انا مبسوطه يامصر ...انا مبسوطه يارب ، مبسوطه قوي !!!!!!
مبسوطه قوي ....... الحكايه مش حكايه ماتش ..
ولا حكايه اننا غلبنا وانتقمنا وثأرنا لهزيمه حقيره وماتش مهم قوي كان يوصلنا لكاس العالم و اتنشل منا بالبلطجيه والسفاحين والسكاكين في ام درمان ، ويالا حنسيب السودان في حالها لان لما بنفتكر الماتش ، بنزعل من السودان ، لكن مش عايزين نزعل النهارده !!! والمسامح كريم ياسودان !!! ماعلينا !!! خلينا في الفرحه والزيطه والزنبليطه في الصالون !!!!!!
لا الحكايه ان ......... لا مش عارفه الحكايه ايه .. الحكايه ان مافيش حكايه ، ماتش كوره جميل فريقنا البطل سحق خصمه البلطجي اللي نازل يضرب ويشلت وبقله ادب وبقله ضمير وعايز يكسر العيال ، لكن مين ، رجاله وطول عمر ولادك يابلدنا رجاله ، واحفظهم يارب !!
الحكايه ان المصريين امبارح عن قلب واحد 80 مليون قالوا يارب فرحنا وربنا استجاب لدعانا ..
ومحدش بقي يتسحب من لسانه ويقول هو احنا كسبنا بالدعاء ، انا ماقلتش كده ، احنا ماكسبناش بالدعا ، احنا كسبنا لان عندنا فريق قوي وجهاز فني محنك ، لكن ربنا وفقنا ، استجاب لدعانا ووفقنا ...
ربنا قالك افرحوا يامصريين وادينا فرحنا ...
منتخب الفراعنه سحق الجزاير يامنززززززززز !!!
منتخب الساجدين سحق الجزاير يامنزززززززززززز !!!
منتخب مصر سحق الجزاير وصلي صلي علي النبي صلي !!!
كلام رزين النهارده مافيش !!! اصل الكلام طار ، بس فيه صور الاجوان وهي بتكسر الشباك واحنا بنصوت باعلي صوت من قلبنا من جوه مصر مصر مصر !!! الكلام طار ، بس فيه صوره حسن شحاته واللعيبه الابطال وعلم مصر فوق في العالي بيرفرف !!!
والله حي والتاني جاي ، ويجي الجون التاني وبحبك يازيزو ، الله حي والثالت جاي ، ويجي الجون التالت وبحبك ياعبد الشافي ياللي بجونك شفيت غليلنا وهديت قلبنا ، والله حي والرابع جاي ، ويجي الجون الرابع وبنحبك ياجدو ياجدو ياجدو !!! واقروا الفاتحه لابو العباس يااسكندريه يااجدع ناس ، واتعشينا وحلينا وبالهنا والشفا علي قلوب المصرييين !!!
انا مبسوطه يامصر ، مبسوطه يارب ، مبسوطه ياشعب ، مبسوطه يافريقنا القومي ياجميل !!!!
وحسن شحاته يامعلم خلي الشبكه تتكلم وتتأدب وتتهذب ، وفتح عينك تاكل ملبن فينك فينك تاكل ملبن ، واحنا كلنا ملبن ومهلبيه وبغاشه وام علي وابو علي وكله ، وبالهنا والشفا الفرحه علي قلوب المصرييين !!!!
ومبروك عليهم وعلينا ، مبروك عليهم اللي يستحقوه ، وليس بالضرب تتكسب الماتشات ، وقله الضمير اخرتها سودا ، الماتشات بتتكسب بالحرفنه والتدريب والموهبه والاصرار واللي يصبر ينووووووول !!! ومبروك علينا فرحه قويه ونصره ،وياليله بيضا يانهار سلطاني وفريقنا القومي فرحني من تاني !!!!
والنبي محدش يدينا النهارده حصه في اي موضوع غير الماتش ده - محدش يقولي الغلا والمشاكل وتوريث الحكم والازمات والبلا الازرق - منهج الغم كله النهارده مشطوب والكتاب مافيهوش غير درس واحد ، درس الكوره والفريق القومي والفرحه !! والنبي والنبي محدش يقولي المشاكل والبلاوي والحكايه والروايه ، خلونا كده مبسوطين ، ولا بتستكتروا علينا الفرحه !!! واللي حيموت يعني علشان يتكلم ويشتم فينا وفي تفاهتنا وفرحتنا بالكوره ولابس دور ناظر المدرسه وماسك العصايه علشان يفهمنا ، ربنا يخليه يعنيي بعيد شويه كده علشان الخنقه ، بعيد شويه كده لان الواحد مبسوط واللي يسرق منه الفرحه النهارده يبقي جني علي نفسه بقي ، واوعد سعاده الناظر بكره لا مش بكره ، يمكن بعد اسبوع ، حنرجع تاني نذاكر دروس وحصص الغم ونراجع علي المشاكل والازمات ونعيط ونحزن ونكتئب !!! بس بلاش النهارده وبلاش الاسبوع ده ، خليكم حلوين بقي!!!!
نرجع بقي للماتش والفرحه والاعلام المرفوعه والرايات المنصوبه ، ويارب تفرح المصريين كمان وكمان!!!!
