22 يناير 2012

بهية في زمن العولمة !!!!ا



( 21 ) 
الساعه الواحد والعشرين 
22/ 1/ 2012 

باتفرج علي فيلم العصفور ...
باقلب في قنوات الافلام زهق ، لقيته ، شبطت ، كل مره مااتفرجش عليه من الاول ، لكن اللي باشوفه منه بيكفيني !!! 
باحب الفيلم وباحب يوسف وبهيه وفاطمه ورؤوف واكتر واحده باحبه جوني ...
اللي ماشفش الفيلم مش حيفهم اي حاجه من اللي بقوله ، وعادي جدا ، انا كمان ساعات مابفهمش الناس بتقول ايه وهي تتكلم عن الحياه العاديه مش بس الافلام ...
ليه باحب فيلم العصفور ، يمكن لاني كان نفسي اعيش في بيت بهيه ، او اكون بهية ، او اكون فاطمه بنت بهيه اللي بتحب رؤوف وكانت حتموت نفسها لوطلعت وحشه !!! 
لكن زمن بهيه خلص ، وبقينا في زمن العولمة !!! 
ياتري لو يوسف شاهين عمل فيلم العصفور النهارده ، بهيه كانت حتبقي عامله ازاي ، حنلاقيها معانا علي الفيس بوك ، بتكتب ايه ، بتشحذ همم الناس ازاي والدنيا كابسه علي قلوبهم كلهم ، يوسف شاهين مات وسابنا في زمن العولمه البارد نتابع اخبار الدنيا المقرفه من النت وبيوتنا ساقعه وقلوبنا بترتجف !!!! 
زمن بهيه خلص ، وزمن العصفور خلص !!! وفضل زمنا الغريب ، زمن زي كباري حرب سته اكتوبر وقت العبور  ، زمن متطبق وبيتفرد فوق وش الميه ، زمن متطبق وبينقلنا من دنيا لدنيا ، من ايام جدتي والدفا لايام العولمه والصقيع واحنا محشورين في الكوبري المتطبق لاعشنا الزمن الجميل ومتنا ولا اولاد الزمن الغريب وعشنا فيه مبسوطين منه !!! 
يخرب بيت الصقيع !!! وكأن العالم يتجمد من حولي !!!! 
زي فيلم اخر العالم ، لما المناخ اتلخبط فبدأ عصر جليدي جديد !!! 
والناس اضطرت تحرق الكتب في المكتبه الكبيره علشان تتدفا وماتتجمدش !!! 
كان ناقصهم في الفيلم بلاك بيري او اي فون ، يعملوا بيه شات وهما بيحرقوا الكتب والدنيا بتتجمد من حواليهم !!! 
احنا بقي قاعدين في المكتبه الكبيرة نحرق الكتب ونترعش من السقعه وبنشات مع بعضنا نوصف لبعض المشهد وازاي بردانين !!! 
زمن العولمه القبيح يستشري وينتشر يستشري وينتشر زي مبيد الصراصير اللي كانوا بيعملوا اعلانه !!! 
ينتشر وينتشر و..........معاه صقيع فيلم اخر العالم وزمن حرق الكتب والشات !!! 
بحب فيلم العصفور وباحب جوني ، وباحب بهيه والدفا وهي مكفيه فوق ماكينه الخياطه وبحب رؤوف وهو بيطبل علي الحلقه ام قعر اسود ، دفا دفا بجد !!!!  كنت عايزه اعيش الزمن ده ، زمن الجيران اللي ابواب بيوتهم مفتوحه ، متطمنين لبعض ، زمن الجاره اللي بتزوق بنت جارتها يوم الفرح ويطلعوا يعملوا الفرح علي السطوح ، زمن البنات لما كانت بتضحك من قلبها زي فاطمه وهي نفسها رؤوف يبوسها ، دلوقتي البوس في الشات بقي افتراضي والحب حروف ينطرها الشات من صوابع لصوابع ولما الناس تتقابل تتخرس وماتعرفش تتكلم ، اصل بطلنا نتكلم وبقينا بنكتب ومن كتر الكتابه اللي هي مش كتابه بطلنا نعرف نحس ونعرف نحب وقفلنا الباب خايفين من الجيران اللي مانعرفهمش لان ولاد الحرام ماسابوش لولاد الحلال حاجه !!!! 
لو عندي فيديو فيلم العصفور ( فيديو او دي في دي ) كنت شغلت الفيلم عشر مرات ورا بعض وقفلت الدفايه !!!! 
