25 يناير 2012

الرواية الرسمية !!!!ا




( 23 ) 
الساعه الثالثه والعشرين 
25/ 1/ 2012 


الرواية الرسمية !!!! 
هي الرواية التي يقولها من يملك ان يفرضها علي الاخرين ويخرس الاخرين بالذوق او بالعافية او بالتجريس ليصمت ويبتلع روايته التي شاهدها و عرفها لانها لاتلزم احد ولن يسمعها منه الاخرون !!! 
الرواية الرسمية !!! هي الرواية التي يصرح بها " الاخ الاكبر " ويفرضها فرضا علي اخوته البنات وجيرانه ويلزم اخوته الرجال بتصديقها او قبولها او الخرس عن تكذيبها !!! 
وكيف يقوي " الاخ الاكبر " ان يفرض روايته علينا !!! 
خطه مدروسه ومعروفة ... السيطرة علي العقول !!! 
اولا .... خلق الرواية وترويجها !!! 
ايه اللي حصل ، اللي حصل هو اللي بيقوله الاخ الاكبر ، هو يرص التفاصيل ، هو يكون الصورة ، هو يسقط اللي مش عايز يشوفه ، هو يكبر اللي نفسه يشوفه ، يعيد ترتيب الاوراق والتفاصيل وشريط الزمن ، يعيد الترتيب و......... بقي فيه روايه رسمية هي الحقيقه هي الواقع هي اللي حصل ، ويقولها الاخ الاكبر ويقولها ، ويرددها ، ويحلف مره انها حصلت و....... يلعب في دماغ الناس ، مره يقول حصلت ومره يقول ازاي ماشفتوهاش ومره يقول انتم عمي ومره يقول انتم اغبيا ومره يقول انتم مغرضين ومره يقول انت مرضي نفسيين ومتلازمه استكوهولم ، والجوقه بتاعت الاخ الاكبر ، ترد عليه ، هو يقول وهي تقول امين ، هو يقول وهي تقول صادق ، هو يقول وهي تقول ياحلاوتك ، هو يقول وهي تقول وانا كمان شفت ، مره تقول في جرنان ومره تقول في برنامج ومره تقول علي الفيس بوك ومره في مره ومره في مره ، تبقي الروايه الرسميه بتاعت الاخ الاكبر هي الحقيقه وهي اللي حصلت وهي اللي كل الناس الحلوين الطيبين شافوها وعارفين انها حصلت وبيحكوها هما كمان علي لسانهم ولو حد سالهم عرفتوا منين ، يقولك الاخ الاكبر قال وهو لما يقول محدش يعرف يقول حاجه تانيه ، و..............والرواية الرسمية حقيقية مية مية !!! 
ثانيا ... الترويع والتهديد !!!
لما حد يقول مش صحيح ، مش ده اللي حصل ، يتقاله يااعمي ياللي مابتشوفش ، لما يصمم ويقول لا باشوف بس ده ماحصلش ،يتقاله ، لا ده اللي حصل ، بس انت مابتشوفهاش لانك صاحب مصلحه ، لانك اعمي القلب ، لانك مغرض ، لانك مريض نفسيا ، لانك عدو مش حبيب ، الحبيب بس اللي بيشوف اللي حصل زي ماشافه الاخ الاكبر ، لغايه كده احنا مؤدبين ، لغايه كده بنقولك انت شايف غلط ، لغايه كده بنقولك بص كويس ، لكن لو صممت بقي وزرجنت وقلت لا فيه حقيقه تانيه ، اصل واصل واصل واصل ، يبقي انت بقي اللي غاوي نكد وعلي نفسها جنت براقش وانت اللي مصمم تعادينا واحنا شعارنا مية نار علي اللي يعادينا ميه نار !!!! و......امسك مجنون الحق مخبول امسك عدو امسك حاقد امسك مريض نفسيا وادي رقم تليفونه اللي عايز يمسي عليه وادي ابوه لما اتجوز علي امه وادي امه لما كانت بتحب راجل تاني غير ابوه وادي بنته لما كانت بترقص في حفله مدرسه وهي من غير ملابس داخليه ، مبسوط كده ماقلنا لك شوف كويس ، ماقلنا لك فتح عينك تاكل ملبن ، ماقلنا لك اللي مايشوفش من الغربال يبقي اعمي ، وانت البعيد اعمي ومالكش في الملبن نصيب !!!! وتصقيف وتصفير وتطبيل ومية نار علي اللي يعادينا مية نار !!!! 
