كنت البس بالطو كاروهات ...
واقف في وسط المحل ارص صاجات الجاتو فجآ سمعت صرخه وصوت ضربه علي الصدر " يانهار اسود " انزعجت جدا والتفت خلفي وسرعان ما ضحكت !!!
كانت صديقه لامي دخلت المحل تشتري جاتو وعندما شاهدتني واقفه وسط المحل ارتدي زي البائعات " اتسرعت " شرحت لي فيما بعد انها تصورت ان ابي وامي ماتوا وهي لم تعلم واننا " افتقرنا " ولهذا السبب فقط نزلت ابيع جاتوه كيف اصرف علي نفسي وعلي اختي الصغيره ..
اخذتها في حضني وهدآت روعها واخبرتها ان ابي وامي بصحتهما واني نزلت للمحل تحديا لابي بعد مشاجره عنيفه معه طالبني فيها بالانصياع التام لاوامره ونواهيه مقابل انفاقه علي وان طاعته واجبي والانفاق علي واجبه ، شرحت لصديقه امي اني غضبت من كلامه واحسسته تهديدا لم يعجبني وقررت تحديه واعلنتها صريحه في وجهه اني لن اخذ منه نقود مره ثانيه وسابحث عن عمل لاصرف علي نفسي وكان ماكان ........
كنت في اجازه السنه الاولي للجامعه في طريقي للسنه الثانيه ، وكنت متمرده ومليئه بالتحفز ، واحسني كبرت علي الاوامر المستمره التي يحاصرني ابي بها ، وكنت غاضبه من رفضه لاصدقائي في الجامعه واعتبار صداقتنا " قله ادب " لا تليق ببنات العائلات المحترمه مثل عائلتنا ، حاولت اقناعه بان الدنيا اتغيرت وان كل من في سني في الجامعه يقبل الصداقه بين البنات والشباب وان اصدقائي محترمين وان وان ... لكن ولا حياه لمن تنادي .....
قرر ابي ايمانا بنظريه " اكسر للبنت ضلع يطلع لها ٩٥ " قرر ان يكسر ارادتي وعظامي ويطحني بمشاجرات مستمره وغضب وخصام وتهديدات عنيفه منتظرا الاعتراف بخطئى وقطع علاقتي باصدقائي باعتبار ان الامر لايساوي اغضاب بابا حبيبي !! لكني وقت ذاك - لم اعتبر الامر بهذه السهوله - بل اعتبرته قهرا لارادتي وتحجيم لوجودي وسيطره عنيفه علي شخصيتني وقررت دخول المواجهه بكل صعوبتها وتحمست جدا باعتباري باعمل ثوري رهيب - تحدي بابا - !!!!!
وامسكت الجرائد وقررت البحث عن عمل لايحتاج مؤهل خاص ...... وطبعا انحصر بحثي بين بائعه وبائعه !!!! بائعه ملابس !! بائعه في محل جزم !!! بائعه جاتوه !! وقررت اخوض التجربه وانزل ااقابل اصحاب المحلات بمنتهي الشجاعه - المزيفه طبعا - واشرح لكل منهم اني ابحث عن عمل في اجازه الصيف ، محل الملابس كان محل صغير مريب صاحبه بشنب لزج ونظرات قبيحه وعليه قررت من الاول اختصار التجربه والسلام عليكم !!! محل الجزم بصراحه مارحتوش لاني باقرف اوي من رائحه الرجلين ولان الناس للاسف مابتغسلش رجليها دايما قلت خلاص دي حتبقي وقعه سودا الناس حتقلع جزمها القديمه اللي عايزه تترمي طبعا وتقيس الجزم الجديده
وكله في وشي يانهار اسود و... اجري ياجدع !!!بائعه جاتو الموضوع اغراني جدا .... اسم المحل معروف وكبير ... وفي شارع شهير وقريب من بيتنا يادوبك ٤ محطات - ماهو ايامها كنا بنركب الاتوبيسات طبعا - والقصه سهله .... لبست واتشيكت ودخلت المحل ..... البياعات جريوا علي " ايوه يافندم اؤمرينا " فتحت الاعلان وشرحت لهم مقصدي .. بسرعه تغيرت معاملتهم ونظرتهم واكاد اجزم اني سمعت حوارهم الداخلي " ومالك عامله في نفسك كده ليه ماانتي زينا حتته بياعه " و.... قابلت مالك المحل رجل وقور محترم وشرحت له ...... وفورا رحب بي ومنحني الوظيفه و٢٠ جنيه مرتب !!!!! يانهار ابيض وليله فللي !!! ٢٠ جنيه في الشهر وانا كنت باخد مصروف ٥ جنيه في الشهر من بابا وعامله فيها بنت قنصل الوز !! وفجآ حسيت اني مليونيره !! وها ها ها ياسي بابا ولا الحوجه لفلوسك ده انا حاقبض ٢٠ جنيه كل شهر !!!!! ها ها ها !!!
