23 ديسمبر 2011

ساعة صوبحية !!!ا




الساعه الثانية
الجمعة 
23/ 12/ 2011
ياصباح الخير ياللي معانا ياللي معانا ، الكروان غني وصحانا وصحانا 



ساعه صوبحية !!! 
تبتدي لما شعاع شمس يخش من الشباك علي وشي ، او لما تليفون يرن فاصحي ااقول الو ، او لما جرس المنبه يرن فارمي امه بعيد واصحي ، ااقعد في السرير زي قرد قطع واقول اصطبحنا واصطبح الملك لله ، ساعه صوبحيه يامصر ، مش عايزه حد يخنقني ولا يقرفني ولسه اليوم طويل !!! 
ساعه صوبحيه ، يعني مالوش لزمه الزعيق والخناق والقرف ، عدوا بس الساعتين بتوع الصبح وبعد كده اليوم طويل اقرفوني زي ماانتم عايزين ، الا ساعه الصوبحيه خصيمكم النبي !!! 
ساعه صبوحيه !!!
لسه بنقول يافتاح ياعليم يارزاق ياكريم 
شاي بالنعناع وعشرين سيجاره مع تحياتي لشعاراتنا الجوفاء " بيئه نظيفه تساوي حياه افضل " 
وبصه مجرد بصه علي مانشيتات الجرايد ، بصه واحده تكفي علشان ارميها بعزم مافي وكل قوتي بعيد والشغالين هايصيين بينضفوا القزاز بالجرايد المقفوله ، اصلي باشتري الجرايد علشان تنضيف القزاز وبالمره ابص عليها بصة واحده ، واحده بس!!!! 
يافتاح ياعليم يارزاق ياكريم ..
اخش الفيس بوك ، علي الهوم جري ، قبل مااكتب اي كلمه اتفرج الناس كاتبه ايه ، كل حاجه بتتقال تغم !!! حاقفله واجري ، مش حاكتب حاجه ، حتي صباح ربنا مش حاصبحه !!! عيب يابت خلي عندك دم ، شدي حيلك واكتبي كلمتين يخلوا الناس يتفائلوا شويه بدل الغم اللي هما فيه !!! 
باشوف التفاصيل كويس وباشوف ايه اللي مااتقالش مش ايه اللي اتقال ، باسمع الصوت الداخلي للناس وهي بتتكلم وتفرفر وتتأفأف ، وبعدين تكتب كلام مش عايزه تقوله ، لان الكلام اللي عايزه تقوله حيجيب وجع الدماغ ، وعلي ايه ، الطيب احسن ، وساعه صوبحيه!!! كل واحد بيكتب كلام مش عايز يقوله ، لان اللي عايز يقوله مش عايز يكتبه ، مبروك يامصر ، بقي كل واحد بيكلم نفسه زي اللهلوب ويبص في وش الناس ويبتسم ابتسامه هبلة اي يعني هو لا مخنوق ولا حاجه ولا متضايق ولا حاجه ، كل واحد يكلم نفسه وكفي الله شر القتال ... 
ماعلينا ، لسه ساعه صوبحيه ، حاقفل الفيس بوك واجري ، حاخش علي فليكر ، العالم هناك ملون ومبهج ، صور جميله ، ناس عندها صبر بتصور ، بتصور الجمال ، يانهار ابيض ، دي الدنيا لسه فيها جمال ، امال الزفت اللي احنا فيه ده ايه بالضبط ؟؟؟ جايز ده الزفت اللي يسبق الجمال ؟؟ طيب يامهون يارب نصبر ونستحمل ونشرب الزفت علشان الجمال يجيي !! انت مابتجيش ليه؟؟؟
في فليكر الدنيا ملونه ، لا والناس كمان ليها هدف في حياتها ، جايز هدف عبيط لكن هدف ، كل واحد ماسك كاميرا وبيصور اي حاجه وكل حاجه ، بيصور الدنيا ، ماهي الدنيا باقيه واحنا حنموت ونغور في ستين داهيه ، بيصور الدنيا والصور تفضل وراه دليل انه كان موجود وكان شايف الدنيا مش محشور في نفسه وبس ، مابيشوفش غير روحه ومصايبه وبلاويه واكتئاباته !!!! في فليكر الناس ليها هدف ، بتحاول تعمل حاجه مفيده ، ايون ، ماهي الحاجه المفيده دي مش لازم تبقي اني ابني الهرم ، يمكن احكي حكايه لطفل صغير يسمعها ويتعلم منه انه " مش كل يوم خس وجزر " وبس ، في فليكر الناس بتحاول تعمل حاجه مفيده لروحها وللناس اللي نفسها تشوف الجمال ، عادي جدا ماهو الجمال ده نعمه من عند ربنا ، طيب نشوف النعمه ونشكر ربنا علي نعمه الكتير ، مش طول النهار نبص في المرايه ونشتم روحنا ونقول ايه القرف ده !!!! 
ماعلينا ، برضه احنا لسه في ساعه صوبحيه ، صباح العسل يافيس بوك ، كذب كذب ، كده وكده ، صباح العسل يافليكر ، بجد بجد عسلن عسلن ، نسمع الراديو بقي ، نخلق عالم جميل ...
يعني شاي بنعناع اخضر وراديو بيغني وفليكر ملون والفيس بوك اللي محشور فيه شويه ناس بحبهم زي الاتوبيس ، نفسي اقولهم محشورين ليه ، الدنيا واسعه ، طيب مش عارفين تنزلوا من الاتوبيس بصوا من الشبابيك طيب ، شموا شويه هوا نضيف ، لكن علي طول محشورين جوه الاتوبيس كده وقافلين الشبابيك والنور والدنيا ضلمه وخنقه وترجعوا تقولوا الحياه زفت ليه ، زفت لان الاتوبيس زحمه وضيق والريحه وحشه ، افتحوا الشبابيك لنور الشمس يالا !!!!!!!!! ا
