!!
وعلي راي ليلي مراد ... عايزه اغني عايزه ارقص عايزه ابوسك مش عارفه ليه!!!
وعلي راي نجيب الريحاني ..... يالطيف يالطيف!!!!
طبعا حاتكلم عن ماتش مصر والجزائر!!!
حاتكلم عن مباره اليوم ... عن حلمي وحلم المصريين بالتاهل لكاس العالم!!!!
عن بوابه الجزائر التي سيعبرها المصريين عبورا مظفرا ويتاهلوا لكاس العالم!!!!!!
وفي البدايه ...... لن اقول انا عايزه ايه وحاسه بايه !!!
ولا حاقول مالي منفعله كده ليه !!!
ولا حاقول انا حاسه بايه !!!!
لكن حابص علي الدنيا حواليا ..... علي العقلاء علي الغلسين علي الممرورين علي السياسين علي رهاف القلوب علي الاخرين!!!
حابص عليهم اشوف مالهم زعلانين ليه ... مش عاجبهم حماسنا ليه !!!
مش متحمسين زينا ليه !!!!! زعلانين من حماسنا ليه !!!!
طيب ........ انا نفسي نكسب في الماتش ومتحمسه جداجدا !!!
ده ايه مرض ؟؟؟؟ حاله نفسيه ؟؟؟ مشكله جينيه في تركيبه عقلي محتاجه كونصلتوا من العلماء الخبراء يفعصوا في مخي لفهم الحاله الغريبه دي !!!!!
انا نفسي نكسب الماتش وننتصر !!!
هل معني كده اني مش فاهمه اللي بيجرا حواليا واني مضحوك علي ودخلت مصيده الالهاء وجلدي تخين مش حاسه بالمشاكل المهمه ومش دريانه بالبلد واللي فيها !!!!!
طيب ...... نشوف مين بيقول ايه !!!!!
في البدايه .... اعرف جيدا ان كره القدم مجرد لعبه !!! وان اللعبه تفترض اننا ممكن نكسب وممكن نخسر وممكن نتعادل !!! عادي جدا كل ده كلام معروف !!! مش فاهمه ليه الناس بتقولوا لينا ليه !!! ليه فجآ حد بيبتدي يدينا دروس في قواعد الالعاب والروح الرياضيه والمكسب والخساره !!! حد قالكم اننا مش فاهمين ده !!! يعني حد قال اننا فاهمين ان الكوره معناها اننا نكسب بس فبتفهمونا شفقه علينا من جهلنا الكروي ان الكوره مكسب وخساره وممكن نكسب او نخسر !!!!! ولا بتشرحوا لينا الكلام ده خايفيين علينا من الصدمه واننا نموت روحنا وننتحر او نكتئب او نتوكس لو اتغلبنا او غلبنا جون ولا اتنين ومانطلعش كاس العالم فبتفكرونا ان اللعبه مكسب وخساره !!!
ماعلينا ..... عرفنا ده خلاص ومتشكرين .... عرفنا ان الكوره مجرد رياضه !!! وان الرياضه مكسب وخساره !!! واننا ممكن نكسب وممكن نخسر !!!!! متشكرين جداجدا ياجماعه والله !!!! ومتشكرين جدا ومانجيش ليكم في حاجه وحشه !!!!!
بس برضه نفسنا ان فريقنا يكسب الماتش !!!!
طيب ..... اوضح برضه اني - وغالبا الملايين المتحمسه للمباره مثلي - نعرف جميعا ان فوزنا او خسارتنا لن يحل مشاكلنا ولن ينظف الشوارع من القمامه ولن يخفض الاسعار ولن يحسن الاداء الطبي في مواجهه انفلونزا الخنازير ولن يحمس المصريين لعمل البطاقات الانتخابيه والمشاركه في لعبه الانتخابات التي يقال انها ستغير شكل الحياه التي يتذمروا منها !!!
ماشي برضه احنا عارفين كل الكلام ده .. عارفين ان فوزنا او خسرنا الزباله حتفضل في الشوارع وحيفضل المصريين ممعاهومش بطاقات انتخابيه وانفلونزا الخنازير حتنتشر اكتر واكتر في يناير وفبراير !!! مطلوب نعمل ايه طيب !!!!
مانتحمسش للماتش ونوجه طاقاتنا لرفع الزباله من الشوارع !!!