وشرح لي الرجل عملي بسرعه ومواعيدي اما فتره صباحيه تنتهي في الرابعه او فتره مسائيه تنتهي في العاشره وطبعا وبدون تفكير اخترت الفتره الصباحيه فمواعيدي في المنزل كانت حتي الساعه الثامنه مساءا ولا اصبحت " بنت قليله الادب بارجع الساعه ١٠ بليل في انصاص الليالي " ونادي اخته سيده محترمه وعهد لي بها وقال لها " دي اختك " و
شرح لي " انت غير كل البنات خدي بالك " ولم افهم سر اهتمامه بي ، لكن نظرات الحقد والغل التي حاصرتني بها البائعات الاخريات اكدت لي ان فيه " حاجه انا مش فاهماها " لكن مش مهم !!! تاني يوم نزلت من البيت قبل ميعاد الشغل بساعه وركبت الاتوبيس درجه اولي واديته قرشين " بحالهم " وشويه وكرسي فضي وقعدت !! وطبعا ماسكه شنطتي تحت باطي بقوه رهيبه لان الاتوبيس اكيد مليان " نشالين " ورميت راسي بره الاتوبيس اتفرج علي الشارع كاني سايحه وفي منتهي السعاده وطريق المليون جنيه يبدآ ب ال ٢٠ جنيه المرتب بتاعي !!!!!ولبست البالطو الكاروهات واتعلمت ارص الجاتو وعرفت انواعه واساميه وعرفت ان " الميل في " غير " الاكلير " غير " الباركيت " وده تارت فاكهه وده تارت فراوله وده " باباه بالكريمه" وده " باباه بالفاكهه " ودي " تشيز كيك " وده " تشيز كيك بالتوت " وكانت علاقتي قبل كده بالجاتوه اني بحبه واحب اكله واللي معرفش اسمه اشاور عليه وماما تديه لي وخلاص!!!
ويوما بعد يوم - وابي صامت لايتشاجر كانه يتحداني ويراقبني وانا عائده الساعه ٥ ميته من التعب واقفه علي رجلي من الساعه ٨ صباحا للساعه ٤ واتوبيسات وهيصه - طبعا في الاول احتست وبقيت تايهه زي العيال مش عارفه اتصرف لكن يوم في يوم بدات افهم هذا العالم الذي دخلته .... محل حلواني يبيع جاتوهات وتورت واخواتهم وده في القسم الغربي ايضا يبيع حلويات شرقيه في القسم الشرقي ويبيع شوكولاته وملبس ويبيع نواشف بسكويت ومنين واخواتهم ويبيع كرواسان وباتيه "ماكانش لسه الدانش دخل مصر ولا حد يعرفه " !!!!