كده بقي ، بقت الروايه الرسميه هي الروايه الرسميه ، هي اللي حصلت وهي اللي كل الناس بتقول انها حصلت وكل الناس بتقول انها شافتها بعينيها وحياه طنط صفيه وراس جوز خالتي ورحمة  جدتي !!!! 
خلص الفيلم ، لا طبعا لسه بدري !!! 
يطلع واحد او واحده - مااحنا مش حنبقي اقصائيين زي البرلمان لما رفض يدخل المحاميه المسيحيه في لجنه تقصي الحقائق بمنتهي الديمقراطيه والتصويت المبدئي - يطلع واحد او واحده ويقول للاخ الاكبر ، اسمح لي يعني عفوا بجد ، اللي حضرتك بتقوله ده محصلش بالطريقه اللي قلت عليها .............
هنا تبدأ المرحله التالته من مخطط تثبيت الروايه الرسميه وتأكيدها ...
ثالثا .... الزن علي الودان امر من السحر !!!
الاخ الاكبر يتنرفز لان لسه في صراصير فيها الروح ، لكن هو الاخ الاكبر اللي مش حيرد عليهم ولا يوسخ لسانه بالكلام معاهم ، فليس وظيفه الاخ الاكبر هي الرد علي الصراصير ، لكن الاخ الاكبر عنده صراصير اكتر شراسه مستعده ترد علي الصراصير العبيطه اللي لسه فيها الروح وعنده شباشب كتيره لضرب الصراصير علي راسها وفوق نافوخها .... 
انت لسه بتقاوح ، لسه بتتكلم ، لسه بتقول بتعافر ، لسه بتقولي الروايه الرسميه ماحصلتش !!! 
طيب قول انت اللي ايه اللي حصل ، قول ، فالعبيط يقول ، يقول ، اللي بتقوله محصلش ، اصل انت نسيت اللي اتكتب في الجرنان يوم كذا ، هههههههههه ، ده كلام كذب !!! طيب واللي شفناه بعينينا في الفيديو ، ههههههههههههه ، ده فيديو فوتوشوب وصور تزيف وتلفيق !!!! طيب واللي قالته فلانه في التليفون واللي قاله فلان في التلفزيون ، انت بتصدق برضه ، دول كلهم عيله تامر بتاع شبرا او تامر بتاع غمرة ، تعرف تامر بتاع شبرا او بتاع غمرة ، ده الراجل اللي طلع يعيط في التلفزيون ، الناس دول كلهم قرايبه واهله واصدقاءه وكلهمه بيكدبوا زي مابيتنفسوا وكلهم تبع امن الدوله وتبع اللجنه الالكترونيه للحزب الوطني وتبع الفلول وتبع طره وتبع عكوشه المجنون ، اوعي تصدقهم ، ياراجل امال اصدق مين ، هههههههههههه تصدقني انا ، انا الاخ الاكبر اللي عارف مصلحتك ومصلحه البلد وحافظ التاريخ ومذاكر الجغرافيا وبحب البلد موووووووت مووووووت ، لما اقول تصدقني انا ولما يقولوا اوعي تصدقهم والا انت حر ......... حر ؟؟ طبعا ، حر جدا خالص ، حر لغايه ماتروح في داهيه ، حر لغايه ما تتنبذ برضه الصوره بتاعت عبد الحليم حافظ ، حر لغايه مانبطل نصبح عليك ، انت حر ماتصدقش روايتنا الرسميه واحنا حرين نطلع عينك وننبذك ونبطل نتكلم معاك ليه ، لان اصدقاء السوء اخطر من فيرس سي ، بيتنشروا بسمهم في الدم زي الكودافين ، يعملوا دماغ ويبوظوا العقول !!!! انت حر ماتصدقناش واحنا احرار نطلع عين امك وعين ام اللي يصدقك ونحاربك ونحاربهم ونشتمك ونتشمهم لغايه ماتقول جاااااااااي وتكتئب حبه وتزهق حبه وتتخنق حبه وبعدين تسلم وترفع الرايه البيضا وتقول ورحمه امي الروايه الرسميه بتاعت الاخ الاكبر هي اللي حصلت ، ههههههههههه ، طب ماكان من الاول ياعسل ، وانت حبيبنا وحبيب حبيبنا و.........سمعني سلام الصلح خير وسمعني الاوركسترا السيفوني وهو بيقول ويغني ويحكي ويردد الروايه الرسمية !!!! 