طيب انتم مش موجهين طاقاتكم انتم ليه لرفع الزباله من الشوارع !!! واشمعني يعني الكلام عن الزباله افتكرتوه الايام دي بالذات واحنا متحمسين للماتش !!! صعبان عليكم حماسنا ورايكم نوجهه للزباله !!! الله طيب حماسكم انتم فين ماتوجوه لرفع الزباله من الشوارع وربنا يقويكم يارب !!!!
يانهار اسود لحد يفهم من كلامي اني معجبه بوجود الزباله في الشوارع ، او معجبه بسلبيه المصريين اللي بيتكلموا ومابيعملوش حاجه ، ومعندهمش بطاقات انتخابيه ولا راضيين يطلعوها ولا راضيين يدفعوا الثمن الباهظ للمعارضه السياسيه لان عصايه الحكومه بتوجع ، انا ماقلتش كده !!!
انا بقول بس نفسي نكسب الماتش !!! وده مطلب انساني بسيط ومن حقي تماما ان فريقنا ومنتخبنا القومي يكسب الماتش !!! وبعد الماتش وقبل الماتش حنفكر في موضوع الزباله والمليون موضوع المقرف التاني اللي احنا عايشينهم ونفكر حنعمل فيهم ايه ونحلهم ازاي !!!!!
ومش بالضروره علشان الماتش وبمناسبته !!! الناس تتكلم في كل قضايا الوطن والهم العام ومشاكل المليون سنه اللي فاتت واللي جايه ، تجيب كل ده وتكببه فوق راسي ،وتقولي ان كل المشاكل لا اتحلت ولا حتتحل وان عيشتنا تقرف وكلها مشاكل علشان احس بالذنب والخجل الوطني وااقاطع الماتش واتكلكع زياده ماانا متكلكعه !!!
سيبونا الكذا يوم دول نتحمس للماتش وبعد كده نرجع لما كنا عليه و" ترجع ريما لعادتها القديمه " !!!
فيه وقت طوووووووووووووويل نناقش فيه جميع القضايا ونغضب ونحبط ونيآس ونكتئب ونشتم بعض ونلوم سلبيتنا ونهاجم الحكومه وسياستها ونعيش حياتنا العاديه بكل قرفها واحباطتها ومشاكلها !!!!
هل ممكن النهارده نتحمس للمباره وفريقنا القومي ونتمني نكسب الماتش !!!
هل ده خيانه وطنيه للوطن المتخم بالمشاكل ؟؟
هل دي تفاهه لان مفروض منا نفضل طول الوقت مقتنعين بانه لاصوت يعلو فوق صوت المعركه !!!!!! انهي معركه مش مهم لكن لازم نبطل تفاهه وخلاص !!!!!!
ااقول تاني ......... اعرف ان كوره القدم لعبه مجرد لعبه ، وان قواعد اللعبه تفترض الخساره والمكسب ، وانه لو خسرنا عادي حنطلع من كاس العالم وبرضه منافساته ... وعلي راي بعض العقلانيين في الكوره والحياه ماهو احنا مش حنعمل حاجه اساسا في كاس العالم وفريقنا مش حيقدر ينافس مع الفرق الجباره وان شكلنا حيبقي وحش خلاص بقي من اولها ومن قصيرها افضل !!!!! خلاص ياعقلانيين بلاش نشجع وبلاش نحلم وبلاش نصدق ان عندنا فرصه ننافس وسط اللي بينافسوا وخلونا ناخدها من قصيرها ومن اخرها وننام و"غطيني ياصفيه وياسعديه ويافتحيه وصوتي !!!!!! وربنا يخليكم لينا يارب وتفضلوا كده تسعدونا وتمنحونا امل في نفوسنا !!!!!!
طيب ...... انا وملايين معايا وزيي ..... نفسنا نكسب المباراه !!! ده معناه ايه بالضبط !!!!!!
هل معناه ... زي مابيقول بعض الغلسين ان احنا شعب تافه نيجي علي الهايفه ونتصدر وسايبين كل مشاكلنا ومركزين في لعبه عيال ومش فالحين غير في الكلام الفاضي واننا بننسي التاريخ والجغرافيا وجميله بوحريد وجمال عبد الناصر والعروبه والقوميه العربيه وعمالين نتخانق مع الاشقاء الجزائريين علي حته ماتش لاراح ولاجه وجتنا نيله او خيبه او وكسه زي ماالغلسين بيقولوا !!!!