لكن معنديش ، طيب حاتدفي ازاي ، وضحكه بهيه وغناها خلص ومافاضلش غير الشات !!!! 
حاستني ام كلثوم ، هي اللي حتدفيني !!! 
هو انا بحبها ليه الست ام كلثوم دي ، بحبها لان صوتها جميل ولا كلماتها جميله ولا ايه الحكايه ؟؟
باحبها لانها صوت مصر الدافي الصادق ، ومن قلبها لقلبي ينتشر الدفا ...
ام كلثوم بوظت الحب !!!! قصدي الحب بتاع الايام دي 
الناس مابقيتش بتعرف تحب ، مره تعتبر الحب عيب ومره تعتبره حرام ومره تعتبره موده ومره عشره ومره ضروره ومره مؤسسه ومره تعتبر الحب اصعب من عضه الكلب ومره تعتبر بيذل ، والبشر من غير حب زي الفاكهه الناشفه علي الشجر الميت ، مافيهاش حياه ، وحياه ربنا لو مافيش حب بين الستات والرجاله الدنيا تبوظ ، الحق هي باظت وخلاص وانتهي الامر !!! باتكلم عن الحب مش عن الجواز والمؤسسات واستمرار النوع والاسره السعيده ، باتكلم عن الحب اللي بيدفي القلوب ويونس ويخلي طعم الحياه حاجه تانيه لما روحين يبقوا روح واحده ويبقي كل كلام الاغاني ماسخ لان اللي بعيشوه اجمل من كل اللي بيتقال وبيتسمع !!! 
ياتري ايه اللي بوظ الحب ، زمن العولمه ولا زمن الوهابيه ولا زمن اللي معاه قرش يساوي قرش واللي ممعاهوش مايلزموش !!!! 
سالت راجل صديقي ، هي الرجاله بتعرف تحب ، ضحك وقالي كنت حاسالك نفس السؤال هي الستات بتعرف تحب !!! 
انا شخصنت السؤال واعتبرتني كل الستات وقلت له طبعا الستات تعرف تحب لما تلاقي رجاله تتحب ، ضحك وقالي وهو مشخصن سؤالي برضه ومعتبر روحه كل الرجاله ان الرجاله بتعرف تحب لما تلاقي ستات تتحب !!! 
عظيم ، فين بقي الرجاله اللي تتحب والستات اللي تتحب !!! 
اكلتهم القطه ولا ماتوا في الحرب ولا داسهم القطر ولا قاعدين قصاد الشات ومش عارفين يتكلموا لان من كتر الشات بقوا بيتهتهوا والكلام بيقف في زورهم وقلبهم بارد ومافيش كروت شحن !!!! 
فاطمه قالت لرؤوف ان بهيه بتحب يوسف ، بتحبه اوبتحب فيه اللي كان نفسها تحبه من عشرين سنه !!! 
وقفت قوي قدام الجمله واللي وقفت قدامها اكتر ، قالت هي صحيح ماما كبيره عدت الاربعين ، ضحكت وقلت في سري كده ياجو تضربني في قلبي كده من غير سبب ، انت معتبر بهيه كبرت لانها عدت الاربعين طيب واللي عدي الخمسين ياجو يبقي ايه ، وقلت فين الراجل اللي بحبه او بحب فيه اللي كان نفسي احبه من تلاتين سنه !!!! سالت السؤال وسكت ، اصل مش كل الاسئله ليها اجابات ، وطبعا في الفيلم بهيه حبت يوسف واتخرست وسكتت وانا مالقتش اللي احبه واتخرس حتي ، يااااااااااه نهار كحلي ، في زمن العولمه يبقي الواحد اخر امنياته يحب واحد مش ممكن يتحب ويتخرس سعيد لانه بيحبه وبس !!! مافيش امنيات اكتر من كده !!! يحرق ام زمن العولمه وزمن الشات !!!! 
مبسوط ياجو ، قلبت علي المواجع ........ دلوقتي اصحابي ينطوا من مكانهم ويقولوا ليه ، اضحك واقول باهيس ، يقولوا اوكي ، وهما عارفين اني باتكلم جد لكن محدش عايز يوجع قلبه ويتكلم ، عارفين اني مش باهيس وعارفين انهم مش بهيسوا وعارفين ان كلنا نفسنا نتكلم ونفضفض وان كلنا مخروسين ومعلقين صوابعنا علي زراير الكي بورد وعمالين ندق عليها ونكتب كلام اخرس زي اصحابه !!! 