لسه ساعه صوبحيه وبلاش فلسفه ووجع نافوخ ودوشه !!! 
مشيها تفائل ، طيب ، ان اجمل الايام التي لم تأتي بعد ، ناظم حكمت !!! 
كده انا حلوه وانتم مبسوطين ، بس المشكله ان عم ناظم ماقالناش حتيجي امتي !! مش مهم ، طوله البال تنول الامل ، اديني مستنيه ياعم ناظم اجمل الايام !!! 
مشيها تفائل وشويه اغاني حلوه وصورتين حلوين والنهار كده تمام التمام ، وانزل جري انا بقي من الاتوبيس والف في الدنيا الواسعه!!!ا 
لسه برضه احنا ساعه صوبحيه !!! 
الصبح الهوا نضيف ، والسقعه حلوه وفنجان قهوه محوج وعشرين سيجاره برضه والراديو بيغني ، مره حب ومره هجر ومره وطنيات ، ومره خلي بالك من زوزو ومره صغيره علي الحب ، الراديو زي الدنيا ، يديك اللي انت مش متوقعه ، علشان كده كنا بنلعب مع بعضينا لعبه بختك ، الاغنيه الجايه علي بختي ، يطلع اسود ومنيل بستين نيله ، في يوم في شهر في سنه ، ونضحك ، غريبه  قوي البشر ، يطلع بختك منيل نضحك ، يطلع بختك كويس نضحك ، والراديو بيلعب معانا وبيلاعبنا !!!! 
اللعبه دي اتعلمتها من امي اللي يرحمها ، كانت هي وصديقاتها يلعبوها وانا صغيره باقرا ميكي واسمعهم واضحك علي ضحكهم ، علي فكره يعني ماكانش فيه حاجه بتطمني في الدنيا غير لما امي تضحك ، امي لما تضحك تبقي الدنيا بخير ، وكبرت وامي ماتت وبقيت جده ولسه مستنيه امي تضحك علشان تفضل الدنيا بخير !!! انت مابتضحكيش ليه ياماما الايام دي ، حتي في الحلم كانت زمان بعد ماماتت تيجي تضحك في الحلم وتقولي انا كويسه يااموره ، فاصحي من النوم متطمنه ، مابقيتش تيجي اساسا ، وحرمتني من الضحك اللي بيطمن ، انت مابتضحكيش ليه ياماما ؟؟؟
لا لا لا ، كده غلط جدااااا، احنا لسه ساعه صوبحيه ومش حنمشيها ماما واكتئاب وعياط واحساس باليتم ، لابد من الاستهبال علي النفس ، انا متفائله وحامشيها تفائل ، وخلينا وراك ياعم ناظم لما نشوف اخرتها ايه ؟؟؟؟؟؟؟؟؟
في ساعه الصوبحيه ااقول بصوت عالي ، ان اجمل الايام التي لم تاتي بعد !!! 
هو صحيح النهارده الجمعه ومن زمان زمان كانوا بيقولوا ان يوم الجمعه فيه ساعه نحس !!! وبعدين بقي فيه مليونيات !!!!
وكل ده يخنق ، لكن وماله برضه ، بمنتهي التفائل قررت ان النهارده مش الجمعه ، وان الاسبوع بتاعي بينط من الخميس للسبت واليوم الفاضي ده مالوش اسمه ، انا حره بجد 
حره الغي يوم الجمعه بساعته النحس ومليونياته من حياتي 
ومحدش يشتم ويقول قله وطنيه ، انا حره ، ده اسبوعي انا ، خلي اسابيعكم كلها جمع انتم حرين وانا حره 
لا لا لا ... كده حابوظ ساعه الصبوحيه ، ساعه الصبوحيه مافيهاش خناق حتي مع يوم الجمعه 
ويايوم الجمعه انا لغيت امك ومابقتيش اي حاجه في اي حاجه بقيت صفحه فاضيه من غير اسم ولا لون ولا تاريخ 
بقي فراغ والي حين اشعار اخر !!! 
ماعلينا ، انا لسه في ساعه صوبحيه 
اشرب قهوه بقي واسمع الراديو والعب في فليكر واستني عصفورة تيجي تقف علي شباكي علشان اقوم اجيب الكاميرا واصورها ولو العصفورة ماجاتش ، حاخد الكاميرا وانزل الشارع ، اصورها علي الشجره او حتي اصور الشجره من غير عصفورة !!!! 
و............ انا قررت اخلي كل اليوم ساعه صوبحيه 
اعيشها انا والقهوه والسجاير وعم ناظم وفليكر !!! 
والفيس بوك طيب ؟؟؟
حابقي اروح اشقر واجري ، اقرا كلمتين ينرفزوني مااعلقش عليهم واجري ، اشوف واحده صاحبتي ااقول لها وحشتيني ، عايزه اقولها ايه الطناش ده ، عايزه اقولها ارحمي روحي من اللي بتعلميه في نفسك ، عايزه اقولها مالك بقيتي بايخه كده ، لكن مش حاقول حاجه ، حاقول لها وحشتيني وبس ، اصل الناس تاهت والوصل اتقطع والجفا ساد !!!! 
لا لا مش وقته خالص كل الكلام ده 
دلوقتي ساعه صوبحيه !!! 
وفي ساعه الصوبحيه ، نفتح عينيا ونقول ، يافتاح ياعليم يارزاق ياكريم 
وفي اليوم اللي مالوش اسم ولا لون ولا رائحه ، باقول كمان ، يارب تستر 
واهرب جري لفليكر ، وللعالم الملون والامل في الحياه ......
و.......... صدقوني وصدقوا عم ناظم حكمت لما قال " ان اجمل الايام لم تاتي بعد "!!!!
وصباحكم اخر تفائل واخر حلاوة واخر الوان !!!! 