الروايه الرسمية يكتبها الاقوي لما يعرف يضرب الاضعف ويقص لسانه يابذهب المعز يابسيفه وستيتاته !!! 
الروايه الرسمية يكتبها المتعلم لما يعرف يلعب في دماغ الجهله الاميين !!! 
الروايه الرسمية يكتبها المستبد لما يهدد المختلفين معه بالسجن والحبس والاقصاء والعقوبات والمحاكم السياسيه !!!! 
الروايه الرسمية يكتبها اللي عنده محطه فضائيه وعنده جرنان يومي وعنده موقع علي الانترنت !!!! 
الروايه الرسميه يكتبها المنتصر علي حساب المهزوم ، لان مش كفايه خيبته انه اتهزم لاكمان يلزم فضحه وتجريسه بروايتنا الرسميه وخليه هو في خيبته وهزيمته ووكسته السوده !!! 
الرواية الرسمية التي يكشف التاريخ بعد طول زمن انها اكذوبه ملفقه مزيفه وان الواقع الذي حدث شيء والروايه الرسميه شيء اخر ، لكن الروايه الرسميه وقتما اعتمدت كروايه رسمية كان لها اهميه ووظيفه ودور مطلوب ، لان مطلوب تصديقها والايمان بها والدفاع عنها وترويجها ، لان لها دور ووظيفه في الحشد والتجييش وصناعه احداث المستقبل ....
التاريخ كله روايات رسميه تم تعميمها جبرا وبالقوة !!!! 
فالملك فاروق كان بيلعب قمار وبتاع نسوان بامر ثورة يوليو !!! 
واحزاب ماقبل ثورة يوليو افسدت الحياه السياسيه بامر الضباط الاحرار !!! 
وعبد الناصر بوظ ارض مصر اللي طبلت بسبب السد العالي بامر انور السادات !!!! 
وعبد الناصر القي الاحتياطي الذهبي في حرب اليمن بامر من مؤرخين الحقبة الساداتية!!! 
والقوميه العربيه حقيقه بامر عبد الناصر والاتحاد الاشتراكي واذاعه صوت العرب والقوميه العربيه اكذوبه بامر السادات واوراق اللعبه اللي في ايد امريكا !!!ا
وانور السادات عمل حرب تحريك وليس حرب تحرير بامر معارضي كامب ديفيد !!!! 
وحسني مبارك ............ مبدئيا افسد البلد ثلاثين سنه ولسه بقيه روايته الرسميه مااتكتبش لكن جاري الشغل عليها وكتابتها !!!! 
حركه يوليو للضباط بقت ثوره شعب لما الضباط الاحرار حكموا البلد !!!! 
وهزيمه يوليو بقت نكسه لما عبد الناصر وهيكل قرروا انها نكسة !!! 
والديقراطيه بقي ليها انياب ضد مراكز القوة لما السادات قرر ينفرد بالسلطه ويحبس رجال الاتحاد الاشتراكي بتوع عبد الناصر!!! 
و....................... شريف خيري بقي رمز الصمود لما قرروا وبقي الخاين العميل لما قرروا ، حسب الحاجه والضرورة والاحداث الدرامية والمطلوب صناعته في المستقبل !!!! 
الروايه الرسمية اكذوبه يصمت الاخرين امامها حتي تصبح حقيقه كبيرة لايقوي احد علي تكذيبها !!!! 
واللي مش عاجبه يشرب من البحر او يخبط راسه في ااقرب حيطه !!!ا 
طيب هو ايه اللي حصل بقي وايه اللي بيحصل في البلد الايام دي ؟؟؟؟؟؟؟؟؟؟؟
محدش يتسرع ويرد ، استنوا لما الاخ الاكبر يقول وكلكم تقولوا وراه وعلي راي المثل ، لسانك حصانك ان صنته صانك وان هنته هانك و.............. ربنا يديك الصحه يااخويا ويطول لنا في عمرك ... دعاء جماعي للاخ الاكبر يسمعه مبتسما وهو يلوح للجماهير سعيدا مبتسما راضيا انهم مؤدبين وبيسمعوا الكلام وبيصدقوا كل رواياته الرسمية !!!! 