يانهار ملون ، امبارح في الشوارع المزمار البلدي والطبل والمصريين بنات قمرات زي الشربات حلوين مش عارف ليه قولوا هيه هيه هيه هيه ، ورجاله حلوين ورجاله وطول عمر ولادك يابلدنا رجاله ، كله بيرقص في الشارع ، والاعلام بترفرف فوق العربيات والاتوبيسات والتوكتوك والللواري ، والناس حاطه الاعلام فوق البلكونات وفي ايديهم وكله بيزغرط ويصوت ويهلل ويهتف ، كلاسات العربيات اتحرقت ، في داهيه في ستين داهيه ، صوتنا اتنبح وماله ، اذا ماكانش يتنبح واحنا بنصرخ ونقول مصر يتنبح امتي !!! ومصر مصر مصر ياحلوه في ثوت النصر ، ولعيبه الجزاير عماله تتطرد واحد ورا واحد ، اخرج بره بره بره بره ، مع السلامه مع السلامه مع السلامه ياابو عمه مايله !!!! هههههههههههههههه مش بقولكم مبسوطه مبسوطه مبسوطه !!!!
لا ده انا بحب البلد دي قوي وباحب ناس وشعبها الجميل واحب اللي يبسطهم ، والفريق القومي امبارح بسطنا وفرحنا ، يبقي انا بحب الفريق القومي ، واللي يبسطنا احبه واللي يزعلنا اكره امه وعين امه!!!
وايه الحلاوه دي ايه الطعامه دي ، مال المصريين احلوا كده ، الناس في الشارع شكلها جميل ، لاتقولي تحرش جنسي ولا تقولي سرقه ونشل ، كله بالادب والفرحه ، كله بيرقص ويطبل ويصقف ويهتف مصر مصر مصر ، بالذمه حد ينفع يتحرش بحد واحنا بنهتف باسم البلد ، واحنا رافعين اعلامها ......... وباحب الابيض والاحمر والاسود وباحب علم مصر واسم مصر وناس مصر وشعب مصر !!!!
وبجد بجد ، طول عمري اكره الاخضر ، ليه معرفش !!! وباحب الاحمر النار علي اللي يعادينا ومابحبش الاخضر اللي اصفر امبارح زي ورق الشجر ايام الخريف يصفر وبعدين يبقي بني ويتكرمش ويقع ، وحاسب ياحبيبي علي اللي وقع منك ومبروك علينا اوي اوي!!!
والنبي محدش النهارده يقولي ولو كنتم اتغلبتم كنتم قلت ايه ، كنا حنقول ايه ، كنا حنقول الصبر من عندك يارب علي قله الحظ وقله البخت وقله التوفيق ، كنت انا شخصيا حاقول اه ياني ياامه وحاعيط لما قلبي يتفتفت ، لكن ربنا ماارادش اعيط ولاحد من المصريين يعيط ، ربنا اراد يفرحنا من الباب الوااااااااااااااااااااااسع ، اربعه اجوان مع الرأفه ، والا البهدله والتقسيم وهات وخد وعلي مهلك ياجميل ، هات الكوره خد الكوره وهو بيجروا في الملعب ، الجزاير تاه ياااولاد الحلال ، ههههههههههههههه وصلي صلي علي النبي صلي!!!!
واحنا حبايبك يارب ، حبايبك وكنا عشمانين ، الفريق متدرب ومستعد وحلو وفله ، لكن التوفيق من عندك يارب واحنا كنا عشمانين ، وياسلام لما ربنا مايكسرش عشمنا ويفرحنا ويفرح قلبنا!!!
انا مبسوطه يامصر مبسوطه
سكرانه بالفرحه ، عامله دماغ رهيبه !!!
وعايزه ارقص عايزه اغني عايزه ابوسك مش عارفه ليه ........ يالطيف يالطيف يالطيف!!!!
ويارب تديم فرحتك علي المصريين ..
يارب تسعدنا
يارب تكرمنا في الكوره وغير الكوره .......... واحنا حبايبك يارب !!!!!!!1
هناك تعليق واحد:
أنطلقى أستاذة أميرة غنى وأفرحى وأرقصى واعلنى عن فرحتك بالطريقة التى تريدها ..من حقنا أن نفرح من حقنا أن نعلن عن فرحتنا بالطريقة التى نريدها وباالأسلوب الذي نريده وليذهب هؤلاء الحمقى الى الجحيم وليذهب كل الحاقدين والشامتين والمشككين فى المواطن المصرى الى الجحيم .ليست شعارات والله بل حقيقة المواطن المصرى من أطيب شعوب العالم .ومن أنقى شعوب العالم .سوف يخرج علينا الكثير ويطالبنا بالصمت لماذا تطالبونا نحن دائما ؟ أنطلقى أستاذة أميرة أفرحى وغنى زى ما انتى عايزة زى ملايين المصريين ...وشكرا بجد لحسن شحاتة لأنه راسم البسمة على وجوه المصريين ومانح السعادة للمصريين ومفترض نعمل للحسن شحاتة تمثال يوضع فى ميدان التحرير ..أنطلقى استاذة فأنتى مصرية بجد وليذهب هؤلاء الحمقى الى الجحيم لقد أعطيناهم درسا فاسيا فى فنون كرة القدم وفى الأخلاق والأدب فلم يمروا على مصر ولم يشربوا من نيل مصر ومن عظمة مصر وتحياتى لك استاذة ومزيد من الأبداع والتميز
إرسال تعليق