هل معناه .... زي ما بيقول بعض السياسين او اللي نفسهم يبقوا سياسين ماتش ايه اللي عامل الدوشه دي كلها وده مخطط الهاء للشعب عن مشاكله العويصه والنظام بيدور علي حاجه يضحك بيها علي الناس العبيطه اللي هي احنا برضه ومش حيلاقي احسن من الكوره وجمال ماله يروح التدريب ليه ودي خطوه علي طريق التوريث ومبارك يروح المعسكر ليه خلاص كل مشاكل البلد خلصت مافاضلش الا الكوره !!! واننا علي رايهم برضه شعب قالع راسه ونستحق كل اللي يجرا لينا !!!!!
هل معناه .... زي مابيقول بعض الممروريين من الهزائم العربيه والانكسارات العربيه ماتروحوا - قصدهم احنا يعني اللي متحمسين للماتش - ماتروحوا تحرروا فلسطين والعراق وتشوفوا امريكا بتعمل فينا ايه بلاخيبه بلاوكسه عليهم ياشعب مش عارف مصالحه الاستراتيجيه - برضه ده احنا - ماتروحوا تشوفوا اسرائيل عندنا قنبله نوويه واحنا منيلين - برضه ده احنا - ماتتشطروا علي امريكا اللي بتضرب العرب والمسلمين بالجزمه بدل ماانتم هبل كده - ده احنا برضه - وموكوسين ومشغولين بالكوره اللي اخترعها واحد يهودي علشان يلهي شعوب العالم عن مصالحها وده جزء من برتوكولات حكماء صهيون اللي سيطروا علي العالم - واحنا طبعا - بيها وجتكم وكسه ده احنا برضه!!!!
هل معناه ..... علي راي بعض رهاف القلوب واللي بيحبوا اخواتهم تاكل وتلبس ، احنا - قصدهم الناس اللي متحمسه للماتش - ناس مش دريانه بمشاكل الاخرين ومش دريانه ان تمن العلم اللي بنتشريه علشان نرقص بيه في الماتش يعشي عيله كامله في العشوائيات وان تمن تذكره الماتش في السوق السودا يلبس ٣ عيال جزم جديده في المدرسه ويشربهم بيبسي كمان واحنا سفاهههها ومش حاسين بالازمه الاقتصاديه اللي ضاربه في الشعب الغلبان ومش حاسين بالغلابه وبنبعتر فلوسنا - غالبا اللي ماتعبناش فيها - في السفاهات بدل مانعمل حاجه مفيده في حياتنا وما تتنيلوا - ده احنا برضه - وتروحوا مستشفي سرطان الاطفال ولاملجآ اطفال يتما وتتبرعوا بالفلوس ابرك!!!
هل معناه ...وعلي راي بنات عماتي ان الاعلام نفسه يهيص واهو لقي هيصه ، والشعب تافهه وبيتضحك عليه واهو اتضحك عليه والحكومه عايزه تنسينا انفلونزا الخنازير والغلا و الرشوه والحزب الوطني واهو نسيناهم ، وجتنا القرف - احنا طبعا - ناس عبيطه بيتضحك عليها وتستاهل اللي يجرا لها وناس امخاخها فاضيه الاعلام بيلعب فيها ويسيطر عليها و" ...... " في دماغها !!!!!
هل معناه ......علي راي عمي اللواء السابق في الجيش المصري ايام النكسه ، ان الشعب بيسخن - احنا برضه - لمعركه حربيه وان الشحن المعنوي يفوق الشحن المعنوي وقت حرب اكتوبر وان عمرنا ماسخنا علي اسرائيل - ده احنا برضه - كده ويلعن ابو الماتش واللي حيتفرج عليه - ده احنا برضه - طيب نعمل ايه ياسعاده اللواء ، يشوح بايده ويقوم ويسيبنا وتغمز لي بنته وتقول ولا حنعمل حاجه حيتفرج طبعا علي الماتش !!!
ياجماعه والله والله ......... وانا حاتكلم عن نفسي ... انا متحمسه للمباراه ونفسي نكسبها ونتآهل لكاس العالم ومنفعله جدا ومليانه مشاعر لكن ده مش معناه خالص اني تافهه ولا موكوسه ولاحد بيلعب في راسي ولا اني نسيت كل مشاكلنا العويصه اللي عايشينها وحنعيشها !!!
مش معناه اني نسيت فلسطين والعراق ، ولانسيت الفقرا والعشوائيات ، ولا نسيت انفلونزا الخنازير ولابطء اجراءات التقاضي ...
مش معناه اني شخصيه تافهه متعصبه ، ولاانسانه امعه بلا راي بلا وجه نظر في الحياه ، ولاانسانه انانيه مابحسش بالناس التانيه !!!