( اديني من وقتك ساعة ... 2 ) 

هناك 5 تعليقات:

مها العباسي يقول...

وحشتينى

داليا يقول...

صباح الفل قلبتى علينا المواجع بس برضه صباح الفل
جميلــــــة

يا مراكبي يقول...

أنا بعمل كده لما بصحى .. بشوف الفيس بوك من البلاك بيري وأنا لسه بفتّح عيني في السرير .. وبعدين برميه جنبي وأقول يا صبح .. خليني أحسن في المخدرات بتاعتي .. الشغل .. المصانع والمواقع ومشاكل البنوك .. يمكن لحد ما أفضى حبة أرجع ألاقي الناس مفرفشة .. وما بيحصلش .. بكلم نفسي وأكتب أي حاجة ليا أنا وخلاص .. وأهو أيام وبتعدي

egyptian tiger يقول...

الحكاية عبارة عن تصوير لفوضى من المشاعر وشعور بالضيق ...ونفاذ الصبر وعدم القدرة على تحمل المزيد من احداث السياسة وشعور بأن ...هناك من يفسد الحياة بأفعال ...تقتل الستمتاع بطعم الحياة

تحياتى ...وصف ..واقعى ...يكشف وجدان
دكتور / رأفت وليم

manoola يقول...

أميره
ايوه والله ساعة صبحيه
كل اللي قلتي بيجرى بشكل او بآخر معانا
اهو... ادينا ماسكين فيها "ياصباح الخير ياللي معانا"
يمكن عاملين زي اللي بيكدب كدبه ومصدقها بس نفسه كمان تحصل ويبقى صباحنا يارب كله خير
ربنا يزيح الغمه يارب