كل قسم له بائعيه ، وكل قسم له الشيف بتاعه اللي بيشتغل تحت ايده اسطوات صغيرين ومرمطونات وكل قسم له بياعينه وبياعاته ، والشيف يفنن والاسطوات الصغيرين ينفذوا تعليماته والمرمطونات تقوم بالاعمل الاقل شآنا يعني الشيف يضبط المقادير ويحدد الطريقه والاسطوات تنفذ وتضرب وتقلب وترص وتساوي وتقطع والمرمطونات تسمح وتنضف وتشيل وتحط وفي الاخر .... تطلع البضاعه في صاجات شكلها جميله وبتلعلط ، هنا يبتدي دورنا احنا البياعات ، نقف جنب التلاجات نبيع ونرص في العلب ونحطها علي البنك عند الاسطي اللي بيلف ، وبعدها نساوي التلاجه ونرتب الصاجات نحط ده علي ده ونشيل الصاجات الفاضيه ونخش نجيب صاجات مليانه من جوه .....
وجوه ده موضوع لوحده ، جوه ده المطبخ ، اللي بيتعمل فيه اي حاجه وكل حاجه ، فريق بيشتغل في الجاتو وهاتك يافن ، اضرب الكريمه البيضا ، وراها الكريمه البمبه ، ابشر بندق ، فين الشوكولاته المبشوره علشان وش الجاتوه والمربي تيجي في اذانات كبيره وبالمعلقه الخشب واديها ارمي قنطار مربي علي وش الملفي ، وشويه مربي تقع علي الارض عادي ندوس فوقها والدنيا تلزق عادي برضه ووطي النار علي الكيك ليتحرق والشوكلاته السايحه شيلها من علي النار خلاص حتلسع ، ورش سكر البورده فوق السابليه ، ومن جاتوه لجاتوه المطبخ يتقلب ، فيه جاتو يتعمل من الكيك والكيك يتخبز في صاجات الكحك وبعدين يتشق وشيك عدل ياروح امك وارمي الكريمه اردمها بالوش التاني من الكيكه وبعدين سكاكين طول السيوف تقطع - طبعا ال
شيف اللي يقطع - قالب الكيك الكبير يتقطع حتت جاتوه قد بعض بالضبط ومافيش هدر ولا فتفوته ، فيه جاتوه يتعمل قوالب ، عجينه تترص في قوالب والقوالب تخش الفرن وبعدين اقلب القالب واحشيه مره شوكولاته ومره كاستر ومره الزق قالبين في بعض يطلع سابليه و..... خليه نحل ما بتهداش .... نبطشيه من ورا نبطشيه ... والجاتو يتعمل ويترص في التلاجه والتلاجه تفضي والجاتو يتباع ...... بنات بتلف شوكولاته قاعده علي الارض واخده الشوكولاته في حجرها وتلحس صباعها وتسحب الورقه المدهب وتلف الشوكولاته ، يفضلوا قاعدين علي الارض والشوكولاته حواليهم جبال وكل ماجبل يخلص يترمي عليهم جبل تاني ، وطبعا مافيش حاجه تمنع ان طباخ السم يدوق السم وبنات الشوكولاته زي ماكنا بنسميهم يلهطوا كل شويه كبشه شوكولاته وعادي ومحدش واخد باله ...... ناس بتعجن الكرواسان والباتيه ، وقطع مره طويل ومره مكبب ومره مثلث و....... تشم ريحه الباتيه ريقك يجري ولاني ساذجه وعبيطه - وقتها - قررت اخدت باتيه وادفع تمنها وكان يوم اسود ، المحل فضل يومين يضحك علي وهاتك ياتريقه علي التلميذه اللي بتدفع من مصروف ماما ، وكل مايشوفوني يضحكوا ، اتاري النظام اللي نفسه في حاجه ياخدها وعلي قد بطنك ما تستحمل لكن محدش ياخد فتفوته معاه بره المحل ولا تبقي نصيبه سودا والشيف يرقعه قلم علي صرصور ودنه لانه حرامي وطفس وكل وشبع لكن مد ايده برضه !!!!