معناه بس ..... اني باحب الكوره وباحب منتخبنا القومي ونفسي نخش كاس العالم !!!
ده معناه بس ..... معني بسيط جدا !!!
وانا مش متعصبه ، انا متحمسه لفريقي ولبلدي ... وحماسي ده مشروع وحبي للوطن مشروع جدا !!!
انا وزيي ملايين .... عارفين كل حاجه وفاهمين كل حاجه لكن ... نفسنا ننبسط هل دي جريمه ؟؟ نفسنا نفرح مش بانجاز شخصي ولابنجاح الواد ولاخطوبه البت ولا بعلاوه جت فوق المرتب ولا بموكل جديد واتعاب جديده ، نفسنا ننبسط نفسنا نفرح فرحه عامه ، نشارك كل المصريين فيها ، فرحه تهز كيانا من جوه ، تفكرنا اننا شعب واحد ، تفكرنا ان كل قلوبنا لسه مع بعض ، تفكرنا ان لينا علم واحد بنحبه ورافعينه فوق دماغتنا ، معلقين فوق العربيات من البلكونات لابسينه فوق هدومنا ، لينا علم واحد بيرفرف خفاق جميل ، رفعناه ايام حرب اكتوبر وهتفنا باسمه في المدارس وغنينا له ولسه حنغني !!!
انا وزيي ملايين المصريين ... ننتمني لهذا الوطن وبنحبه ورغم مشاكله ومشاكلنا ، نفسنا نصرخ من جوه مصر مصر ، نفسنا نهتف باسم الوطن اللي بنحبه ، نفسنا نرفع العلم عالي نرسمه علي وشوشنا علي قلوبنا علي هدومنا ، نفسنا نرجع نفتكر ونعيش احساس الانتماء الوطني احساس الجماعه المتوحده احساس الشعب المتكاتف ، نفسنا نغني ياحبيبتي يامصر ودموعنا تجري علي وشنا واحنا بنضحك ، نفسنا نحس فرحه جماعيه وانتصار قومي !!!
علشان كده نفسنا نكسب الماتش !!!!
حتقولوا ومالقتوش غير الماتش تحسوا فيه بالمعاني الجميله دي !!!
حاقول لكم المثل الشعبي الجميل " قالوا ليه ابوك مات من الجوع قاله هو لقي اكل وماكلش " !!!
ايوه حاليا مش لاقيين غير الماتش يفرحنا ويرفع اعلامنا ونصرخ باسم مصر فيه !!!
اللي عنده حاجه تانيه يقول لنا عليها ، اللي عنده حاجه تانيه يجيبها لينا !!!
لكن لغايه مااي حاجه تانيه تلم المصريين حواليها وتسعد قلوبهم وتخليهم يرفعوا الاعلام ويصرخوا مصر مصر !!! لغايه ما ده يحصل محدش يلومنا ليه متحمسين ليه منفعلين ليه نفسنا نكسب المباراه !!!
لغايه ما ده يحصل محدش يتريق علينا ولايسخر من مشاعرنا ولايتعالي علينا !!!
ايوه ....... نفسي نكسب المباراه
نفسي نخش كاس العالم
نفسي ابطال منتخبنا القومي الوطني يسعدونا النهارده
نفسي ساعتها انزل ارقص في الشارع مع اللي بيرقصوا
واطبل واصقف مع اللي بيصقفوا
واصرخ مصر مصر تحيا مصر مع اللي بيهتفوا
وارفع العلم علي العربيه وارسمه علي وشي وانا ست كبيره عندي ٥٠ سنه وامش ازمر في الشارع !!!
نفسي نكسب المباره وننبسط !!!
انا ومعظم المصريين نفسنا ننبسط بفرحه وطنيه للاسف مافيش حاجه بتديها لينا في هذا الزمن الرديئ غير الكوره!!! فماتلومش علينا ولاتنتقدوا فرحتنا ... بالكتير قوي لوموا الزمن الرديء واللي يعرف يعمل حاجه ويغيره ايدي وقلبي معاه !!!
يارب يارب يارب
فريقنا يكسب ونتآهل لكاس العالم ويفرح كل المصريين ويتسعدوا !!!!
وادعوا معايا يارب النصر لمصر النصر لمصر !!!!!
هناك تعليق واحد:
ياريت يا اميرة كلنا نفرح انهاردة انا محتاجة الفرحة اوى بعد الجرح اللى انجرحته ومفتكرش انى حخف كدة بسهولة الا لو جت فرحة كبيرة فرحة قلبى
إرسال تعليق