طيب ماليش دعوه ، كنت عايزه اعيش في زمن بهيه ، وزمن السبت الخوص مش الشنطه البلاستيك وزمن القهوه مش الكافيه وزمن النكسه الدافي مش زمن الانتصارات الوهميه البارده .......... ماليش دعوه ياجو ، اكتشفني ، اعمل فيلم جديد وخدني امثل فيه ، اديني دور بهيه ، لا مش في زمن العولمه وحرق الكتب والصقيع المنتشر ، لا اديني دور بهيه في زمنها زمن الدفا والاحلام والامنيات اللي حتي لما بتتحققش بتونس وتدفي !!!! ااقولك ، اعمل لي فيلم جديد ، اديني فيه دور بهيه في العصفور ودور هدي سلطان في الاختيار ، يانهار اسود علي ده دور ، هدي سلطان حبيبه محمود ، هي دي الحياه ياجو ، هي دي الحياه اللي كانت بتونس ، ست قويه عفيه زي الدنيا وصوتها عالي وضحكتها من قلبها اعلي ، بتحب محمود الصياد الحر ، وبتكره سيد العبد الاسير لكل ماهو كريه ومزيف ، تصدق ياجو ، لو ماكنتش عملت غير الفيلمين دول ، العصفور والاختيار كان كفايه عليك ، تعملهم وتموت وتفضل عايش !!!! 
ياتري في زمن العولمه كنت حتعمل ايه ياجو ، افلامك كان حيبقي شكلها ايه ، ولا كان حيبقي شكلها حاجه ، كنت حتموت كمدا الحمد لله بقي انك مت لما عمرك خلص قبل العولمه ما تخيم بصقيعها علي الحياه ، كانت افلامك حتبوظ ياجو ، الحمد لله انك عملت الافلام في زمن الدفا وموت بعد ايام عمرك ماخلصت !!!! 
فيلم العصفور دافي قوي ، وايه الراجل علي الشريف ده ، يخرب بيت كده وايه الانسانيه دي ، ايوه الانسانيه ، بهيه بتغني وبنتها بتحزمها وعايزاها ترقص ورؤوف حيلزق مقالاته علي الحيطان وجوني قاعد علي القهوه والعصفور في القفص والشيخ احمد راح لنبويه والراجل عايز ولد ولما مراته خلفت بنت اقسم يسميها حنفي برضه !!!!!!!!! انسانيه محدش مكسوف منها ولاخايف حد يقوله عيب كده ، انسانيه بتتعاش مش بتتحرم وتتمنع وتدان !!!! 
دفا دفا ، يخلي الشمس تطلع وسط الليل ، ماليش دعوه بالقضايا الكبيره والمناقشات الفلسفيه ، وناس يعجبها الفيلم وناس مايعجبهاش ، ماليش دعوه بده ، انا باحب مصر بتاعت الفيلم مصر الدافيه الحميمه اللي بشرها كانوا لسه بشر قبل زمن العولمه وزمن الوهابيه ماياكلوهم ، بعضنا اكلته العولمه وبعضنا اكلته الوهابيه وبينا استخبت مصر لما نستقر علي حال ، استخبت وسابتنا وراحت عند بهيه وسكنت في دفي قلبها !!! 
طيب ياجو .... ايه حكايتك بقي !!! 
بتعرف توجع قلبي بافلامك ليه ، هي الافلام اللي بجد بتوجع القلب كده زي الحب !!!! 
يوسف شاهين ؟؟؟؟؟؟؟؟؟ عبقري ولا مجنون ولا غريب ولا جميل ولا كل ده علي بعضه !!! 
عنده لطشه تطلع في افلامه ، حاجه صادقه توجع القلب ، اصل الصدق بيوجع القلب ، الكذب جميل ومريح وبارد زي السكينه التلمه ، ماتحسش بحاجه لما تسمع حد يكذب ، ماتحسش بحاجه خالص ، لكن الصدق بيوجع القلب ويخليك نفسك تعيط ويمكن كمان تعيط !!!! 
يوسف شاهين عنده لطشه تطلع في افلامه ، تحس فيه جمله من جمل كل فيلم تخصك ، انت اللي بتقولها او كان نفسك تقولها فهو قالها واتنهد وقالك مالكش حجه اديني قلت ، قول انت بقي !!!! 