( ااديني من وقتك ساعة - 23 ) 

هناك 6 تعليقات:

غير معرف يقول...

مجدي السباعي
كلام واضح...محترم ...حقيقي...
لكن لي سؤال هل هذا ناتج عن ثقاقتنا ...ام انه ثقافه كل شعوب العالم ...سؤال محيرني اريد عليه اجابه؟؟؟
الروايه الرسميه الحقيقيه ""علي نفسها جنت براكش""
الروايه الرسميه الحقيقيه ان اقتصاد بلد قد خرب تماما ويحتاج الي سنين طويله لاصلاحه ..حتي ياتي اخ اكبر جديد يدمره وهكذا تواليك

مها جمال يقول...

ودة تفسير حقيفى ل من يكتب التاريخ حقيقى احييك يااميرة على تفكيرك وتنظيمك للافكار ..باتعلم منك يااحلى مرمر فى الدنيا

EMAN KANDEEL يقول...

والله يا أميره كل الناس بلا أستثناء تمارس أسلوب الأخ الأكبر والرواية الرسمية ونفس المصطلحات التي تفضلتي بذكرها أنا نفسي قلتها بالأمس بس أزعم أني قلتها لناس موش عايزين يصدقوا أن مصر مستهدفه وأخذ مني هذا النقاش عاما كاملا دون جدوي ،،((((((((أنت نفسك يا أميرة أعتقد أنك تعانين من مثل تلك الموضوعات،ويمكني أن أضرب لك مثلا بسيطا عندما تناقش معك بعض الأصدقاء عن ملابسات قضية مبارك وكيفية إدانتة وأجتمع أصحاب الرؤية الواحدة على ضرورة أعدامة بينما تحدثت أنت من نظرة قانونية بحتة واستطيع أن أؤكد لك أن كلامك لم يعجب أحدا من الذين يرون أنه لابد من أعدام مبارك ، بينما رأى آخرون ومنهم أنا أن كلامك قانوني وسليم مأئة بالمائة وعلينا أن ننتظر الحكم وفقا لمايراه القضاة الملتزمون بنصوص القانون ،)))أعود لأقول لك أن معظم المصطلحات التي ذكرتيها وقلتها أنا بالأمس لإناس أيضا ينظرون الى الأحداث بطريقة أحادية ولا يحاولون تبني وجهات نظر آخرى لأنها بالتأكيد تتعارض مع مصالحهم أو رؤيتهم أو إدعاءاتهم وأن الفيلم اللي بنعيشه الغالبيه العظمي منه مكتوب بسيناريو مسبق،وعندما أظل أتحاور بالإقناع وبالأدله وأضع لينكات واضحة توثق بالصوت والصورة ما أحاول أيضاحه بكل أدب للطرف الآخر وأجد هذا الآخر أستحمر ولم يعد يرى أي شيء سوى الخيالات والضلالات التي تملأ مخيلته أقرر خلعه من قائمة الأصدقاء التي فرض نفسه فيها علي ليزعجني وليفرض فيها رايه الذي أراه أنا يتنافي مع الرأي الذي كونته بناء على قراءات ومعلومات وأدله واضحه للعيان، وفي النهاية أقرر تنفيض هذا الشخص وطرده نهائيا ليس لأنه لم يصدق روايتي ولكن لأنه فعلا بني أدم يفتقد أدني درجات الشك للوصول للمعرفه ، والرواية الرسمية موجوده لدينا جميعا ولكن بدرجات

قلم جاف يقول...

انتهى عصر الأخ الأكبر الواحد ، وأصبح لدينا أكثر من أخ أكبر!

Carol يقول...

أين انت؟؟
لقد أدمنت كتاباتك اليومية :)
أتمنى أن تكوني بخير دائما

Hello يقول...

طالما ان هناك قلم ناضج يلاحظ الاحداث بمنتهى التأنى والعمق ولايتسرع بالحكم مثل قلمك
فنحن واعون ومنتبهون ..
هذا الشعب لاينطلى عليه الزيف وان طال الزمن .. هو يصبر كالجمل .. ثم ينفجر كالبركان .. وقديما أيام الدراسة طلب منى الاستاذ أن اعرف كيف هى الادارة فى مصر .. قلت فى ثلاث كلمات .. المصريين يتبنون أحدث وأعلى الاستراتيجيات من الدرجة الأولى فى العالم .. ثم ينشئون هيكل تنظيمى لتنفيذ هذه الاستراتيجية من الدرجة الثانية .. لأنه عند المناصب لازم يفصلوا حسب المقام .. مش معقول رجل محترم نديله حاجة صغيرة .. فنعمله ادارة مخصوصة .. ثم يدار هذا الهيكل المبتكر بادارة من الدرجة التالتة .. ولا ادارة بتكلم التانية .. ولا واحد له علاقة باللى جنبه ..
ثورة يوليو نجحت لما كل الناس كلمت بعضها .. وحرب اكتوبر لم تنجح الا لأن الدولة قامت قومة رجل واحد ..وثورة يناير قوتها ان الناس كلمت بعض .. ونزلت مع بعض ..
النجاح الحقيقى الذى آراه هو انتصار التكنولوجيا فى سد فجوة رهيبة اسمها الاتصال والتواصل .. دليلى يا أميرة هو الفيس بوك .. لاتستهينى به أبدا .. وتخيلى انه احد مصادر الاعلام الحديث الحقيقى .. لأنه يعرض الرأى والرأى الآخر مهما احتد الاصطدام الذى يصل احيانا الى حد البذاءة والسب .. ومن يدخله يشعر بأن له رأيه الخاص وفلسفته التى يعرضها بمنتهى الحرية
هذا اهم انجاز حققته الثورة .. وستجدين ان آخر من يستمع اليه هو الأخ الأكبر .. والدليل الهتاف بسقوطه فى مقار الانتخابات .. مع ملحوظة .. فى الدول المتقدمة التاريخ ليس مادة اساسية فى التعليم الاساسى .. فقط فى التعليم العالى لمن يريد .. ولابد ان فهموا نظرية الأخ الأكبر من زمان .. فتقدموا.. تقبلى تحياتى