والقسم الشرقي شغا
ل نار ... صواني بسبوسه وصواني كنافه ، صواني يعني صينيه كبيره تتقطع حتت وقت البيع ، لكن فيه برضه طباق والطبق ده هو الصينيه الصغيره اللي تشتريها علي بعضها ، والكنافه انواع مبروم ومعدول وفزدق ولوز وساده وكريمه ، والبقلاوه سوري ومصري وكريمه وقشطه وبيضه وصفرا ، والبسبوسه لوز وبندق ساده وبجوز هند ، صواني صواني صواني اطباق اطباق اطباق .... !!!وانا واقفه علي رجلي في المعرض - المعرض ده اللي بيتباع فيه الجاتوه - مستنيه الزبون وفيه اتفاق عرفي ، محدش ينط علي زبون حد ، لو الزبون جايلك يبقي خلاص كله يبعد ، لو وقف محتار ااقرب واحده تروح له ، وابتسامه لطيفه وعيني وحاضر واؤمر ، وترص بنظام وذوق وكده كويس يافندم وده لسه طازه ده لا ماتخدش منه مش كويس جرب دي علي ضمانتي لو بتحب الشوكولاته
يبقي دي وابتسامه تانيه ولو لزم الامر والزبون او الزبونه دمها خفيف يبقي ضحكه لطيفه علي اي حاجه تقولها و...... اي خدمه يافندم وطبعا ايديها في جيبي ومرسي يافندم وعيني علي صوابعها ماسكه بقشيش كام !!!!!والبقشيش ده طلع موضوع لوحده ، ٢٠ جنيه مرتب و٣٠ جنيه بقشيش تتجمع من قرش وقرشين وخمسه صاغ وعشره صاغ والزبون المتريش يبان عليه ويبقي سعدك لو جه ناحيتك كل البنات تثبت مكانها متغاظه والزبون المقلحف باين من شكله وجزمته الوسخه وياقه قميصه المعفنه وحيطلع عينك وفي الاخر مرسي يامزمازيل وباي باي ومافيش مليم بقشيش .. ما قلنا زبون مقلحف ... وفي العيد نبيع كحك وبتي فور وغريبه وبسكوت والبقشيش يتضاعف فلوس جديده وحتي الزبون المقلحف القيحه يجي يوم العيد مستحمي وتمام ويدفع بقشيش ونزغرط ونحيه ماهو زبون المحل بقي وواجب نخلي بالنا منه !!!
النبطاشيه ٨ ساعات وساعات ٩ واقف علي رجلك لما ضهرك يزن وكعابك تنمل وبعدين ماتحسش بيها وممنوع حد يقعد في المعرض ، كل ساعتين نخش جوه نريح رجلينا - طبعا لو مافيش زحمه - نقعد جنب بنات الشوكولاته ، اللي مابيبطلوش رغي ولت وعجن وتريقه واذا مالقوش حاجه يتريقوا عليها يتريقوا علي نفسهم ، ودي تحكي خناقتها مع امها ودي تحكي غيره خطيبها اللي خنقها والتالته تحكي عن الوليه حماتها ام لسان موس وقارشه ملحتها كده لله في لله وطبعا تبص لها زميله من زمايلها وتلعب حواجبها لا يعجبها الحديث وتقلدها لله في لله ، تحدفها بشوكولاته غاضبه ايوه لله في لله ماقلت لكم قبل كده وليه عقربه !!!
وحواديت من حواديت وتريقه علي شيف البسبوسه وشفتم شنبه ملزقه بتفافه ، واعجاب بالاسطي الجديد بتاع الجاتوه ، واد قمر عايز الواحده تقطعه ،،، ضحك وسخريه وسفاله وبساطه وجدعنه و..... كلهم يداروا علي بعض لو واحده زوغت تبقي في الحمام ولامؤاخده ولو واحده عايزه تتكلم في التليفون تكلم الواد بتاعها يبقي ابله ياابله ، ابله دي اخت صاحب المحل ، ابله اكلم امي اتطمن عليها اصلها بعافيه شويه وابله تاكلها بمزاجها وتديها التليفون وهي تؤكد عليها " بقولك ايه ماتطوليش ياروح ابلتك فاهمه " تهز الفتاه راسها وتخطف التليفون والو ايه فينك ولا معبرني وهمس ضحك ثم وحياه النبي ماعدش بيخيل علي الكلام ده وضحك وبقيه البنات بتابع المكالمه وهاتك ياضحك وتريقه و..... خلاص ياحلوه ، تخطف الابله السماعه وتصرخ البنت سلام بقي ، ثم تضحك للابله مصطنعه البراءه الحمد لله ماما كويسه ، تصدر لها الابله صوت غريب لم افهم معناه وتقول لها علي ابله ياروح ابله امشي يابت لاسفخك قلمين وبالنباهه الفطريه افهم ان اسفخك دي يعني اضربك !!!!!