باحب فيلم العصفور وجو الدفا في الايام الساقعه ، اصل الدفا بقي صعب ، ودفا القلوب اصعب !!! 
دفا القلوب ونس ، والونس شاحح وعزيز ، لا مش حنقلبها نكد ولا غم ولا حد يقولي مالك واجمدي وشدي حيلك والسكه الغامقه دي ، مماليش ، خلاص ، يلا نتكلم كلام فاضي ، او نتكلم ليه بدام الكلام فاضي مانسكت ، ولما حد يقولك ساكت ليه ، الكذب الابيض حلال ، قوله عندي صداع وهو من باب ترييح الراس حيصدقك ويتمني لك الشفا ....
بحب فيلم العصفور وبحب فيلم الاختيار ...
الاختيار بقي موضوع تاني ، اصله طول الوقت يطرح علي السؤال اللي باهرب منه ، حنختار ايه امتي ؟؟؟
حنبقي محمود الصعلوك اللي عاش ولا سيد العبد اللي اختار مايعيش !!! 
باحب محمود البحار الصعلوك لكن طبعا مابعيش عيشته لان الاصول والقواعد والاخلاق والعائله و.............. كلهم موتوا محمود !! طيب وعيشه سيد ، لا مش عايشاها برضه ، عايشاها شويه صغيرين ومتمرده علي الباقي ، متمرده وباطلق لروحي عنانها زي محمود ، لا ماشاركتش سيد في قتل محمود لكن معرفتش احيي محمود في حياتي !!! 
منك لله ياجو ............ طيب اعترف انت كنت سيد ولا محمود ولا كنت الاتنين زينا كلنا !!! 
شرحتنا ياجو وكشفت حقيقتنا اللي بنخبيها ، مااحناش بهيه بحريتها ولا محمود بصعلكته وتشبسه بالحياه ولا احنا جوني السكران ولاسيد المتنحط في توابيت الاصول والاعراف الاجتماعيه ، احنا كل دول مع بعض وعمالين نقطع في وشنا واحنا محتاسين ومش عارفين نختار !!! 
طيب ............ العصفور جاب الاختيار والاختيار فكرني بعبد الهادي وابو سويلم وصوابعه اللي بتحرت في الارض تطرح دم ووطنيه ، وابو سويلم فكرني بكل الخيبه اللي عشناها ، لما كنا رجاله ووقفنا وقفه رجاله وبعدين مابقيناش !!! 
هو ابو سويلم لو عاش زمن الشات والانترنت كان عمل ايه ، كان عمل ارض فوتوشوب وهجانه فوتوشوب وعمل شات مع البرنس علشان يحول الطريق بعيد عن ارضه ولو البرنس ماردش عليه كان عمل له بيدج علي الفيس بوك وجمع عليها توقيعات افتراضيه ونام مبسوط ، وكانت الارض ضاعت لكن هو فضل عايش يبص علي بيدج الفيس بوك كل يوم وهو مبسوط من نفسه وكنا فقدنا مشهد سينمائي من اعظم مشاهدنا في السينما العربيه !!! الحمد لله ان ابو سويلم مات ومعاه يوسف شاهين قبل زمن العولمه والشات وفضل مشهد النهايه في فيلم الارض مشهد يخلي قلوبنا تعيط ، لا الاخطر ، يخلينا نفتكر الارض اللي بنحبها وحنفضل نحبها !!! 
طيب ............ كفايه كده النهارده !!! 
حابطل كتابه واروح اتفرج علي فيلم الارض او اسمع ام كلثوم !! 
اصل الجو برد قوي وانا عايزه ادفي ومافيش حاجه حتدفيني الا مصر الهربانه في الفيلم والمستخبيه في صوت ام كلثوم الدافي !!! 
مصر دي بس اللي تعرف تدفيني ، لكن مصر بتاعت زمن العولمه مابتدفيش !!! 
ماعلينا ............. الساعه بتاعت الكتابه مرت ومعاها ساعه كمان وكفايه كده اصل الكلام ده لاليه اول ولا ليه اخر ولو قعدت اكتب واكتب مش حاخلص والتخريف حيزيد علي الاخر !!!! 
باكره زمن العولمه والشات والتكنولوجيا والشات وعايزه اعيش في زمن بهية !!!!! 