وتمضي الايام افطر كرواسان وباتيه ومافيش مانع احلي بجاتوه والم بقشيش واجمد الصاغات برايز والبرايز جنيه واقبض اول مرتب عشرييييييييين جنيه !!! ومعايا عشره من البقشيش اصلي مصرفه وباركب تاكسيات ماهي فرجت بقي !!! وياواد يامليونير !!! وابي يتابعني غاضب لايكلمني وامي تبذل كل مجهودها لاثنائي عن الجنان ده " واقفه تبيعي لمين للجرابيع " ولاارد عليها " مالهم الجرابيع " وتصورتني انتصرت علي ابي وهزمت قوته وتحديته وخلاص بقي اسمع كلامه براحتي مااسمعش كلامه برضه براحتي انا ومزاجي ... وابي صامت يراقبني ولا يتكلم !!! وفي المحل صاحب المحل يعاملني بادب ورقه رغم ان لسانه طويل وطول النهار يشتم في البنات والاسطوات بالاب والام واشياء اخري الا انه فانا اتفضلي ياانسه براحتك ياانسه .... والشغل عاجبني وصاحبت بنات الشوكولاته وعرفت كل قصصهم بنات غلابه معاهم دبلون مالقوش شغل غير القعده السوده دي !!!!
وتقترب الدراسه ... واخطر امي برغبتي في استئناف العمل مع الدراسه وانا حره حانظم وقتي . لا توافقني وتتشاجر معي وتهددني بابي " حاسيبه يتصرف معاكي " لكني قويه ومستقله ماديا وقادره علي الصراع واذهب للعمل غاضبه مكشره يستوقفني صاحب المحل ، مالك ياانسه ، احكي له ، اصل ماما واصل بابا ، يبتسم بذوق ، طيب ماهي ماما عندها حق ، انت طالبه في حقوق وحقوق عايزه مذاكره كتيره ياانسه ، لما الجامعه تفتح شوفي مذاكرتك وفي الصيف ابقي تعالي ، قال لي كلامته الاخيره بطريقه حاسمه كانه يآمرني ، ازددت تكشير وغضب وقررت ااقعد في البيت ويلعن ابو الدنيا .....
ودخلت جوه يومها لم اخرج ، وتشاجر اتنين اسطوات مع بعض وكان يوم اسود ومنيل البنات تصوت وتشتم مع كل طرف شويه والاسطوات شايلين عيون نار بيتخانقوا بيها وعين النار دي زي الكاسروله موصوله مباشره بخرطوم طويل علي انبوبه بوتجاز عملاقه ، لا منظم ولا كلام فاضي منه ، وعيون النار مولعه والاسطوات بتتخانق تضرب بعض بيها ببراعه النار تطير في وش كل واحد منهم شويه لكن لاتمسك في هدوم حد ولا حد يتحرق والبنات تصوت وانا اترعب ، النار ، الانابيب حتفرقع ، عيب كده ، تضحك البنات علي كلامي ويقلدوني ياي ياي ياي ساخرات من كلامي واخاف فعلا واصوت ....
ولا تنتهي المعركه الا لما يخش الشيفات الكبار فيها ، كل واحد يضرب الاسطي بتاعه قلمين وشلوطين والنار تتطفي والبنات تبطل صويت وكله يرجع شغله ولا كان فيه حاجه !!!!