( اديني من وقتك ساعه - 21 ) 

هناك 6 تعليقات:

غير معرف يقول...

مجدي السباعي
حاجه صادقه توجع القلب ، اصل الصدق بيوجع القلب ، الكذب جميل ومريح وبارد زي السكينه التلمه ، ماتحسش بحاجه لما تسمع حد يكذب ، ماتحسش بحاجه خالص ، لكن الصدق بيوجع القلب ويخليك نفسك تعيط ويمكن كمان تعيط !!!!
وفضل مشهد النهايه في فيلم الارض مشهد يخلي قلوبنا تعيط ، لا الاخطر ، يخلينا نفتكر الارض اللي بنحبها وحنفضل نحبها !!!

كفايه كده برد والام

Carol يقول...

ومافيش حاجه حتدفيني الا مصر الهربانه في الفيلم والمستخبيه في صوت ام كلثوم الدافي


مش هاقول غير..

رائعة :)

egyptian tiger يقول...

كتاباتك يا سيدتى ......مفعمة بصدق إحساس وطعم لوعة الأفتراق عن الزمن الجميل ...وتذوق للحياة ومسحة ...من شجن العواطف المرهفة إنه الوطن الذى نحبه ....ونفتقد فيه زمن الحب البسيط الذى غناه حليم ودفئتنا به نجاة وصاغته ...قويا عميقا راقيا أم كلثوم ......وأصبح إفتراضيا خياليا ....وربما نتوهمه ولا نجرؤ على ....لقياه ...!!!!!

قوس قزح يقول...

اصل بطلنا نتكلم وبقينا بنكتب ومن كتر الكتابه اللي هي مش كتابه بطلنا نعرف نحس ونعرف نحب

بطلنا نبقى بنى ادمين و بقينا شاشات
عيوننا بقت دايما متعلقة بشاشة مبقيناش نبص فى وشوش الناس و نحسهم من عينيهم ..حد يا ناس يحس حد من حروفه ؟؟؟

Dynamite يقول...

سيدتى .. أوجزتى .. ومن السهل ان نجتر لوحات مصر القديمة لأنها أصلية .. والآن الصور هى صور تقليد .. لانها علاها ركام من الاتربة الثقافية التى جثمت على ارواحها فلم تفلت منها ..

هل يمكننا استحضار الماضى؟ ولم لا ؟
اذا نسينا السنين يمكننا ان نفعل ما كنا نتمناه من سنوات طويلة .. فبرناردشو يقول
نحن لم نتوقف عن اللعب لأننا كبرنا .. ولكننا كبرنا لأننا توقفنا عن اللعب
وساسمح لنفسى ان استعير مقولته مع تعديل بسيط
نحن لم نتوقف عن الحب لأننا كبرنا فاصبح الحب عيبا او حراما .. ولكننا كبرنا لأننا توقفنا عن الحب ..

لكنك سقت مثلا مهما .. انه زمان كان الناس يحبون .. بغض النظر عن نهاية هذا .. حتى نجيب محفوظ كان يقول المحبون لايتزوجون ..لكننا فى زماننا نحب حبا مشروطا .. فكأننا نضع العربة امام الحصان

الحب غاية فى حد ذاته .. كانت النهاية ايما كانت .. وبغيره نحن أموات .. هذا هو الزمن الدافئ .. وهو تحدى أيضا .. فهل نقدر عليه؟

مها جمال يقول...

انا بقى اتفرجت ساعتها على فيلم الارض وقفلت الفيس وحسيت بحاجات كم زمان ماحسيتهاش جايز يكون الدفا اللى بندور عليه او الاصالة فى حب الناس والارض حتى اللى بيعبوا مية من الترعة كانت عيشة صعبة واحنا حياتنا سهلة وافتراضية وكسولة ومزيفة ووقت ضايع فى لاشىء..كلامك صادق من القلب ويوجع القلب