وخلاص الجامعه حتفتح !!! وصاحب المحل يزن علي روحي الكليه وفي الصيف تعالي ، وامي تتخانق معايا لازم تبطلي الهبل ده وترجعي الجامعه لحسن وقعتك سودا وبابا صامت كانه ينتظر ماذا سافعل !!!
وفي اليوم الاخير اسلم علي بنات الشوكولاته واعيط واسلم علي الشيفات واعيط واسلم علي الاسطوات واعيط واحضن الابله وانزل فيها بوس واشكر صاحب المحل وانا قاعده بانهنه وباي باي ياانسه ......
واقف امام المحل لاانتظر شيئا لكني لاامشي ... تقف سياره فارهه امام المحل اعرف هذه السياره ، ينزل منها شخص اعرف هذا الشخص ، انكل طه وانط في حضنه وهاتك يابوس ، انكل طه صاحب بابا الروح بالروح وصدفه سعيده ، يضحك انكل طه ، ويسحبني من يدي ويخش المحل وتنتفض الابله من مكانها ترحب بانكل طه ، تعرفها منين ياانكل لايرد علي ، وجري يجيي صاحب المحل واهلا ياباشا ، اسال انكل طه تعرفه منين ياانكل ؟؟؟ وسرعان ماافهم مالذي كان يحدث من خلف ظهري واعود البيت غاضبه اغلق باب حجرتي واخاصم امي واخاصم بابا اللي اساسا لا يكلمني !!!
وافهم كل القصه ، هذا المحل ملك انكل طه ، وعندما عرف بخناقتي مع بابا قرر ان يساعد بابا في حل مشكلتي ،واتفقوا اني اروح اشتغل واتبهدل علشان اتربي واتعلم ان الله حق ، وعلي طول المحل عمل اعلان عايزين بياعات وانا روحت قابلت صاحب المحل اللي هو مدير المحل اللي بيتشغل عند انكل طه وخدت الوظيفه وتعالي ياانسه وارجعي ياانسه واتاريني بشتغل في محل انكل طه وبابا مطمن علي لان الابله اخت المدير ليس لها عمل الا رعايتي واخد بالها مني وبابا بيعرف اخباري في المحل قبل مااروح و.......... وناداني بابا واحتضني وانا ابكي متغاظه لانه ضحك علي وهو يضحك لاني اتبهدلت وانا سيبتك تجربي وتعاني وتتبهدلي وتكسبي مش ده اللي كنت عايزاه ....
و... اقاطعه متغاظه بس انا اتعلمت حاجات كتيره ، يضحك بابا طيب تعرفي بقي تعملي لينا جاتوه زي اللي شفتيه بيتعمل قدامك !!! وخرجت من الاوضه حرنانه غضبانه من بابا وماما وانكل طه وقبل اصل اوضتي ناداني بابا وقالي لي وهو يضحك ساخرا فين المرتب والبقشيش دي كلها فلوسي !!!!!!
وينفجر ضاحكا ويخذني في حضنه !!!!
وانتهت رحله التحدي !!!
لكني تعلمت ، تعلمت صناعه الجاتوه وتعلمت معامله الناس وتعملت ان البيع فن وان الزبون علي حق وان الرزق ده من عند ربنا !! وتعملت ان الاستقلال الاقتصادي شيء اساسي للحريه والتمرد ..... وعرفت اني باحب بابا جداجدا !!!!!
وصحيح اللي بني مصر كان في الاصل حلواني .......
اهدي هذا النوت لروح انكل طه ولبنات الشوكولاته والشيفات والاسطوات وجميع زملائي ممن عشت معاهم جزء من ايامي الصعبه !!!
" نصحني احد الاصدقاء الا انشر هذه النوت باعتبار انه لا يليق بالاستاذه الكبيره ان تكون قد باعت جاتو !!! لكني اختلفت معه في الراي لاني احب هذه التجربه وافتخر بها ولانها علمتني اشياء كثيره واضافت لي .. وماالانسان الا مجموعه تجارب يعيشها تجعل لحياته قيمه!!"
ليست هناك تعليقات:
إرسال تعليق